1. ¿Ndáana kivi ka̱ʼa̱n xíʼinyó ndáa ki̱ʼva xíniñúʼu ndasakáʼnuyó Ndióxi̱?

KU̱A̱ʼÁNÍ na̱ veʼe-ñu̱ʼu káʼa̱nna ña̱ sánáʼa̱na ña̱ nda̱a̱ xa̱ʼa̱ Ndióxi̱. Soo su̱ví ña̱ nda̱a̱ kúú ña̱yóʼo, chi na̱ veʼe-ñu̱ʼu xa̱a̱ síín síín ña̱ʼa sánáʼa̱na xa̱ʼa̱ Ndióxi̱ ta saátu xa̱ʼa̱ ndáa ki̱ʼva xíniñúʼu ndasakáʼnuyóra. Tá saá, ¿ndáa ki̱ʼva kunda̱a̱-iniyó ndáa ña̱ kúú religión ña̱ nda̱a̱? Iinlá Jehová kúú ta̱ kivi ka̱ʼa̱n xíʼinyó ndáa ki̱ʼva xíniñúʼu ndasakáʼnuyóra.

2. ¿Ndáaña xíniñúʼu keʼún ña̱ va̱ʼa kunda̱a̱-iniún ndáa ki̱ʼva ndasakáʼnuyó Ndióxi̱?

² Jehová ta̱xira Biblia ndaʼa̱yó ña̱ va̱ʼa chindeétáʼanña xíʼinyó ña̱ kunda̱a̱-iniyó ndáa ki̱ʼva xíniñúʼu ndasakáʼnuyóra. Xa̱ʼa̱ ña̱kán xíniñúʼu kaʼviún Biblia. Ta mií Jehová chindeétáʼan xíʼún ña̱ kunda̱a̱-iniún xa̱ʼa̱ ña̱ káʼa̱nra, saáchi ndíʼi̱ní-inira xa̱ʼún (Isaías 48:17).

3. ¿Ndáaña kúni̱ Ndióxi̱ ná keʼéyó?

³ Ku̱a̱ʼání na̱ yiví káʼa̱nna ña̱ va̱ʼa ndiʼi religión nu̱ú Ndióxi̱, soo su̱ví ña̱yóʼo kúú ña̱ sa̱náʼa̱ ta̱ Jesús. Ta̱yóʼo ka̱chira: “Su̱ví ndiʼi na̱ káʼa̱n xíʼi̱n ‘Táta, tátaʼ ki̱ʼvi ti̱xin Reino ña̱ íyo chí ndiví. Na̱ kéʼé ña̱ kúni̱ yivái̱ ta̱ íyo chí ndiví kúú na̱ ki̱ʼvi”. Xa̱ʼa̱ ña̱kán, Ndióxi̱ ndátura ña̱ ná kunda̱a̱-iniyó xa̱ʼa̱ ña̱ kúni̱ra ta ná keʼéyóña. Ta ndáyáʼviní ña̱yóʼo, chi ta̱ Jesús ni̱ka̱ʼa̱nra na̱ va̱ása xíniso̱ʼo ña̱ káʼa̱n Ndióxi̱ íyona nda̱a̱ táki̱ʼva íyo na̱ va̱ása kándíxa ña̱ káʼa̱n ley (Mateo 7:21-23).

4. ¿Ndáaña ni̱ka̱ʼa̱n ta̱ Jesús xa̱ʼa̱ ña̱ keʼéyó ña̱ kúni̱ Ndióxi̱?

⁴ Ta̱ Jesús ni̱ka̱ʼa̱nra ña̱ sava yichi̱ ixayo̱ʼvi̱ña xíʼinyó ña̱ keʼéyó ña̱ kúni̱ Ndióxi̱. Chi̱táʼanra ki̱ʼva ña̱ táku na̱ ndásakáʼnu  Ndióxi̱ xíʼin iin yichi̱ ña̱ táñu nu̱ú ku̱a̱ʼa̱n loʼo na̱ yiví. Ta ka̱chira: “Ki̱ʼvindó chí yéʼé táñu. Saáchi yéʼé káʼnu xíʼin yichi̱ ña̱ ndíka̱ kán kúú nu̱ú ku̱a̱ʼa̱n na̱ ndiʼi-xa̱ʼa̱, ta ku̱a̱ʼání kúú na̱ ku̱a̱ʼa̱n kán; ta yéʼé táñu xíʼin yichi̱ táñu, kán kúú nu̱ú ku̱a̱ʼa̱n na̱ kutaku, ta loʼova kúú na̱ ndáni̱ʼíña” (Mateo 7:13, 14). Yichi̱ ña̱ táñu kúú religión ña̱ nda̱a̱, ta yóʼo kúú nu̱ú kivi ndakiʼin na̱ yiví ña̱ koona ndiʼi tiempo. Ta yichi̱ ña̱ ndíka̱ kúú ña̱ veʼe-ñu̱ʼu vatá, ta yóʼo kúú nu̱ú ku̱a̱ʼa̱n na̱ kuvi. Soo Jehová va̱ása kúni̱ra ña̱ ná kuvi nda̱a̱ ni iin na̱ yiví. Xa̱ʼa̱ ña̱kán táxira ña̱ ná sakuaʼa ndiʼi na̱ yiví xa̱ʼa̱ra (2 Pedro 3:9).

