1. ¿Pita rimana ushan imasna Diosta adurana ashcara?

ASHCA religionguna Diosmanda ciertora yachachinchi nisha rimanun. Shina ajllaira mana ciertochu, religionguna ashca tunu yachachishcaras Diosmanda rimanun, astaun imasna adurangahuas. Shinajpi, ¿imasna rashara yachanchi maican ali religión ashcara? Jehovallami rimana ushan imasna paita adurana ashcara.

2. ¿Imara rurana angui yachangahua imasna Diosta aduranara?

² Jehová, Bibliara cushcami ñucanchi yachanuchu imasna adurana ashcara, chiraigu Bibliara estudiapai. Dios canda cuirangahua munanmi, chiraigu yanapangami paihua yachachishcara intindingahua, camba causaibi pactachingahuas (Isaías 48:17).

3. ¿Imara munan Dios ñucanchimanda?

³ Maican runauna ninun, Dios tucui religiongunara chasquin nisha, Jesús mana shina yachachicachu. Pai nica: “Mana tucui ñucara: ‘Señor, Señor,’ nij runa ahua pacha mandanai icungachu, astaun ñuca ahua pachai tiaj Yaya munaira rajcunalla”. Shinajpi Dios munan, ñucanchi paihua munashcara yachanuchu, astaun pactachinuchu. Caiga yapa ministishcami, Jesús nica Yaya Diosta mana casuj runauna “manalira rajcuna”, anun (Mateo 7:​21-23).

4. ¿Imara Jesús nica Diospa munaira ruranamanda?

⁴ Jesús nica Diospa munaira rurangaj huaquimbi  shinzhimi an. Pai nica: “Quishqui pungura icuichi. Anzhu punguga atun ñambiga [...] pushan chingachingaj. Ashcaunami chi pungura icunaun. Quishqui pungu, ichilla ñambi causanama pushan, ansallami icunaun cai ñambira” (Mateo 7:​13, 14). Quishqui ñambiga ricuchin ali religión huiñai causanama pushashcara. Anzhu ñambiga ricuchin panda religión huañunama pushashcara. Jehová Dios mana pihuas huañunuchu munan, chiraigu tucui runaunara paimanda yachanuchu saquinmi (2 Pedro 3:9).

5. ¿Imasnara ricsina ushanchi pigunara ali religionda catishcara?

⁵ Jesús nica imasna ricsina ushanchi pigunara ali religionda catishcara. Paiguna imara quirishcara, rurashcaras ricsinami anchi. Pai nica: “Paiguna rashcaunai paigunara ricsinguichi”. Astaumbas nica: “Tucui ali yura ali muyura aparin” (Mateo 7:​16, 17). Caiga mana yachachinzhu Diosta adurajcuna ucha illaj ashcara. Shinajpi Diosta sirvijcuna tucui huras alira rurangaj ursarinunmi. Cuna ricushun imasnara ali religionda ricsina ushanchi.

6, 7. a) ¿Imarasha ali religión Biblia yachachishcallara yachachin? b) ¿Imara yachachin Jesuspa ejemplo?

⁶ Ali religión Biblia yachachishcallarami yachachin. Bibliaga ninmi: “Tucui Dios Quillcashca Diosmanda rimashcami. Valinmi yachachingaj, camachingaj, alichingaj, ali causanara yachachingaj, Diospa runa ali tucungaj, pactajta alichishca tucui ali ranara rangaj” (2 Timoteo 3:​16, 17). Apóstol Pablo Jesusta catijcunara quillcaca: “Canguna ñucanchimanda uyasha, Diospa shimira chasquicanguichi. Mana  runaunamanda shimirasna astaumbas Diosmanda shimirasna chasquicanguichi, imasna sirtu ashcara” (1 Tesalonicenses 2:13). Ali religionga Bibliamandallami yachachin, Diospa Shimi ashcamanda. Mana yachachin runa rimashcasna.

⁷ Jesús, Diospa Shimi yachachishcallara yachachica (leapai Juan 17:17). Diospa shimimanda ashcara yachachica (Mateo 4:​4, 7, 10). Diosta sirvijcuna Jesuspa ejemplora catisha, Bibliai rimashcallara yachachinchi.

