1. Ino ngani weenga watulwiita kupaila Lesa nkwaasuminisha?

BESHIBUPAILISHI baanji balaamba ayi balaiisha cancine pali Lesa. Sombi isho tashikonsheki, mukwiinga bupailishi boonse bulaiisha makani apusene pusene pali Lesa ambotweelete kumupaila. Ino inga twakushiba buyani kupaila Lesa nkwaasuminisha? Yehova eenkabo ngweenga watulwiita mbotweelete kumupaila.

2. Ino inga mwashiba buyani kupaila Lesa nkwaasuminisha?

² Yehova wakatupa Baibo kwaamba ayi tushibe mbotweelete kumupaila. Aboobo amwiiye Baibo, lyalo Yehova alaakumucafwa kwaamba ayi mufubileemo mukwiisha kwakwe mukwiinga ulimusuni abuumbi.—Isaya 48:17.

3. Ino Lesa alisuni kwaamba ayi tucite nshi?

³ Bantu bamwi balaamba ayi Lesa alasuminisha bupailishi buli boonse, ano isho teshi nshaakatwiisha Yesu. Wakaamba ayi: ‘teshi boonse banjita ayi, ‘Nkambo, Nkambo,’ beshibakenjile mu Bwaami bwakwiculu, sombibo wooyo ucita kuyanda kwa baTa bali kwiculu.’ Aboobo tulyeelete kushiba kuyanda kwakwe Lesa akukucita. Aya ngamakani ayandika abuumbi mukwiinga Yesu wakeelanisha bantu batanyumfwili Lesa kubakapondo, “bamucita shibiibi.”—Mateyo 7:21-23.

4. Ino Yesu wakaamba nshi pamakani akucita kuyanda kwakwe Lesa?

⁴ Yesu wakatucenjeshela limwi ayi tulaakukumanya mapensho ndyetutoocita kuyanda kwakwe Lesa. Wakaamba ayi: “Amwinjilile pamulyango ushaankene, ceebo mulyango utola mukunyonyoolwa ngunene, ayalo nshila taishuupi;  paceebo ceeco abo bainda nshila iyi mbaanji; sombi mulyango utola kubuumi butamaani ulishaankene alimwi nshila iyaako ilishupite, aboobo bantu baikonkela mbaniini.” (Mateyo 7:13, 14) Nshila ishupite, na kupaila Lesa nkwaasuminisha, kulatola bantu kubuumi butamaani. Nshila itashuupi, na kupaila Lesa nkwaatasuminishi, kulatola bantu kulufu. Ano Yehova taasuniwo kwaamba ayi muntu uli woonse akafwe. Wapa coolwe muntu uli woonse cakwiiya pali nguwe.—2 Pita 3:9.

5. Ino inga mwabashiba buyani abo bapaila Lesa munshila njaasuminisha?

⁵ Yesu wakaamba ayi inga twabashiba bantu bapaila munshila njaasuminisha Lesa. Inga twabeshiba kwiinda mukubona nshobashoma anshebacita. Wakaamba ayi: “Mulaakubeshibila kushisepo shabo.” Wakeelikawo akwaamba ayi: “Cisamu coonse cibotu cilacata shisepo shibotu.” (Mateyo 7:16, 17) Ici tacaambi ayi abo bapaila Lesa balisalalite. Ano basebenshi bakwe Lesa baleelesha kucita shiluleme lyoonse. Ano atubandike sheenga shatucafwa kushiba baabo bapaila Lesa munshila njaasuminisha.

6, 7. Ino nceebonshi bantu bapaila Lesa munshila yancine balakonkela njiisho shamu Baibo? Ino cakubonenaako cakwe Yesu cilatwiisha nshi?

