1. Pita imasa adoranata rimanata ushai tucunchi.

CADSI HUIN religiongunami Diosmanda sirtutami yachachinchi ninaun. Chiga mana sirtu chan. Religiongunaga Dios pi ashcata, imasa adoranata mana pasacta yachachinaunzhu. Sashaga, imasata yachashun maican religion mana llullasha yachachishcata. Jehovallami imasa adoranata rimana ushai tucunchi.

2. Diosta imasa adoranata yachangahua imata rana angui.

² Jehovaga paita imasa adoranata yachangahua, Bibliata cui tucushcanchi. Chiraicu Bibliata estudiana anchi. Diosca canda llaquishami pai yachachishcagunahuan yanapai tucungui (Isaias 48:17).

3. Diosca ñucanchimanda imata munan.

³ Maican runagunaga ninaunmi, Diosca tucui religiondami munan nisha. Chasna acpihuas, Jesusca mana chasna yachachirachu. Paiga nirami: ‘Mana tucui ñucata señor, señor niccuna Diospa ali mandanama yaicungaunachu, ñuca Yaya munashcata pactachic runallami paihua ali mandanama yaicungaʼ. Chiraicu, Diosca ñucanchi pai munashcata yachasha pactachichun munan. Chimandahuas, Jesusca Diosta mana casuc runagunataga “mana alita rasha” causaccuna nirami (Mateo 7:​21-23).

4. Jesusca Diospa munaita pactachinamanda imata nira.

⁴ Jesusca Diospa munaita pactachinaga sinzhi manga nira. Paiga nirami: ‘Ichilla punguta yaicuichi. Atun punguta yaicushaga chasnallata atun ñambita rishaga  huañunguichimi. Chita pasanalla ashcamanda chibi ashca runagunami purinaun. Randi huiñai causanama ringahuaca punguhuas ñambihuas ichilla man. Chitaga ashilla runagunami rinaunʼ (Mateo 7:​13, 14). Ichilla ñambiga sirtu religionda ricuchin. Caiga huiñai causaima apan. Atun ñambiga mana ali religionda ricuchin. Caiga huañuima apan. Chasna acpihuas, Jehovaga mana pihuas huañuchun munanzhu. Chiraicu mundu intiruibi, runaguna paita ricsichun munan (1 Timoteo 2:​3, 4).

5. Canga sirtuta yachachic religionda imasata musiangui.

⁵ Jesusca sirtuta yachachic religionda ricsinalla man nira. Ricsingahuaga paiguna quirishcata, imata rashcata yachana anchi. Jesusca nirami: “Paiguna rashcagunata ricushami” yachanguichi. Astahuanbas: “Ali ruyaguna ali muyuta aparinaun” nirami (Mateo 7:​16, 17). Caiga Diosta adoraccuna ucha illac acta mana nisha ninzhu. Randi, Diosta sirviccunaga tucui uras alita rangahua esforzarinaun. Cunanga sirtuta yachachic religionda imasa musianata yachashun.

6, 7. a) Sirtuta yachachic religionga imahuata Bibliahuan yachachin. b) Jesusmanda imata yachanchi.

⁶ Sirtuta yachachic religionga Bibliahuanmi yachachin. Bibliaga ninmi: “Diosllata paihua runagunata yuyachisha quillcachira tucui paihua shimita. Chi shimi balinmi ali purinata yachachingahua paihua shimimanda ñucanchi ucha rashcata yachanchi. Ñucanchi pandacpi Diospa shimi pasacta yachachin imasna ñucanchi alichinata [...] Diospa shimita yachashaga Diosta sirvic runa man, pactacta alichishca ima aligunatahuas rangahua” (2 Timoteo 3:​16, 17). Apostol Pabloga Jesusta  caticcuna camachishcata uyasha quillcara: “Mana runa yuyaimanda chan astahuanbas cai shimiga Diospagmanda man nisha alita quiriranguichi” (1 Tesalonicenses 2:13). Sirtuta yachachic religionga Diospa shimi Bibliahuan yachachin. Runa yuyaigunata, costumbregunata mana yachachinzhu.

⁷ Jesusca Diospa Shimimanda tucuita yachachira (Juan 17:17 leipai). Paiga Diospa Shimibi quillcashcata caran uras rimac ara (Mateo 4:​4, 7, 10). Diosta sirtuta sirviccunaga Jesus shina Bibliamanda tucuita yachachinchi.