5. ¿Ndáa ki̱ʼva kivi ndakuniún ndáa na̱ kúú na̱ ñúʼu ti̱xin religión ña̱ nda̱a̱?

⁵ Ta̱ Jesús ni̱ka̱ʼa̱nra ña̱ kivi ndakuniyó ndáa na̱ kúú na̱ ñúʼu ti̱xin religión ña̱ nda̱a̱. Xa̱ʼa̱ ña̱yóʼo, xíniñúʼu kunda̱a̱-iniyó xa̱ʼa̱ ña̱ kándíxana xíʼin xa̱ʼa̱ ña̱ kéʼéna. Ta̱ Jesús ni̱ka̱ʼa̱nra: “Xíʼin ña̱ kéʼéna ndakunindóna”. Ta ni̱ka̱ʼa̱nkara: “Yitu̱n tú va̱ʼa, ku̱i̱ʼi va̱ʼa táxinú” (Mateo 7:16, 17). Soo ña̱yóʼo va̱ása kúni̱ kachiña, ña̱ kǒo ku̱a̱chi kúúmií na̱ ndásakáʼnu Ndióxi̱. Chi na̱yóʼo ndiʼi tiempo chíka̱a̱na ndee̱ ña̱ keʼéna ña̱ va̱ʼa. Vitin ná kotoyó ndáa ki̱ʼva kivi ndakuniyó ndáa ña̱ kúú religión ña̱ nda̱a̱.

6, 7. a) Na̱ ñúʼu ti̱xin religión ña̱ nda̱a̱, ¿nda̱chun xíniñúʼuna Biblia? b) ¿Ndáaña sánáʼa̱ ña̱ ke̱ʼé ta̱ Jesús miíyó?

⁶ Na̱ ñúʼu ti̱xin religión ña̱ nda̱a̱ sánáʼa̱na ña̱ va̱xi nu̱ú Biblia. Ña̱ Biblia káchiña: “Ndiʼi tu̱ʼun ña̱ ni̱ka̱ʼyi̱, xíʼin ta̱chí yi̱i̱ Ndióxi̱ ni̱ka̱ʼyi̱ña, ta va̱ʼaní sánáʼa̱ña, ta chíka̱a̱ña miíyó yichi̱ nda̱kú tasaá násamaña miíyó xíʼin ña̱ kéʼéyó, ña̱kán na̱ káchíñu nu̱ú Ndióxi̱ nduuna iin na̱ xíni̱ va̱ʼa ta koo tu̱ʼvana ña̱ keʼéna ndiʼi ña̱ʼa” (2 Timoteo 3:16,  17). Ta̱ apóstol Pablo ka̱ʼyíra ña̱yóʼo ku̱a̱ʼa̱n nu̱ú na̱ xi̱ndasakáʼnu Ndióxi̱: “Tá xi̱niso̱ʼondó tu̱ʼun Ndióxi̱, ña̱ ni̱ka̱ʼa̱nndi̱ xíʼinndó ka̱ndíxandóña, soo kǒo níkandíxandó ña̱ kúúña tu̱ʼun na̱ yiví, chi ka̱ndíxandó ña̱ kúúña tu̱ʼun Ndióxi̱” (1 Tesalonicenses 2:13). Na̱ ñúʼu ti̱xin religión ña̱ nda̱a̱ sánáʼa̱na xa̱ʼa̱ ña̱ va̱xi nu̱ú Biblia, saáchi tu̱ʼun Ndióxi̱ kúúña. Ta va̱ása sánáʼa̱na xa̱ʼa̱ ña̱ ndákanixi̱ní na̱ yiví á xa̱ʼa̱ costumbre ña̱ kúúmiína.

