1. ¿Pillataj niyta atiwanchej imaynatachus Diosta yupaychanata?

¹ CASI tukuy iglesias ninku, Diosmanta cheqanta yachachisqankuta. Chaytaj mana jinachu. Imaraykuchus sapa iglesiapi imaymanata Diosmanta yachachinku. Nitaj uj yuyayllaman chayayta atinkuchu imaynatachus Diosta yupaychanamanta. Jina kajtin, ¿imaynatataj yachasunman mayqen religionchus Diosmanta cheqanta yachachisqanta? Jehová Dioslla niyta atiwanchej, imaynatachus payta yupaychananchejta.

2. Diosta allinta yupaychanapaj, ¿imatá ruwananchej tiyan?

² Jehová Diosqa Bibliapi willawanchej, imaynatachus payta yupaychananchejta. Chayrayku payta allinta yupaychanapajqa, Palabranta estudiananchej tiyan. Jehová Diosqa sapa ujninchejmanta llakikun. Chayrayku pay yanapawasun Palabranta entiendenapaj, chayman jina kausakunapajpis (Isaías 48:17).

3. ¿Imata ruwananchejtataj Dios munan?

³ Wakin runasqa ninku: “Tukuynin iglesias Diosmanta kanku”, nispa.  Jinapis  Jesusqa mana chaytachu yachacherqa. Astawanpis pay nerqa: “Mana tukuy pikunachus ‘Señor, Señor’ niwajkunachu cielopi kaj Gobiernoman yaykonqanku. Manachayqa, cielopi kashaj Tataypa munayninta ruwajkunalla  yaykonqanku”, nispa. Chayrayku Diosninchejqa munan payta rejsinanchejta, payta kusichinapaj jinataj kausakunanchejta. Chaytataj ruwananchejpuni tiyan. Imaraykuchus Jesusqa, Tatanta mana kasukojkunata, “mana allin imasta ruwajkuna” chayri sajrata ruwajkuna kasqankuta nerqa (Mateo 7:21-23).

4. ¿Diospa munayninta ruway atikullanchu?

⁴ Jesusqa nerqa, Diospa munayninta ruwayqa mana atikunallanta. Pay ajinata nerqa: “Kʼullku punkunta yaykuychej, imaraykuchus wañuyman pusaj ñanqa anchotaj jatuntaj, chayninta yaykojkunataj ashkhas kanku. Punkoqa kʼullkumin, kʼullkullataj kausayman pusaj ñanpis, chayta tarejkunaqa pisilla kanku”, nispa (Mateo 7:13, 14). Kʼullku ñanqa cheqan religionwan ninakun, wiñay kausaymantaj pusan. Ancho ñantajrí llulla religionwan ninakun, wañuymantaj pusan. Jehová Diosqa mana munanchu pipis wañunanta. Chayrayku tukuyman paymanta yachachiyta munan (2 Pedro 3:9).

5. ¿Imaynapí yachasunman mayqenchus cheqan religión kasqanta?

⁵ ¿Imaynapí yachasunman mayqen religionchus verdad chayri cheqan kasqanta? Jesusqa cheqan religionta allin sachʼawan kikincharqa. Nerqataj: “Allin sachʼaqa sumajta poqon”, nispa. Chayrayku cheqan religionpi kajkunataqa, “ruwasqasninkunejta allinta rejsinkichej” nerqa (Mateo 7:16, 17). Chayqa mana  niyta munanchu, Diosta yupaychajkuna ni imapi pantanankuta. Jinapis Diospa kamachisnenqa, allin kajta ruwanankupaj kallpachakunkupuni. Qhawarinachej imastachus cheqan religionpi kajkuna ruwasqankuta.

6, 7. 1) Cheqan religionpi kajkuna, ¿Bibliamantapunichu yachachinku? 2) ¿Imamantataj Jesús yachachej?

