1. Юмылан кузе чын кумалаш, кӧ каласен кертеш?

ШУКО религий ойла, пуйто Юмо нерген чыным каласкала. Но чыла религийыште чын лийын огеш керт, вет кажне религий Юмо нерген шке семын туныкта. Тугеже Юмылан кузе чын кумалаш да тудын нерген чыным кушеч пален налаш? Тидын нерген Иегова Юмо деч веле пален налаш лиеш.

2. Юмылан кузе чын кумалаш, кушеч пален налын кертына?

² Иегова, тудлан кузе чын кумалаш пален налашлан, мыланна Библийым пуэн. Сандене тудым умбакыжат шымлыза. Юмо тыланда библийысе туныктымаш-влакым умылен налаш полша, вет тудо тендам йӧрата да тендан илышдам саемдынеже (Исаия 48:17).

3. Юмо мемнан деч мом вуча?

³ Южо еҥ-влак ойлат, пуйто чыла религий Юмылан йӧрышӧ. Но Иисус Христос тидлан туныктен огыл. Тудо теве мом каласен: «Мыланем „Господь, Господь“ манше-влак кокла гыч Пылпомыш Кугыжанышыш чыланжак огыт пуро, тушко Пылпомышсо Ачамын эрыкшым шуктышо-влак веле логалыт». Сандене Юмын эрыкшым пален налаш да тудым шукташ кӱлеш.  Тидым ышташ чот кӱлешан, вет Иисусын каласымыже почеш нуно, кӧмыт Юмын эрыкшым огыт шукто, «закондымылыкым ыштыше-влак» улыт (Матфейын 7:21—23).

4. Юмын эрыкшым шуктымо нерген Иисус мом каласен?

⁴ Юмын эрыкшым шукташ куштылго огеш лий манын, Иисус ойлен. Тудо каласен: «Шыгыр капкаш пурыза, вет колымашке наҥгайыше капка лопка, корно кумда, шукын тиде корно дене каят. Илышыш наҥгайыше капка шыгыр, корно аҥысыр, шагалынже тудым кычал муыт» (Матфейын 7:13, 14). Аҥысыр корно, вес семынже Юмо деке чын корно, курымашлык илышыш наҥгая. А кумда корно, вес семынже Юмо деке йоҥылыш корно, колымашыш наҥгая. Иегова иктынат колымыжым ынеж уж, сандене кажне айдемылан тудын нерген пален налаш йӧным пуа (2 Петрын 3:9).

5. Юмын чын служитлышыже-влакым кузе пален налаш?

⁵ Иисусын каласымыж почеш Юмын чын служитлышыже-влакым пашашт да туныктымашышт дене пален налаш лиеш. Тудо каласен: «Нуным те саскашт дене паледа». Да ешарен: «Сай пушеҥге сай саскам пуа» (Матфейын 7:16, 17). Юмын служитлышыже-влак йоҥылышым нигунамат огыт ыште манын, тиде огеш ончыкто. Но нуно Юмылан келшышын эре ышташ  тыршат. Юмын чын служитлышыже-влак мо дене ойыртемалтыт, айста пален налына.

6, 7. Юмылан кумалмаш молан Библий негызеш лийшаш? Иисусын примерже мемнам мо шотышто туныкта?

⁶ Юмын чын служитлышыже-влакын туныктымашышт Библиеш негызлалтеш. Библийыште возымо: «Чыла Возымаш Юмын Шӱлыш деч лектын да туныкташ, титакым чараш лукташ, койыш-шоктышым тӧрлаш, чын ыштымашке виктараш пайдале. Тугеже, Юмын айдемыжын нимогай ситыдымашыже уке, тудо чыла поро пашаланат ямдылыме лиеш» (2 Тимофейлан 3:16, 17). Апостол Павел христиан-влаклан возен: «Мемнан деч Юмын шомакым колмекыда, те тудым айдеме шомак семын огыл, а тудо чынжымак могай... Юмын виян ыштыше шомакше семын ушешда коденда» (1 Фессалоникысе-влаклан 2:13). Юмын Мутшо гына — Библий — кумалмашын негызше. Юмылан кумалмаш айдеме шонымашеш да тӱрлӧ йӱлаеш негызлалтшаш огыл.

⁷ Иисусын чыла туныктымашыже Юмын Мутшо негызеш лийын. (Иоаннын 17:17 лудын лекса.) Туныктымыж годым тудо Священный Возымаш гыч шонымаш-влакым чӱчкыдын кучылтын (Матфейын 4:4, 7, 10). Юмын чын служитлышыже-влак Иисус деч примерым налыт — нуно Библий негызеш гына туныктат.

8. Юмылан служитлымаш нерген Иисус мом каласен?

