1. Ko šaj te vačeri amendže sar valjani te služina e Devljese?

BUT religije phenena so on sikavena o čačipe ando Devel. Ama, odova nane adžahar sose o religije sikavena but averčhane ando odova koj tano o Devel hem sar valjani te služina oljese. Sar šaj čače te džana sar o Devel mangela te služina oljese? Samo o Jehova šaj te vačeri amendže sar valjani te služina oljese.

2. Sar šaj te sikljove sar o Devel mangela te služine oljese?

² O Jehova dijamen i Biblija te šaj te sikljova sar valjani te služina oljese. Odoljese sikljov andi Biblija, a o Jehova ka pomožinitu te haljove o čačipe, sose ov akhari gajlja tutar (Isaija 48:17).

3. So o Devel mangela amen te čera?

³ Disave manuša phenena so sa o religije ljegarena ko Devel, ama o Isus na sikadža odova. Ov vačerdža: „Nane svako ko vačeri maje: ’Gospodare, Gospodare‘ te khuvel ko nebesko kraljevstvo, nego samo okova so čerela me Dadesi volja.“ Odoljese amen valjani te sikljova so o Devel mangela hem te čera odova. Odova tano diso but važno sose o Isus vačerdža so o manuša kola na šunena e Devlje tane sar okola „so čerena lošna buča“ (Matej 7:21-23).

4. So vačerdža o Isus ando odova te čerelpe e Devljesi volja?

⁴ O Isus vačerdža so na te ovel lokho te čera odova so o Devel mangela. Ov vačerdža: „Khuven ko tang udar. Sose buvlo tano o drumo kova ljegari ko uništenje hem  but tane okola so džana ko odova drumo. A tang tano o udar hem tang tano o drumo kova ljegari ko dživdipe hem hari tane okola so arakhenalje“ (Matej 7:13, 14). O tang drumo mothovi sar valjani te služina e Devljese hem odova drumo ljegari dži o večno dživdipe. O buvlo drumo na mothovi amendže sar valjani te služina e Devljese, odova drumo ljegari dži o meribe. Ama, o Jehova na mangela nijekh manuš te merel. Ov dela svakonese prilika te sikljol oljestar (2. Petareso 3:9).

5. Sar šaj te pendžara e manušen kola služinena e Devljese sar so ov mangela?

⁵ O Isus pheja so amen šaj te pendžara e manušen kola služinena e Devljese. Sar? Ko oljengo dživdipe šaj te dikha ko so on verujinena hem so čerena. O Isus vačerdža: „Kotar oljenge plodija ka pendžarenljen.“ Palo odova vačerdža: „Svako šukar kaš anela šukar plod“ (Matej 7:16, 17). Odova na značini so okola so služinena e Devljese na grešinena, ama on dena sa pestar te čeren okova soj tano šukar. Akana ka dikha so ka pomožini amendže te pendžara e manušen kola služinena e Devljese sar so ov mangela.

6, 7. (a) Sose valjani te služina e Devljese adžahar sar so phenela i Biblija? (b) So sikljova kotar Isus?

⁶ Amen valjani te služina e Devljese adžahar sar so pisini ki Biblija. I Biblija phenela: „Celo Ljil avela ando Devel hem korisno tano te sikljolpe, te ukorinipe, te ispravinipe, te vaspitinipe ko pravednost te šaj e Devljeso manuš te ovel ko sa sposobno hem te ovel spremno te čerel svako šukar buti“ (2. Timotejese 3:16, 17). O apostol Pavle pisija e hrišćanendže: „Ked šundžen e Devljeso  lafi amendar, na ljeljenlje sar lafi kotar manuš, nego sar e Devljeso lafi, soj tano hem čače“ (1. Solunskonendže 2:13). I čačutni religija ičeripe samo ko odova so phenela e Devljeso Lafi, i Biblija, a na ko odova so phenena o manuša, o adetija ja diso aver.

⁷ Sa so o Isus sikadža hine ando Devljeso Lafi (Čitinen Jovan 17:17). Ov but puča koristija e biblijake stihija (Matej 4:4, 7, 10). E Devljese čačutne sluge ičerenape ko sa so sikavi i Biblija sar so čerdža o Isus.