⁶ Kupaila kwesu kulyeelete kuswa mu Baibo. Baibo ilaamba ayi: “Malembo oonse akatanjililwa a Lesa alimwi alacafwa mukwiisha, mukululika, mukululamika shintu, mukululika cabululami, kwaamba ayi muntu wakwe Lesa eelele cancine, ulibambite cakumaninina kusebensa ncito ibotu ili yoonse.” (2 Timoti 3:16, 17) Mutumwi Paulo wakalembela Beneklistu ayi: “Ndimwakatambula maswi akwe Lesa ayo ngomwakanyumfwa kuli ndiswe, tamukwe kwaatambula anga aswa kumuntu, sombi bweenka mbwaabete,  ncakwiila ayi ngakwe Lesa.” (1 Bene Tesalonika 2:13) Aboobo bantu bapaila Lesa munshila yeelete balakonkela njiisho sha mumaswi akwe Lesa, Baibo. Tabakonkeli miyeeyo yabantu, milawo na shintu shimwi shili shoonse.

⁷ Shintu shili shoonse Yesu nshaakalinga kwiisha shakaswa mu Maswi akwe Lesa. (Amubelenge Joni 17:17.) Lyoonse wakalinga kusebensesha Malembo. (Mateyo 4:4, 7, 10) Basebenshi bakwe Lesa bancinencine balakonkela cakubonenaako cakwe Yesu aboobo nshobaiisha shoonse shilaswa mu Baibo.

8. Ino Yesu wakatwiisha nshi pamakani akulambila Yehova?

⁸ Tulyeelete kulambila Yehova eenkabo. Kulumbaisha 83:18 ilaamba ayi: “Mwebo, nomucite liina lyakwaamba ayi Yehova, mwebo nweenkabo ndimwe Mwiinditeewo pacishi coonse.” Yesu wakalinga kusuni ayi bantu bamushibe kabotu Lesa wancine, aboobo wakaiisha bantu liina lyakwe Lesa. (Amubelenge Joni 17:6.) Yesu wakaamba ayi: “ngu Yehova Lesa wako ngoweelete kulambila, alimwi lakwe eenkabo ngoweelete kusebensela ncito isalalite.” (Mateyo 4:10) Aboobo mbuli basebenshi bakwe Lesa, tulakonkela cakubonenaako cakwe Yesu. Tulalambila Yehova eenkabo, tulasebensesha liina lyakwe akwiisha bamwi liina lyakwe ansheshi akatucitile.

9, 10. Ino tulatondesha buyani ayi tulisunene?

⁹ Tulyeelete kutondesha bantu lusuno lwancinencine. Yesu wakaiisha bashikwiiya bakwe kusunana. (Amubelenge Joni 13:35.) Tatubikili maano mushobo wa muntu nkwaaswa, na ngu mukandu nabi mubile. Lusuno lulyeelete kutucatanya mbuli bamakwesu abenankashi na mukwashi womwi. (Bene Kolose 3:14) Aboobo tatwaabaniimo lubasu munkondo. Baibo ilaamba ayi: “Bana bakwe Lesa abana bakwe Satana balashibikwa munshila iyi: Uyo woonse utaciti shiluleme taaswi kuli Lesa sobwe, ncomwibo awooyo utasuni mukwaabo.” Alimwi ilaamba ayi: “Tulyeelete  kusunana; kuteshi kuba mbuli Kaini, uyo wakalinga kulubasu lwa mubiibi akucaya mukwaabo.”—1 Joni 3:10-12; 4:20, 21.

¹⁰ Tulasebensesha ciindi ankusu shesu ashintu shakumubili kucafwa akuyuminisha bamakwesu. (Bene Ebulu 10:24, 25) “Tulacita shintu shibotu kubantu boonse.”—Bene Galatiya 6:10.

