1. Nani lenda zabisa beto mutindu ya mbote ya kusambila Nzambi?

MABUNDU mingi ketubaka ti bakelongaka kedika na yina metadila Nzambi. Kasi yakele mutindu yina ve, samu mabundu yango kelongaka malongi ya kusuasana samu na diambu metadila Nzambi mpe mutindu ya kusambila yandi. Yinki mutindu beto lenda zaba mutindu ya mbote ya kusambila Nzambi? Kaka Yehova nde muntu yina lenda zabisa beto mutindu yina beto fueti sambila yandi.

2. Yinki mutindu nge lenda zaba mutindu ya mbote ya kusambila Nzambi?

² Yehova mepesaka beto Biblia samu beto zaba mutindu ya mbote ya kusambila yandi. Yau yina, longuka Biblia mpe Yehova kesadisa nge, nge baka mambote na malongi na yandi samu yandi ketudilaka nge dikebi.—Yezaya 48:17.

3. Yinki Nzambi zola beto sala?

³ Bantu yankaka ketubaka ti Nzambi kendimaka mabundu nionso, kasi Yesu longaka mutindu yina ve. Yandi tubaka: “Bantu nionso ve yina ketubilaka munu ti, ‘Mfumu, Mfumu,’ kekota na Kimfumu ya mazulu, kasi muntu yina kesalaka luzolo ya Tata na munu.” Yau yina, beto fueti zaba luzolo ya Nzambi mpe kusala yau. Yakele diambu ya kubaka na bansaka ve samu Yesu tubaka ti bantu yina kezitisaka Nzambi ve bakele lokola bantu yina kesalaka yimbi, ’bantu yina kezitisaka ve bansiku.’—Matayo 7:21-23.

4. Yinki Yesu tubaka na diambu metadila kusala luzolo ya Nzambi?

⁴ Yesu luengisaka beto ti kana beto zola kusala luzolo ya Nzambi, beto kekutana na mambu ya mpasi. Yandi tubaka:  ‘Beno kota na porte ya fioti, samu porte ya nene mpe nzila ya nene kenataka na lufua, mpe bantu mingi kekotaka kuna; kasi porte ya fioti mpe nzila yina kele dikaka kenataka na luzingu, mpe bantu fioti kemonaka yau.’ (Matayo 7:13, 14) Nzila ya dikaka, to mutindu ya mbote ya kusambila Nzambi, kenataka na luzingu ya mvula na mvula. Nzila ya kuyalumuka, to mutindu ya yimbi ya kusambila Nzambi, kenataka na lufua. Kasi Yehova zola ti muntu ata mosi ve kufua. Yandi mepesa muntu nionso diluaku ya kulonguka mambu na yandi.—2 Piere 3:9.

5. Yinki mutindu nge lenda zaba bantu yina kesambilaka Nzambi na mutindu ya mbote?

⁵ Yesu tubaka ti beto lenda zaba bantu yina kesambilaka Nzambi na mutindu ya mbote. Beto kezaba bau kana beto metadila malongi na bau mpe mavanga na bau. Yandi tubaka: ‘Beno kezaba bau na mbuma na bau.’ Mpe yandi tubaka diaka: ‘Konso yinti ya mbote kebutaka mbuma ya mbote.’ (Matayo 7:16, 17) Yau zola tuba ve ti bayina kesambilaka Nzambi kele bantu ya kulunga. Kasi, bisadi ya Nzambi kesalaka ntangu nionso ngolo samu basala mambu ya mbote. Beto tadila ntangu yayi mambu yina lenda sadisa beto, beto zaba bantu yina kesambilaka Nzambi na mutindu ya mbote.

6, 7. Samu na yinki dibundu ya kedika kelongaka mambu yina mekatuka kaka na Biblia? Kifuani ya Yesu melonga beto yinki?

