1. Ñanyi wafwainwa kwitubula bya kupopwela Lesa?

BA MU BUPOPWESHI bwavula bamba’mba bafunjisha bya kine pe Lesa. Kechi kyakonsha kwikala bino ne, mambo bupopweshi bufunjisha bintu byapusana pusana pe Lesa ne pa bya kumupopwela. Pano twakonsha kuyuka byepi byo twafwainwa kupopwelanga Lesa? Yehoba ye yenkatu wakonsha kwitubula byo twafwainwa kumupopwela.

2. Mwakonsha kuyuka byepi byo mwafwainwa kupopwela Lesa?

² Yehoba witupa Baibolo pa kuba’mba tuyuke byo twafwainwa kumupopwelanga. Onkao mambo, fundainga Baibolo kabiji Yehoba ukemukwasha kumvwisha byavula pe aye mambo wimuta muchima.—Isaya 48:17.

3. Lesa ukeba’mba tubenga ka?

³ Bantu bamo bafunjisha’mba bupopweshi bonse bwaitabilwa kwi Lesa. Bino Yesu kechi byobyo afunjishe ne. Waambile’mba: “Kechi bonse bañambila’mba, ‘Nkambo, Nkambo,’ bakatwela mu Bufumu bwa mwiulu ne, kana yenka uba kyaswa muchima wa Tata.” Onkao mambo twafwainwa kuyuka kyaswa muchima wa Lesa ne kwikyubanga. Kuba bino kwanema bingi mambo Yesu waambile’mba bantu babula kukokela Lesa bajitu pamo na bambanzhi, ‘boba byatama.’—Mateo 7:21-23.

4. Yesu waambile’mba ka pa boba kyaswa muchima wa Lesa?

⁴ Yesu waambile’mba boba kyaswa muchima wa Lesa bakapitanga mu makatazho. Waambile’mba: “Twelai pa kibelo kyakepa, mambo kibelo kyabaya ne jishinda jabaya bitwala ku lonaiko, kabiji bayamo bo bavula; pakuba  kibelo kyakepa ne jishinda jakatazha kwendamo, jitwala ku bumi kabiji bejitaana bachechetu.” (Mateo 7:13, 14) Jishinda jakatazha kwendamo, nangwa’mba kupopwela Lesa mu jishinda jawama kukalengela bantu kwikala na bumi bwa myaka ne myaka. Pa kuba jishinda jabaya nangwa’mba kupopwela Lesa mu jishinda jabula kufwainwa kutwala ku lufu. Bino Yehoba kechi ukeba muntu nangwa umo amba akafwe ne. Lesa ubena kukeba bonse kuba’mba bafunde pe aye.—2 Petelo 3:9.

5. Mwakonsha kuyuka byepi bapopwela Lesa kya kine?

⁵ Yesu waambile’mba aba bapopwela Lesa mu jishinda jafwainwa tukebayuka. Twibayukila ku byo boba ne ku byo baitabilamo. Yesu waambile’mba: “Mukebayukila ku bipangwa byabo.” Kabiji waambile ne kuba’mba: “Kichi kyawama kipanga bipangwa byawama.” (Mateo 7:16, 17) Aba bapopwela Lesa nabo bambulwakulumbuluka. Pano bino, bantu ba Lesa bebikako kuba byawama. Pano twayai twisambe pa bintu byakonsha kwitukwasha kuyuka bapopwela Lesa kya kine.

6, 7. Mambo ka byonse byuba bapopweshi bakine o bifumina mu Baibolo? Tufunjilako ka ku byafunjishanga Yesu?

⁶ Bupopweshi bwetu bwaimena pa Baibolo. Baibolo waamba’mba: “Binembelo byonse byanembelwe na lutangijilo lwa mupashi wa Lesa kabiji bikwasha bantu pa kwibafunjisha, pa kwibakajipila, pa kwibololako ne pa kwibajimuna mu bololoke, pa kuba’mba muntu wa Lesa ekale wafikilamo, winengezha bulongo kwingila mingilo yonse yawama.” (2 Timoti 3:16, 17) Mutumwa Paulo wanembejile bena Kilishitu amba: “Byo mwatambwile mambo a Lesa, o mwaumvwine kwi atweba, kechi mwiatambwile nobe byambo bya bantu ne, poso byonka byo aji kine mambo a Lesa.” (1 Tesalonika 2:13) Byonse byuba bapopweshi ba kine bifuma mu Mambo a Lesa aji mu Baibolo.  Bupopweshi bwa kine kechi bwaimena pa milanguluko ya bantu ne pa bisho nangwa pa bintu bikwabotu ne.

⁷ Byonse byafunjishanga Yesu Kilishitu byafumanga mu Mambo a Lesa. (Tangai Yoano 17:17.) Javula wakumbulanga na Binembelo. (Mateo 4:4, 7, 10) Bapopweshi ba Lesa bakine byonse byo bafunjisha bantu bifuma mu Baibolo byonka byaubanga Yesu.

