1. Nnganyi udi mua kutuambila mushindu muimpe wa kutendelela Nzambi?

BITENDELELU bia bungi bidi biamba mudibi bilongesha malu malelela pa bidi bitangila Nzambi. Kadi kabiena mua kuikala nanku to, bualu bitendelelu bia bungi bidi bilongesha malu mashilangane bikole bua tshidi Nzambi ne mushindu utudi ne bua kumutendelela. Mmunyi mutudi mua kumanya mushindu muimpe wa kutendelela Nzambi? Anu Yehowa nkayende ke udi mua kutuambila mutudi mua kumutendelela.

2. Mmunyi mutudi mua kumanya mushindu muimpe wa kutendelela Nzambi?

² Yehowa mmutupeshe Bible bua tumanye mushindu muimpe wa kumutendelela. Nunku longa Bible, ne Yehowa neakuambuluishe bua malu audi ulongamu akuambuluishe, bualu udi uditatshisha bikole bua bualu buebe.—Yeshaya 48:17.

3. Nzambi mmusue ne: tuenze tshinyi?

³ Kudi bantu badi bamba ne: Nzambi udi wanyisha bitendelelu bionso, kadi ki ntshivua Yezu mutulongeshe to. Wakamba ne: “Ki mmuntu yonso udi umbikila ne: ‘Mukalenge, Mukalenge,’ wabuela mu Bukalenge bua mu diulu to, kadi anu eu udi wenza disua dia Tatu wanyi udi mu diulu ke wabuela.” Nunku mbimpe tumanye tshidi Nzambi musue ne pashishe tutshienze. Mbualu bua mushinga mukole bualu Yezu wakafuanyikija bantu badi kabayi batumikila Nzambi ne benzavi, “bashipi ba mikenji.”—Matayi 7:21-23.

4. Yezu uvua muambe tshinyi bua kuenza disua dia Nzambi?

⁴ Yezu uvua mutudimuije ne: tuetu basue kuenza disua  dia Nzambi, netupete ntatu. Wakamba ne: “Buelelayi ku tshiibi tshikese, bualu tshiibi tshidi tshinene ne njila udi mualabale udi ufikisha ku kabutu, bantu ba bungi badi babuelelaku; kadi tshiibi tshidi tshikese ne njila udi mubumbakane udi ufikisha ku muoyo, bantu bakese badi bamupeta.” (Matayi 7:13, 14) Njila mukese, anyi mushindu muimpe wa kutendelela Nzambi, udi ufikisha ku muoyo wa tshiendelele. Njila munene, anyi mushindu mubi wa kutendelela Nzambi, udi ufikisha ku lufu. Pabi Yehowa ki mmusue bua muntu nansha umue afue to. Udi upesha muntu yonso mpunga wa kumumanya.—2 Petelo 3:9.

5. Mmunyi muudi mua kumanya bantu badi batendelela Nzambi mu mushindu muimpe?

⁵ Yezu uvua muambe ne: tudi mua kumanya bantu badi batendelela Nzambi mu mushindu muimpe. Tudi tubamanya patudi tukonkonona malu adibu bitabuja ne adibu benza. Wakamba ne: “Nenubamanyine ku mamuma abu.” Kuambaye kabidi ne: “Mutshi wonso muimpe udi ukuama bimuma bimpe.” (Matayi 7:16, 17) Ebi kabiena biumvuija ne: bantu badi batendelela Nzambi kabatu benza bilema to. Kadi badi badienzeja misangu yonso bua kuenza malu mimpe. Tumone mpindieu tshidi mua kutuambuluisha bua kumanya bantu badi batendelela Nzambi mu mushindu muimpe.

6, 7. a) Bua tshinyi ntendelelu mulelela mmuimanyine mu Bible? b) Tshilejilu tshia Yezu tshidi tshitulongesha tshinyi?