⁶ Malongi na bau fueti katuka na Biblia. Biblia metuba: ‘Masonukua nionso kele ya kupemama na Nzambi mpe yakele mfunu samu na kulonga, samu na kusemba, samu na kusungika mambu, samu na kupesa disiplini na lunungu, samu muntu ya Nzambi vuanda ya kukoka mpenza, mpe ya kufuana mpenza samu na konso kisalu ya mbote.’ (2 Timoteo 3:16, 17) Ntumua Paulo sonikinaka Baklisto ti: ‘Ntangu beno ndimaka mpova ya Nzambi,  yina beno kuwaka na beto, beno ndimaka yau ve lokola mpova ya bantu, kasi mutindu yakele mpenza, lokola mpova ya Nzambi.’ (1 Batesalonika 2:13) Malongi ya dibundu ya kedika kekatukaka kaka na Biblia, Mpova ya Nzambi. Yau kekatukaka ve na bangindu ya bantu, na kinkulu ya bantu ve to na kima yankaka.

⁷ Mambu nionso yina Yesu longaka yakatukaka na Mpova ya Nzambi. (Tanga Yoane 17:17.) Mbala mingi yandi vuandaka vutukila bampova ya Masonukua. (Matayo 4:4, 7, 10) Bisadi ya kedika ya Nzambi kelandaka kifuani ya Yesu mpe bakelongaka mambu yina mekatuka kaka na Biblia.

8. Yinki Yesu longaka beto na yina metadila kusambila Yehova?

⁸ Bakesambilaka kaka Yehova. Nkunga 83:18 metuba: ‘Nge, yina nkumbu na nge Yehova, nge kaka kele Muntu yina Meluta Zulu na ntoto ya mvimba’ Yesu zolaka ti bantu bazaba mbote mbote nani kele Nzambi ya kedika, mpe yandi longaka bantu nkumbu ya Nzambi. (Tanga Yoane 17:6.) Yesu tubaka: ‘Nge fueti sambila Yehova Nzambi na nge, mpe yandi kaka nge fueti sadila kisalu ya nlongo.’ (Matayo 4:10) Yau yina, lokola beto kele bisadi ya Nzambi, beto kena kulanda kifuani ya Yesu. Beto kena kusambila kaka Yehova, beto kebokidilaka yandi na nkumbu na yandi, mpe beto kelongaka bantu nkumbu yango mpe mambu yina yandi kesadila beto.

9, 10. Yinki mutindu beto kemonisaka ti beto kezolanaka?

⁹ Bakemonisaka nzola ya kedika. Yesu longaka banlonguki na yandi ti bafueti zolana. (Tanga Yoane 13:35.) Nzola yango keponaka buala ve, bifu ve, to kana beto kele bamvuama to bamputu. Nzola yina beto kele na yau kati na beto kesangisaka beto, yau mekumisa beto bampangi mpenza. (Bakolosai 3:14) Yau yina, beto kekotaka na bamvita ve, mpe beto kekufuaka bantu ve. Biblia metuba: ‘Bana ya Nzambi mpe bana ya Diabulu kemonanaka na diambu yayi: Konso muntu yina kesalaka ve mambu ya lunungu  mpe muntu yina kezolaka ve mpangi na yandi mekatuka ve na Nzambi.’ Mpe yau metuba diaka: ‘Beto fueti zolana; kasi ve lokola Kaina, yina katukaka na muntu ya yimbi mpe kufuaka mpangi na yandi.’—1 Yoane 3:10-12; 4:20, 21.

¹⁰ Beto kesadilaka ntangu, ngolo, mpe bima na beto samu na kusalasana mpe kukindasana. (Baebreo 10:24, 25) ‘Beto salaka mambu ya mbote na bantu nionso.’—Bagalatia 6:10.

