1. A lingbi zo wa la afa na e nzoni lege ti voro na Nzapa?

MINGI ti abungbi ti nzapa atene so ala yeke fa tâ tënë na ndö ti Nzapa. Me a yeke tâ tënë pëpe, ndali ti so abungbi ti nzapa afa aye so ayeke nde nde na ndö ti Nzapa nga na ndö ti lege so a lingbi e voro na lo. E lingbi ti hinga nzoni lege ti voro na Nzapa tongana nyen? Gï Jéhovah oko la alingbi ti fa na e lege so a lingbi e voro na lo.

2. Tongana nyen la mo lingbi ti hinga nzoni lege ti voro na Nzapa?

² Jéhovah amû na e Bible tongaso si e lingbi ti hinga nzoni lege ti voro na lo. Tongaso, manda Bible, na Jéhovah ayeke mû maboko na mo ti wara ye ti nzoni na lege ti afango ye ti lo ndali ti so lo bi bê ti lo na mo mingi.—Ésaïe 48:17.

3. Nyen la Nzapa aye ti tene e sara?

³ Ambeni zo atene so Nzapa aye abungbi ti vorongo Nzapa kue, me a yeke ye so Jésus afa na e la pëpe. Lo tene: “A yeke pëpe zo kue so atene na mbi, ‘Seigneur, Seigneur,’ si ayeke lï ande na yâ ti Royaume ti yayu. Me gï zo so asara ye so bê ti Babâ ti mbi so ayeke na yayu aye si ayeke lï ande dä.” Tongaso, a yeke kota ye ti hinga ye so bê ti Nzapa aye na ti sara ni. Ye so ayeke kota tënë mingi ndali ti so Jésus ahaka azo so ake ti mä yanga ti Nzapa na asioni zo wala “azo so akpe ndia pëpe”.—Matthieu 7:21-23.

4. Jésus atene nyen na ndö ti sarango ye so Nzapa aye?

⁴ Jésus atene na e so tongana e ye ti sara ye so bê ti Nzapa aye, e yeke wara ande akpale. Lo tene: “Ala lï na kete  yanga ti gbagba, ndali ti so lê ti lege so ayeke gue na futingo akono nga yanga ti gbagba ni ayeke kota, na gbâ ti azo si ayeke hon dä; me lê ti lege so ague na fini ayeke kete nga yanga ti gbagba ni ayeke kete mingi, na azo mingi pëpe ayeke wara ni.” (Matthieu 7:13, 14). Kete lege, wala nzoni lege ti voro na Nzapa, ague na fini ti lakue lakue. Kota lege, wala sioni lege ti voro na Nzapa, ague na kuâ. Me Jéhovah aye ti tene zo oko akui pëpe. Lo mû lege na zo kue ti manda ye na ndö ti lo.—2 Pierre 3:9.

5. Tongana nyen la mo lingbi ti hinga azo so ayeke voro Nzapa na lege ni?

⁵ Jésus atene so e lingbi ti hinga azo so ayeke voro Nzapa na lege ni. E yeke sara ni na lege so e yeke gi ti hinga aye so ala mä na bê na ni nga na aye so ala yeke sara. Lo tene: “Ala yeke hinga [ala] na lege ti alengo ti ala.” Lo kiri lo tene: “Nzoni keke kue ayeke lë nzoni lê ti keke.” (Matthieu 7:16, 17). So aye ti tene pëpe so azo so ayeke voro Nzapa ayeke mbilimbili-kue. Me awakua ti Nzapa ayeke sara lakue ngangu ti sara ye so ayeke na lege ni. E yeke bâ fadeso aye so alingbi ti mû maboko na e ti hinga azo so ayeke voro Nzapa na lege ni.

6, 7. Ngbanga ti nyen la vorongo so ayeke na lege ni asara ye ague oko na Bible? Tapande ti Jésus afa na e nyen?

