1. Magano halaalunni magansiˈneemmo gara kulannonkehu ayeti?

ROORE ammaˈno Maganu daafira halaale rosiinseemmo yitanno. Ikkirono kuni ikkannokkireeti; mayira yiniro, addi addi ammaˈno Maganu ewelumma daafiranna iso magansiˈnanni gara rosiissanno rosi lowo geeshsha babbaxxinoho. Magano halaalunni magansiˈnanni gara afa dandiineemmohu hiittoonniiti? Magansiˈneemmosi gara kula dandaannohu Yihowa callaati.

2. Magano halaalunni magansiˈnanni gara afa dandiineemmohu hiittoonniiti?

² Yihowa iso halaalunni magansiˈneemmo gara ronseemmo gede Qullaawa Maxaafa uyinonke. Konni daafira Qullaawa Maxaafa xiinxalli; Yihowa ate daafira hedannohura rosiisannohe roso huwatanna harunsa dandaatto gede kaaˈlannohe.—Isayaasi 48:17.

3. Maganu maa assinammora hasiˈranno?

³ Mitu manni baalanti ammaˈno Magano hagiirsiissanno yaanno; Yesuusi kayinni hatto yee dirosiisino. Isi togo yiino: “‘Mootichaˈya! Mootichaˈya!’ yaannoehu baalu gordu Gashshoote dieanno. Gordu Gashshoote eannohu Anniˈya yiinore [woy, fajjo] wonshannoho.” Konni daafira Maganu fajjo maatiro rosanna wonsha hasiissannonke. Kuni mulluri gede assine laˈnannire diˈˈikkino; mayira yiniro, Yesuusi Maganoho hajajamannokki manni finqilu woy ‘bunshe assanno’ manniwiinni bande laˈnanniha ikkinokkita coyiˈrino.—Maatewoosi 7:21-23.

4. Yesuusi, Maganu fajjo wonshate daafira mayyiino?

⁴ Yesuusi, Maganu fajjo assa woˈma wote shota ikkitannokkita  coyiˈrino. Isi togo yiino: “Ruukkashsho waalcho higgine eˈe! Baote widira massanno waalchi halaˈladoho. Doogono halaˈladote; hakkaanni higge eˈannorino batinyeho. Heeshshote widira massanno waalchi ruukkashshoho; doogono gurchote [woy, shaaladote]; ise afiˈranno manni kiiro shiimaho.” (Maatewoosi 7:13, 14) Shaalado doogo woy addu ammaˈno hegere heeshshowa massitanno. Halaˈlado doogo woy kaphu ammaˈno kayinni reyote widira massitanno. Yihowa kayinni mittu manchino baˈˈara dihasiˈranno. Isi mittu mittunku manchira isire rosanno gede faro fanino.—2 Pheexiroosi 3:9.

5. Magano halaalunni magansidhannore badde afa dandaattohu hiittoonniiti?

⁵ Yesuusi, Magano halaalunni magansidhannore bande afa dandiineemmota coyiˈrino. Afa dandiineemmohu ammantannorenna assitannore laˈneeti. Yesuusi togo yiino: “Insa baddine affinannihu guminsanniiti.” Ledeno togo yiino: “Dancha haqqicho baala dancha laalo laaltanno.” (Maatewoosi 7:16, 17) Hatto yaa Magano magansidhannori disodhannoreeti yaa diˈˈikkitino. Ikkirono Maganu soqqamaasine woˈmanka wote gara ikkinore assate sharrantanno. Aanchine Magano halaalunni magansidhannore bade afate kaaˈlannonkeri maatiro laˈneemmo.

6, 7. Magano halaalunni magansidhannori Qullaawu Maxaafi aana xintamino roso rosiissannohu mayiraati? Yesuusi assinorinni maa ronseemmo?

