1. Ko hai kua lata ke tala mai ki a tautolu e puhala hako ke tapuaki ke he Atua?

LAULAHI he tau lotu ne talahau kua fakaako e lautolu e kupu mooli hagaao ke he Atua. Ka e nakai maeke ke pihia, ha kua kehekehe e tau fakaakoaga he tau lotu hagaao ke he Atua mo e puhala kua lata a tautolu ke tapuaki ki a ia. Iloa fēfē e tautolu e puhala hako ke tapuaki ke he Atua? Ko Iehova hokoia ni ka tala mai ki a tautolu e puhala kua lata ke tapuaki ki a ia.

2. Iloa fēfē e koe e puhala hako ke tapuaki ke he Atua?

² Foaki mai e Iehova ki a tautolu e Tohi Tapu ke maeke ia tautolu ke fakaako e puhala hako ke tapuaki ki a ia. Ti fakaako ke he Tohi Tapu, to lagomatai e Iehova a koe ke aoga mai he tau fakaakoaga haana ha kua manamanatu mooli a Ia ki a koe.​—Isaia 48:17.

3. Ko e heigoa ne manako e Atua ke taute e tautolu?

³ Pehē falu tagata na talia he Atua e tau lotu oti, ka e nakai pihia e fakaakoaga ha Iesu ki a tautolu. Pehē a ia: “Nakai hohoko ke he kautu he lagi a lautolu oti kua pehe mai kia au, Ko e Iki na e, ko e Iki na e; ka ko ia ni kua eke e finagalo he haku a Matua.” Ti kua aoga ma tautolu ke iloa e finagalo he Atua mo e taute ai. Ko e mena aoga lahi anei ha kua fakatatai e Iesu e tau tagata ne nakai omaoma ke he Atua ko e tau tagata kolokolovao, “ne eke e tau mahani kelea.”​—Mataio 7:21-23.

4. Ko e heigoa ne talahau e Iesu hagaao ke he taute he finagalo he Atua?

⁴ Hataki mai e Iesu ka manako a tautolu ke taute e finagalo  he Atua, to fehagai a tautolu mo e tau paleko. Pehē a ia: “Kia huhū atu a mutolu ke he gutuhala pukilu; ha ko e mena pulahi e gutuhala, ti laulahi foki e hala ke pu atu ke he malaia, kua tokologa foki a lautolu kua huhū atu ki ai. Ko e mena pukilu e gutuhala, ti lautote foki e hala ke pu atu ke he moui, kua tokogaogao foki a lautolu ke moua.” (Mataio 7:13, 14) Ko e hala pukilu, po ke puhala hako ke tapuaki ke he Atua kua takitaki atu ke he moui tukulagi. Ko e hala laulahi, po ke puhala hepe ke tapuaki ke he Atua kua takitaki atu ke he mate. Ka e nakai finagalo a Iehova ke mate ha tagata. Foaki age e ia ke he tau tagata oti e magaaho ke fakaako hagaao ki a ia.​—2 Peteru 3:9.

5. Kitia fēfē e koe e tau tagata ne hako e puhala ne tapuaki ke he Atua?

⁵ Pehē a Iesu kua maeke a tautolu ke kitia e tau tagata ne hako e puhala ne tapuaki ke he Atua. Kitia e tautolu e mena nei he kumikumi ke he tau taofiaga ha lautolu mo e tau gahua ha lautolu. Pehē a ia: “To iloa mali e mutolu a lautolu ke he tau fua ha lautolu.” Ti lafi e ia: “[Ko] e tau akau mitaki oti kua takitaha mo e fua mai e tau fua mitaki.” (Mataio 7:16, 17) Nakai kakano e mena nei kua mitaki katoatoa a lautolu ne tapuaki ke he Atua. Ka e lali tumau e tau fekafekau he Atua ke taute e mena hako. To kitia e tautolu mogonei e tuaga ka lagomatai a tautolu ke mailoga e tau tagata ne hako e puhala ne tapuaki ke he Atua.

6, 7. Ko e ha e tapuakiaga mooli ne fakavē ke he Tohi Tapu? Ko e heigoa kua fakaako e tautolu mai he fakafifitakiaga ha Iesu?

