1. ¿Pichuslla niayshta atin imaina Tata Yayát adoranáysh tían?

 YACKA túcuy religiunes nincu yachachiyta verdarta Tata Yayamanta. Pero chá mana ciertu can, religiunescka mana allít yachachincu Tata Yayamanta, pichus can imainásh adoranáysh tían. Chaypachá, ¿imaina yachayta atíysh mayckan can verdadera religiún? Jehovalla niayshta atin imaina payta adoranáysh tían.

2. Ckam, ¿imát ʼruanayqui tían yachanayquípaj imaina Tata Yayát adoranayqui tían?

² Jehová Bibliát ckoaráysh yachanáyshpaj imaina payta adoranáysh tían, chayraycu alli can ckam Bibliát estudianayquita. Tata Yaya yanapasoncka causayniyquipi yachachinasninta practicapi churayta, imaraycu pay ckampi ancha interesacun (Isaías 48:17).

3. Tata Yaya nockayshmanta, ¿imát suyan?

³ Huaquin persunas nincu Tata Yaya túcuy religiunesta aceptan, pero chayta Jishu mana yachachiaráysh. Pay nera: «Mana túcuy ima nian: ‹Señor, Señor›, reinupi cielomanta yáicoj ʼrin, manapé, pi Tataypa voluntarninta ʼruan». Chayna Tata Yaya suyan aprendenayshta mayckan can voluntarnin y ʼruanayshta. Cay suj asunto ancha delicau can, imaraycu Jishu nera picunas Tata Yayát mana casucuncu «mana alli ʼruajcuna» cancu, niyta munan, huanchejcuna (Mateo 7:21-23).

4. ¿Ima íshcay ñanesmanta Jishu ʼrimara y cayuan ima niyta munara?

⁴ Jishu nera, mana chaynalla cancka Tata Yáyap voluntarninta ʼruayta. Pay nera: «Yaicuychis puncu  llañuraycu; imaraycu puncu palta can y ñanpas palta can ima destrucciunman pusan y ashca chá huellapi ʼrincu; pero puncu llañu can y ñitiscka ñan causayman pusan, y mana ashca cancu tarejcuna» (Mateo 7:13, 14). Ñan ñitiscka verdadera religiún can y únay unáypaj causayta pusan. Ñan palta llulla religiún can y huañuyman pusan. Pero Jehová mana munan ni pipas huañuchun, chayraycu túcuy persunasta oportunidar ckon paymanta aprendenancunápaj (2 Pedro 3:9).

5. ¿Imaina ckam yachayta atinqui picunas religiún verdaderata practicancu?

⁵ Jishu nera atíysh ʼrejsiyta picunasta religiún verdadera practicancu o yachachincu. Cháypaj yachanáysh tían creesckancuta y ʼruasckancuta. Pay nera: «Frutusnincuraycu ʼrejsisckas caj ʼrincu». Y nerapas: «Túcuy alli tacko súmaj frutu ckon» (Mateo 7:16, 17). Cay mana niyta munan picunas Tata Yayát adorancu mana defectus apisckancunata. Pero Tata Yáyap siervusnin afanacuncu alli tiasckanta ʼruanancunápaj. Cunan ckaasúysh imaina yachayta atíysh mayckan can religiún verdadera.

6, 7. a) ¿Imajchus verdadera religiún Bibliamanta yachachin? b) Jíshup ejemplun, ¿imát yachachiáysh?

⁶ Religiún verdadera Bibliamanta yachachin. Biblia nin: «Túcuy Escritura Yayamanta inspirascka can y siruin yachachíypaj, añáypaj, imastistas allicháypaj, reprendéypaj justiciaan, chayna Tata Yáyap ckarin tucuypi capas canánpaj y alli preparascka tianánpaj tucuyta allít ʼruanánpaj» (2 Timoteo 3:16, 17). Apóstul Pablu cristianusta escribipucora nipucus: «Imaraycu ckamcuna Tata Yáyap ʼRimayninta  chasqueranquísh, ima nockaycumanta uyareranquísh, y aceptaranquísh, mana ckarispa ʼrimaynincu ina manapé, Tata Yáyap ʼRimaynin ina» (1 Tesalonicenses 2:13). Verdadera religiún Bibliallamanta yachachin, imaraycu Tata Yáyap ʼRimaynin can. Mana yachachin ckarispa ideasnincunata ni tradicionesta.

⁷ Jishu túcuy yachachisckanta Bibliamanta cara (Juan 17:17 léey). Siempre Escriturasmanta léej cara (Mateo 4:4, 7, 10). Chayraycu Tata Yáyap verdaderus siervusnin Jíshup ejemplunta seguíysh y túcuy yachachisckayshta Bibliamanta can.