⁷ Ndiʼi ña̱ sa̱náʼa̱ ta̱ Jesús nu̱ú tu̱ʼun Ndióxi̱ ka̱naña (kaʼvi Juan 17:17). Ta ndiʼi tiempo xi̱xiniñúʼura tu̱ʼun Ndióxi̱ tá xi̱ka̱ʼa̱nra xíʼin na̱ yiví (Mateo 4:4, 7, 10). Ña̱kán na̱ ndásakáʼnu Ndióxi̱ ndíku̱nna yichi̱ ta̱ Jesús, chi nu̱ú Biblia távána ndiʼi ña̱ sánáʼa̱na.

8. ¿Ndáaña ni̱ka̱ʼa̱n ta̱ Jesús xa̱ʼa̱ ña̱ ndasakáʼnuyó Jehová?

⁸ Iinlá Jehová xíniñúʼu ndasakáʼnuyó. Salmo 83:18 káchiña: “Ná kunda̱a̱-ini na̱ yiví ña̱ ki̱vi̱ yóʼó kúú Jehová, ña̱ iinlá yóʼó kúú ta̱ káʼnu iníísaá ñuyǐví”. Ta̱ Jesús xi̱kuni̱ra ña̱ ná kunda̱a̱ káxi ini na̱ yiví ndáa ta̱ kúú Ndióxi̱ ta̱ nda̱a̱. Xa̱ʼa̱ ña̱kán, sa̱náʼa̱ra na̱ yiví xa̱ʼa̱ ki̱vi̱ Ndióxi̱ (kaʼvi Juan 17:6). Ta̱ Jesús ka̱chira: “Tu̱ʼun Ndióxi̱ káchiña: ‘Jehová Ndióxi̱ún kúú ta̱ xíniñúʼu ndasakáʼnún, ta iinlá nu̱ú ta̱yóʼo xíniñúʼu kachíñúnʼ” (Mateo 4:10). Ña̱kán na̱ ndásakáʼnu Ndióxi̱ ndíku̱nna yichi̱ ta̱ Jesús. Ta iinlá Jehová ndásakáʼnuna, xíniñúʼuna ki̱vi̱ra ta sánáʼa̱na inka na̱ yiví xa̱ʼa̱ ki̱vi̱ra. Ta saátu sánáʼa̱na na̱ yiví xa̱ʼa̱ ña̱ va̱ʼa ña̱ keʼé Ndióxi̱ xa̱ʼa̱ ndiʼiyó.

9, 10. ¿Ndáa ki̱ʼva náʼa̱yó ña̱ kúʼvi̱-iniyó xínitáʼanyó?

⁹ Ná na̱ʼa̱yó ña̱ ndixa kúʼvi̱-iniyó xíniyó inkana. Ta̱ Jesús sa̱náʼa̱ra na̱ discípulora ña̱ kuʼvi̱-inina kunitáʼanna (kaʼvi Juan 13:35). Ta saátu na̱ ñuu Ndióxi̱ na̱ ndóo tiempo vitin kúʼvi̱ní-inina xínitáʼanna ta viíní kítáʼanna ni xa̱a̱ síín ñuuna, ni kúúna na̱ ku̱i̱ká á na̱ ndáʼvi (Colosenses  3:14). Xa̱ʼa̱ ña̱kán, va̱ása ku̱a̱ʼa̱nna nu̱ú íyo guerra, ta ni va̱ása xáʼnína nda̱a̱ ni iin na̱ yiví. Ña̱ Biblia káchiña: “Na̱ se̱ʼe Ndióxi̱ xíʼin na̱ se̱ʼe ta̱ Ndi̱va̱ʼa náʼa̱ miívana xíʼin ña̱yóʼo: na̱ kǒo kéʼé ña̱ va̱ʼa su̱ví se̱ʼe Ndióxi̱ kúúna, saátu na̱ kǒo kúʼvi̱-ini xínitáʼan su̱ví se̱ʼe Ndióxi̱ kúúna”. Ta saátu káʼa̱nña: “Ná kuʼvi̱-iniyó kunitáʼanyó; ta kǒo keʼéyó táʼan ña̱ ke̱ʼé ta̱ Caín, se̱ʼe ta̱ Ndi̱va̱ʼa xi̱kuu ta̱yóʼo chi xa̱ʼníra ñanira” (1 Juan 3:10-12; 4:20, 21).