⁶ Ko e tapuakiaga ha tautolu kua lata ke fakavē ke he Tohi Tapu. Pehē e Tohi Tapu: “Ko e tau Tohi Tapu oti kana mai he Agaga he Atua ia, kua aoga ni ke fakaako ai, ke fakatonu ai, ke akonaki ai, ke fakailoilo ai foki ke he tututonu, Kia katoatoa ai e mitaki he tagata he Atua, kia taute ni a ia  ke he tau gahua mitaki oti kana.” (2 Timoteo 3:16, 17) Tohi he aposetolo ko Paulo ke he tau Kerisiano: “Ha kua talia e mutolu e kupu he Atua ne fanogonogo mai ai a mutolu kia mautolu, ti talia ai e mutolu nakai ko e kupu he tau tagata, ka ko e kupu he Atua (ko e moli ni haia).” (1 Tesalonia 2:13) Ko e tapuakiaga mooli kua fakavē hokoia ni ke he Kupu he Atua, ko e Tohi Tapu. Nakai fakavē ke he tau manatu he tagata, tau aga tuai, po ke ha mena foki.

⁷ Ko e tau mena oti ne fakaako e Iesu kua fakavē ke he Kupu he Atua. (Totou Ioane 17:17.) Fatiaki tumau e ia e Tau Tohiaga Tapu. (Mataio 4:4, 7, 10) Kua muitua e tau fekafekau mooli he Atua ke he fakafifitakiaga ha Iesu ti fakavē foki e tau fakaakoaga oti ha lautolu ke he Tohi Tapu.

8. Ko e heigoa ne fakaako e Iesu ki a tautolu ke he puhala ke tapuaki ki a Iehova?

⁸ Lata a tautolu ke tapuaki hokoia ni ki a Iehova. Pehē e Salamo 83:18: “Ko e hāu a higoa ko Iehova, hoko koe ni kua Mua ue atu ke he lalolagi oti.” Manako a Iesu ke iloa tonu he tau tagata e Atua mooli, ti fakaako e ia ke he tau tagata e higoa he Atua. (Totou Ioane 17:6.) Pehē a Iesu: “Kia hufeilo atu a koe ke he Iki [Iehova] hau a Atua, ko ia ni hokoia ke fekafekau atu a koe ki ai.” (Mataio 4:10) Ko e mena ia, ko tautolu ko e tau fekafekau he Atua, to mumuitua a tautolu ke he fakafifitakiaga ha Iesu. Tapuaki hokoia ni a tautolu ki a Iehova, fakaaoga e higoa haana, mo e fakaako ke he falu e higoa he Atua mo e tau mena ka taute e Ia ma tautolu.

9, 10. Fakakite fēfē e tautolu e fakaalofa ke he taha mo e taha?

⁹ Lata a tautolu ke feofanaki, po ke fakaalofa mooli ke he tau tagata. Fakaako e Iesu e tau tutaki haana ke feofanaki. (Totou Ioane 13:35.) Nakai aoga lahi e tupu maiaga ha tautolu, aga fakamotu, po ke muhukoloa po ke mativa.  Ko e fakaalofa ha tautolu ke he taha mo e taha kua lata ke tamai fakalataha a tautolu ko e tau matakainaga. (Kolose 3:14) Ti nakai o atu a tautolu ke he felakutaki mo e tamate e tau tagata. Pehē e Tohi Tapu: “Ko e mena ia kua iloa ai e fanau he Atua mo e fanau he tiapolo. Ko lautolu gotoa kua nakai eke e mahani tututonu, nakai mai he Atua a lautolu, katoa mo lautolu kua nakai fakaalofa ke he tau matakainaga ha lautolu.” Ti lafi ai: “Kia feofanaki a tautolu. Nakai tuga a Kaino ne mai ia ia ne mahani kelea, ne kelipopo foki e ia hana matakainaga.”​—1 Ioane 3:10-12; 4:20, 21.

¹⁰ Fakaaoga e tautolu e tau magaaho, tau malolō, mo e tau koloa ke lagomatai mo e fakamafana ke he taha mo e taha. (Heperu 10:24, 25) “Kia mahani mitaki a tautolu . . . ke he tau tagata oti kana.”​—Kalatia 6:10.

