MURU 15
Makalelo ofwanelela omlambelana Nlungu
1. N’nga mbaani unaniwandele makalelo ofwanelela omlambela Nlungu?
MARELIGIAU manjinji anaroromela ira anofunji-a imbarimbari ya Nlungu. Mbwenye mareligiau anofunji-a vyongo vyo-iyana thitho anolambela Nlungu ndhila dhiwadhene mo-iyana-iyana. Ee-no, kai imbarimbari ira othene anoira vimbo-ive. N’nga vatokala iroromelo yaimbarimbari yomlambelela Nlungu? Ngu Yohova Nlungu unawakule yofuka yei.
2. N’nga ninaidhiwe a-vi makalelo ofwanelela omlambelela Nlungu?
2 Yohova utoniva-a Bibilya ira linikami-e idhiwa makalelo ofwanelela oi niode mlambela. Ee-no, munofwanela funjedha Bibilya mwaira ee-no Yohova unodha ukami-ani ganyali na vinofunjedha nyoovyo mwasa oi unoudhiveliwanani vinjinji.—Esaya 48:17.
3. N’nga Nlungu unofuna ira niirengan’ni?
3 Atu enango anaroromela ira, Nlungu unoona mareligiau othene kala apama. Mbwenye pyo-iyana na vyaongile Yesu. Liye aongile ira: “Kai othene anoonga ira mbwiyeni mbwiyeni anofuna dhavolowa Muumwene wa dhulu, mbwenye baa-i unoira ifunelo ya Babanga.” Vyevyo vinooni-a ira ninofwanela mlambela Nlungu ndhila yorumeleya na irangana vinofunjedha i-yo. Mwasa wen’na kai oluluva neri-a Yesu alandani-idhe atu o-ovwela Nlungu kala ninga atu “o-ovwela malamulo.”—Mateu 7:21-23.
4. N’nga Yesu aongilen’ni vamwasa wa vinofuna Nlungu?
4 Yesu atoniwenjeli-a ira ninodha gumanana nyarwa nadhilimbi-edhanga ira vyongo vinofuna Nlungu. Liye aongile ira: Volowani va lango wopaparedha. Voi ndhila ilukulu thitho yorambalala inadhowa manongiwelo, thitho mbaatu anjinji anowenda mwemo. Mbwenye lango ung’onong’ono na ndhila yopaparedha njodhowana wiingumi, thitho mboeva anoifwanya. (Mateu 7:13, 14) Ndhila yopaparedha, inaimelela makalelo ofwanelela omlambela Nlungu, mbenao anamkami-e mutu dhafwanya ingumi yo-omala. Ndhila ilukulu, inaimelela makalelo o-ofwanela mlambela Nlungu, inodhowa makwelo. Mbwenye Yohova kanofuna ira mutu uliwethene adhanongiwe. Ee-no unovelela ngari wa mutu uliwethene ira ammwidhiwe.—2 Pedru 3:9.
MAKALELO OFWANELELA OMLAMBELANA NLUNGU
5. N’nga munaiidhiwe a-vi atu anamlambela Nlungu ndhila yofwanelela?
5 Yesu aongile ira i-yo ninooda aidhiwa atu anamlambela Nlungu na makalelo ofwanelela. Ninoaidhiwa akala ira nitoona vinoira aliwa na vinororomela aliwa. Liye aongile ira: “Munodha azindiyela na vyova-a viwa” thitho atoonga okoka ira: “Muri uliothene wapama unova-a vyova-a vyapama.” (Mateu 7:16, 17) Mbwenye vyevi kavinothapulela ira aliwa katinadawi-a yongo iliyothene. Mbwenye hora dhothene anamalaba a Nlungu anodhilimbi-edha ira vyongo vyofwanelela. Dhoweni nitapanye vyongo vinanikami-e zindiyela atu anamlambela Nlungu na makalelo ofwanelela.
6, 7. (a) Mwasiwa ngwan’ni atu anamlambela Nlungu na makalelo ofwanelela tana-arela makundo a Bibilyani? (b) N’nga ninofunjedhan’ni vaifwanafwani-o ya Yesu?
6 Vinoira aliwa volambela vinokumela Bibilyani. Bibilya linoonga ira: “Malemba othene tavudheleliwile na Nlungu, thitho mboganyali-a vofunji-a, vosumulula, vodhongola vyongo, na langa molongomana, ira mutu wa Nlungu akale ofwanelela pama, na wokozeya mokwakwanela, ira alabe basa lililothene lapama.” (2 Timoteo 3:16, 17) Rumiwi Paulo atoalembela Makristau ira: “Mudhawachele madhu a Nlungu avwidenyo wamiyo, kamwaone ninga madhu aatu, mbwenye ninga mukalele aliwa madhu a Nlungu.” (1 Atezalonika 2:13) Ee-no atu anamlambela Nlungu na makalelo ofwanelela ano-arela makundo a madhu a Nlungu, Bibilya. Aliwa katinowendela mathuulelo aatu, vilemeelelo venango vyongo vinango.