11. Samu na yinki bansambidi ya kedika kendimaka ti Yesu kele nzila kaka mosi yina bantu lenda vukila?

¹¹ Bakezitisaka Yesu samu bamezaba ti kaka na nzila na yandi nde balenda vukila. Biblia metuba: ‘Luvuluzu kele ve na muntu yankaka, samu yakele ve na nkumbu yankaka na ntoto yina bamepesaka na kati ya bantu, yina beto fueti vuluzua na nzila na yau.’ (Bisalu 4:12) Na Kikapu ya 5 ya mukanda yayi, beto longukaka ti Yehova tindaka Yesu samu na kupesa luzingu na yandi lokola nkudulu samu na bantu ya luzitu. (Matayo 20:28) Yehova meponaka Yesu yandi vuanda Mfumu ya ntoto. Yau yina, Biblia metubila beto ti kana beto zola baka luzingu ya mvula na mvula, beto fueti zitisa Yesu.—Tanga Yoane 3:36.

12. Samu na yinki beto kekotaka na mambu ya politiki ve?

¹² Bakekotaka na mambu ya politiki ve. Yesu kotaka ve na mambu ya politiki. Ntangu bavuandaka sambisa Yesu, yandi zabisaka Pilate, muntu ya Roma yina vuandaka mfumu ti: ‘Kimfumu na munu kele ve ya yinza yayi.’ (Tanga Yoane 18:36.) Lokola Yesu, beto kele ya kukuikama na Kimfumu ya Nzambi yina kele na dizulu, yau yina bisika nionso yina beto kezingilaka, beto kekotaka ve na mambu ya politiki. Kasi, Biblia melonga beto, beto zitisaka ‘bamfumu yina kele na ntuala,’ yazola monisa bamfumu ya Leta. (Baroma 13:1) Beto kezitisaka bansiku ya buala kisika beto kena kuzingila. Kasi, kana nsiku mosi kele na nguizani ve na nsiku ya Nzambi, beto kesalaka mutindu  bantumua ya Yesu tubaka: ‘Beto fueti zitisa Nzambi lokola mfumu na kisika ya kuzitisa bantu.’—Bisalu 5:29; Marko 12:17.

13. Yinki beto kelongaka samu na Kimfumu ya Nzambi?

¹³ Bakendimaka ti kaka Kimfumu ya Nzambi nde kemanisa bampasi ya yinza. Yesu tubaka ti “nsangu ya mbote ya Kimfumu” kesamunua na yinza ya mvimba. (Tanga Matayo 24:14.) Ata guvernema mosi ve awa na ntoto lenda sadila beto mambu yina Kimfumu ya Nzambi kesadila beto. (Nkunga 146:3) Yesu longaka beto, beto sambilaka samu na Kimfumu ya Nzambi ntangu yandi tubaka: ‘Kimfumu na nge kuiza. Luzolo na nge salama na ntoto, lokola na dizulu.’ (Matayo 6:10) Biblia mezabisa beto ti Kimfumu ya Nzambi kekufua baguvernema nionso ya bantu mpe ‘yau kaka kebikana mvimba-mvimba.’—Daniele 2:44.

14. Samu na nge, banani kesambilaka Nzambi na mutindu ya mbote?

¹⁴ Na kutadila mambu yayi beto mekatuka tubila, nge kukiyuvusa mutindu yayi: ‘Banani yina malongi na bau kekatukaka kaka na Biblia? Banani kelongaka bantu yankaka nkumbu ya Nzambi? Banani yina kele na nzola ya kedika mpe kendimaka ti Nzambi tindaka Yesu samu na kuvulusa beto? Banani yina kekotaka ve na mambu ya politiki? Banani kelongaka ti kaka Kimfumu ya Nzambi nde kemanisa bampasi na beto?’ Yakele kaka Bambangi ya Yehova.—Yezaya 43:10-12.