8. Yesu witufunjishe byepi byo twafwainwa kupopwelanga Yehoba?

⁸ Twafwainwa kupopwelangatu Yehoba. Salamo 83:18 waamba’mba: “Anweba, yenka wa jizhina ja Yehoba, yenu bunketu Mwine Wakila pano pa ntanda ponse.” Yesu wakebeshanga bingi bantu kuyuka Lesa wa kine byo aji kabiji wabulanga bantu jizhina ja Lesa. (Tangai Yoano 17:6.) Yesu waambile’mba: “Wafwainwa kupopwelatu Yehoba Lesa wobe ne kumwingijila aye yenka kwapwa.” (Mateo 4:10) Bapopweshi ba Lesa tulondela byaubanga Yesu. Tupopwelatu Yehoba yenka kwapwa, twingijisha jizhina janji kabiji tubula bantu jizhina ja Lesa ne byo aketubila.

9, 10. Tumwesha byepi byo twitemwa atweba bene na bene?

⁹ Twafwainwa kutemwa bantu kya kine. Yesu wafunjishe baana banji ba bwanga kwitemwa abo bene na bene. (Tangai Yoano 13:35.) Kechi tuta muchima kwafuma muntu, pa bisho, pa bunonshi nangwa pa buyanji ne. Butemwe bwitulengela kukwatankana mu bwanabwankazhi bwa balongo ne banyenga. (Kolose 3:14) Kechi tulwa nkondo ne kwipaya bantu ne. Baibolo waamba’mba: “Baana ba Lesa ne baana ba Diabola bayukanyikilwa mu kino: Yense ubula kuba byaoloka kechi ye wa kwa Lesa ne, kyo kimotu ne yewa wabula kutemwa mulongo wanji.” Kabiji Baibolo wanungapo’mba: “Twafwainwa kwitemwa atwe bene na bene; kechi kwikala byajinga Kaina wajinga wa kwa yewa mubi, yenka waipayile nkasanji ne.”—1 Yoano 3:10-12; 4:20, 21.

 ¹⁰ Twingijisha kimye, bulume bwetu ne bintu byetu kukwasha bakwetu ne kwibatundaika. (Bahebelu 10:24, 25) Kabiji tubila bantu “bonse byawama.”—Ngalatiya 6:10.

11. Mambo ka o twafwainwa kukokelanga Yesu?

¹¹ Twafwainwa kukokelanga Yesu mambo jo jishinda ja kuyilamo kwi Lesa. Baibolo waamba’mba: “Lupulukilo kechi lukeshilapo mu muntu mukwabo ne, mambo kafwako jizhina jikwabo pano pa ntanda Lesa jo asala mu bantu ja kwitupulushishamo ne.” (Byubilo 4:12) Mu Kitango 5, twafunjile’mba Yehoba watumine Yesu kwiya na kupana bumi bwanji ne kukuula bantu balukokelo. (Mateo 20:28) Yehoba wasala Yesu kwikala Mfumu wa bufumu bukalama ntanda yonse. O ene mambo Baibolo o aambila’mba twafwainwa kukokela Yesu pa kuba’mba tukekale na bumi bwa myaka ne myaka.—Tangai Yoano 3:36.

12. Mambo ka o tubujila kwivwanga mu bya bumulwila ntanda?

¹² Kechi twivwanga mu bya bumulwila ntanda ne. Mambo Yesu kechi wivwanganga mu bya bumulwila ntanda ne. Byo bamutotolweshenga, wakumbwile Pilato, mfumu wa bena Loma amba: “Bufumu bwami kechi bwa pano pa ntanda ne.” (Tangai Yoano 18:36.) Byonka byajinga Yesu, ne atweba twibakishinka ku Bufumu bwa Lesa. Konse ko twikala mwaya ntanda kechi twivwanga mu bya bumulwila ntanda ne. Bino tukokela “balama kyalo,” ko kuba’mba kafulumende byonka bitukambizha Baibolo. (Loma 13:1) Tukokela mizhilo ya mu kyalo mo twikala. Bino inge mizhilo yabo yalala mizhilo ya Lesa, tuba byaubile batumwa baambile’mba: “Lesa ye kalama ye twafwainwa kukookela kechi bantu ne.”—Byubilo 5:29; Mako 12:17.

13. Tusapwila’mba ka pa Bufumu bwa Lesa?

¹³ Twaitabila kuba’mba Bufumu bwa Lesa bo bonkatu bukapwisha makatazho pano pa ntanda. Yesu  waambijile jimo amba: “Ano mambo awama a Bufumu” akasapwilwa pano pa ntanda ponse. (Tangai Mateo 24:14.) Kafwako kafulumende wakonsha kubila bantu biketubila Bufumu bwa Lesa ne. (Salamo 146:3) Yesu witufunjishe kulomba pa Bufumu bwa Lesa amba: “Bufumu bwenu bwiye. Kyaswa muchima wenu kyubiwe pano pa ntanda, byonka byo kibena kubiwa mwiulu.” (Mateo 6:10) Baibolo waamba’mba Bufumu bwa Lesa bukonauna makafulumende a bantu onse kabiji abo “bukekala myaka ne myaka.”—Danyela 2:44.