 ⁸ Ик чын Иегова Юмылан кумалыт. Псаломышто 82:19 каласыме: «Тыйын лӱмет — Господь [«Иегова», УТ], да чыла мландылан Кӱшылсӧ Юмо Ик Тый гына улат». Еҥ-влак чын Юмым палышт манын, Иисусын кугу кумылжо лийын. Сандене Иисус Юмын лӱмжӧ нерген калыклан каласкален. (Иоаннын 17:6 лудын лекса.) Иисус каласен: «Господь [«Иегова», УТ] Юметлан, сукен, вуйым саве, ик Тудланак веле служитле» (Матфейын 4:10). Юмын служитлышыже-влак Иисус деч примерым налыт. Нуно Иеговалан веле служитлат да тудым лӱмжӧ дене маныт. Нуно весе-влаклан тиде лӱм нерген да ончыкылык шотышто Юмын шонымашыже нерген каласкалат.

9, 10. Юмын служитлышыже-влак икте-весым йӧратат манын, кушеч коеш?

⁹ Икте-весым чынжымак йӧратат. Иисус шке тунемшыж-влакым икте-весыштым йӧраташ туныктен. Юмын чын служитлышыже-влак тыгакак ыштат. (Иоаннын 13:35 лудын лекса.) Айдемын поянлыкшым але могай кундем да калык гыч улмыжым нуно огыт ончо. Нуно икте-весыштым иза-ака-влак семын йӧратат (Колоссян-влаклан 3:14). Сандене нуно сарыш огыт кошт да еҥ-влакым огыт пушт. Библийыште ойлалтеш: «Кӧ Юмын, а кӧ диаволын икшывыже, тыге палаш лиеш. Кӧ чын ок ыште — Юмо деч  огыл, тыгак иза-шольыжым йӧратыдыме еҥат Юмо деч огыл». Тыгак тушто возымо: «Ме икте-весынам йӧратышаш улына. Ме Каин гай лийшаш огынал. Тудо осал деч лийын да шке шольыжым пуштын» (1 Иоаннын 3:10—12; 4:20, 21).

¹⁰ Юмын чын служитлышыже-влак, икте-весылан полшаш манын, шке вийым, жапым да материальный поянлыкым пуаш ямде улыт (Еврей-влаклан 10:24, 25). Нуно чыла еҥлан порым ыштат (Галат-влаклан 6:10).

11. Иисус Христос гоч гына утарымаш лийын кертеш манын, молан ӱшанаш кӱлеш?

¹¹ Иисус Христосым колыштыт, вет тудын гоч гына утарымаш лийын кертеш. Библийыште возымо: «Уке вес лӱм кава йымалне айдемылан пуымо, кудын дене лиеш ыле мыланна утаралташ» (Апост. пашашт 4:12, У Сугынь, 1986). Иисус Юмым колыштшо еҥ-влак верч шке илышыжым тӱлен налмаш семын пуыжо манын, Иегова тудым мландыш колтен. Тидын нерген 5-ше ужаш гыч пален налынна (Матфейын 20:28). Тыгак, Иегова Иисусым мландым вуйлаташ шогалтен. Сандене курымеш илымына шуэш гын, ме Иисусым колыштшаш улына. Тыге Библийыште возымо. (Иоаннын 3:36 лудын лекса.)

12. Юмын служитлышыже-влак политике дене кылым молан огыт кучо?

¹² Политике дене кылым огыт кучо. Иисус Христос политикыш пурен огыл да тудын  дене нимогай кылым кучен огыл. Судышто Иисус римысе вуйлатыше Пилатлан тыге каласен: «Мыйын Кугыжанышем тиде тӱня деч огыл». (Иоаннын 18:36 лудын лекса.) Христос семынак Юмын служитлышыже-влак Юмын Кугыжанышлан ӱшанле улыт. Сандене нунын кокла гыч иктат политике дене кылым огеш кучо. Но кажныже шке элын законжым колыштеш, вет Библийын каласымыж почеш «кӱшыл властьым», вес мут дене правительствым, колышташ кӱлеш (Римлян-влаклан 13:1). Но иктаж-могай закон Юмын законжо ваштареш ышташ тарата гын, Юмын служитлышыже-влак апостол-влак семын ыштат. Икана апостол-влак каласеныт: «Юмым айдеме деч утларак колыштман» (Апост. пашашт 5:29; Маркын 12:17).

13. Юмын чын служитлышыже-влак мо нерген каласкалат?

¹³ Юмын Кугыжаныш гына еҥ-влакын чыла нелылыкыштым пытара манын ӱшанат. Иисусын ойлымыж почеш «Кугыжанышын... Поро Уверже» уло мланде мучко каласкалыме лиеш. (Матфейын 24:14 лудын лекса.) Ик правительстват ыштен огеш керт тудым, мом Юмын Кугыжанышыже ышта (Псалом 145:3). Иисус тиде Кугыжанышын толмыж нерген кумалаш кӱштен: «Тыйын Кугыжанышет толжо, Тыйын эрыкет мланде ӱмбалнат пылпомышсо гаяк лийже» (Матфейын 6:10). Библийын ончылгоч каласымыж ден келшышын, Юмын Кугыжанышыже  чыла правительствым пытара, а шкеже «курымеш шогаш тӱҥалеш» (Даниил 2:44).