⁶ Cheqan religionpi kajkunaqa Bibliamantapuni yachachinku. Bibliaqa nin: “Diosmanta tukuy Qhelqasqaqa, paypa yuyaychasqan kashan. May sumajtaj yachachinapaj, juchata reparachinapaj, tukuy imata cheqanchanapaj, cheqan kajta ruwayta yachachinapaj ima. Ajinamanta Diospa kamachenqa, allin yachachisqa kanqa, sumaj wakichisqataj tukuy ima allin kajta ruwananpaj”, nispa (2 Timoteo 3:16, 17). Apóstol Pabloqa cristianosman nerqa: “Chayrayku noqaykoqa mana saykʼuspa Diosman graciasta qoyku. Imaraykuchus Diospa palabranta qankunaman willajtiyku, qankunaqa chayta japʼikorqankichej mana runaspa palabranta jinachu, manachayqa cheqamanta Diospa palabranta jina”, nispa (1 Tesalonicenses 2:13). Cheqan religionmanta kajkunaqa, Bibliata Diospa Palabranta jinapuni qhawanku. Chayrayku Bibliamantapuni yachachinku. Paykunaqa mana runaj yuyaynintachu, nitaj ñaupa tataspa yachachisqankutachu yachachinku.

⁷ Jesuspis Diospa Palabranmantapuni yachacherqa (Juan 17:17 leey). Payqa imamanta parlaspapis Diospa Palabrantapuni oqharej (Mateo 4:4, 7, 10). Diospa  kamachisninpis, Jesús jinallataj Bibliamantapuni yachachinchej.

8. Jesús yachachisqanman jina, ¿pillatataj yupaychana tiyan?

⁸ Jehová Diosllata yupaychana. Quechua de Cuzce nisqa Bibliapi, Salmo 83:18 nin: ‘Yachachunku qan, Jehová sutiyoj, qanlla Altísimo kasqaykita tukuy kay pacha patapi’, nispa. Jesusqa munarqa, tukuy runas Diospa sutinta yachanankuta. Chayrayku Diospa sutinta runasman rejsicherqa (Juan 17:6 leey). Jesús nerqa: “Jehová Diosniykita yupaychanayki tiyan, pay sapallantataj sirvinayki tiyan”, nispa (Mateo 4:10). Diospa kamachisnenqa Jesús jinallataj ruwanchej. Jehová Diosllata yupaychanchej, sutinta oqharinchej, runasmanpis sutinta rejsichinchej. Chantapis runasman willarinchej, imastachus Diosninchej noqanchejpaj ruwananta.

9, 10. Runamasinchejta munakunchej chay, ¿imastá ruwanchej?

⁹ Runamasinchejta tukuy sonqo munakuna. Jesusqa yachachisqasninman nerqa, purajmanta munanakunankuta (Juan 13:35 leey). Chayrayku maymanta kajtinchejpis, imayna uywasqa kajtinchejpis, wajchas chayri qhapaj kajtinchejpis, purajmanta munanakusqanchejrayku uj familia jina ujchasqa kananchej tiyan (Colosenses 3:14). Chayrayku guerrasman mana rinchejchu, nitaj runata wañuchinchejchu. Bibliaqa nin: “Kay jinamanta rejsinchej Diospa wawasninta, Kuraj Supaypa wawasnintapis: Pichus mana cheqan kajta ruwajqa, manamin Diospa wawanchu. Hermanonta  mana munakojpis, nillataj Diospa wawanchu”, nispa. Chantá nillantaj “purajmanta munanakunanchej kasqanta. Manataj Caín jinaqa kananchejchu tiyan, payqa Kuraj Supaypa wawan kaspa, mana khuyarikuspa hermanonta wañucherqa” (1 Juan 3:10-12; 4:20, 21).

¹⁰ Noqanchejqa purajmanta yanapanakunchej, kallpachanakunchejtaj. Chaypaj tiemponchejta, kallpanchejta, imaschus kapuwasqanchejtapis churanchej (Hebreos 10:24, 25). “Tukuypaj allin kajta” ruwanchej (Gálatas 6:10).

11. ¿Imaraykutaj Jesusta kasukunanchej tiyan?