8. ¿Imaina Jíshup ejemplunta yachapianáysh tían?

⁸ Jehovallát adoranáysh tían. Salmo 83:18 nin: «Ckampa, sutiyqui Jehová can, ckamlla ancha atun canqui áshpap saanpi». Jishu munara gente allít yachananta pichus Tata Yaya verdaderu can. Chayraycu persunasta Tata Yáyap sutinta yachachicora (Juan 17:6 léey). Jishu nera: «Jehová Tata Yayayquita adoranayqui tían, y payllát serviciu sagradu ckonayqui tían» (Mateo 4:10). Chayraycu, Tata Yáyap siervusnin Jíshup ejemplunta seguíysh. Jehovallát adoráysh, sutinta utilisáysh y sujcunasta yachachicúysh. Yachachicuyshpas Tata Yaya nockayshraycu ʼruaj ʼrisckanta.

9, 10. ¿Imaina múnay sujuan sujuan ckaachíysh?

⁹ Sujcunaraycu múnay verdaderu ckaachináysh tían. Jishu discipulusninta yachachera sujuan sujuan munanacuyta (Juan 13:35 léey). Munayníysh sujcunaraycu cuscayachianáysh tían huauckes ina, mana importas maymanta cáysh o culturáysh, o si huajchas o ckoshckelus cáysh (Colosenses 3:14). Chayraycu guerrasman mana ʼríysh ni pipasta huanchíysh. Biblia nin: «Tata Yáyap huaasnin y Supaypa huaasnin  patente ʼruacuncu cá ʼruasckaan: Túcuy cháckay mana justiciát mascan, mana Tata Yayamanta can, ni chackaypas ima huauckenta mana munan». Y ninpas «Munayta sujcuna sujcunaan apicunáysh tían; mana Caín ina, ima mana alli cajmanta amora, y huauckenta cuncanta cuchupora» (1 Juan 3:10-12; 4:20, 21).

¹⁰ Utilisáysh tiempuyshta, fuersasniyshta y apisckayshta yanapacunáyshpaj y sujuan sujuan animacunáyshpaj (Hebreos 10:24, 25). «Alli casckanta tucuycunaan» ʼruáysh (Gálatas 6:10).

11. ¿Imajchus Jishút casucúysh?

¹¹ Jishút casucunáysh tían, payraycu ckeshpisckas caj ʼríysh. Biblia nin: «Ckéshpiy mana tían nima ckaripi, imaraycu mana tían suj suti ciélop abajunpi ima ckarispurapi ckoscka cara ckeshpisckas canáyshpaj» (Hechos 4:12). Capitulopi 5 cá librumanta aprenderáysh Jehová Jishút cachara causayninta ckonánpaj persunas casúcoj ckeshpisckas canancunápaj (Mateo 20:28). Jehová Jishút ajllara Rey ina Ashpamanta. Chayraycu Biblia nin Jishút casucunáysh tían únay unáypaj causayta munaspá (Juan 3:36 léey).

12. ¿Imajchus politicapi mana puríysh?

¹² Mana purináysh tían politicapi. Jishu politicapi mana purera. Áicap payta jusgashcarancu, gobernador romano Pilatút nipora: «Réinuy mana can parte cá mundumanta» (Juan 18:36 léey). Jishu ina, Tata Yáyap Reinunta leales cáysh. Chayraycu mana puríysh imastispi ima politicaan ckaanan tían, mana importas maypi causáysh. Pero Biblia casucunayshta cachaáysh «Autoridares superioresta», niyta munan, gobiernusta (Romanos 13:1). Casucúysh leyesta paismanta maypi causáysh. Pero, áicap suj  ley tían Tata Yáyap leyesninpa contranpi, apostulesta yachapiáysh. Paycuna nerancu «Tata Yayát gobernante ina casucunáysh tían y mana ckarista» (Hechos 5:29; Marcos 12:17).

13. ¿Imát Tata Yáyap Reinunmanta predicáysh?

¹³ Predicanáysh tían Tata Yáyap Reinunlla túcuy mana alli imastista allíchaj ʼrisckanta. Jishu nera cá «alli noticias reinumanta» túcuy Ashpapi predicaconcka (Mateo 24:14 léey). Nima gobiernu humanu ʼruayta atin Tata Yáyap Reinun nockayshraycu ʼrúaj ʼrisckanta (Salmo 146:3). Jishu yachachiaráysh oraciunesniyshpi Reinút mañanayshta áicap nera: «Reinuyqui amuchun. Voluntarniyqui ʼruacuchun, cielopi ina, áshpap saanpipas» (Mateo 6:10). Biblia niáysh Reinu túcuy gobiernus humanusta amchi ʼrúaj ʼrisckanta, cá Reinulla Ashpát gobérnaj ʼrin únay unáypaj (Daniel 2:44).