8. ¿Imara Jesús yachachica Jehová Diosta ali aduranamanda?

⁸ Jehová Diosllara adurana anchi. Salmo 83:18 nin: “Runauna yachanuchu, camba shuti Jehová ajta, canllami tucui Allpamanda astaun Atun Dios angui”. Jesús munaca runauna yachanuchu pita cierto Dios ashcara. Chiraigu runaunara Diospa shutira yachachica (leapai Juan 17:6). Jesús nica Jehová Diosta “aduranami angui, paillara sirvinami angui” (Mateo 4:10). Chiraigu Diosta sirvijcuna Jesús rurashca cuinta ruranchi. Jehová Diosllara aduranchi, paihua shutira rimanchi, oracionda mañasha, shujcunara paihua shutira yachachisha, astaun ñucanchimanda Dios ima rurangaraushcara rimasha.

9, 10. ¿Imasnara parijumanda llaquinara ricuchinchi?

⁹ Cierto llaquinara shujcunara ricuchishun. Jesús paita catijcunara parijumanda llaquinunuchu yachachica (leapai Juan 13:35). Huauquipura shina llaquinunami anchi, maimanda shamushcara, ima tunu culturamanda ajtas, pugri o charij ashcara mana ricunachu (Colosenses 3:14). Chiraigu guerrama mana rinchi, mana pitas huañuchinchi. Biblia ninmi: “Caimanda Diospa churiuna supai apu churiunas ricsi  tucunaun. Maican runa mana alira rasha, paihua uquira mana llaquisha, cai runa mana Diosmandachu”. Astaumbas nin: “Ñucanchipura parijumanda llaquinaunami anchi. Mana Caín rashcasna, pai manali supaimanda asha, paihua uquira huañuchica” (1 Juan 3:​10-12; 4:​20, 21).

¹⁰ Ñucanchi timpura, ushaira, charishcaunaras shujcunara yanapangaj, animangaj cunchi (Hebreos 10:​24, 25). “Alira rashunchi tucuigunahua” (Gálatas 6:10).

11. ¿Imarasha Jesusta casunchi?

¹¹ Jesusmandallami quishpirina charinchi, chiraigu paita casunami anchi. Biblia ninmi: “Shujpajpi quishpina illanmi. Cai pachai shu shutiras runaunama mana cushcachu ñucanchi quishpichi tucungaj” (Rashcauna 4:12). Tema 5​pi yachashcanchi Jehová Dios, Jesusta cachamuca casuj runaunamanda paihua causaira cungaj (Mateo 20:28). Jehová Dios, Jesusta ajllashcami shamuj punzhai cai Allpai Rey apu tucuchu. Chiraigu Biblia yachachin, huiñaigama causana munashaga Jesusta casunami anchi (leapai Juan 3:36).

12. ¿Imarasha politicaibi mana satirinchi?

¹² Politicaibi mana satirinachu anchi. Jesús politicaibi mana satiricachu. Paita taripaushcai, Roma llactamanda Pilato apura nica: “Ñuca mandana pacha mana cai pachamandachu” (leapai Juan 18:36). Jesús cuinta, Diospa Reinollara mandachu munanchi. Chiraigu maibi causashas, politicaibi mana satirinchichu. Shinajpi Biblia mandanmi “gubirnura uyachu” (Romanos 13:1). Causaushca llactai tiaj leygunara casunchi. Shinajpi shu ley Dios mandashcara cuntra  tucujpi, apostolguna cuinta ruranchi. Paiguna ninuca: “Runaunamanda yali Diosta caźuna ministirin” (Rashcauna 5:29; Marcos 12:17).

13. ¿Imara yachachinchi Diospa Reinomanda?

¹³ Diospa Reinollami cai Allpai tiaj problemagunara alichina ushan nisha yachachina anchi. Jesús nica “Dios mandana pacha evangelio ali shimi” intiru mundui yachachishca anga (leapai Mateo 24:14). Mana pi runa gobiernoguna rurangachu, Diospa Reino ñucanchihua rurangaraushcara (Salmo 146:3). Jesús yachachica cai Reinomanda mañangahua casna nisha: “Shamuchu camba mandana. Can munashcara rashca achu, imasna ahua pachais, shinallara cai pachais” (Mateo 6:10). Biblia ninmi Diospa Reino tucui runa gobiernogunara tucuchingami, Diospa Gobiernollami cai Allpara huiñaigama mandanga (Daniel 2:44).