¹¹ Jesusnejllata salvación tiyan, chayrayku payta kasukuna. Bibliaqa Jesusmanta niwanchej: “Waj runanejtaqa manapuni salvación kanchu. Kay jallpʼapitaj mana waj suti runasman qosqa kanchu chaynejta salvasqa kananchejpaj”, nispa (Hechos 4:12). Kay libropi yachakorqanchejña, Jehová Diosqa Wawanta kachamusqanta kasukoj runasta juchamanta kacharichinanpaj (Mateo 20:28). Jehová Diosqa Jesusta ajllan Reyninchej kananpaj. Chayrayku Biblia niwanchej, wiñay kausayta japʼinapajqa Jesusta kasukunanchejta (Juan 3:36 leey).

12. ¿Politicaman chhapukunachu tiyan?

¹² Mana politicaman chhapukunachu. Jesusqa mana politicaman satʼikorqachu. Payta juzgashajtinku, kamachej Pilatoman nerqa: “Gobiernoyqa mana kay mundomanta gobiernos jinachu”, nispa (Juan 18:36 leey). Jesús jina, noqanchejpis Diospa  Gobiernollan kamachinanta munanchej. Chayrayku may llajtapi tiyakuspapis, mana politicaman satʼikunchejchu. Jinapis Bibliaqa “autoridadesta” chayri kamachejkunata kasukunata niwanchej (Romanos 13:1). Mayqen nacionpi tiyakuspapis, chay nacionpa leyesninta kasukunchej. Jinapis uj ley chayri uj kamachiy, Diospa kamachisqanwan churanakun chayqa, apóstoles jina ninchej: “Noqaykoqa Diostapuni kamachejniykuta jina kasunayku tiyan runasta kasunaykumantaqa”, nispa (Hechos 5:29; Marcos 12:17).

13. ¿Imayna kausaytataj Diospa Gobiernon apamonqa?

¹³ Diospa Gobiernollan sumaj kausayta apamunanmanta parlana. Jesús nerqa: “Diospa Gobiernonmanta sumaj willaykunapis jallpʼantinpi willakonqa”, nispa (Mateo 24:14 leey). Ni mayqen gobiernopis sumaj kausayta apamuyta atinchu. Diospa Gobiernollan chayta ruwayta atenqa (Salmo 146:3). Jesusqa Diospa Gobiernonta mañakunata yachachiwarqanchej. Payqa ajinata mañakunata nerqa: “Gobiernoyki jamuchun. Munayniykitaj ruwasqa kachun, imaynachus cielopi, ajinallatataj kay jallpʼa patapipis”, nispa (Mateo 6:10). Bibliaqa willawanchej, Diospa Gobiernonqa tukuy gobiernosta tukuchinanta. Chantataj Diospa Gobiernollan kay jallpʼata kamachimonqa, wiñaypajtaj sayanqa (Daniel 2:44).

14. ¿Mayqen religionpitaj Diospa nisqanta ruwashanku?

¹⁴ Kaykama yachakunchej imastachus Diospa  kamachisnin ruwasqankuta. Paykunaqa Bibliamantapuni yachachinku, Diospa sutinta runasman rejsichinku, tukuy sonqotaj purajmanta munanakunku. Chantapis Diospa kamachisnenqa, Jesusta kasukunku, mana politicaman chhapukunkuchu, ninkutaj Diospa Gobiernollan sumaj kausayta apamunanta. ¿Pikunataj tukuy chay imasta ruwashanku? Jehovaj testigosnillan (Isaías 43:10-12).

15. ¿Imatataj ruwananchej tiyan Diospa kamachisnin kanapaj?

¹⁵ Diospa kamachisnin kananchejpajqa, imatachus pay niwasqanchejta kasukunanchej tiyan. Manataj “Diospi creeni” ninallanchejchu tiyan. Imajtinchus supaykunapis Dios kasqanta creellankutaj, jinapis mana Diosta kasukunkuchu (Santiago 2:19).