¹⁰ Xíniñúʼuyó tiempoyó, ndee̱yó xíʼin ña̱ʼa ña̱ kúúmiíyó ña̱ chindeétáʼanyó xíʼin inkana, ta chika̱a̱yó ndee̱ xíʼinna (Hebreos 10:24, 25). Ta saátu kéʼéyó ña̱ va̱ʼa xíʼin ndiʼina (Gálatas 6:10).

11. ¿Nda̱chun xíniso̱ʼoyó ña̱ káʼa̱n ta̱ Jesús?

¹¹ Ná kuniso̱ʼoyó ña̱ káʼa̱n ta̱ Jesús, chi tíxa̱ʼvi ta̱yóʼo kivi kuyatinyó nu̱ú Ndióxi̱. Ña̱ Biblia káchiña: “Kǒo ni iinna kivi sakǎku miíyó, saáchi kǒo inka ki̱vi̱ nu̱ú ñuʼú yóʼo ña̱ níndaka̱xin Ndióxi̱ ña̱ kivi sakǎku miíyó” (Hechos 4:12). Nu̱ú ña̱ capítulo 5 ña̱ libro yóʼo, sa̱kuaʼayó ña̱ chi̱ndaʼá Jehová se̱ʼera ta̱ Jesús ña̱ ni̱xi̱ʼi̱ra xa̱ʼa̱yó ña̱ va̱ʼa sakǎkura na̱ xíniso̱ʼo (Mateo 20:28). Jehová nda̱kaxinra ta̱ Jesús ña̱ koora Rey ta kaʼndachíñura nu̱ú ñuʼú yóʼo. Xa̱ʼa̱ ndiʼi ña̱yóʼo, ña̱ Biblia káʼa̱nña ña̱ xíniñúʼu kuniso̱ʼoyó ña̱ káʼa̱n ta̱ Jesús tá kúni̱yó kooyó ndiʼi tiempo (kaʼvi Juan 3:36).

12. ¿Nda̱chun va̱ása kíʼviyó xíʼin ña̱ política?

¹² Ná va̱ása ki̱ʼviyó xíʼin ña̱ política. Ta̱ Jesús va̱ása níki̱ʼvira xíʼin ña̱ política. Tá tíinna ku̱a̱chi xíʼinra ni̱ka̱ʼa̱nra ña̱yóʼo xíʼin ta̱ chíñu Pilato: “Reinoi̱ su̱ví ña̱ ñuyǐví yóʼo kúúña” (kaʼvi Juan 18:36). Nda̱a̱ táki̱ʼva ke̱ʼé ta̱ Jesús, miíyó nda̱kú íyo iniyó xíʼin Reino Ndióxi̱. Xa̱ʼa̱ ña̱yóʼo va̱ása kíʼviyó xíʼin ña̱ política nda̱a̱ ndáaka ñuu nu̱ú ndóoyó. Soo ña̱ Biblia káʼa̱nña xíʼinyó ña̱ ná kuniso̱ʼoyó ña̱ káʼa̱n na̱ chíñu ñuyǐví yóʼo (Romanos 13:1). Xíniso̱ʼovayó ley ña̱ íyo  ñuu nu̱ú ndóoyó. Soo tá iin ña̱ ley yóʼo íyoña contra xíʼin ña̱ káʼa̱n ley Ndióxi̱, miíyó ndíku̱nyó yichi̱ na̱ apóstol. Na̱yóʼo ka̱china: “Siʼnaka ña̱ káʼa̱n Ndióxi̱ xíniñúʼu kuniso̱ʼondi̱ su̱víka ña̱ káʼa̱n na̱ yiví” (Hechos 5:29; Marcos 12:17).

13. ¿Ndáaña nátúʼunyó xa̱ʼa̱ Reino Ndióxi̱?