11. Ko e ha kua talia e tautolu ko Iesu e puhala ke he Atua?

¹¹ Lata a tautolu ke omaoma ki a Iesu ha ko ia e puhala ke he Atua. Pehē e Tohi Tapu: “Nakai tokai foki e fakamouiaga ke he taha; nakai fakai taha higoa i lalo he lagi kua foaki mai ke he tau tagata, ke maeke ai ke fakamomoui a tautolu.” (Gahua 4:12) He Veveheaga 5 he tohi nei, fakaako e tautolu na fakafano mai e Iehova a Iesu ke foaki haana moui mo lukutoto ma e tau tagata omaoma. (Mataio 20:28) Ne fifili e Iehova a Iesu ke pule ko e Patuiki ke he lalolagi. Kakano haia ne tala mai e Tohi Tapu kua lata a tautolu ke omaoma ki a Iesu ka manako ke momoui tukulagi.​—Totou Ioane 3:36.

12. Ko e ha kua nakai fai vala a tautolu ke he tau mena fakapolitika?

¹² Nakai lata a tautolu ke fai vala ke he tau mena fakapolitika. Nakai fakalataha a Iesu ke he tau mena fakapolitika. He magaaho ne fakafili ai, ne tala age a ia ke he pule Roma ko Pilato: “Nakai ko e kautu he lalolagi nai haku a kautu.” (Totou Ioane 18:36.) Tuga a Iesu, kua fakamooli a  tautolu ke he Kautu he Atua he lagi, ti ko e kakano nei, pete e matakavi kua nonofo ai a tautolu, nakai fai vala a tautolu ke he tau mena fakapolitika. Ka e poaki mai e Tohi Tapu ke omaoma “ke he tau tui ne mua,” ko e tau fakatufono a ia. (Roma 13:1) Omaoma a tautolu ke he tau matafakatufono he motu ne nonofo ai a tautolu. Ka ko e magaaho ka nakai felauaki e matafakatufono ia mo e tau fakatufono he Atua, kua fifitaki e tautolu e tau aposetolo ne pehē: “Kua lata ni ke mua e omaoma ke he Atua ke he omaoma ke he tau tagata.”​—Gahua 5:29; Mareko 12:17.

13. Ko e heigoa ha tautolu kua fakamatala hagaao ke he Kautu he Atua?

¹³ Talitonu a tautolu ko e Kautu he Atua e tali hokoia ni ke he tau lekua he lalolagi. Pehē a Iesu ko e “tala mitaki nai he kautu” to fakamatala ke he tau motu oti. (Totou Mataio 24:14.) Nakai maeke e fakatufono he tagata ke tamai e moui kua atāina he tau lekua mo e moua e mafola, ko e Kautu ni he Atua ka taute e mena ia. (Salamo 146:3) Fakaako e Iesu a tautolu ke liogi ma e Kautu he Atua he pehē a ia: “Kia hoko mai hau a kautu. Kia eke hau a finagalo ke he lalolagi, tuga ne eke ke he lagi.” (Mataio 6:10) Tala mai he Tohi Tapu ko e Kautu he Atua ka fakaoti tukulagi e tau fakatufono oti he tagata ti ko e Kautu ni he Atua ka “tumau tukulagi.”​—Tanielu 2:44.

14. Ko hai ne manatu e koe kua tapuaki ke he Atua he puhala hako?

¹⁴ He oti e fakaako ke he tau matakupu nei, hūhū hifo ki a koe: ‘Ko hai e matakau ne fakavē e tau fakaakoaga ha lautolu ke he Tohi Tapu? Ko hai ne tala age ke he falu hagaao ke he higoa he Atua? Ko hai ne fakakite e fakaalofa mooli ke he taha mo e taha, ti talitonu ko e Atua ne fakafano mai a Iesu ke fakahao a tautolu? Ko hai ne nakai fai vala ke he tau mena fakapolitika? Ko hai ne fakamatala ko e Kautu he Atua hokoia ni ka utakehe e tau lekua ha tautolu?’ Ko e Tau Fakamoli a Iehova ni.​—Isaia 43:10-12.

