1. Naani apalile kutubuila nzila iweeme ya kumupupa Leeza?

 MA DIINI engi ali alanda nangue ali asambilizia kisinka palwakue Leeza. Inzi, keekio tekiviindikana, paantu ma diini ali asambilizia bintu bingesie palua vili vyasaangua Leeza, ni vitupalile kumupupa. Kunti twainika siani diini ya kisinka? Yehova sie bunke, i wakutubuila vitupalile kumupupa.

2. Kunti wainika siani diini ya kisinka?

² Yehova waatupeele Bibilia, ni pakaako kunti twainika diini ya kisinka. Kansi sambilila Bibilia, ni Yehova wakaba kukukwasia kunoonkelamo mu masambilizio akue paantu ali wakwemena saana.​—Isaya 48:17.

3. Leeza atonene tukite ki?

³ Bantu bange bali balanda nangue Leeza etabiile ma diini onse, inzi, Yesu taatusambiliziizie evio. Waalandile eevi: “Te onse ali walanda nangue, ‘We Mulopue, we Mulopue,’ wakengila mu Bukolo bwa mwiulu, ingasie olia ali wakita mutoneene Tawe [ao, Baba waane].” Kansi, ni kintu kya mana kuli fwefue tusambilile eevi kumana kine kutona kwakue Leeza ni kiki, kisia tukite kutona kooko. Keekio ni kintu kya mana, paantu Yesu waapalaniizie bantu basiizi kumunakila Leeza ku ba mbiifi, “bankita tubi.”​—Mateo 7:21-23.

4. Yesu waalandile ki palua kukita kutona kwakue Leeza?

⁴ Yesu waatubuilile nangue tekikaba kyalengele lyonse kukita kutona kwakue Leeza. Waalandile eevi: “Ingile ku muliango wa kanfinenkezia, paantu nzila ya kuzeezyania  itanine, ni muliango wa kwingilapo utanine, kabili bantu bali baya mu ezio nzila bavulile. Inzi nzila ya kasansaila isili yamonua na bengi, i nzila ya kuya ku bukose. Ni muliango wakwingililapo mu bukose, wa kanfinenkezia.” (Mateo 7:13, 14) Nzila iniini, ao diini ya kisinka, ili yatungulula ku bukose bwa loonse. Nzila ikata, ao diini ya bufi ili yatungulula ku lufu. Inzi, Yehova teezi kutona muntu ata umo afue. Apeele kila umo lisyuko lya kusambilila palwakue weene.​—2 Petro 3:9.

5. Kunti wainika siani baalia bali bamupupa Leeza mu nzila ipalile?

⁵ Yesu waalandile nangue kunti twainika baalia bali bamupupa Leeza mu nzila ipalile. Tuli kukita evio kupitila kutoosia musango wa mazabo ali aseeka ku beene, ali amoneka kupitila masambilizio ni “bikitua” byabo. Yesu waalandile eevi: “Kimuti kili kyaseekako mazabo aweeme i kimuti kiweeme, ni kimuti kili kyaseekako mazabo abiipile i kimuti kibiipile.” (Mateo 7:16, 17) Keekio te kilangiliile nangue baalia bali bamupupa Leeza bapuililikile. Inzi, babombi bakue Leeza bali baikwinda lyonse kukita biweeme. Loonu, tuli kumona bintu byakutukwasia kwinika baalia bali bamupupa Leeza mu diini ya kisinka.

6, 7. Juu ya ki lupupo lwa kisinka luswapile Bibilia? Mufuano wakue Yesu watusambilizia ki?

⁶ Masambilizio etu apalile kuba aswapiile Bibilia. Bibilia ili yalanda eevi: “Kila Lileembo litunguluilue na mupasi wakue Leeza kabili lili lyabomba mukusambilizia, mukusasilila, mukuolola bintu, mukulapizia mu nsaambu. Eevi muntu wakue Leeza abe ni buviinde bwine-bwine, waali ni biombo biine-biine palua kila muilo uweeme.” (2 Timoteo 3:16, 17, NWT) Mutumua Paulo waabalembeele Bakristu eevi: “Musita umwapokeleele Mulandu Wakue Leeza, olia umwaunvuile kufuma kuli  fwefue, te mwaawitabiile nga mulandu wa bantu, inzi, mwaawitabiile kuba mulandu wakue Leeza nga vyuli kakiine.” (1 Batesalonika 2:13, NWT) Masambilizio a diini ya kisinka aswapiilesie Mulandu Wakue Leeza, Bibilia. Te aswapiile maano a bantu, bisilano ao kintu kinge kili kyonse.