⁶ Rosiinseemmo rosi Qullaawu Maxaafi aana xintaminoha ikka hasiissannosi. Qullaawu Maxaafi togo yaanno: “Qullaawa Borro baala Maganunnihu Qullaawu Ayyaani kulanna borreessinoonnite. Tini borro halaale rosiisate, sodhinore seejjate, soˈro hoolatenna halaalaancho heeshshora ikkanno biddishsha aate kaaˈlitanno. Qolteno, Maganu manchi guuta ikkano gedenna dancha coye assate qixxaawinoha ikkanno gede kaaˈlitanno.” (2 Ximootewoosi 3:16, 17)  Soqqamaasinchu Phaawuloosi Kiristaanaho togo yee sokka borreessino: “Maganu qaale kullummoˈne yannara, mannu qaali gede assitine ikkikkinni, Maganu qaali gede assitine adhitinoonni. Addanko [loosannoho] Maganu qaaleeti.” (1 Teselonqe 2:13) Magano halaalunni magansidhannori rosiissanno rosi, Qaalisi yaano Qullaawu Maxaafi aana xintaminoho. Insa mannu hedo, woga woy woluri aana xintamino roso dirosiissanno.

⁷ Yesuusi rosiisino rosi baalunku Maganu Qaali aana xintaminoho. (Yohaannisi 17:17 nabbawi.) Isi duucha wote Qullaawa Borro yitannore qummi assanno. (Maatewoosi 4:4, 7, 10) Halaalunni Maganoho soqqantannorino isi lawishsha harunsite Qullaawu Maxaafi aana calla xintamino roso rosiissanno.

8. Yesuusi, Yihowa magansiˈrate daafira mayyee rosiisino?

⁸ Yihowa calla magansiˈra hasiissannonke. Faarso 83:18 (NW) togo yitanno: “Suˈmakki Yihowa yinannihu ati callu uulla woˈmate aana Woˈmunkura Aliidiha ikkoottota mannu afona.” Yesuusi mannu halaalaanchu Magani ayetiro bade afara hasiˈrino; qoleno mannaho Maganu suˈma kulino. (Ibiraawoota 2:12 nabbawi.) Yesuusi togo yiino: “Mootichu Maganikkira kumbuuli; iso calla magansiˈri!” (Maatewoosi 4:10) Konnira ninkeno Maganu soqqamaasine ikkinoommohura, Yesuusi faale haˈneemmo. Yihowa calla magansiˈneemmo, suˈmasi woshshineemmo, qoleno suˈmasinna albillitte assannonkere mannaho rosiinseemmo.

9, 10. Mimmito banxeemmota leellinsheemmohu hiittoonniiti?

⁹ Mimmito godowinta baxa hasiissannonke. Yesuusi rosaanosi mimmito baxxanno gede rosiisino. (Yohaannisi 13:35 nabbawi.) Heeˈneemmo gobbanna budinke baxihano ikkiro, dureeyye woy buxaneno ikkino, mereeronke babbadooshshu dino. Mimmito banxeemmo daafira roduuwu mereero heedhanno mittimma noonke. (Qolasiyaasi Sokka 3: 14) Konni daafira olaho gaande manna dishineemmo. Qullaawu Maxaafi togo yaanno: “Maganu oosonna Daawuloosi ooso bande anfannihu [konninniiti]; keeraanchimma assannokkihunna rodoosi baxannokkihu baalu Maganu ila diˈˈikkino.” Qoleno togo yaanno: “Mimmitinke ledo baxammo. . . . Bushunniha ikkinohu Qaayeeli rodoosi shiino; ninke hattoore ikkinoonke.”—1 Yohaannisi 3:10-12; 4:20, 21.

¹⁰ Yannanke, wolqankenna miinjanke horoonsiˈne mimmito kaaˈlineemmo hattono jawaachinsheemmo. (Ibiraawoota 10:24, 25) ‘Manna baalaho dancha coye assineemmo.’—Galatiyu Sokka 6:10.