⁶ A lingbi vorongo ti e ague oko na ye so Bible afa. Bible atene: “Atënë kue ti yâ ti Mbeti ti Nzapa, a sû ni na gbe ti yingo ti Nzapa, na a yeke nzoni ti fa na ye na zo, ti suku na zo, ti kiri na aye na nzoni lege, ti fa na zo ti sara ye so ayeke mbilimbili, si zo ti Nzapa alingbi na yâ ti ye kue, lo wara aye kue so lo yeke na bezoin ni ti sara na nzoni kusala kue.” (2 Timothée 3:16, 17). Bazengele Paul atene na aChrétien, atene: “Na ngoi so ala yamba tënë ti Nzapa so e  fa lani na ala, ala yamba ni tongana tënë so alondo na azo pëpe, me tongana tënë ti Nzapa, na a yeke tënë ti lo biani.” (1 aThessalonicien 2:13). Vorongo so ayeke na lege ni asara ye ague gï oko na Bible. A sara ye ague oko pëpe na apensé ti azo, angobo ti ala, wala na ambeni ye nde.

⁷ Aye kue so Jésus afa lani alondo na yâ ti Mbeti ti Nzapa. (Diko Jean 17:17.) Mingi ni lo sara kua na atënë so lo mû ni na yâ ti Mbeti ti Nzapa (Matthieu 4:4, 7, 10). Atâ wakua ti Nzapa ayeke mû tapande ti Jésus na aye kue so ala yeke fa alondo na yâ ti Bible.

8. Jésus afa na e nyen na ndö ti vorongo Jéhovah?

⁸ A lingbi e voro gï Jéhovah oko. Psaume 83:18 atene: “Mo so iri ti mo ayeke Jéhovah, mo oko la mo yeke Lo so ayeke na nduzu na ndö ti aye kue, na ndö ti sese kue.” Jésus aye lani ti tene azo ahinga Nzapa nzoni, na lo fa na azo iri ti Nzapa. (Diko Jean 17:6.) Jésus atene: “A yeke gï Jéhovah Nzapa ti mo si mo doit ti voro lo, nga gï lo oko si mo doit ti sara na lo kusala so ayeke nzoni-kue.” (Matthieu 4:10). Tongaso, so e yeke awakua ti Nzapa, e yeke mû tapande ti Jésus. E yeke voro gï Jéhovah oko, e yeke di iri ti lo nga e yeke fa na azo iri ti Nzapa nga na ye so lo yeke sara ande ndali ti e.

9, 10. Tongana nyen la e yeke fa so e ndoye terê na popo ti e?

⁹ A lingbi e ye azo na bê ti e kue. Jésus afa na adisciple ti lo ti ndoye terê. (Diko Jean 13:35.) Atâa ndo so e londo dä, ngobo ti e wala e yeke zo ti mosoro wala wayere, e yeke ye azo kue. A lingbi ndoye so e yeke na ni na popo ti e asara si e duti beoko tongana aita (aColossien 3:14). Tongaso, e yeke sara bira pëpe nga e yeke fâ zo pëpe. Bible atene: “A hinga amolenge ti Nzapa na amolenge ti Zabolo na lege ti ye so: Zo kue so ayeke sara ye ti mbilimbili pëpe alondo na Nzapa pëpe, nga zo so andoye ita ti lo pëpe alondo na  Nzapa pëpe.” Bible akiri atene: “A lingbi e ndoye terê na popo ti e. E sara tongana Caïn pëpe, so alondo na Zo ti sioni si lo fâ ita ti lo.”—1 Jean 3:10-12; 4:20, 21.

¹⁰ E yeke mû ngoi ti e, ngangu ti e nga na aye ti e ti mû maboko na amba ti e nga ti wa ala (aHébreu 10:24, 25). E “sara ye ti nzoni na azo kue”.—aGalate 6:10.