8. So o Isus sikadža ando odova sar te služina e Jehovase?

⁸ Amen valjani te služina samo e Jehovase. O Psalam 83:18 phenela: „Tu kaso nav tano Jehova, hijan jedino Najbaro upri celo Phuv.“ O Isus manglja o manuša te džanen koj tano čače o Devel hem sikadža e manušen ando Devljeso nav (Čitinen Jovan 17:6). O Isus vačerdža: „E Jehovase, te Devljese, per ko kročija hem samo oljese služin“ (Matej 4:10). Sar e Devljese sluge amen čera odova so čerdža o Isus. Amen služina samo e Jehovase, vičinalje ko nav hem sikava averen ando Devljeso nav hem so ov ka čerel amendže.

9, 10. Sar mothova so manga jekh jekhe?

⁹ Amen valjani čače te manga jekh jekhe. O Isus sikadža pe učenikon te mangen jekh jekhe (Čitinen Jovan 13:35). Amen na dikha ko odova kotar avaja, kotar savo narodo hijam ja da lji hijam barvalje ja čore, nego manga jekh jekhe sar phralja hem phenja (Koloskonendže 3:14). Odoljese na dža ko maribe hem na mudara e manušen. I Biblija phenela: „E Devljese čhave hem e Bengese čhave pendžarenape ko akava: svako ko na čerela okova soj tano pravedno, na avela kotar Devel, sar ni okova so na mangela pe phralje.“ Palo odova phenela:  „Te manga jekh jekhe! Ma te ova sar o Kain, kova alo ando Lošno hem mudardža pe phralje“ (1. Jovaneso 3:10-12; 4:20, 21).

¹⁰ Amen daja amaro vakti, takati hem o materijalna buča te pomožina jekh jekhese (Jevrejendže 10:24, 25). Amen „čera šukaripe sarinendže“ (Galatskonendže 6:10).

11. Sose valjani te verujina ko Isus?

¹¹ Amen valjani te šuna e Isuse sose samo prekalo oljeste šaj te ova spasime. I Biblija phenela: „Nane nijekh aver te spasini amen, sose nane aver nav dindo talo nebo e manušendže kova šaj te spasini amen“ (Čeriba e apostolengo 4:12). Ko pandžto šero kotar akija knjiga sikljiljam so o Jehova bičhaldža e Isuse te del po dživdipe e manušendže kola šunena (Matej 20:28). O Jehova birija e Isuse te ovel Kralj ki celo Phuv. Odoljese i Biblija phenela so valjani te šuna e Isuse ako manga te živina večno (Čitinen Jovan 3:36).

12. Sose amen na mešinamen ki politika?

¹² Amen na valjani te mešinamen ki politika. O Isus na mešijape ki politika. Ked hine anglo rimsko vladari, o Pilat, vačerdža oljese: „Moklo kraljevtsvo nane kotar akava sveto“ (Čitinen Jovan 18:36). Sar o Isus hem amen hijam verna e Devljese Kraljevstvose hem sebepi odova kuri god te ova, amen na mešinamen ki politika. Ama, i Biblija phenela so valjani te šuna okoljen soj tane ki vlast (Rimskonendže 13:1). Amen šuna o zakonja ki Phuv kuri živina. Ama, ked odola zakonja tane protiv e Devljese zakonja, tegani amen čera odova so čerdže o apostolija, kola vačerdže: „E Devlje valjani te šuna pobuter, nego lji e manušen“ (Čeriba e apostolengo 5:29; Marko 12:17).

13. So vačera e manušendže ando Devljeso Kraljevstvo?

 ¹³ Amen verujina so samo e Devljeso Kraljevstvo ka čhinavi sa o problemija ko sveto. O Isus vačerdža so o „šukar haberi ando kraljevstvo“ ka vačeripe ko celo sveto (Čitinen Matej 24:14). Nijekh manušikani vlast našti te čerel odova so e Devljeso Kraljevsto ka čerel amendže (Psalam 146:3). O Isus sikadžamen te moljinamen: „Te avel to Kraljevstvo. Te ovel ti volja sar ko nebo, adžahar hem ki Phuv“ (Matej 6:10). I Biblija phenela so e Devljeso Kraljevstvo ka uništini sa o manušikane vladavine hem „samo ov ka ačhol večno“ (Danijel 2:44).