11. Yesuusira hajajama hasiissannonkehu mayiraati?

¹¹ Gato afiˈnannihu Yesuusi widoonni calla ikkinota ammana hasiissannonke. Qullaawu Maxaafi togo yaanno: “Gato wolewa ayewano dino. Gatote hasiisannonkehu mannaho uyinoonni suˈmi gordoho woroonni wolu dino.” (Soqqamaasinete Looso 4:12) Konni maxaafira Fooliishsho 5te, Yihowa hajajamanno mannira heeshshosi wodo asse aanno gede Yesuusa soyinota ronsoommo. (Maatewoosi 20:28) Yihowa, Yesuusa uulla gashshanno gede shoomino. Qullaawu Maxaafi hegerera heeˈra hasiˈnummoro Yesuusira hajajama hasiissannonketa kulannohu iseraati.—Yohaannisi 3:36 nabbawi.

12. Poletiku coyira anga wodhineemmokkihu mayiraati?

¹² Poletiku coyira anga wodha dihasiissannonke. Yesuusi poletiku coyira dikarsamino. Isi yoote shiqinshoonniwa heeˈre Roomu gashshaanchira Philaaxoosira, “Ane gashshooti tenne gobbaha diˈikkino” yiino. (Yohaannisi 18:36 nabbawi.) Yesuusi gede ninkeno Maganunnite iimi Mangistera ammanammoommoreeti; konni daafira heeˈneemmo gobba baxxutano ikkituro poletiku coyira anga diwodhineemmo. Ikkollana Qullaawu Maxaafi “aleenni noo gashshaanora” yaano uullate gashshootira hajajamme  yaannonke. (Roomu Sokka 13:1) Heeˈneemmo gobba higge ayirrinseemmo. Kayinni uullate gashshooti fushshino higge Maganu higge ledo sumuu yitannokkita ikkituro, soqqamaasinete faale haˈneemmo; insa togo yitino: “Mannaho hajajamantenni Maganoho hajajama hasiissannonke.”—Soqqamaasinete Looso 5:29; Maarqoosi 12:17.

13. Maganu Mangiste daafira mayine sabbankeemmo?

¹³ Alamete aana noo qarra tirtannoti Maganu Mangiste calla ikkitinota ammanneemmo. Yesuusi “Maganu Gashshootihu Danchu Duduwi” alame woˈmate aana sabbakamannota coyiˈrino. (Maatewoosi 24:14 nabbawi.) Maganu Mangiste assitannonkere assa dandaannohu uullate gashshooti horo dino. (Faarso 146:3) Yesuusi Maganu Mangiste daggara huucciˈneemmo gede rosiisanni togo yiino: “Gashshootikki dayo, hedoottori gordoho ikkinonte gede, baattote aanano ikko.” (Maatewoosi 6:10) Qullaawu Maxaafi, Maganu Mangiste uullate gashshoote baalanka hunte ‘ise calla hegerera kaajjite uurritannota’ kulanno.—Daanieeli 2:44.

14. Magano halaalunni magansidhanni noori ayeooti yite ammanatto?

¹⁴ Kageeshsha xiinxalloottore heddanni ateneeto togo yite xaˈmi: ‘Qullaawu Maxaafi aana xintamino roso rosiissannori ayeooti? Mannaho Maganu suˈma kultannori ayeooti? Mimmito godowinta baxxannorinna gatisannonke gede Maganu Yesuusa soyinota ammantannori ayeooti? Poletiku coyira anga wodhitannokkiri ayeooti? Qarranke tirtannoti Maganu Mangiste calla ikkitinota dudubbannori ayeooti?’ Koye yinire baalankare assitannori Yihowa Farciˈraasine callaati.—Isayaasi 43:10-12.

15. Magansiˈranke Magano hagiirsiissannota ikkitanno gede maa assa hasiissannonke?

¹⁵ Maganu noota ammana calla diguddanno. Agaaninte nafa Maganu noota ammantanno; ikkirono insa isira  dihajajantanno. (Yaiqoobi 2:19) Magansiˈranke Magano hagiirsiissannota ikkitanno gede, isi noota ammana calla ikkikkinni isi yaannore assano hasiissannonke.