11. Ino nceebonshi tulasumina Yesu mbuli nshila itola kuli Lesa?

¹¹ Tulyeelete kunyumfwila Yesu mukwiinga njenshila itola kuli Lesa. Baibo ilaamba ayi: “Taaku liina alimwi mucishi ca panshi Lesa ndyaakapa ayi inga twapulukilaamo.” (Milimo 4:12) Mumutwi 5 walibuku ili, twakeeya ayi Yehova wakatuma Yesu kwaaba buumi bwakwe mbuli cilubula kubantu banyumfwila. (Mateyo 20:28) Yehova wasala Yesu kwaamba ayi akeendeleshe mbuli Mwaami pacishi coonse ca panshi. Nceceeco Baibo ncoyaambila ayi tulyeelete kunyumfwila Yesu kwaamba ayi tukabe abuumi butamaani.—Amubelenge Joni 3:36.

12. Ino nceebonshi tatwaabaniimo lubasu mumapolitiki?

¹² Tatweelete kwaabanaamo lubasu mumapolitiki. Yesu taakwe kwaabanaamo lubasu mumapolitiki. Ndyaakalinga koomboloshekwa, wakaambila Pilato muleli wa bene Loma ayi: “Bwaami bwangu teshi bwa mucishi ca panshi pano.” (Amubelenge Joni 18:36.) Bweenka mbuli Yesu, tulashomeka ku Bwaami bwakwiculu, aboobo kuli koonse nkotukala tatwaabaniimo lubasu mumapolitiki. Nacibi boobo, Baibo ilatwaambila “kunyumfwila beendeleshi,” na mfulumeende. (Bene Loma 13:1) Tulakonkela milawo yakucishi nkotukala. Ono na milawo ya mfulumeende yapusana amilawo yakwe Lesa, tulakonkela cakubonenaako ca batumwi, abo bakaamba ayi: “Tulyeelete kunyumfwila Lesa mbuli mweendeleshi kuteshi bantu.”—Milimo 5:29; Maako 12:17.

13. Ino tulashimikila nshi pamakani a Bwaami bwakwe Lesa?

 ¹³ Tulashoma kwaamba ayi Bwaami bwakwe Lesa bweenkabo mbweshi bukamane mapensho oonse ali pacishi. Yesu wakaamba ayi “makani abotu aBwaami” alaakushimikilwa nsengwe yoonse. (Amubelenge Mateyo 24:14.) Taakuwo mfulumeende ya bantu yeenga yacikonsha kucita Bwaami bwakwe Lesa nsheshi bukatucitile. (Kulumbaisha 146:3) Yesu wakatwiisha kupailila Bwaami bakwe Lesa ndyaakaamba ayi: “Abwise Bwaami bwanu, kuyanda kwanu akucitwe panshi pano bweenka mbuli kwiculu.” (Mateyo 6:10) Baibo ilaamba ayi Bwaami bwakwe Lesa bulaakunyonyoola mfulumeende shoonse sha bantu ‘bwalo bweenkabo mbweshi bukatolelele kwamuyayaya.’—Danyelo 2:44.

14. Ino mbaani mbomushoma ayi balapaila Lesa munshila njaasuminisha?

¹⁴ Pesule lyakwiiya makani oonse aya, amuliipushe ayi: ‘Ino mbaani baiisha kweelana anshoyaamba Baibo? Ino mbaani beshi kwaambilaako bamwi sha liina lyakwe Lesa? Ino mbaani beshikutondesha lusuno lwancinencine pakati kabo? Ino mbaani bashoma ayi Lesa wakatuma Yesu kusa mukutupulusha? Ino mbaani bataabaniimo lubasu mumapolitiki? Ino mbaani bashimikila ayi Bwaami bakwe Lesa bweenkabo mbweshi bukamane mapensho esu?’ Mbakamboni Bakwe Yehova beenkabo.—Isaya 43:10-12.