7 Vyongo vyothene vyafunji-a Yesu vyakumela m’madhu a Nlungu. (Muleri Juwau 17:17.) Hora dhinjinji liye a-indi-edha basa madhu a malemba. (Mateu 4:4, 7, 10) Anamalaba ororomeleya a Nlungu anotukulela ifwanafwani-o ya Yesu thitho vyothene vinofunji-a aliwa vinokumela Bibilyani.
8. N’nga Yesu afunji-idhen’ni vamwasa olambela Yohova?
8 Anamlambela Yohova baa-i. Lemba la Salimo 83:18 linoonga ira: “Ira atu taidhiwe ira nyo, dhina linyu muli Yohova, nyo mweka muli wadhuludhulu va ilambo yothene yavathi.” Yesu afuna ira atu tammwidhiwe pama Nlungu waimbarimbari, mwasiwa ngwenuo anofunji-a vya dhina la Nlunguwo. (Muleri Juwau 17:6.) Liye aongile ira: “Yohova Nlungwinyu ngunofwanela nyo mlambela, thitho munofwanela mlabela liye baa-i.” (Mateu 4:10) Ee-no anamalaba a Nlungu tano-arela ifwanafwani-o ya Yesu. Aliwa tanomlambela Yohova baa-i, tano-indi-edha basa dhinalee thitho tanofunji-a enango dhina la Nlungu na vinofuna liye dhaairela atu.
9, 10. N’nga ninaoni-a a-vi ira ninodhiveliwana atu enango?
9 Tanodhiveliwana atu naudhivela waimbarimbari. Yesu atofunji-a anamafunjedhee ira tadhiveliwengana unango na fwee, thitho i-yo ninoira vimbo-ive. (Muleri Juwau 13:35.) Ninodhivelana angalive ira nili o-iyana vilambo, makalelo thitho akala nili ofuma venango osauwa. Udhivela unonikami-a ira nivionenga ira nili atu a banja limbo-ive. (Akolose 3:14) Kaninawana khondo thitho kaninopa atu enango. Bibilya linoonga ira: “A-ima a Nlungu thitho a-ima a Namanami-a anooneela pama mwa eeni: Mutu uliwethene a-anaira vyolongomana thitho a-anadhiveliwana balee.” Thitho Bibilya linoonga ira: “Nidhivelengana mutu na fwee, a-kala ninga Kaini, ulandeile namakalelo othakala nompa balee.”—1 Juwau 3:10-12; 4:20, 21.
10 Nino-indi-edha basa hori-u, nguru dhi-u thitho fumadhi-u voakami-a abali-u thitho limbi-ana. (Aebere 10:24, 25) “Ninodhilimbi-edha irela atu othene vyapama.”—Agalata 6:10.
11. Mwasiwa ngwan’ni ninororomela ira ivulumucho inokumela wa Yesu Kristu?
11 Tanororomela ira Yesu njindhila ya Nlungu yovulumuchedha atu. Bibilya linoonga ira: “Ivulumucho kinofwanyeya mwa mutu uliwethene, kavali dhina n’nango vathi varambo, lelo laveleliwile waatu, linofwanela i-yo vulumuchiwana.” (Mayirelo 4:12) Muru 5 nifunjedhile ira Yohova atomruma Yesu vailambo yavathi ira adhavelele ingumiyee ninga yoombolana atu. (Mateu 20:28) Mwasiwa ngwenuo Bibilya linoniwandela ira ninofwanela mvwela Yesu ira nidhafwanye ingumi yo-omala.—Muleri Juwau 3:36.
12. N’nga mwasiwa ngwan’ni makristau aimbarimbari katinavolowela ndale?
12 Katinovolowela ndale. Yesu kaavolowela ndale. Hora inango atongiwanga, atommwandela namatonga wa Roma dhinalee Pilato ira: “Umwenanga kuli ikundu ya ilambwila.” (Muleri Juwau 18:36.) Mofwanafwana na Yesu, nili ororomeleya va Umwene wa Nlungu thitho ngumwasiwa, kaninovolowela myasa ya ndale. Mbwenye Bibilya linoniwandela ira nivwelenga “anamatonga andimuwa,” anotonga. (Aroma 13:1) I-yo ninovwela malamulo ailambo inakala i-yo. Mbwenye akala ira malamulwao katinavwelana na malamulo a Nlungu, ninosazi-a anamarumiwa, aongile ira: “I-yo ninofwanela vwela Nlungu ninga namatonga, a-kala atu.”—Mayirelo 5:29; Marku 12:17.
13. N’nga makristau aimbarimbari tanolaleela vyoi a-vi voonga vya Umwene wa Nlungu?
13 Tanolaleela ira Umwene wa Nlungu baa-i ngunofuna mali-a nyarwa dhothene vailambo yavathi. Yesu aongile ira: “Milanyu yapama ya Umwene” inodha laleiwa vailambo yothene yavathi. (Muleri Mateu 24:14.) Kavali utongi unango waatu vailambo yavathi unaode niirela vyongo ninga vinofuna dhaira Umwene wa Nlungu. (Salimo 146:3) Yesu atonifunji-a ira nilobelenga e-ni: “Umweninyu udhe, ifunelo inyu iireye, ninga dhulu thitho vikale saasawa nailambo yavathi.” (Mateu 6:10) Bibilya linoonga ira Umwene wa Nlungu unodha nonga Maumwene aatu thitho ira “unodha kalawo dhowa nodhowa.”—Danieli 2:44.