14. Bañanyi bo mwamona’mba bo bonkatu bapopwela Lesa kya kine?

¹⁴ Byo twisamba pa bino bishinka, mwafwainwa kwiipuzha anweba bene amba: ‘Bañanyi bafunjisha byaamba Baibolo? Bañanyi babuula bantu jizhina ja Lesa? Bañanyi betemwa bene na bene kabiji baitabila kuba’mba Yesu bamutumine kwi Lesa kwiya na kwitukuula? Bañanyi babula kwivwanga mu bya bumulwila ntanda? Bañanyi basapwila kuba’mba Bufumu bwa Lesa bo bonkatu bukapwisha makatazho pano pa ntanda?’ Bakamonyi ba kwa Yehoba bo bonkatu boba bino bintu.—Isaya 43:10-12.

15. Twafwainwa kuba byepi pa kuba’mba tupopwelenga Lesa mu jishinda jafwainwa?

¹⁵ Kechi mwafwainwa kwitabilatu kuba’mba Lesa ko aji ne. Mambo ne bandemona nabo baitabila kuba’mba Lesa ko aji, pano bino kechi bamukokela ne. (Yakoba 2:19) Umvwe tukeba Lesa kwitutalanga bulongo pa kumupopwela, twafwainwa kumukokelanga ne kwitabila kuba’mba kine ko aji.

16. Mambo ka o twafwainwa kufumina mu bupopweshi bwa bubela?

¹⁶ Mwafwainwa kufuma mu bupopweshi bwa bubela  pa kuba’mba mupopwelenga Lesa mu jishinda jafwainwa. Ngauzhi Isaya wanembele’mba: “Lupukaimo mwi aye, itokeshai.” (Isaya 52:11; 2 Kolinda 6:17) Kechi twafwainwa kubanga bintu byakunza bupopweshi bwa bubela ne.

17, 18. “Babilona Mukatampe” ye mu ka, kabiji mambo ka o mwafwainwa kufuminamo bukiji?

¹⁷ Bupopweshi bwa bubela bo bu ka? Ke bupopweshi bonse bubula kufunjisha bantu kupopwela Lesa byonka byaamba Mambo anji. Baibolo utela bupopweshi bwa bubela bonse amba “Babilona Mukatampe.” (Lumwekesho 17:5) Mambo ka o ibutelela bino? Mambo mafunjisho a bubela atendekejile mu muzhi wa Babilona wajingako Muyulo wa Nowa byo apwile. Ano mafunjisho a bubela akumbene ntanda yonse. Bantu baikalanga mu Babilona bapopwelanga misango ya balesa isatu. Ne mu ano moba bupopweshi bwavula bufunjisha’mba kuji balesa basatu. Bino Baibolo saka aambatu patoka kuba’mba kujitu Lesa umo wa kine aye Yehoba kabiji Yesu Mwananji. (Yoano 17:3) Bantu baikalanga mu muzhi wa Babilona baitabijile ne kuba’mba kintu kimo mu muntu kitwajijila kwikala kyumi muntu inge wafwa, kabiji kino kintu kyo kimanama mu mujilo wa helo. Buno ke bubela bwine bufita.—Monai Byambo byo Balumbulula, 14, 17, ne 18.

¹⁸ Lesa waamba’mba katatakatu akazhiishe bupopweshi bwa bubela bonse. (Lumwekesho 18:8) Nanchi mwamona ene mambo o mwafwainwa kufuminamo bukiji mu bupopweshi bwa bubela nyi? Yehoba Lesa ubena kukeba’mba mufumemo mema saka akiji mu tupokoso.—Lumwekesho 18:4.

19. Yehoba ukemulamanga byepi inge mwafuukulapo kumwingijila?

¹⁹ Inge mwafuukulapo kufuma mu bupopweshi bwa bubela ne kutendeka kwingijila Yehoba, balunda nenu ne  balongo benu bakonsha kumona nobe mwatamisha kabiji bakonsha ne kwimumanyika. Bino Yehoba kechi ukemulekelela ne. Mukekala mu kisemi kya ntanda yonse kya bantu betemwa kya kine abo bene na bene, kabiji mukekala na luketekelo lwa kwikala myaka ne myaka mu ntanda ipya ya Lesa. (Mako 10:28-30) Mu kuya kwa moba balongo ne balunda nenu bamo bemukainyenga kwingijila Yehoba bakonsha kutendeka kufunda Baibolo.

20. Mambo ka kupopwela Lesa mu jishinda jafwainwa o kwanemena?

²⁰ Katatakatu Lesa akafumyepo bintu byatama, kabiji Bufumu bwanji bo bukalamanga pano pa ntanda ponse. (2 Petelo 3:9, 13) Kino kikekala kimye kyawama bingi. Bantu bonse bakapopwelanga Yehoba byonka byo akeba. Kino kyo kimye kyo mwafwainwa kutendeka kupopwela Lesa mu jishinda jafwainwa.