8. Jesusca Diosta imasa adorana manguichi nirata.

⁸ Jehovallata adorana anchi. Salmo 83:18 nin: “Runaguna yachanauchun, camba shuti Jehova acta, canllami tucui allpamanda astahuan Atun Dios angui”. Jesusca maican sirtu Dios acta runaguna yachachun munara. Chiraicumi runagunata Diospa shutita yachachira. Paiga casna mañara: “Mundumanda can cushca runagunata camba shutita ricsichishcanimi. Cambac manaura, chasna acpihuas ñucata cuhuarangui, chasnallata can rimashcata casushcaunami” (Juan 17:​6, NM). Jesusca nirami: “Canda mandac Diosta alabana angui, paillata casusha causana mangui” (Mateo 4:10). Diosta sirviccunaga Jesus shinallata ranchi. Jehovallata adoranchi. Paiba shutita rimasha, shuccunata yachachinchi. Chasnallata, Dios ñucanchimanda imata rangaraushcata yachachinchi.

9, 10. Imasata shuccunata llaquishcata ricuchinchi.

⁹ Shuccunata shungumanda llaquishcata ricuchina anchi. Jesusca paiba discipulogunata pariumanda llaquinacunata yachachira (Juan 13:35 leipai). Pariumanda llaquinacushaga cullquiyuc, pugri o maican llactamanda ashahuas huauqui panigunahuan tandalla causashun (Colosenses 3:14). Chiraicumi, mana guerrama  rinchi. Runatas mana huanchinchichu. Bibliaga ninmi: “Maican Diospa huahua acta, Supaiba runa acta yachanalla man. Maicanbas mana alita rac runaga, chasnallata quiric huauquigunata mana llaquicca mana Diospa huahua chan”. Chimandas nin: “Pariumanda llaquinacuna manchi, mana Cain nishca runa shina aichichu, paiga Supaibac tucushami paihua huauqui Abelta huanchira” (1 Juan 3:​10-12; 4:​20, 21).

¹⁰ Ñucanchi ursata, lugarta, charishca cosasgunata cusha pariumanda cushiyanacunchi (Hebreos 10:​24, 25). Chasnallata, “tucuigunata alita rasha” yanapanchi (Galatas 6:10).

11. Imaraicuta Jesusta casunchi.

¹¹ Jesus ñucanchita quishpichishcamandami paita casuna anchi. Bibliaga ninmi: “Jesusllami ñucanchita quishpichic an. Pihuas paita mana quirisha mana quishpingachu. Cai munduibi pihuas mana tiyanzhu uchayuc runagunata quishpichicca. Randi Jesusllami ushan” (Hechos 4:12). Cai libromanda capitulo 5ibi casuc runagunata quishpichingahua Jehova Jesusta cachashcata yacharanchi (Mateo 20:28). Jehovaga cai Allpaibi Rey tucusha mandachun Jesusta anllashca. Chiraicumi, huiñai causana munashaga Jesusta casuna anchi (Juan 3:36 leipai).

12. Imaraicuta politicaibi mana participanchi.

¹² Politicagunaibi mana participanchichu. Jesusca politicaibi mana yaicurachu. Paita uchachiucpiga, Roma llactamanda mandac amu Pilatota nira: “Ñuca mandanaga mana cai pachamanda chan” ( Juan 18:36 leipai). Jesus shinallata, Diospa ahua pachamanda mandanata apoyanchi. Chiraicu, maibi causashahuas politicaibi mana participanchichu. Chasna ashas, Bibliaga mandac amugunata o gobiernogunata  casunauchun ninmi (Romanos 13:1). Chiraicu, ñucanchi causashca llactaibi mandashcagunata casunchi. Chasna acpihuas, maican ley Dios mana gustashcata raichi nicpi mana casunchichu. Apostolgunaga casna ninaura: ‘Ñucanchiga runata uyana randiga Diostami uyana anchiʼ (Hechos 5:29; Marcos 12:17).

13. Diospa Reinomanda imatata yachachinchi.

¹³ Diospa Reinolla cai munduta alichingarauta yachachinchi. Jesusca “Diospa ali mandanamanda” tucui Allpaibi cuintashca tucungami nira (Mateo 24:14 leipai). Diospa Reino cungaraushcata mana maican runa gubirnuhuas cuna ushanzhu (Salmo 146:​3). Jesusca mañausha casna mañanguichi nira: ‘Camba ali mandanaga tucuibi mirarishca tucuchun. Camba munaiga ahua pachai ashcacuinta cai pachaibis chasnallata achunʼ (Lucas 11:2). Bibliaga cai Reino o mandana tucui runa gubirnugunata tucuchingaraun nin. Diospa Reinollami cai Allpaibi saquirisha huiñai mandanga (Daniel 2:44).

