1. ¿Maijan religión alli cashcata yachangapajca imatataj rurana canchij?

ACHCA religioncunami verdadta yachachinchij nishpapish Diosmanta, paita ima shina adoranamantaca chꞌican chꞌican yuyaicunata yachachincuna. Pero maijan religión alli cashcata yachangapajca, Jehová Dios paita ima shina adorachun munashcatami puntapica yachanaraj canchij.

2. ¿Diosta ima shina adoranata yachangapajca imatataj rurana cangui?

² Jehová Diosca paita ima shina adoranata yachachunmi Bibliata cushca. Chaimantami Bibliata estudiashpa catina cangui. Bibliapi tiyaj yuyaicunata alli intindichunca Diosllatajmi canta ayudanga (Isaías 48:17).

3. ¿Diospaj ñaupajpi alli ricuringapajca imatataj rurana canchij?

³ Huaquin gentecunaca, “Diosca tucui religioncunatami chasquin” nincunami. Pero Jesusca: “Ñucata ¡Mandaj Jesús, Mandaj Jesús! nijcunaca, Taita Dios mandacunpica mana tucuicuna yaicungacunachu. Ashtahuanpish jahua pacha ñuca Yayapaj munaita rurajcunami, chaimanca yaicungacuna” nircami. Shinallataj Jesusca, Diospaj munaita mana rurajcunaca ‘millaita rurajcunami can’ nircami. Chaimantami Diospaj ñaupajpi alli ricuringapajca Diospaj voluntadta rurana canchij (Mateo 7:21-23).

4. ¿Diospaj munaita rurasha nijcunataca Jesusca imatataj yachachirca?

⁴ Jesusca, Diospaj munaita rurangapajca mana facilchu canga nircami. Chaimantami: “Quichqui punguta  yaicuichij. Chingarinaman pushajca pungupish anchomi, ñanpish yallitaj anchomi. Chaitaca achcacunami yaicuncuna. Causaiman pushajca pungupish quichquimi, ñanpish quichquimi. Chaitaca ashacunallami chasquincuna” nirca (Mateo 7:13, 14). Quichqui ñanca alli religiontami ricuchin. Cutin, ancho ñanca panda religioncunatami ricuchin. Panda religioncunaca huañuimanmi gentecunata apacun. Pero Yaya Diosca ni shuj gentellapish ama huañuchunmi munan. Chaimantami tucuicunaman paimanta yachachun oportunidadta cushca (Ezequiel 18:23).

5. ¿Alli religionta catijcunataca ima shinataj rijsi tucunchij?

⁵ ¿Maijan religión alli cashcata yachangapajca imatataj rurana canchij? Jesusca, alli religionca shuj alli yura shina cashcatami nirca. Paica: ‘Tucui alli yurapimi, alli granoca pꞌucun. Alli religionta catijcunatapish paicuna imalla rurashcata ricushpami yachanguichij’ nircami (Mateo 7:16, 17). Diosta alli sirvijcunaca juchayujcunami can. Shinapish allita rurangapajmi esforzarincuna. Cunanca, alli religión ima shina cashcata yachashun.

6, 7. a) ¿Alli religionta catijcunaca imamantataj Bibliamanta yachachina can? b) ¿Ñucanchijpish imatataj Jesús shina rurana canchij?

⁶ Alli religionta catijcunaca Bibliamantami yachachincuna. Paicunaca mana paicunapaj yuyaicunamanta o costumbrecunamanta yachachinchu. Bibliapica: “Dios Quillcachishcacunaca tucuimi Diosllataj yuyaita cushpa quillcachishca. Chashna cashpami yachachingapajpish, millaita rurajcunata rimangapajpish, cunangapajpish, cashcata ruraj canata  yachachingapajpish alli. Chashna yachachishca cashpami, Diospajta rurajca tucui imatapish allita rurangapajca, alli allichishca canga” ninmi (2 Timoteo 3:16, 17, QC, 1989). Apóstol Pablopish: “Taita Diospaj Shimita cancunaman ñucanchij huillajpi uyashpaca, mana runacunapaj shimita shinallachu chasquircanguichij. Ashtahuanpish Taita Diospaj Shimitaj cashcatami chasquircanguichij” nircami (1 Tesalonicenses 2:13).

⁷ Jesusca siempremi Diospaj Shimimanta yachachij carca (Mateo 4:4, 7, 10; Juan 17:17-ta liyipai). Diosta alli sirvijcunapish Jesuspaj ejemplota catishpami tucuita Bibliamanta yachachinchij.

