1. Nani olenda kutuvovesa e mpila yambote ya sambila Nzambi?

MABUNDU mayingi mevovanga vo ludi belonganga mu kuma kia Nzambi. Kansi ediadi ke dialudi ko, kadi mabundu mama mambu maswaswana belonganga mu kuma kia Nzambi ye una tufwete kunsambila. Aweyi tulenda zayila e mpila yambote ya sambila Nzambi? Yave kaka olenda kutuvovesa e mpila tulenda kunsambila.

2. Aweyi olenda zayila e mpila yambote ya sambila Nzambi?

² Yave watuvana Bibila kimana twazaya e mpila yambote ya kunsambila. Muna kuma kiaki, longokanga e Bibila, Yave okusadisa wabaka e nluta mitukanga muna malongi mandi kadi mfunu kekuvuanga.—Yesaya 48:17.

3. Adieyi Nzambi kazolele vo twavanga?

³ Wantu ankaka bevovanga vo Nzambi otondanga mabundu mawonso, kansi ediadi ke diau ko Yesu kalonga. Wavova vo: “Ke awonso ko bekumpovesa vo, ‘E Mfumu, e Mfumu,’ i bekota muna Kintinu kia zulu, kansi awana kaka bevanganga luzolo lwa Se diame.” Muna kuma kiaki, tufwete zaya alweyi i luzolo lwa Nzambi yo vanga lo. Ediadi diamfunu kikilu, kadi Yesu watezanesa awana ke belemvokelanga Nzambi ko ye yimpumbulu vava kabayikila vo, “akwa mavangu ma umpumbulu.”—Matai 7:21-23.

4. Adieyi Yesu kavova mu kuma kia vanga luzolo lwa Nzambi?

⁴ Yesu wavova vo avo tutambulwidi vanga luzolo lwa Nzambi, mpasi tumweswa. Wavova vo: “Nukotela muna mwelo ambatakani, kadi o mwelo ampwena ye nzila asanzuka ku lufwasu ifilanga, ndonga bena ana  bekotelanga mo; kuna diak’e sambu, o mwelo ambatakani ye nzila yamfinangani ku moyo ifilanga, akete kaka bena ana besololanga yo.” (Matai 7:13, 14) E nzila yamfinangani yovo mpila yambote ya sambila Nzambi, ifilanga ku moyo a mvu ya mvu. E nzila yasanzuka yovo mpila yambi ya sambila Nzambi, ifilanga ku lufwa. Kansi, Yave kazolele ko vo muntu kafwa. Ovananga e lau kwa konso muntu kanzaya.—2 Petelo 3:9.

5. Aweyi olenda zayila awana besambilanga Nzambi mu mpila yambote?

⁵ Yesu wavova vo tulenda zaya awana besambilanga Nzambi mu mpila yambote. Tulenda kubazaya muna fimpanga mana bekwikilanga ye mana bevanganga. Yesu wavova vo: “Muna mbongo au i nukubazayila. . . . Konso nti ambote, mbongo ambote uyimanga.” (Matai 7:16, 17) Ediadi ke disongele ko vo awana besadilanga Nzambi wantu alunga. Kansi, e selo ya Nzambi besianga ngolo za vanga mambu mambote. Owau tubadika mana mekutusadisa mu zaya awana besambilanga Nzambi mu mpila yambote.

6, 7. Ekuma malongi ma nsambila akieleka mafwete tukila muna Bibila? E mbandu a Yesu, adieyi ikutulonganga?

⁶ Malongi mau muna Bibila metukanga. Bibila kivovanga vo: “Sono yawonso yavumunuinua kwa Nzambi, yamfunu muna longa, muna tumba, muna singika mambu, muna ludika kuna unsongi, kimana muntu a Nzambi kakala watoma fwana yo toma kubamena muna mavangu mawonso mambote.” (2 Timoteo 3:16, 17) Paulu wa ntumwa wasonekena Akristu vo: “Vava nuatambula e diambu dia Nzambi, dina nuawá kwa yeto, ke nuatambula dio nze diambu dia wantu ko, kansi wauna dina  kieleka, diambu dia Nzambi kaka, dina disalanga mu yeno minkwikizi.” (1 Tesalonika 2:13) E malongi ma nsambila yakieleka mu Bibila kaka metukanga, kina vo i Diambu dia Nzambi. Ke metukanga mu ngindu za wantu ko ngatu mu tusansu twa wantu.

⁷ Mawonso Yesu kalonganga mu Diambu dia Nzambi matukanga. (Tanga Yoane 17:17.) Nkumbu miayingi wayikanga e sono. (Matai 4:4, 7, 10) Selo yakieleka ya Nzambi betangininanga mbandu a Yesu. Mawonso belonganga mu Bibila metukanga.