16. Kaphu ammaˈnowiinni xeertiˈra hasiissannonkehu mayiraati?

¹⁶ Magansiˈranke Magano hagiirsiissannota ikkitanno gede, kaphu ammaˈnowiinni xeertiˈra hasiissannonke. Masaalaanchu Isayaasi togo yee borreessino: “Baabilooninni baxxitine fulle! . . . Giddonsanni fultine keeraaˈme!” (Isayaasi 52:11; 2 Qorontoosi 6:17) Kaphu ammaˈno ledo xaado afiˈrino coyi baalunkuwiinni xeertiˈra hasiissannonkehu iseraati.

17, 18. “Bayira Baabiloone” maati? Ise giddonni rahe fula hasiissannohu mayiraati?

¹⁷ Kaphu ammaˈno maati? Magano Qaalisi yaannokki garinni magansiˈnanni gede rosiissanno ammaˈno baalanti kaphu ammaˈnooti. Qullaawu Maxaafi kaphu ammaˈno woˈmanta “Bayira Baabiloone” yaanno. (Yohaannisi Ajuuja 17:5, NW) Mayira? Nohi dirihu Baote Wayi gedensaanni, batinyu kaphu ammaˈno rosi hanafinohu Baabiloonete katamiraati. Kuni rosi alame woˈma tuqino. Lawishshaho, hunda Baabiloonete heeˈranno manni sase waaxo maganna magansiˈranno. Yannankerano batinye ammaˈno Maganu Sillaaseeti yite rosiissanno; ikkollana Qullaawu Maxaafi halaalaanchu Magani mitto Yihowa calla ikkinotanna Yesuusi Beettosi ikkinota rosiisanno. (Yohaannisi 17:3) Baabiloonete heeˈranno manni, mannu reyanno wote reyikki gatannori giddosi no, qoleno hakkurichi fule sioolete giiramanno yeeno ammananno. Kunino kaphoho.—Jeefote Hedo 14, 17 nna 18 lai.

¹⁸ Maganu kaphu ammaˈno baalanti muli yanna giddo baˈanno yiino. (Yohaannisi Ajuuja 18:8) Kaphu ammaˈno giddonni rahe fula hasiissannohu mayiraatiro leellihe? Maganu Yihowa yanna gooffukki konne assattora hasiˈranno.—Yohaannisi Ajuuja 18:4.

19. Yihowara soqqama doodhatto wote, isi towaatannohehu hiittoonniiti?

 ¹⁹ Kaphu ammaˈno giddonni fulte Yihowa magansiˈrate higatto wote, mite jaallakki woy miniˈne manni tenne doodhoottohu mayiraatiro huwata hoogaranna waadahera dandaanno. Yihowa kayinni ditugannohe. Mimmito addinta baxannohu lowo miliyoone ikkanno manni noote halaˈlado maate miila ikkatto; qoleno Maganu abbannote haaro alamera hegerera heeˈrate hexxo heedhannohe. (Maarqoosi 10:28-30) Yihowara soqqama doodhiteenna gibbannohe jaallakki woy maateˈne giddo mitu, gale hosanni Qullaawa Maxaafa xiinxallannoha ikkara dandaanno.

20. Magano halaalunni magansiˈra hasiissannohu mayiraati?

²⁰ Muli yanna giddo, Maganu bunshe baalanta hunanno; qoleno Mangistesi uulla woˈma gashshitanno. (2 Pheexiroosi 3:9, 13) Hatti lowo geeshsha hagiirsiissanno yannaati! Hakkawote baalunku manni Yihowa isi hasiˈranno garinni magansiˈranno. Konni daafira assa hasiissannohere xaanni assite Magano halaalunni magansiˈri.