14. Юмылан кӧ чын служитла, кузе шонеда?

¹⁴ Чыла тиде ойыртемым шотыш налын, шке деч йодса: Библий негызеш кӧ туныкта? Юмын лӱмжӧ нерген кӧ каласкала? Икте-весым чынжымак кӧ йӧрата? Иисус Христос гоч гына утарымаш лийын кертеш манын, кӧ ӱшана? Политике дене кылым кӧ огеш кучо? Юмын Кугыжанышыже гына чыла нелылыкым пытарен кертеш манын, кӧ каласкала? Тиде Иегован Таныкше-влак (Исаия 43:10—12).

15. Кумалмашна Юмылан келшыже манын, мом ыштыман?

¹⁵ Юмо уло манын ӱшанаш гына огеш сите. Демон-влакат тидлан ӱшанат, но Юмым огыт колышт (Иаковын 2:19). Кумалмашна Юмылан келшыже манын, тудын улмыжлан ӱшанаш гына огеш сите, тудын чыла кӱштымашыжым шукташ кӱлеш.

16. Ме шоя религий ден молан нимогай кылым кучышаш огынал?

¹⁶ Мемнан кумалмашна Юмылан йӧрышӧ лийже манын, ме шоя религий дене нимогай кылым кучышаш огынал. Исаия пророк возен: «Тушечын лекса... шкендан арулыкдам аралыза» (Исаия 52:11; 2 Коринфян-влаклан 6:17). Теве молан шоя религий ден кылдалтше чыла паша ден ӱзгар деч ме утлышаш улына.

17, 18. Мо тыгай «кугу Вавилон» да молан тушечын жапым шуйкалыде лекташ кӱлеш?

 ¹⁷ Могай религийым шоя религийлан шотлаш лиеш? Тыгай религийым, кудын туныктымашыже Библий дене келшен огеш тол. Библийыште чыла шоя религийым «кугу Вавилон» манме (Почмаш 17:5). Молан? Кугу вӱд ташлымаш деч вара Вавилон олаште пеш шуко шоя туныктымаш шочын. Нине туныктымаш мланде мучко шарленыт. Мутлан, Вавилонышто илыше еҥ-влак кум юмо гыч шогышо триада-влаклан кумалыныт. Кызытат шуко религийыште Юмым Троицылан шотлат. Но Библийыште раш возымо: Юмо икте гына — Иегова, а Иисус Христос — тудын Эргыже (Иоаннын 17:3). Тыгак Вавилонышто илыше-влак ӱшаненыт, пуйто колымаш деч вара айдемын чонжо умбакыжат ила да тамыкыш логалын кертеш. Но тиде чын огыл. (14, 17-ше да 18-ше ешартыш статьялам ончыза.)

¹⁸ Юмо чыла шоя религийым вашке пытараш сӧра (Почмаш 18:8). Сандене шоя религий гыч жапым шуйкалыде лекташ кӱлеш. Вараш кодаш огыл манын, Иегова кызытак тидым ышташ тендам тарата (Почмаш 18:4).

19. Иеговалан служитлаш тӱҥалыда гын, тудо тендан верч кузе тыршаш тӱҥалеш?

¹⁹ Шоя религий гыч лектын, те Иеговалан служитлаш тӱҥалыда гын, йолташда але родо-влак гыч иктаж-кӧжӧ ваштареш шогалын кертеш.  Но Иегова тендам огеш кодо. Иегован кугу ешыже миллионло еҥ гыч шога. Нуно тӱрлӧ наций гыч улыт да икте-весым йӧратат. Иеговалан служитлаш тӱҥалын, те Юмын кугу ешын ужашыже лийыда. Тыгак Юмын сӧрымӧ у тӱняште курымеш илаш тендан ӱшанда лиеш (Маркын 10:28—30). Лийын кертеш, жап эртымеке, тендан родо-влак гыч иктаж-кӧжӧ, эн ончыч ваштареш лийын гынат, Библийым шымлаш тӱҥалеш.

20. Молан Иеговалан служитлаш кызытак тӱҥалман?

²⁰ Вашке Юмо мланде ӱмбалне чыла осалым пытара, да тудын Кугыжанышыже вуйлаташ тӱҥалеш (2 Петрын 3:9, 13). Тиде жапым ме чот вучена, вет тунам чыла еҥ Иеговалан чын кумалаш тӱҥалеш. Иеговалан служитлаш кызытак тӱҥалза.