11. Ngbanga ti nyen la e yeda so Jésus ayeke lege so ague na Nzapa?

¹¹ A lingbi e mä yanga ti Jésus ndali ti so lo yeke lege so ague na Nzapa. Bible atene: “Salut ayeke na mbeni zo nde pëpe, ndali ti so mbeni iri nde ayeke dä pëpe na gbe ti yayu so a mû ni na azo, so gï na lege ni si e lingbi ti wara salut.” (Kusala 4:12). Na chapitre 5 ti buku so, e manda so Jéhovah atokua Jésus ti mû fini ti lo tongana ye so a futa ndali ti azo so amä yanga (Matthieu 20:28). Jéhovah asoro Jésus ti komande tongana Gbia na ndö ti sese. Ndani la Bible atene so tongana e ye ti ngbâ na fini lakue lakue, a lingbi e mä yanga ti Jésus.—Diko Jean 3:36.

12. Ngbanga ti nyen e yeke yôro terê ti e pëpe na yâ ti poroso?

¹² A lingbi e yôro terê ti e na yâ ti poroso pëpe. Jésus ayôro lani terê ti lo na yâ ti poroso pëpe. Na ngoi so Jésus ayeke na gbele ngbanga, lo tene na Pilate, mbeni mokonzi ti Rome, lo tene: “Royaume ti mbi ayeke ti dunia so pëpe.” (Diko Jean 18:36.) Legeoko tongana Jésus, e yeke be-ta-zo na Royaume ti Nzapa so ayeke na yayu, ndani la, atâa ndo wa la e yeke dä e yeke yôro terê ti e pëpe na yâ ti poroso. Ye oko, Bible ahunda na e ti mä yanga ti “akota zo ti komande”, so ti tene azo ti gouvernement (aRomain 13:1). E yeke sara ye alingbi na andia ti kodro so e yeke dä. Me tongana mbeni ndia ni ahunda na e ti sara ye so ndia ti Bible ake, e yeke mû tapande ti abazengele, so atene: “A lingbi e mä yanga ti Nzapa, lo so lo yeke mokonzi, ahon ti mä azo.”—Kusala 5:29; Marc 12:17.

13. Nyen la e yeke fa na ndö ti Royaume ti Nzapa?

 ¹³ E hinga so gï Royaume ti Nzapa la ayeke leke akpale ti dunia so. Jésus atene lani so a yeke fa ande “nzoni tënë ti Royaume” na yâ ti dunia kue. (Diko Matthieu 24:14.) Mbeni gouvernement ti azo alingbi pëpe ti sara ye so Royaume ti Nzapa ayeke sara ande ndali ti e (Psaume 146:3). Jésus afa na e ti sambela ndali ti Royaume ti Nzapa tongana lo tene: “Zia Royaume ti mo aga. Zia a sara ye so bê ti mo aye, na yayu legeoko nga na ndö ti sese.” (Matthieu 6:10). Bible afa na e so Royaume ti Nzapa ayeke futi ande agouvernement ti azo kue nga so “gï royaume so oko la ayeke ngbâ lakue lakue”.—Daniel 2:44.

14. Azo wa la mo bâ so ala yeke voro Nzapa na lege ni?

¹⁴ Na peko ti aye so kue e bâ so, hunda terê ti mo: ‘Azo wa la afango ye ti ala alondo na yâ ti Bible? Azo wa la ayeke fa iri ti Nzapa na amba ti ala? Azo wa la ayeke ndoye amba ti ala na bê ti ala kue nga amä na bê so Nzapa atokua lani Jésus ti sö e? Azo wa la ayeke yôro terê ti ala pëpe na yâ ti poroso? Azo wa la ayeke fa so gï Royaume ti Nzapa la alingbi ti leke akpale ti e?’ A yeke gï aTémoin ti Jéhovah.—Ésaïe 43:10-12.

15. Nyen la a lingbi e sara tongana e ye ti tene vorongo ti e anzere na Nzapa?

¹⁵ Gï ti mä na bê so Nzapa ayeke dä alingbi pëpe. Même asioni yingo amä na bê so Nzapa ayeke dä, me ala mä yanga ti lo pëpe (Jacques 2:19). Tongana e ye ti tene vorongo so e yeke voro na Nzapa anzere na lo, a lingbi e mä gï na bê na Nzapa ape me e sara nga aye so lo tene.