16. ¿Llulla religionmanta llojsipunachu tiyan?

¹⁶ Diospa kamachisnin kananchejpajqa, llulla religionmanta chayri falso iglesiasmanta llojsipunanchej tiyan. Profeta Isaías nerqa: “Paykunaj chawpinkumanta llojsimuychej; llimphuchakuychej”, nispa (Isaías 52:11; 2 Corintios 6:17). Chayrayku chay iglesiaswanqa, ni ima ruwananchej kananchu tiyan.

17. ¿Imatataj Biblia “Jatun Babilonia” nispa sutichan?

¹⁷ ¿Imaynapí yachasunman mayqen religionchus llulla chayri falso kasqanta? Chay iglesiapi Diosmanta pantasqata yachachejtinku, Bibliaj nisqantataj qʼewejtinku. Bibliaqa chay iglesiasta, “Jatun Babilonia” nispa sutichan (Apocalipsis 17:5). ¿Imaraykutaj chay  sutita churan? Noej tiemponpi, Jatun Para pasayta uj llajta karqa. Chay llajtataj Babilonia nisqa karqa. Chay llajtamanta runasqa, imaymana creenciasniyoj kaj kanku. Paykunaqa kinsa uyayoj dioskunata yupaychaj kanku. Chay pantasqa creenciasninkutaj, tukuynejman chayarqa. Chayrayku kunanpis ashkha iglesiaspi creenku Diosqa kinsa uyayoj kasqanta, ninkutaj Dioswan, Jesuswan, espíritu santowan ujlla kasqankuta. Bibliatajrí sutʼita niwanchej, kʼata cheqa Diosqa ujlla kasqanta, paytaj Jehová Dios, Jesustajrí paypa Wawan (Juan 17:3). Babiloniamanta runasqa, creellajtaj kanku uj runa wañupojtin alman llojsipusqanta, sajra kaspataj infiernopi ñakʼarisqanta. Bibliatajrí mana chaytachu yachachin (“¿Ujllachu kanku Dioswan, Jesuswan, espíritu santowan?” nisqata leeriy. Chantá “Alma” nisqata leeriy, “Espíritu” nisqata leeriy).

18. ¿Imaraykutaj llulla iglesiasmanta llojsipunayki tiyan?

¹⁸ Diosqa unayña nerqa, tukuynin llulla iglesiasta pisimantawan chinkachinanta (Apocalipsis 18:8). Chayrayku chay iglesiasmanta llojsipunayki tiyan. Jehová Diostaj usqhayllata llojsipunaykita munan (Apocalipsis 18:4).

19. Diosta sirvikojtiyki, ¿pay saqerpasonqachu?

¹⁹ Sichus llulla iglesiasmanta llojsipuspa, Jehová Diosta sirvinki chayqa, ichapis wakin familiayki chayri rejsisqasniyki manaña allinpajchu qhawasonqanku. Ichapis chejnikusonqanku, waqachisonqanku chayri tukuy imata nisonqanku. Jina kanman chaypis,  ama llakikuychu. Jehová Diosninchej yanapasonqa. Payqa may munakuyniyoj jatun familiata jallpʼantinpi qosonqa, aswan qhepamantaj mosoj jallpʼapi wiñay kausayta qosonqa (Marcos 10:28-30). Kunan chejnikusunku chay familiaresniykimanta chayri rejsisqasniykimanta wakenqa, ichapis qhepaman Bibliamanta yachakonqanku.

20. ¿Imaraykutaj cheqan religionman yaykupunayki tiyan?

²⁰ Uj chhikamantawan, Diosqa tukuynin sajra kausayta chinkachenqa, paypa Gobiernollantaj jallpʼata kamachimonqa (2 Pedro 3:9, 13). Chay tiempomá sumaj kanqa. Tukuy runastaj Jehová Diosta munayninman jina yupaychanqanku. Chayrayku kunan tiempo kashan, Diosman chimpapunaykipaj, cheqan religionmantaj yaykupunaykipaj.