14. N’nga nyo munoona ira mbaani unamlambela Nlungu na makalelo ofwanelela?
14 Vomala tapanya makundo enala, dhifukeni ira: ‘N’nga mbaani ano-ara makundo okumela Bibilyani? Mbaatu aavi anawandela atu enango vya dhina la Nlungu? Mbaatu aavi ana udhivela waimbarimbari thitho anororomela ira Nlungu atomruma Yesu ira anivulumuche? N’nga mbaani a-anavolowela ndale? Mbaani analaleela ira Umwene wa Nlungu baa-i ngunofuna dhamali-a nyarwa dhaatu?’ Amboni dha Yohova baa-i mbanoirana vyongo vyevi.—Esaya 43:10-12.
N’NGA NYO MUNOFWANELA IRAN’NI?
15. N’nga ninofwanela iran’ni akala ninofuna ira Nlungu arumelenga lambela wi-u?
15 Roromela ira utokala Nlungu kai okwakwanela mwasiwa minemba yothakala thitho inororomela ira Nlungu utokalao, mbwenye katinavwela. (Tiyago 2:19) Ira lambela wi-u Nlungu ukale orumeleya, ninofwanela mvwelanga.
16. Mwasiwa ngwa’ni ninofwanela kuma mureligiauni lonama?
16 Ira Nlungu arumelenga lambela wi-u, ninofwanela kumamo religiauni lonama. Namaro-edha Esaya alembile ira: Kumanivo vari vee! Kalani ochena.” (Esaya 52:11; 2 Akoritiyo 6:17) Movwelana na vyevi, ninofwanela rambela yongo iliyothene yovwelana na religiau lonama.
17, 18. (a) N’nga Babulo Nlukulu chini? (b) N’nga mwasiwa ngwan’ni atu tanofwanela kumamo mombaranya?
17 Religiau lonama tireligiau lililothene linofunji-a vyongo vyo-iayana na vili m’madhuni a Nlungu. Bibilya linoromola mareligiau othene onama ira “Babulo Nlukulu.” (Apokalipse 17:5) N’nga dhina leli likumele wan’ni? Ma-inje a hora ya Nowa angavirile, atu okala isa ya Babulo tatoroma funji-a vyongo vyonama. Vyafunji-a aliwavyo vyatoroma mwadheya vailambo yothene yavathi. Mofwanafwani-a, atu okala Babulo tanolambela milungu yakala miraru. Malamboano thitho, mareligiau manjinji anofunji-a ira vatokala alungu araru va Nlungu mmbo-i. Mbwenye Bibilya linofunji-a ira vali Nlungu waimbarimbari mmbo-i baa-i, Yohova thitho mwanee ngu Yesu. (Juwau 17:3) Thitho atu okala wu Babulo tanororomela ira mutu akwa vatokala yongo inodhowanave kaana ingumi thitho ira yongo ina-alayo inooda ona nyarwa muloni. Mbwenye vyevi kai vyaimbarimbari.—Onani madhu akomoni 14, 17, na 18.
18 Nlungu atoonga ira mareligiau othene onama anodha nongiwa chineneeva. (Apokalipse 18:8) Mwasiwa ngwenuo munofwanela kumamo mombaranya religiauni lonamalo. Yohova Nlungu unofuna ira mukumemo mombaranya.—Apokalipse 18:4.
Mulambele Yohova naatwee vanoiranyo ikundu ya banja nlukulu
19. N’nga Yohova unodha usamalelani a-vi mwasakula mlabela?
19 Nyo mwasakula kuma mu religiau lonama noroma mlabela Yohova, afwinyu enango naabalinyu katinodhiveliwa thitho tanodha roma udhimbinuwelani. Mbwenye Yohova kanau-iyani. Munodha volowa banja lavailambo yothene yavathi lelo lin’na atu mamiliyau manjinji enao anodhivelana. Thitho Munodha kaana ngari yodha kaana ingumi yo-omala mwiilambo ipya. (Marku 10:28-30) Pyoidhiweya ira atu enango enao anoudhimbinuwelani mwasa oi mwatosakula mlabela Yohova, sogolo anodha roma funjedha Bibilya.
20. N’nga mlambela Nlungu na makalelo ofwanelela unothapulela n’ni?
20 Chineneeva, Nlungu unononga atu othene othakala thitho Umwenee unodha roma tonga vailambo yothene yavathi. (2 Pedru 3:9, 13) Yen’na inodha kala hora yova-a imwerumweru vinjinji. Vahora yeniyo atu othene tanodha mlambelanga Yohova namakalelo ofwanelela ninga munofunela mwinyaa. Ee-no ila njihora yapama yoi murome mlambela Nlungu na makalelo ofwanelela.