15. Yinki beto fueti sala kana beto zola ti Nzambi ndima nsambudulu ya beto?

¹⁵ Yafueti sukila kaka ve na kundima ti Nzambi kele. Kutu, ata bademo kendimaka ti Nzambi kele, kasi bakezitisaka yandi ve. (Yakobo 2:19) Kana beto zola ti Nzambi ndima nsambudulu ya beto, beto fueti suka kaka ve na  kundima ti yandi kele, beto fueti zitisa mpe bampova na yandi.

16. Samu na yinki beto fueti bika dibundu ya luvunu?

¹⁶ Samu Nzambi ndima nsambudulu ya beto, beto fueti bika dibundu ya luvunu. Mbikudi Yisaya sonikaka ti: ‘Beno bima na kati na yandi, beno vuanda ya kuvedila.’ (Yezaya 52:11; 2 Bakorinto 6:17) Yau yina, beto fueti manga kima nionso yina kele na nguizani na nsambudulu ya luvunu.

17, 18. “Babilone ya Nene” kele yinki, mpe samu na yinki nge fueti bika yau malu malu?

¹⁷ Dibundu ya luvunu kele yinki? Yakele dibundu nionso yina kelongaka bantu basambila Nzambi na mutindu yina mewizana ve na Mpova na yandi. Biblia mebokidila mabundu nionso ya luvunu “Babilone ya Nene.” (Kusonga 17:5) Samu na yinki? Na manima ya Nkuka ya maza na ntangu ya Noa, malongi mingi ya mabundu ya luvunu bandilaka na mbanza ya Babiloni. Malongi yango ya luvunu muanganaka na yinza ya mvimba. Na kifuani, bantu ya Babiloni vuandaka sambila butatu (trinite). Bubu yayi mpe, mabundu mingi kelongaka ti Nzambi kele butatu, kasi Biblia kelongaka puelele ti Nzambi ya kedika kele kaka mosi, Yehova, mpe Yesu kele Muana na yandi. (Yoane 17:3) Bantu ya Babiloni vuandaka ndima diaka ti kima mosi na nzutu ya muntu ketatamanaka kuzinga na manima ya lufua mpe kima yango lenda niokuama na bilungi. Yakele luvunu.—Tala Noti ya 14, 17, mpe ya 18.

¹⁸ Nzambi samunaka ti yamebikana ntangu fioti mabundu nionso ya luvunu kebungua. (Kusonga 18:8) Nge memona mfunu yina nge fueti katuka malu malu na dibundu ya luvunu? Yehova Nzambi zola ti nge sala yau kondua kuvingila, lokola ntangu kele ntete.—Kusonga 18:4.

19. Ntangu nge mebaka nzengolo ya kusadila Yehova, yinki mutindu yandi kesadisa nge?

¹⁹ Ntangu nge mebaka nzengolo ya kukatuka na dibundu  ya luvunu samu na kusadila Yehova, bankundi to bantu ya dibuta na nge yankaka kebakusa nzengolo na nge ve. Balenda kutu kubanda kuniokola nge. Kasi Yehova keloza nge ve. Nge kekota na dibuta mosi ya bantu mingi mpenza ya bampangi ya yinza ya mvimba, bayina kezolanaka mpenza, mpe nge kevuanda na kivuvu ya kuzinga mvula na mvula na yinza ya yimpa ya Nzambi. (Marko 10:28-30) Mbala yankaka, bankundi mpe bantu ya dibuta na nge yankaka yina kena kumanga nge sadila Yehova, bakebaka nzengolo ya kulonguka Biblia na manima.

20. Samu na yinki yakele mfunu kusambila Nzambi na mutindu ya mbote?

²⁰ Ntama mingi ve, Nzambi kekatula yimbi nionso mpe Kimfumu na yandi keyadila ntoto ya mvimba. (2 Piere 3:9, 13) Yakevuanda ntangu mosi ya mbote! Konso muntu kesambila Yehova na mutindu yina yandi kezolaka beto sambila yandi. Yakele mfunu nge baka nzengolo banda bubu yayi mpe kusambila Nzambi na mutindu ya mbote.