8. Adieyi Yesu katulonga mu kuma kia sambila Yave?

⁸ Yave kaka besambila. E sono kia Nkunga 83:18 kivovanga vo: “Ngeye una ye nkumbu Yave, nge kaka i Mpungu-nene omu nza yawonso.” Yesu wazola vo wantu bazaya kana nani kikilu i Nzambi aludi ye wabalonga e nkumbu a Nzambi. (Tanga Yoane 17:6.) Yesu wavova vo: “Yave wa Nzambi aku kaka ofwete sambila, yandi kaka ofwete sadila e salu kiavauka.” (Matai 4:10) Ozevo, Akristu akieleka mbandu a Yesu belandanga. Yave kaka besambilanga, besadilanga e nkumbu andi yo longa yo kwa akaka. Besamunanga mpe kwa akaka mana Nzambi kevanga mu kuma kieto.

9, 10. Aweyi Akristu akieleka besongelanga o zola kwa muntu yo nkwandi?

⁹ Besongaziananga o zola kwakieleka. Yesu walonga alongoki andi vo bazolananga. (Tanga Yoane 13:35.) O zola kwaku ke kusolanga nsi ko, fu ya kisi nsi yovo mvuama ngatu nsukami. O zola muna muntu yo nkwandi kufwete yikakesa Akristu akieleka se ampangi. (Kolosai 3:14) Muna kuma kiaki, ke bekwendanga mu vita ko yo vonda wantu. Bibila kivovanga vo: “O wan’a Nzambi yo wan’a Nkadi ampemba bazayakene mu diambu edi: Konso ndiona olembi kuyivananga muna mambu  mansongi ke wa Nzambi ko, ngatu ndiona olembi zolanga mpangi andi.” Ukudikilanga vo: “Tufwete zolananga; ke tukadi nze Kaini ko, ona watuka kwa ndiona wambi yo vonda mpangi andi.”—1 Yoane 3:10-12; 4:20, 21.

¹⁰ Besadilanga e ntangw’au, ngolo ye mavua mau muna sadisa yo kasakesa muntu yo nkwandi. (Ayibere 10:24, 25) Bevanganga “edi diambote kwa wantu awonso.”—Ngalatia 6:10.

11. Ekuma tukwikidilanga vo Nzambi watuma Yesu mu kutuvuluza?

¹¹ Belemvokelanga Yesu kadi Nzambi wantuma mu kutuvuluza. Bibila kivovanga vo: “Ke vena luvuluzu muna muntu akaka ko, ke vena mpe nkumbu yankaka ko oku nsi a ntangwa yavewa kwa wantu ina tufwete vuluzilwa.” (Mavangu 4:12) Muna kapu kia 5 kia nkanda wau, twalongoka vo Yave watuma Yesu kimana kavana o moyo andi se lukûlu lwa awana bekunlemvokelanga. (Matai 20:28) Yave wasola Yesu se Ntinu mu yala e nza yawonso. Ekiaki i kuma e Bibila kikutuvoveselanga vo avo tuzolele zinga yakwele mvu, tufwete lemvokela Yesu.—Tanga Yoane 3:36.

12. Ekuma Akristu akieleka ke bekuyisilanga mu mambu ma tuyalu ko?

¹² Ke bekuyisianga mu mambu ma tuyalu ko. Yesu kayisianga mu mambu ma tuyalu ko. Vava kafundiswa, wavova kwa Pilato wa nyadi a Roma vo: “E Kintinu kiame ke kia nza yayi ko.” (Tanga Yoane 18:36.) Nze Yesu, Akristu akieleka besonganga kwikizi muna Kintinu kia Nzambi. Muna kuma kiaki, kana nkutu nkia nsi bezingilanga, ke bekuyisianga mu mambu ma tuyalu ko. Kansi, Bibila kivovesanga Akristu akieleka basakalela “akwa wisa,” i sia vo, ayadi. (Roma 13:1) Belemvokelanga e nsiku mia nsi ina bezingilanga. Kansi vava nsiku ukululanga nsiku a Nzambi, betangininanga antumwa ana bavova  vo: “Tufwete lemvokela Nzambi nze mfumu ke mu wantu ko.”—Mavangu 5:29; Maku 12:17.

13. Adieyi Akristu akieleka besamunanga mu kuma kia Kintinu kia Nzambi?

¹³ Bekwikilanga vo Kintinu kia Nzambi kaka kifokola e mpasi ova nza. Yesu wavova vo ‘e nsangu zambote za Kintinu’ zisamunua mu nza yawonso. (Tanga Matai 24:14.) Ke vena luyalu lwa wantu ko lulenda vanga mana Kintinu kia Nzambi kivanga mu kuma kieto. (Nkunga 146:3) Yesu watulonga twasambanga mu kuma kia Kintinu kia Nzambi vava kavova vo: “E Kintinu kiaku kiza. O luzolo lwaku lwavangama ova ntoto nze koko zulu.” (Matai 6:10) Bibila kikutuzayisanga vo Kintinu kia Nzambi kifwasa tuyalu twawonso twa wantu ye “kiau kaka kiyala yakwele mvu.”—Daniele 2:44.