14. Ckam imát creenqui, ¿mayckan can religiun verdadera?

¹⁴ Cá parrafusta analisas chaymantá, tapunácuy «¿Picunas Biblia nisckanta yachachincu? ¿Picunas persunasta Tata Yáyap sutinta yachachincu? ¿Picunas sujuan sujuan munanacuncu? ¿Picunas creencu Tata Yaya Jishút cachara ckeshpichianáyshpaj? ¿Picunas politicapi mana purincu? ¿Picunas predicancu Tata Yáyap Reinunlla túcuy problemasniyshta allíchaj ʼrisckanta?». Jehóvap testigusninlla túcuy chayta ʼruáysh (Isaías 43:10-12).

15. ¿Imát ʼruanáysh tían Tata Yaya adoraciunniyshta aceptanánpaj?

¹⁵ Mana suficiente can creeyta Tata Yaya causasckanta. Demoniuspas creencu causasckanta, pero mana casupuncu (Santiago 2:19). Tata Yaya adoraciunniyshta aceptananta munaspá, pay mañaasckayshta ʼruanáysh tían, manalla creeyta pay causasckanta.

16. ¿Imajchus llulla religiunta sackenáysh tían?

 ¹⁶ Tata Yaya adoraciunniyshta aceptanánpaj, llulla religiunta sackenáysh tían. Profeta Isaías nera: «Llojsiychis paypa chaupinmanta, limpius tiaychis» (Isaías 52:11; 2 Corintios 6:17). Chayraycu rechasanáysh tían túcuy ima llulla religiunuan ckaanan tían.

17, 18. a) ¿Ima can «Atun Babilonia»? b) ¿Imajchus llulla religiunta utcka sackenayqui tían?

¹⁷ ¿Llulla religiun ima can? Can máyckanp cachun religiun ima mana yachachin Biblia nisckanta. Biblia túcuy llulla religiunesta huajyan «Atun Babilonia» (Revelación [Apocalipsis] 17:5). ¿Ímaj? Atun para chaymanta, ciudarpi Babiloniamanta ashca llulla yachachinas ʼricurerancu. Cháckay yachachinas túcuy mundupi ʼricurerancu. Por ejemplu, persunas Babiloniamanta grupus quimsa diosesmanta adóraj carancu. Cunan punchau, ashca religiunes yachachincu Tata Yaya suj trinidar casckanta, pero Biblia allít niáysh Jehovalla Tata Yaya verdaderu can y Jishu huaan can (Juan 17:3). Babiloniuspas créej carancu pillapas huañuptin suj parte persunamanta causas seguin y atin infiernupi usuyta. Pero chay mana ciertu can (Ckáay Astaan yacháypaj 14, 17 y 18 paginaspi 213-215).

¹⁸ Tata Yaya huillara ima túcuy llulla religiunes mana unas chamckayasckas caj ʼrincu (Revelación 18:8). ¿Ckam unanchanqui imajchus ancha urgente can llulla religiunta sackenayquita? Jehová munan utcka ʼruanayquita manáraj ancha tarde captin (Revelación 18:4).

19. ¿Imaina Tata Yaya ckammanta cuidancka decidiptiyqui siruipuyta?

¹⁹ Si ckam decidinqui llulla religiunta sackeyta y Jehovát siruiyta, huaquin familiaresniyquimanta o  yanasusniyquimanta decisiunniyquita mana unánchaj ʼrincu y contrayquipi churácoj ʼrincu. Pero Jehová ckammanta cuidancka. Ckosoncka suj atun familia ancha ashca ashca persunasmanta ima munanacuncu y túcuy mundupi tiancu y suyana únay unáypaj causáypaj mósoj mundupi (Marcos 10:28-30). Pítaj yachan huaquin familiares o yanasus ima cunan oponecuncu ckam Jehovát siruinayquita, quisá decidincu ámoj pachapi Bibliát estudiayta.

20. ¿Imajchus importante can ckam chayanayquita parte cayta religiún verdaderamanta?

²⁰ Mana unas Tata Yaya puchucancka túcuy maldaruan, y Reinun túcuy Ashpata gobernancka (2 Pedro 3:9, 13). Tiempus ancha súmaj canckancu á. Tucuycunas Jehovata adoranckancu imaina pay munan. Chayraycu ancha importante can ckam Jehóvap partenmanta churacunayquita y chayna chayanayquípaj parte cayta religiun verdaderamanta.