14. Maican religiondata sirtuta yachachic man ningui.

¹⁴ Caimanda yachashca huashaga tapuri: “Pigunata Bibliahuan yachachinaun. Pigunata Diospa shutita yachachinaun. Pigunata pariumanda llaquinacunaun. Pigunata ñucanchita quishpichingahua, Diosmi Jesusta cachashca nisha quirinaun. Pigunata politicaibi mana participanaun. Pigunata Diospa Reinollami ñucanchi llaquigunata alichinga nisha yachachinaun”. Jehovahua testigogunallami caita ranchi (Isaias 43:​10-12).

15. Ñucanchi adorashcata Dios alita ricuchun nishaga imata rana anchi.

¹⁵ Dios tiyashcata mana quirinalla chanchi. Demoniogunahuas Dios tiyashcata quirishahuas mana  casunaunzhu (Santiago 2:19). Ñucanchi adorashcata Dios alita ricuchun nishaga, paita quirisha pai mandashcata casuna manchi.

16. Imaraicuta mana ali religionda saquina anchi.

¹⁶ Ñucanchi adorashcata Dios alita ricuchun nishaga, mana ali religionda saquina manchi. Apostol Pablo casna quillcara: “Paigunamanda anchurichi chican tucuichi nira. Ima iridsatas ama llangaichichu” (2 Corintios 6:17). Chiraicumi, tucui mana ali religionguna rashcata saquina anchi.

17, 18. a) “Atun Babilonia” ima tan. b) Imaraicuta ucta anchurina angui.

¹⁷ Mana ali religionga ima tan. Bibliaibi rimashca shina Diosta adoranata mana yachachiccunaga panda religionguna manaun. Bibliaga “Atun Babilonia” nishaga tucui mana ali religionda nin (Apocalipsis 17:​5). Imaraicuta chasna nin. Allpata catac tamia o diluvio huasha, Babilonia llactaibi llullasha yachachishcaguna llucshirinaura. Cai panda yachachishcagunaga mundu intiruibi mirarira. Ñaupa, Babiloniaibi causac runagunaga quimsa diosta adorac anaura. Cunanga, ashca religiongunaga Yaya Dios, Jesus, Diospa samai shuclla Dios o trinidad man nisha yachachinaun. Chasna acpihuas, Bibliaga nin shuc Dioslla tiyan nisha. Chasnallata, Jesusca Diospa churi man (Juan 17:​3). Chimandahuas, Babiloniamanda runagunaga, huañushca huasha causasha catishcata, infiernoibi turmintarishcatas quiric anaura. Cai yachachishcaga mana sirtu chan (nota 14, 17 y 18​ta ricui).

¹⁸ Diosca tucui mana alita yachachic religionda huin tucuchishami nin (Apocalipsis 18:​8). Chiraicumi mana ali religionmanda ucta anchurina angui. Jehovaga panda religiongunamanda ucta llucshichun munan (Apocalipsis 18:​4).

19. Can Jehovata sirvicpiga imasata yanapai tucungui.

 ¹⁹ Mana ali religionda saquisha Jehovata sirvicpiga, camba ailluguna, amigoguna manachari intindingaunachu o piñangaunachari. Chasna acpihuas, Jehova canda mana saquingachu. Mundu intiruibi shungumanda llaquinacuc ailluta cui tucungui. Astahuanbas, mushuc munduibi huiñai causaita cungami (Marcos 10:​28-30). Cunan Bibliata estudiacpi, piñac ailluguna o amigogunaga shamuc punzhaibi Bibliata estudiana munangaunachari.

20. Imaraicuta sirtuta yachachic religion parti tucuna angui.

²⁰ Nallami, Diosca tucui mana alita tucuchisha paiba Reinohuan cai Allpaibi mandangaraun (2 Pedro 3:​9, 13). Caibiga gustutami causashun. Tucuigunami Jehovallata adorangauna. Chiraicumi mana ali religionda saquisha, sirtuta yachachic religion parti tucuna angui.