⁶ Ntendelelu wetu udi ne bua kushindamena mu Bible. Bible udi wamba ne: “Dîyi dionso didi mu Mifundu ndifundisha kudi Nzambi ku bukole bua nyuma wende ne didi diambuluisha bua kulongesha, bua kubela, bua kululamija malu, bua kunyoka mu buakane, bua muntu wa Nzambi ikale mukumbane menemene, muikale ne bionso bidi bikengedibua bua mudimu wonso muimpe.” (2 Timote 3:16, 17) Mupostolo Paulo wakafundila bena Kristo ne: “Panuvua  bapete dîyi dia Nzambi dinuvua bumvuile kutudi, nuvua baditabe, ki mbu dîyi dia bantu, kadi anu bu mudidi mu bulelela, bu dîyi dia Nzambi.” (1 Tesalonike 2:13) Ntendelelu mulelela mmushindamene anu mu Bible, Dîyi dia Nzambi. Ki mmuimanyine pa ngenyi ya bantu, bilele, anyi malu makuabu to.

⁷ Malu onso avua Yezu ulongesha avua mashindamene mu Dîyi dia Nzambi. (Bala Yone 17:17.) Uvua misangu ya bungi utela Mifundu. (Matayi 4:4, 7, 10) Batendeledi balelela ba Nzambi badi balonda tshilejilu tshia Yezu, ne malu onso adibu balongesha adi afumina mu Bible.

8. Ntshinyi tshivua Yezu mutulongeshe bua kutendelela Yehowa?

⁸ Tudi ne bua kutendelela anu Yehowa. Misambu 83:18 udi wamba ne: “Wewe, udi ne dîna dia Yehowa, wewe nkayebe ke Mutambe Bunene pa mutu pa buloba bujima.” Yezu uvua musue bua bantu bamanye bimpe menemene ne: Nzambi mulelela nganyi, ne uvua ubalongesha dîna dia Nzambi. (Bala Yone 17:6.) Yezu wakamba ne: “Yehowa Nzambi webe ke uudi ne bua kutendelela, ne yeye nkayende ke uudi ne bua kuenzela mudimu wa tshijila.” (Matayi 4:10) Nunku bu mutudi batendeledi ba Nzambi, tudi tulonda tshilejilu tshia Yezu. Tudi tutendelela anu Yehowa, tutela dîna diende, ne tulongesha bantu bakuabu dîna dia Nzambi ne malu ikalaye ne bua kutuenzela.

9, 10. Mmushindu kayi utudi tuleja ne: tudi banangangane?

⁹ Tudi ne bua kuikala ne dinanga dilelela bua bantu. Yezu uvua mulongeshe bayidi bende bua banangangane. (Bala Yone 13:35.) Dinanga edi kadiena ditangila muaba utudi bafumine, tshisamba tshietu anyi bituikala babanji peshi bapele to. Dinanga edi didi dienza bua tuikale mu buobumue ne bana betu ba balume ne ba bakaji. (Kolosayi 3:14) Ke bualu kayi katuena tuya ku mvita ne katuena tushipa bantu to. Bible udi wamba ne: “Bana ba Nzambi ne bana ba Diabolo badi bamuenekela ku bualu ebu: Muntu yonso udi kayi utungunuka ne kuenza malu makane kena ufumina  kudi Nzambi, nansha muntu udi kayi munange muanabu.” Udi wamba kabidi ne: tudi ne bua ‘kunangangana; ki mbu Kayina uvua mufumine kudi mubi ne mushipe muanabu to.’—1 Yone 3:10-12; 4:20, 21.

¹⁰ Tudi tufila dîba dietu, makanda etu, ne bintu bietu bua kuambuluishangana ne kukankamijangana. (Ebelu 10:24, 25) Tudi ‘tuenzela bantu bonso malu mimpe.’—Galatiya 6:10.