8. ¿Jesusca Yaya Diosta ima shina adoranatataj yachachirca?

⁸ Jehová Diosllatami adorancuna. Bibliapica: “Cambaj shuti Jehová cashcata gentecuna yachachun. Canllami ashtahuan Jatun Dios cangui” ninmi (Salmo 83:18, NM). Jesusca Jehová Dios pi cashcata gentecuna yachachunmi munarca. Chaimantami Diospaj shutita gentecunaman yachachirca (Juan 17:6-ta liyipai *). Jesusca, “Mandaj cambaj Jatun Diosllata adorangui, paipajllata rurangui” nircami (Mateo 4:10). Jesuspaj ejemplota catishpami Jehová Diosllata adorana canchij, shujtajcunamanpish paimanta yachachina canchij. Chashnami Diosta alli sirvijcuna cashcata ricuchishun.

9, 10. ¿Ima shinataj caishuj chaishuj cꞌuyaita ricuchina canchij?

⁹ Cꞌuyaitami ricuchincuna. Jesusca paita catijcunataca, caishujmanta chaishujmantami cꞌuyaita ricuchina canguichij nircami (Juan 13:35-ta liyipai). Shujtajcunaman cꞌuyaita ricuchingapajca maijan llajtamanta,  ima culturamanta, charij o huajcha cashcataca mana ricunchijchu (Colosenses 3:14). Chashna cꞌuyaita charishcamantami macanacuicunaman mana rinchij, shujtajcunatapish mana huañuchinchij. Bibliapica, ‘Diospaj huahuacuna cajtapish, Diablopaj huahuacuna cajtapish ricunallami. Maijanpish cashcata mana ruraj, paipaj huauquita mana cꞌuyajca mana Diospajchu. Ama Caín shina cashunchij. Paica Diablopaj cashpami, paipaj huauquitaca huañuchirca’ ninmi (1 Juan 3:10-12; 4:20, 21).

¹⁰ Shinallataj shujtajcunata ayudangapajmi ñucanchij imalla charishca cosascunata, tiempota, fuerzata utilizanchij (Hebreos 10:24, 25). Cashnami tucuicunapaj allita ruranchij (Gálatas 6:10).

11. ¿Jesustaca imamantataj cazuna canchij?

¹¹ Jesusta cazushpalla quishpiri tucushcatami crincuna. Bibliapica: “Pi shujtaj Quishpichijca mana tiyanchu. Cai pachapi causajcunata quishpichichunca Taita Diosca pi shujtajtaca mana cushcachu. Jesusllami quishpichi tucun” ninmi (Hechos 4:12). Capítulo 5-pi yachashca shinaca, alli shungu gentecunata quishpichingapajmi Jehová Diosca Jesusta cacharca (Mateo 20:28). Shinallataj shamuj punllapi cai Allpata mandachunca Yaya Diosca Jesustami agllashca. Chaimantami Bibliapica, huiñai causaita charisha nishpaca Jesustami cazuna canchij nin (Juan 3:36-ta liyipai).

12. ¿Politicapica imamantataj mana participanchij?

¹² Politicapi mana participancunachu. Jesusca politicapi nunca mana participarcachu. Mandaj Pilato paita juzgacujpica, “ñuca mandaj canaca mana cai pachamantachu” nircami (Juan 18:36-ta liyipai). Ñucanchijpish Jesús layallatajmi Diospaj gobiernota apoyashpa politicapica mana chagrurinchij. Pero  Bibliapi nishca shinami jatun mandajcunata, cada llajtapi tiyashca leycunatapish cazuna canchij (Romanos 13:1). Chai leycuna Diospaj mandashcacuna contra rijllapimi apostolcuna shina, ‘runacunata cazunapaj randica Taita Diosta’ cazuna canchij (Hechos 5:29; Marcos 12:17).

13. ¿Diospaj gobierno imata ruragrishcatataj huillanchij?

¹³ Diospaj gobierno tucui llaquicunata tucuchigrishcatami huillancuna. Jesusca, “Dios mandacun alli huillaitaca” tucui cai pachapimi huillashca canga nircami (Mateo 24:14-ta liyipai). Cai Allpapi tiyaj gobiernocunaca Diospaj gobierno imata ruragrishcataca mana rurai tucushcacunachu (Salmo 146:3). Chai gobiernomanta parlashpami Jesusca: ‘Diospaj gobierno shamuchun. Jahua pachapipish cai pachapipish Diospaj munai pajtarichun nishpa mañanguichij’ nirca (Mateo 6:10). Bibliapica, Diospaj gobiernoca tucui cai pachapi mandajcunata tucuchishpami huiñai huiñaita cai Allpataca mandanga ninmi (Daniel 2:44).