16. Ngbanga ti nyen la a lingbi e ke bungbi ti vorongo nzapa ti wataka?

¹⁶ A lingbi e ke bungbi ti vorongo nzapa ti wataka si  vorongo so e yeke voro na Nzapa anzere na lo. Prophète Ésaïe atene: “Ala sigi na ndo so, ala bata terê ti ala si ala ga sioni pëpe.” (Ésaïe 52:11; 2 aCorinthien 6:17). Ndani la a lingbi e ke aye kue so andu vorongo ti wataka.

17, 18. “Babylone, Ngangu gbata” ayeke nyen? Ngbanga ti nyen la a lingbi zo asigi na yâ ni hio?

¹⁷ Bungbi ti vorongo nzapa ti wataka ayeke nyen? A yeke abungbi ti nzapa kue so ayeke fa na e ti voro Nzapa na mbeni lege so ague nde na ye so Bible, so ayeke Mbeti ti Nzapa, afa. Bible airi abungbi ti vorongo ti wataka kue “Babylone, Ngangu gbata”. (Apocalypse 17:5). Ngbanga ti nyen? Na peko ti kota ngu so apika na ngoi ti Noé, gbâ ti afango ye ti abungbi ti nzapa ti wataka akomanse na gbata ti Babylone. Afango ye ti wataka so amû ndö ti sese kue. Na tapande, azo so ayeke na Babylone ayeke voro lani agroupe ti anzapa ota. Laso, nga, abungbi ti nzapa mingi afa so Nzapa ayeke nzapa ti Trinité, me Bible afa polele so tâ Nzapa ayeke gï oko, Jéhovah, nga Jésus ayeke Molenge ti lo (Jean 17:3). Azo so ayeke na Babylone amä na bê so mbeni ye ti terê ti zo ayeke ngbâ na fini na peko ti so zo akui nga so ye ni so alingbi ti bâ pasi na enfer. So mvene la.—Bâ Kete tënë 14, 17, na 18.

¹⁸ Nzapa afa kozo awe so a ga nduru ti futi abungbi ti nzapa ti wataka kue awe (Apocalypse 18:8). Mo hinga awe ndani so a lingbi zo asigi na yâ ti bungbi ti nzapa ti wataka hio? Jéhovah Nzapa aye ti tene mo sara ni hio kozo si ngoi ayeke dä pëpe ti tene mo sara ni.—Apocalypse 18:4.

19. Tongana mo mû desizion ti sara na Jéhovah, lo yeke bâ lege ti mo tongana nyen?

¹⁹ Tongana mo mû desizion ti sigi na yâ ti bungbi ti nzapa ti wataka nga ti voro Jéhovah, ambeni kamarade ti mo wala afami ti mo alingbi ti hinga li ti ala na desizion ti  mo ni pëpe nga ala lingbi ti sara si gigi akpengba na mo. Me Jéhovah ayeke zia ande mo pëpe. Mo yeke ga na yâ ti sewa ti aita kutu mingi so ayeke na yâ ti dunia so aye terê mingi, nga mo yeke duti na beku ti duti ande na yâ ti fini dunia ti Nzapa teti lakue lakue (Marc 10:28-30). Peut-être ambeni kamarade ti mo nga na afami ti mo so ake desizion ti mo so alingbi mbeni lâ ti mû desizion ti manda Bible.

20. Ngbanga ti nyen la a yeke kota ye ti voro Nzapa na lege so lo ye ti tene a sara na ni?

²⁰ Nzapa aga nduru mingi awe ti futi asioni ye kue nga Royaume ti lo ayeke komande na ndö ti sese (2 Pierre 3:9, 13). A yeke duti ande mbeni pendere ngoi mingi! Azo kue ayeke voro ande Jéhovah na lege so lo ye ti tene e sara na ni. Tongaso, a yeke kota ye ti tene mo mû desizion fadeso nga mo voro Nzapa na lege so lo ye ti tene a sara na ni.