11. Bua tshinyi tudi tuitaba Yezu bu njila udi ufikisha kudi Nzambi?

¹¹ Tudi ne bua kutumikila Yezu bualu yeye ke njila udi ufikisha kudi Nzambi. Bible udi wamba ne: “Kakuena lupandu mu muntu mukuabu, bualu kakuena dîna dikuabu muinshi mua diulu didibu bafile munkatshi mua bantu didi ne bua kutupandisha to.” (Bienzedi 4:12) Tuvua balonge mu nshapita muitanu wa mukanda eu ne: Yehowa uvua mutume Yezu bua kufila muoyo wende bu mulambu wa kupikula nawu bantu badi batumikila. (Matayi 20:28) Yehowa mmusungule Yezu bua kukokesha bu Mukalenge pa buloba. Ke bualu kayi Bible udi utuambila bua kutumikila Yezu tuetu basue kupeta muoyo wa tshiendelele.—Bala Yone 3:36.

12. Bua tshinyi katuena tubuelakana mu malu a tshididi?

¹² Katuena ne bua kubuelakana mu malu a tshididi to. Yezu kavua mubuelakane mu malu a tshididi to. Pavuabu bamulumbuluisha, wakambila Pilato mukokeshi muena Lomo ne: “Bukalenge buanyi ki mbua pa buloba ebu to.” (Bala Yone 18:36.) Anu bu Yezu, tudi tulamata Bukalenge bua Nzambi bua mu diulu, ne bua bualu ebu, katuena tubuelakana mu malu a tshididi to, nansha tuetu basombele muaba kayi. Kadi Bible udi utulomba bua kutumikila “bakokeshi badi ku mutu,” mmumue ne: mbulamatadi. (Lomo 13:1) Tudi tutumikila mikenji ya mu ditunga ditudi. Kadi padi mukenji kampanda ubengangana ne mikenji ya Nzambi, tudi tuidikija bapostolo bavua bambe ne: “Tudi ne bua kutumikila Nzambi bu mfumu pamutu pa kutumikila bantu.”—Bienzedi 5:29; Mâko 12:17.

13. Mmalu kayi atudi tuyisha bua Bukalenge bua Nzambi?

 ¹³ Tudi tuitaba ne: anu Bukalenge bua Nzambi ke buajikija ntatu ya pa buloba. Yezu wakamba ne: bavua ne bua kuyisha “lumu luimpe elu lua Bukalenge” pa buloba bujima. (Bala Matayi 24:14.) Mbulamatadi nansha umue kena mua kuenza tshikala Bukalenge bua Nzambi ne bua kutuenzela to. (Misambu 146:3) Yezu uvua mutulongeshe bua kusambila bua Bukalenge bua Nzambi pavuaye muambe ne: “Bukalenge buebe bulue. Disua diebe dienzeke kabidi pa buloba muomumue ne mu diulu.” (Matayi 6:10) Bible udi utuambila ne: Bukalenge bua Nzambi nebubutule mbulamatadi yonso ya bantu ne “buobu nkayabu nebushalaku kashidi.”—Danyele 2:44.

14. Udi wela meji ne: mbanganyi badi batendelela Nzambi mu mushindu muimpe?

¹⁴ Wewe mumane kulonga malu onso aa, diebeja ne: ‘Mbanganyi batu bangatshila malongesha abu mu Bible? Mbanganyi batu bambila bantu bakuabu dîna dia Nzambi? Mbanganyi batu banangangane bikole ne bitaba ne: Nzambi uvua mutume Yezu bua kutupandisha? Mbanganyi batu kabayi babuelakana mu malu a tshididi? Mbanganyi batu bayisha ne: anu Bukalenge bua Nzambi ke buajikija ntatu yetu?’ Anu Bantemu ba Yehowa.—Yeshaya 43:10-12.

15. Tuetu basue bua Nzambi anyishe ntendelelu wetu, tudi ne bua kuenza tshinyi?

¹⁵ Kuitaba anu ne: Nzambi udiku ki nkukumbane to. Nansha bademon badi bitaba ne: Nzambi udiku, kadi kabena bamutumikila to. (Yakobo 2:19) Tuetu basue bua Nzambi anyishe ntendelelu wetu, tudi ne bua kuitaba ne: udiku, ne kuenza kabidi tshidiye wamba.