14. Aki nani obenze besambilanga Nzambi mu mpila yambote?

¹⁴ Wau olongokele mambu mama ukiyuvula: ‘Aki nani belonganga mana mena muna Bibila? Aki nani belonganga e nkumbu a Nzambi kwa akaka? Aki nani besongaziananga o zola kwakieleka yo kwikila vo Nzambi watuma Yesu muna kutuvuluza? Aki nani ke bekuyisianga mu mambu ma tuyalu ko? Aki nani besamunanga vo Kintinu kia Nzambi kaka kifokola e mpasi zeto?’ Mbangi za Yave kaka.—Yesaya 43:10-12.

15. Adieyi tufwete vanga avo tuzolele vo Nzambi katonda e nsambil’eto?

¹⁵ O kwikila vo Nzambi una kieleka, ke diau kaka ko divavuanga. Kadi kana nkutu nkuya bekwikilanga vo Nzambi una, kansi ke bekunlemvokelanga ko. (Yakobo 2:19) Avo tuzolele vo Nzambi katonda e nsambil’eto, ka tufwete kwikila kaka muna yandi ko, kansi tufwete vanganga mpe mana kekutulombanga.

16. Ekuma tufwete bembolwela e nsambil’aluvunu?

 ¹⁶ Avo tuzolele vo Nzambi katonda e nsambil’eto, tufwete bembola e nsambil’aluvunu. Yesaya wa ngunza wasoneka vo: “Nuvaika vana kati kwandi, nukala nuavelela.” (Yesaya 52:11; 2 Korinto 6:17) Ekiaki i kuma tufwete bembolwela emvimba konso lekwa kina ngwizani ye nsambil’aluvunu.

17, 18. Nki i “Babele Anene”? Ekuma tufwete mo vaikila mu nzaki?

¹⁷ Nki i nsambil’aluvunu? I konso dibundu difilanga wantu mu sambila Nzambi mu mpila itumbwanga muna Diambu dia Nzambi. Bibila kiyikilanga mabundu mawonso maluvunu vo: “Babele Anene.” (Lusengomono 17:5) Ekuma? Kadi, vava Kizalu kia lumbu ya Noa kiavioka, malongi mayingi maluvunu kuna mbanz’a Babele mayantikila. Malongi mama mamwangana mu nza yawonso. Kasikil’owu, awana bazingilanga kuna Babele basambilanga buka ya nzambi mu ntatu. O unu mpe, mabundu mayingi melonganga vo wantu tatu bena muna Nzambi, kansi Bibila kitoma kiesesanga vo vena ye Nzambi mosi kaka aludi, Yave. O Yesu i Mwan’andi. (Yoane 17:3) O wantu bazingilanga kuna Babele bakwikilanga mpe vo avo muntu ofwidi, vena ye lekwa muna nitu kikwamanananga zinga yovo mona e mpasi kuna bilungi bia tiya. Ediadi ke dialudi ko.—Tala e Mvovo Misasilu 14, 17, ye 18.

¹⁸ Nzambi wasakula vo ke kolo ko mabundu mawonso maluvunu mefwaswa. (Lusengomono 18:8) Nga obakwidi ekuma tufwete vaikila mu nzaki muna mabundu maluvunu? Yave wa Nzambi ozolele vo wavaika mo ekolo e ntangwa yakinu.—Lusengomono 18:4.

19. Nkia lusadisu kekuvana o Yave avo obakidi e nzengo za kunsadila?

¹⁹ Vava obaka e nzengo za vaika muna dibundu dia luvunu yo sadila Yave, akaka muna yitu yaku yovo akundi  nanga ke beyangalala ko. Ke bebakula ko e kuma obakidi e nzengo zazi, balenda nkutu kubangika. Kansi, Yave ke kuyambula ko. Okala muna kintwadi kia wan’angudi kia nz’amvimba, ana besonganga o zola kwakieleka kwa muntu yo nkwandi. Okala mpe ye vuvu kia zinga yakwele mvu muna nz’ampa ya Nzambi. (Maku 10:28-30) Kuna kulanda, akaka muna akundi ye yitu yaku ana bekusianga kitantu mu kuma kia nzengo zaku za sadila Yave, balenda longoka e Bibila.

20. Ekuma tufwete sambidila Nzambi mu mpila yambote?

²⁰ Ke kolo ko, Nzambi ofwasa yimpumbulu yawonso. E Kintinu kiandi kiyala nza yawonso. (2 Petelo 3:9, 13) Eyayi ntangw’a kiese yikala. Wantu awonso besambila Yave mu mpila ina kezolanga. Muna kuma kiaki, diambote wabaka e nzengo owau yo sambila Nzambi mu mpila yambote.