14. ¿Picunataj Diospaj munaita ruracuncuna?

¹⁴ Diosta alli sirvijcunaca Bibliamantami yachachina can. Diospaj shutitapish rijsichina, paicunapurapish cꞌuyaitami ricuchina can. Shinallataj Yaya Dios gentecunata quishpichingapaj Jesusta cachashcatami crina can. Politicapi, macanacuicunapi mana participanachu can. Diospaj gobiernolla tucui llaquicunata tucuchinatami huillana can. ¿Tucui religioncunachu caicunata ruracuncuna? Mana. Testigo de Jehovacunallami caitaca ruracuncuna (Isaías 43:10-12).

15. ¿Diospi crishcata ricuchingapajca imatataj rurana canchij?

¹⁵ Supaicunaca Dios tiyashcata crishpapish paitaca  mana cazuncunachu. Ñucanchijpish Dios tiyashcata crishpallaca mana saquirinachu canchij. Ashtahuanpish Yaya Diostaca tucuipimi cazuna canchij (Santiago 2:19).

16. ¿Panda religionmantaca ima nishpataj llujshina canchij?

¹⁶ Diosta cazushcata ricuchingapajca panda religionmantami llujshina canchij. Profeta Isaiasca: “Chaimanta llujshichij. Imapish mapapica ama tuparichijchu” nircami (Isaías 52:11; 2 Corintios 6:17). Chaimantami panda religionhuan chagrurishca tucui ruraicunamanta anchurina canchij.

17, 18. a) ¿Babilonia jatun puebloca imataj can? b) ¿Imamantataj panda religioncunamantaca utca llujshina cangui?

¹⁷ Yacu juillu qꞌuipami Babilonia llajtapi causajcunaca panda yachachishcacunata cati callarircacuna. Por ejemplo, paicunaca quimsa dioscunatami shujlla diosta laya adorajcuna carca. Shinallataj, “almaca mana huañushpami infiernopi llaquinaita sufrin” nijcunami carca. Pero chai nishcacunaca mana ciertochu can (nota 14, 17 y 18-ta ricui). Chai panda yachachishcacunami cai Allpapica mirarishca. Chaimantami panda religioncunaca Bibliapi nishca shina Diostaca mana adorancuna. Cai tucui panda religioncunatami Bibliapica, “Babilonia jatun pueblo” nin (Apocalipsis 17:5). Panda religioncunaca, “Diosca trinidadmi can” nishpami yachachincuna. Pero Bibliapica shujlla Jehová Dios tiyashcata, paipaj Churica Jesucristo cashcatami yachachin (Juan 17:3).

¹⁸ Jehová Diosca ñallami panda religioncunataca libri tucuchinga (Apocalipsis 18:8). Yaya Diosca canpish panda religionhuan chingarichunca mana munanchu. Chaimantami panda religionmantaca utca llujshina cangui (Apocalipsis 18:4).

19. ¿Diosta sirvinata agllajpica paica ima shinataj canta cuidanga?

 ¹⁹ Panda religionmanta caruyashpa Jehová Diosta sirvi callarijpica cambaj familiacuna, amigocunaca manachari de acuerdo canga. Chaimantachari llaquicunata charingui. Pero Diosca cantaca manataj saquingachu. Shinallataj mundo enteropi Diosta sirvij huauqui panicunaca cambaj familia shinami tucunga. Paraíso Allpapi causana esperanzatapishmi charingui (Marcos 10:28-30). Cambaj familiacuna, amigocunaca tal vez shamuj punllacunapi Bibliata estudianatachari munangacuna.

20. ¿Imamantataj utca alli religión parte tucuna cangui?

²⁰ Jehová Diosca ñallami tucui mana alli ruraicunata, llaquicunata tucuchinga. Diospaj gobiernollami tucui cai Allpata alli mandanga (Habacuc 2:3; 2 Pedro 3:13). Chai punllacunapica tucui gentecunami Dios munashca shina paillata adorangacuna. Chaica sumajmi canga. Chaimantami cantapish utca alli religión parte tucuchun animanchij.