15. Ko e heigoa ha tautolu kua lata ke taute ka manako ke talia he Atua e tapuakiaga ha tautolu?

¹⁵ Nakai koenaia ke talitonu na fai Atua. Ne talitonu foki e tau temoni na fai Atua, ka e nakai omaoma a lautolu ki a Ia. (Iakopo 2:19) Ka manako a tautolu ke talia he Atua e tapuakiaga ha tautolu, kua lata ni ke talitonu na fai Atua ti taute foki e tau mena ne talahau e Ia.

16. Ko e ha kua lata a tautolu ke tiaki e lotu fakavai?

¹⁶ Ke talia he Atua e tapuakiaga ha tautolu, latatonu a tautolu ke tiaki e lotu fakavai. Tohi he perofeta ko Isaia: “Kia o [kehe] ā mutolu mai loto ia ia; kia meā a mutolu.” (Isaia 52:11; 2 Korinito 6:17) Kakano haia ati latatonu a tautolu ke tiaki e tau mena oti ne putoia ke he lotu fakavai.

17, 18. Ko e heigoa a ‘Papelonia Lahi,’ ti ko e ha kua lata ke toka mafiti ai?

¹⁷ Ko e heigoa e lotu fakavai? Ko e tau lotu ne fakaako ki a tautolu ke tapuaki ke he Atua he puhala ne nakai tatai mo e Kupu he Atua. Fakahigoa he Tohi Tapu e tau lotu fakavai oti ko ‘Papelonia Lahi.’ (Fakakiteaga 17:5) Ko e ha? He mole e Fakapuke he vahā ha Noa, loga e tau fakaakoaga he lotu fakavai ne kamata he maaga ko Papelonia. Ko e tau fakaakoaga fakavai ia ne holofa ke he lalolagi katoa. Ma e fakatai, ne tapuaki e tau tagata i Papelonia ke he tolu e atua i loto he taha. He vahā nei foki, loga e lotu ne fakaako ko e Atua ko e Tolu Taha Tapu, ka e fakaako fakamaaliali mai he Tohi Tapu kua tokotaha ni e Atua mooli ko Iehova, mo e ko Iesu e Tama haana. (Ioane 17:3) Ne talitonu foki e tau tagata i Papelonia ka mate e tagata kua fai vala ne matutaki ke moui ti maeke ai ke matematekelea he afi tote. Ka e nakai mooli e mena ia.​—Kikite Tala he Matahiku 14 mo e 17.

¹⁸ Talahau tuai he Atua to nakai leva ti utakehe e tau lotu fakavai oti. (Fakakiteaga 18:8) Maama nakai e koe e kakano ke toka mafiti e lotu fakavai? Manako a Iehova ko e Atua ke taute e koe e mena ia neke tōmui.​—Fakakiteaga 18:4.

19. Ka fifili a koe ke fekafekau ki a Iehova, to leveki fēfē e ia a koe?

 ¹⁹ Ka fifili a koe ke toka e lotu fakavai ka e fekafekau ki a Iehova, liga nakai maama he tau kapitiga po ke magafaoa e fifiliaga haau ti liga taute e lautolu e moui haau ke uka. Ka e to nakai tiaki e Iehova a koe. To eke a koe mo vala he magafaoa he lalolagi katoa he tau tagata kua totou miliona nukua fakaalofa mooli e taha ke he taha, mo e to moua e koe e amaamanakiaga ke moui tukulagi he lalolagi foou he Atua. (Mareko 10:28-30) Liga ko e tau kapitiga mo e magafaoa ne totoko e fifiliaga haau ke fekafekau ki a Iehova to fifili ke fakaako e Tohi Tapu he magaaho fakamui.

20. Ko e ha kua aoga ke tapuaki ke he Atua he puhala hako?

²⁰ Nakai leva, to utakehe katoatoa he Atua e mahani kelea ti pule e Kautu haana ke he lalolagi katoa. (2 Peteru 3:9, 13) Ko e magaaho kua mua e mitaki a ia! To tapuaki e tau tagata oti ki a Iehova he puhala ne manako a Iehova ke taute e tautolu. Ti kua aoga ma haau ke taute taha mena mogonei mo e tapuaki ke he Atua he puhala hako.