14. Ko služini e Devljese adžahar sar so ov mangela?

¹⁴ Akana puč kokri tut: „Ko služini e Devljese adžahar sar so phenela i Biblija? Ko vačeri averendže ando Devljeso nav? Ko čače mothovi mangipe jekh jekhese hem verujini so o Devel bičhaldža e Isuse te spasinimen? Ko na mešinipe ki politika? Ko vačeri ando odova so samo e Devljeso Kraljevstvo ka čhinavi amare problemija?“ Odova čerena samo e Jehovase svedokija (Isaija 43:10-12).

15. So valjani te čera ako manga te služina e Devljese sar so ov mangela?

¹⁵ Našti samo te phena so verujina so isi Devel. Čak hem o demonja verujinena so isi Devel, ama na šunenalje (Jakoveso 2:19). Ako manga te služina e Devljese sar so ov mangela, na valjani samo te phena so verujina so isi Devel, nego hem te čera odova so ov rodela.

16. Sose valjani te cidamen andi hovavni religija?

¹⁶ Te šaj te služina e Devljese sar so ov mangela, amen valjani te ikljova kotar hovavni religija. O prorok Isaija  pisija: „Ikljoven odothar [...] oven čista“ (Isaija 52:11; 2. Korintskonendže 6:17). Odoljese valjani te cidamen kotar sa so avela andi hovavni religija.

17, 18. Soj tano o „Baro Vavilon“ hem sose valjani sig posig te ikljove odothar?

¹⁷ Soj tani i hovavni religija? Odija tani svako religija koja na sikavimen te služina e Devljese, adžahar sar so phenela oljeso Lafi. Ki Biblija sa o hovavne religije vičinenape „Baro Vavilon“ (Pučaribe 17:5). Sose? Palo potop kova hine ko Nojese dive, but hovavne sikaviba ikljislje andi diz Vavilon hem pherdže celo Phuv. Na primer, o manuša kola živije ko Vavilon hineljen grupe ando trin devela koljendže služije hem odoljese avdije but religije sikavena soj tano o Devel Trojstvo. On verujinena soj tane o Dad, o Čhavo hem o sveti duh jekh Devel. Ama, i Biblija sikavimen so isi samo jekh čačutno Devel, o Jehova, hem soj tano o Isus oljeso Čhavo (Jovan 17:3). O manuša ko Vavilon verujie so ked o manuš merela oljesi duša džala te živini ko aver than hem šaj te thabljol ki jag ko pakao. Ama, odova tano hovajbe. Moljinatu dikh o 14. dodatko hem o 17. hem o 18. dodatko.

¹⁸ O Devel vačerdža so pana hari sa o hovavne religije ka oven uništime (Pučaribe 18:8). Da lji akana haljoveja sose valjani sig posig te ikljove andi hovavni religija? O Jehova mangela te ikljove odothar dži isitu pana vakti (Pučaribe 18:4).

19. Sar o Jehova ka akhari gajlja tutar sebepi so mangeja te služine oljese?

¹⁹ Ked ka mange te ikljove andi hovavni religija hem te služine e Jehovase, disave kotar ti familjija ja te amala šaj na te haljoven sose čerdžan odova hem čak ka mangen  te čerenče pharipe. Ama, o Jehova na te mukeltu. Ov ka čerel te oveltu familjija ko celo sveto kuri isi milionja phralja hem phenja kola čače mangena jekh jekhe. Isto adžahar, ka oveltu nada so ka živine večno ko Devljeso nevo sveto (Marko 10:28-30). Šaj disave kotar ti familjija ja te amala kola čerenače pharipa so služineja e Jehovase, ka mangen palo disavo vakti te sikljoven andi Biblija.

20. Sose valjani te služine e Devljese adžahar sar so ov mangela?

²⁰ Pana hari, o Devel ka čhinavi sa o lošnipe hem oljeso Kraljevsto ka vladini upri celo Phuv (2. Petareso 3:9, 13). Odova ka anel amendže baro bahtaljipe! Sare ka služina e Jehovase adžahar sar so ov mangela. Odoljese, akana tano vakti te služine e Devljese adžahar sar so ov mangela.