¹³ Ná natúʼunyó xíʼin na̱ yiví ña̱ iinlá Reino Ndióxi̱ kúú ña̱ kivi sandíʼi-xa̱ʼa̱ tu̱ndóʼo ña̱ íyo ñuyǐví yóʼo. Ta̱ Jesús ni̱ka̱ʼa̱nra ña̱ xíniñúʼu ku̱ʼu̱nyó natúʼunyó tu̱ʼun va̱ʼa xa̱ʼa̱ Reino Ndióxi̱ iníísaá nu̱ú ñuʼú (kaʼvi Mateo 24:14). Nda̱a̱ ni iin na̱ chíñu ñuyǐví yóʼo va̱ása kívi keʼé táʼan ña̱ keʼé Reino Ndióxi̱ xa̱ʼa̱yó chí nu̱únínu (Salmo 146:3). Ta̱ Jesús sa̱náʼa̱ra miíyó ña̱ xíniñúʼu ndukúyó Reino Ndióxi̱ tá kéʼéyó oración, ka̱chira: “Ná kixaa̱ ña̱ kaʼndachíñún. Ta ná koo ña̱ kúni̱ miíún, nda̱a̱ táki̱ʼva íyo chí ndiví, saá ná koo nu̱ú ñuʼú yóʼo” (Mateo 6:10). Ña̱ Biblia káʼa̱nña xíʼinyó ña̱ sandíʼi-xa̱ʼa̱ Reino Ndióxi̱ ndiʼi na̱ chíñu na̱ íyo nu̱ú ñuʼú yóʼo, ta ndáa iinlá Reino Ndióxi̱ kúú ña̱ kaʼndachíñu nu̱ú ñuʼú yóʼo ndiʼi tiempo (Daniel 2:44).

14. ¿Ndáaña kúú míí religión ña̱ nda̱a̱ túviún?

¹⁴ Xa̱ʼa̱ ña̱ xa̱a̱ na̱kunda̱a̱-iniyó xa̱ʼa̱ ndiʼi ña̱yóʼo, ná nda̱ka̱tu̱ʼunyó miíyó: “¿Ndáana kúú na̱ sánáʼa̱ ña̱ va̱xi nu̱ú Biblia? ¿Ndáana kúú na̱ sánáʼa̱ xa̱ʼa̱ ki̱vi̱ Ndióxi̱? ¿Ndáana kúú na̱ ndixa kúʼvi̱-ini xínitáʼan? ¿Ndáana kúú na̱ kándíxa ña̱ chi̱ndaʼá Ndióxi̱ se̱ʼera ta̱ Jesús ña̱ sa̱kǎkura miíyó? ¿Ndáana kúú na̱ va̱ása kíʼvi xíʼin ña̱ política? ¿Ndáana kúú na̱ nátúʼun xíʼin na̱ yiví ña̱ iinlá Reino Ndióxi̱ kúú ña̱ kivi sandíʼi-xa̱ʼa̱ ndiʼi tu̱ndóʼo?”. Nda̱saa kuití na̱ testigo Jehová kúú na̱ kéʼé ndiʼi ña̱yóʼo (Isaías 43:10-12).

15. ¿Ndáaña xíniñúʼu keʼéyó tá kúni̱yó ná kusi̱í-ini Ndióxi̱ xíʼin ña̱ kéʼéyó?

¹⁵ Va̱ása xíniñúʼu kandíxa kuitíyó ña̱ íyo Ndióxi̱.  Chi nda̱a̱ na̱ ta̱chí ndi̱va̱ʼa kándíxana ña̱ íyora, soo va̱ása xíniso̱ʼona ña̱ káʼa̱nra (Santiago 2:19). Tá kúni̱yó ña̱ ná kusi̱í-ini Ndióxi̱ xíʼin ña̱ kéʼéyó, va̱ása xíniñúʼu kandíxa kuitíyó ña̱ íyora chi xíniñúʼu keʼéyó ña̱ káʼa̱nra xíʼinyó.

16. ¿Nda̱chun xíniñúʼu sandákooyó veʼe-ñu̱ʼu vatá?

¹⁶ Ña̱ va̱ʼa kusi̱í-ini Ndióxi̱ xíʼin ña̱ kéʼéyó, xíniñúʼu sandákooyó veʼe-ñu̱ʼu vatá. Ta̱ profeta Isaías ka̱ʼyíra ña̱yóʼo: “Keendó ti̱xinña, ta limpio koondó” (Isaías 52:11; 2 Corintios 6:17). Xa̱ʼa̱ ña̱yóʼo xíniñúʼu kundasíyó kuniyó ndiʼi ña̱ʼa ña̱ kítáʼan xíʼin ña̱ veʼe-ñu̱ʼu vatá.

17, 18. a) ¿Ndáaña kúú “Babilonia ña̱ káʼnu”? b) ¿Nda̱chun ndáyáʼviní ña̱ ndi̱ku̱n ná sandákoún veʼe-ñu̱ʼu vatá?