16. Bua tshinyi tudi ne bua kubenga tshitendelelu tshia dishima?

¹⁶ Bua Nzambi kuanyishaye ntendelelu wetu, tudi ne bua kubenga tshitendelelu tshia dishima. Muprofete Yeshaya wakamba ne: “Patukayi munkatshi muende, dilamayi  bakezuke.” (Yeshaya 52:11; 2 Kolinto 6:17) Ke bualu kayi tudi ne bua kubenga bualu buonso budi mu diumvuangana ne tshitendelelu tshia dishima.

17, 18. a) “Babilona Munene” ntshinyi? b) Bua tshinyi mbimpe kupatukamu ne lukasa?

¹⁷ Tshitendelelu tshia dishima ntshitendelelu kayi? Ntshitendelelu tshionso tshidi tshitulongesha bua kutendelela Nzambi mu mushindu udi ubengangana ne Dîyi diende. Bible udi ubikila bitendelelu bionso bia dishima ne: “Babilona Munene.” (Buakabuluibua 17:5) Bua tshinyi? Bualu panyima pa Mvula wa kabutu wa mu matuku a Noa, malongesha a bungi a bitendelelu bia dishima akatuadijila mu tshimenga tshia Babilona. Malongesha a dishima au akatangalaka pa buloba bujima. Tshilejilu, bantu ba mu tshimenga tshia Babilona bavua batendelela nzambi isatu misangisha kaba kamue. Bia muomumue lelu, bitendelelu bia bungi bidi bilongesha ne: Nzambi udi Busatu Bunsantu. Kadi Bible yeye udi ulongesha ne: kudi anu Nzambi mulelela umue, Yehowa, ne Yezu m’Muanende. (Yone 17:3) Bantu ba mu Babilona bavua kabidi bitaba ne: muntu udi ne tshitupa kampanda tshidi tshishala ne muoyo padi mubidi ufua, ne tshitupa etshi tshidi mua kukenga mu iferno wa kapia. Ki ndilongesha dilelela to.—Tangila dimanyisha dia ku ndekelu 14, 17, ne 18.

¹⁸ Nzambi ukadi mumanyishe ne: mu katupa kîpi emu, bitendelelu bia dishima bionso nebibutudibue. (Buakabuluibua 18:8) Udi mumvue bua tshinyi udi ne bua kupatuka mu tshitendelelu tshia dishima ne lukasa anyi? Yehowa Nzambi mmusue bua upatukamu kumpala kua kutshibutulabu.—Buakabuluibua 18:4.

19. Paudi wangata dipangadika dia kuenzela Yehowa mudimu, neakuambuluishe mushindu kayi?

¹⁹ Paudi wangata dipangadika dia kumbuka mu tshitendelelu tshia dishima ne kuenzela Yehowa mudimu, balunda bebe bakuabu anyi bena mu dîku dienu kabakumvua  pamuapa tshiudi muangatshile dipangadika adi to. Badi mua kutuadija too ne kukutatshisha. Kadi Yehowa kakukulekela to. Neubuele mu dîku dia pa buloba bujima dia bantu miliyo ya bungi badi banangangane bushuwa, ne newikale ne ditekemena dia kupeta muoyo wa tshiendelele mu bulongolodi bupiabupia bua Nzambi. (Mâko 10:28-30) Balunda bebe ne bena mu dîku dienu badi bakutatshisha bualu udi muangate dipangadika dia kuenzela Yehowa mudimu nebalue pamuapa kuangata pabu dipangadika dia kulonga Bible.

20. Bua tshinyi bidi bikengela kutendelela Nzambi mu mushindu muimpe?

²⁰ Mu matuku makese emu, Nzambi neumbushe malu mabi onso, ne Bukalenge buende nebukokeshe pa buloba bujima. (2 Petelo 3:9, 13) Netshikale tshikondo tshimpe be! Bantu bonso nebatendelele Yehowa mu mushindu udiye musue. Nunku mbimpe wangate dipangadika mpindieu dia kutendelela Nzambi mu mushindu muimpe.