14. ¿Maican ali religión ashcara quiringuichu?

¹⁴ Ña mas intindishcamanda tapuringui: “¿Pigunara Biblia yachachishcallarami yachachinun? ¿Pigunara Diospa shutira yachachinun? ¿Pigunara alira pacha paigunapura llaquinunun? ¿Pigunara quirinun Yaya Dios, Jesusta cachamushcara ñucanchira quishpichingaj? ¿Pigunara politicaibi mana satirinun? ¿Pigunara yachachinun Diospa Reinollami ñucanchi problemagunara alichingaraun nisha?”. Jehovahuaj testigogunallami caita ruranchi (Isaías 43:​10-12).

15. ¿Imara rurana anchi Dios ñucanchi adurashcara chasquichu?

¹⁵ Mana shimimandalla Diosta quirinachu. Supaigunas Dios tiashcara quirinunmi, shinajpi paita mana  casununzhu (Santiago 2:19). Dios ñucanchi adurashcara chasquichu, mana shimimandalla Diosta quirinachu anchi, pai mandashcara casunami anchi.

16. ¿Imarasha panda religionda saquina anchi?

¹⁶ Yaya Dios ñucanchi adurashcara chasquichu, panda religionda saquinami anchi. Profeta Isaías quillcaca: “Paihua chaupimanda llucshichi, chuyaj aichi” (Isaías 52:11; 2 Corintios 6:17). Chiraigumanda tucui panda religión rurashcaunamanda anzhurinami anchi.

17, 18. a) ¿Imara an “Atun Babilonia”? b) ¿Imarasha panda religionda uctalla saquina angui?

¹⁷ Maicans religión Diosta adurangahua Biblia rimashca cuinta mana yachachijta, panda religión an. Bibliaga “Atun Babilonia” nishca tucui panda religiongunara nin (Ricuchina 17:5). ¿Imarasha? Atun tamia pasashca huasha, Babilonia llactai ashca panda yachachishcauna llucshinuca. Chi yachachishcauna intiru munduma icuca. Babilonia llactai causaj runauna quinsa muntun diosgunara adurajcunami anuca. Cunan punzhaunai ashca religionguna yachachinun shujllai quinsa dios tian nisha, shinajpi Biblia yachachin Jehovallami cierto Dios ajta, astaumbas Jesús paihua Churimi (Juan 17:3). Babilonioguna quirinuca shu runa huañushca huasha causasha catin, ucu pachai turmindariunmi nisha. Chiga mana ciertochu ashca (nota 14, 17, 18 ricungui).

¹⁸ Diosga rimashcami ñalla tucui panda religiongunara tucuchingaraushcara (Ricuchina 18:8). ¿Intindinguichu imarasha uctalla panda religionda saquina angui? Cuna chara timpu tiajllaira, Jehová Dios munanmi can chita saquichu (Ricuchina 18:4).

19. Can Diosta sirvina munajpi, ¿imasnara pai canda cuiranga?

 ¹⁹ Can panda religionda saquijpi, Diosta sirvingaj munajpi, huaquimbi camba ailluuna o amigoguna can ajllashcara mana intindisha llaquichinungami, shina tucujpi Jehová Dios canda cuirangami. Intiru mundui shu atun llaquij aillura canda cungami, astaun huiñai causaira charina ushanguimi (Marcos 10:​28-30). Cunan timpui Diosta ama sirvingui nij aillu o amigoguna, huaquimbi, huasha Bibliara estudiangaj munanungami.

20. ¿Imarasha ministishca an, can ali religionda ajllachu?

²⁰ Ñallami, Yaya Dios tucui manali rashcaunara tucuchinga, paihua Reinollara intiru Allpai mandangami (2 Pedro 3:​9, 13). Chi timpuga yapa cushimi anga. Tucuigunaga Jehová Diosta aduranunga pai munashca cuinta. Shinajpiga ministishcami an, can ña ajllachu ali religionda catingaj.