¹⁷ ¿Ndáaña kúú veʼe-ñu̱ʼu vatá? Ndiʼi na̱ veʼe-ñu̱ʼu káʼa̱nna ña̱ ndásakáʼnuna Ndióxi̱, soo va̱ása kéʼéna ña̱ va̱xi nu̱ú tu̱ʼunra. Ña̱ Biblia káʼa̱nña ña̱ ndiʼi na̱ veʼe-ñu̱ʼu vatá nanína “Babilonia ña̱ káʼnu” (Apocalipsis 17:5). ¿Nda̱chun? Saáchi tándi̱ʼi ku̱un sa̱vi̱ kini, na̱ yiví ki̱xáʼana sánáʼa̱na ku̱a̱ʼání ña̱ vatá ñuu Babilonia. Ta ña̱ vatá ña̱ xi̱sanáʼa̱na iníísaá nu̱ú ñuʼú ki̱xáʼaña íyoña. Tá kúú, na̱ ñuu Babilonia u̱ni̱ xi̱chitáʼanna ndióxi̱ na̱ xi̱ndasakáʼnuna. Tiempo vitin ku̱a̱ʼání na̱ veʼe-ñu̱ʼu sánáʼa̱na, Ndióxi̱ kúúra iin trinidad á u̱ni̱ kúúra, soo ña̱ Biblia káxiní káʼa̱nña ña̱ iinlá Jehová kúú Ndióxi̱ ta̱ nda̱a̱ ta ta̱ Jesús kúú se̱ʼera (Juan 17:3). Ta saátu xi̱kandíxa na̱ ñuu Babilonia ña̱ tákuka iin táʼví na̱ yiví tá xíʼi̱na ta kivi xo̱ʼvi̱na ti̱xin ndayá á infierno. Soo su̱ví ña̱ nda̱a̱ kúú ña̱yóʼo. (Koto nota 14, “Ña̱ trinidad, iin ña̱ vatá kúúña”, xíʼin nota 17 “Níma̱”, ta saátu ña̱ 18, “Espíritu”).

¹⁸ Ndióxi̱ ni̱ka̱ʼa̱nra ña̱ si̱lóʼo kúma̱ní ña̱ ndiʼi-xa̱ʼa̱ ndiʼi na̱ veʼe-ñu̱ʼu vatá (Apocalipsis 18:8). ¿Á kúnda̱a̱-iniún nda̱chun kúú ña̱ ndáyáʼviní ndi̱ku̱n sandákoún veʼe-ñu̱ʼu vatá? Jehová kúni̱ra ña̱ kamaní ná keʼún ña̱yóʼo chi si̱lóʼoní tiempo kíndo̱o ña̱ ndiʼi-xa̱ʼa̱ña (Apocalipsis 18:4).

19. ¿Ndáa ki̱ʼva kundaa Jehová yóʼó tá ná ndaka̱xiún ña̱ kachíñún nu̱úra?

 ¹⁹ Tá ná sandákoún veʼe-ñu̱ʼu vatá ta kachíñún nu̱ú Jehová, sana na̱ veʼún xíʼin na̱ migoún va̱ása kunda̱a̱-inina xíʼin ña̱ kéʼún, ta sana kuni̱na kasina nu̱ún. Soo Jehová kundaara yóʼó. Taxira ku̱a̱ʼání na̱ yiví na̱ ndixa kúʼvi̱-ini xínitáʼan ña̱ koona na̱ veʼún ta saátu taxira ña̱ koún ndiʼi tiempo nu̱ú ñuyǐví xa̱á (Marcos 10:28-30). Sana na̱ veʼún xíʼin na̱ migoún na̱ sási nu̱ún ña̱ kachíñún nu̱ú Jehová vitin, kuni̱na sakuaʼana xa̱ʼa̱ ña̱ káʼa̱n Biblia chí nu̱únínu.

20. ¿Nda̱chun ndáyáʼviní ña̱ ná kundiku̱ún religión ña̱ nda̱a̱?

²⁰ Si̱lóʼo kúma̱ní ta sandíʼi-xa̱ʼa̱ Ndióxi̱ ndiʼi ña̱ kini, ta Reino miíra kúú ña̱ kaʼndachíñu nu̱ú ñuʼú yóʼo (2 Pedro 3:9, 13). Ta iin tiempo ña̱ va̱ʼaní koo ña̱yóʼo. Ndiʼina ndasakáʼnuna Jehová nda̱a̱ táki̱ʼva kúni̱ miíra. Xa̱ʼa̱ ña̱yóʼo, vitin kúú ña̱ ndáyáʼviní ña̱ ná chika̱ún ndee̱ ña̱ kundiku̱ún religión ña̱ nda̱a̱.