15. Ino nciinshi ncotweelete kucita na tulisuni kwaamba ayi Lesa atambule kulambila kwesu?

¹⁵ Tamweelete kweelabo pa kushoma ayi Lesa nkwaali. Mukwiinga nabibo bashikaswa abalo balashoma ayi Lesa nkwaali, sombi tabamunyumfwili. (Jemusi 2:19) Na tulisuni kwaamba ayi Yehova atambule kulambila kwesu, tulyeelete kucita nshaamba kuteshi kushomabo.

16. Ino nceebonshi tulyeelete kukaka bupailishi bwakubeca?

 ¹⁶ Kwaamba ayi Lesa atambule kulambila kwesu, tulyeelete kukaka bupailishi bwakubeca. Mushinshimi Isaya wakaamba ayi: “Amuswe mulinguwe, kamusalalite.” (Isaya 52:11; 2 Bene Kolinto 6:17) Nceceeco ncotweelete kukakila cintu cili coonse cikumite bupailishi bwakubeca.

17, 18. Ino “Babiloni Munene,” cilaambanshi alimwi nceebonshi ncociyandikila kuswaamo cakufwambaana?

¹⁷ Ino bupailishi bwakubeca nciinshi? Mbupailishi buyuminisha bantu kupaila munshila itasuminishikwi a Baibo. Baibo ileeta bupailishi bwakubeca boonse ayi “Babiloni Munene.” (Ciyubululo 17:5) Ino nceebonshi? Pesule lya Muyoba wa muciindi cakwe Nowa, kwakatalika njiisho shakubeca shiinji mundabala ya Babiloni. Njiisho shakubeca isho shakapalangana pacishi coonse ca panshi. Kucakubonenaako, bantu bakalinga kukala ku Babiloni bakalinga kupaila balesa botatwe. Amunshiku shino, beshibupailishi baanji balaiisha ayi kuli balesa Botatwe, ono sombi Baibo ilaiisha ayi kulibo Lesa womwi wancine, Yehova, alimwi Yesu ngo Mwanaakwe. (Joni 17:3) Alimwi bene Babiloni bakalinga kushoma ayi na muntu wafwa mushimu wakwe ulatolelela kuba abuumi alimwi alakonsha kupenshekwa ku helo. Ano ubu mbubeshi bwakwaansa.—Amubone Makani Aamwi 14, 17, a 18.

¹⁸ Lesa wakaambila limwi ayi alaakunyonyoola bupailishi bwakubeca conoonobo. (Ciyubululo 18:8) Ano sa mwaboona ncociyandikila kufwambaana kuswa mubupailishi bwakubeca? Yehova Lesa alisuni kwaamba ayi mufwambaane kucita boobo ciindi kacitana kumana.—Ciyubululo 18:4.

19. Ino Yehova alaakumulama buyani, na mukasale kumusebensela?

¹⁹ Mwaakusala kuswa mubupailishi bwakubeca akutalika kusebensela Yehova, beshicibusa banu na beshikamukowa  inga tabanyumfwishishi ncemwacitila boobo alimwi inga batalika akumupensha. Ono Yehova teshi akamushiyewo. Mulaakuba lubasu lwa mukwashi wa pacishi coonse wa bantu baanji abuumbi basunene cancinencine, alimwi mulaakuba abulindilishi bwakuba abuumi butamaani mucishi cipya. (Maako 10:28-30) Mpashi babyaanu abeshikamukowa bamwi abo bamupikisha inga basuna kwiiya Baibo mukuya kwaciindi.

20. Ino nceebonshi ncotweelete kupaila Lesa munshila njaasuminisha?

²⁰ Conoonobo, Lesa alaakunyonyoola bamucita shibiibi boonse, lyalo Bwaami bwakwe Lesa bulaakutalika kweendelesha pacishi coonse ca panshi. (2 Pita 3:9, 13) Cilaakuba ciindi cisangalasha abuumbi! Bantu boonse paciindi ico balaakunopaila Yehova kweelana akuyanda kwakwe. Aboobo cino nceciindi ncomweelete kucitawo comwi akusala kupaila Lesa munshila njaasuminisha.