⁷ Kila kintu kyaasambiliziizie Yesu, kyali kyaswapiile Mulandu Wakue Leeza. (Soma Yoane 17:17.) Lyonse, waali wazimbula maleembo. (Mateo 4:4, 7, 10) Babombi bakisinka bakue Leeza, bakoonkele kipalo kyakue Yesu kabili kila kintu kibali basambilizia kiswapiile Bibilia.

8. Yesu watusambilizia ki palua kumupupa Yehova?

⁸ Tupalile kumupupasie Yehova bunke. Malumbo 83:18 ili yalanda eevi: “Weewe, liina lyobe ni Yehova, weewe sie bunke i Wapamuulu Saana pa kyalo kyonse.” Yesu waatonene bantu bamane Leeza wa kisinka naani kakiine, kabili waabasambiliziizie liina lyakue Leeza. (Soma Yoane 17:6.) Yesu waalandile eevi: “Yehova Leeza obe, i uupalile kupupa, kabili weene sie bunke i uupalile kukitila miilo itakatiifu.” (Mateo 4:10, NWT) Kansi, pakuba tuli babombi bakue Leeza, tukoonkele mufuano wakue Yesu. Tuli twamupupasie Yehova, tuli twabombia liina lyakue ni kusambilizia bange liina lyakue Leeza ni beelia byali wakatukitila.

9, 10. Tuli kulangililana siani ntono?

⁹ Tupalile kuba ni ntono ya kisinka ku bantu bange. Yesu waasambiliziizie basambi bakue kutonana. (Soma Yoane 13:35.) Tupalile kutona bange anzia kine tufumine pi, anzia mibeele ya kutwakuliile, ibe tuli banoonsi ao tuli bapabi. Kutonana kwetu kupalile kutukwatania pamo ni balupua ni bankazi. (Bakolosai 3:14) Pakaako, tetuizi kuya ku vita, kabili tetuizi kwipaya bantu. Bibilia ili yalanda eevi: ‘Bobu i bupusano bukata bumwenekele pa baana  bakua Leeza ni bakue Kibanda. Onse asili wakita biweeme ni asimutonene mwinakue, weene te mwina Leeza.’ Kabili yaongezia eevi: “Tonane tekuti tuye twali nga Kaini, weene waali muntu wakua olia mubi. Ozu muntu waaipaile mwalawakue.”​—1 Yoane 3:10-12; 4:20, 21.

¹⁰ Tuli twabombia musita weetu, maka, ni bintu byetu bya kimubili eevi kukwasiana ni kukoseleziana. (Baebrania 10:24, 25) Tuli ‘twawamiizia bantu bonse.’​—Bagalatia 6:10.

11. Juu ya ki tumunakile Yesu?

¹¹ Tupalile kumunakila Yesu paantu weene i nzila ili yatuala kuli Leeza. Bibilia ili yalanda eevi: “Tekuli unge muntu ali wapususia, ingasie Yesu bunke paantu monse mwaya kyalo, Leeza taatupeelemo linge liina lya kuti tupusukilemo.” (Miilo 4:12) Mu lyasi lya 5 lya keeki kitabu, twaasambiliile nangue Yehova waamutumine Yesu eevi afumie bukose bwakue kuba kilubula mulandu ku bantu bali banakila. (Mateo 20:28) Yehova waamusaakuile Yesu kuba Likolo eevi ateeke kyalo kyonse. I mana Bibilia ili yatubuila nangue tupalile kumunakila Yesu kine tutonene kwikala loonse.​—Soma Yoane 3:36.

12. Juu ya ki tetuizi kwiingizia mu bintu bya politike?

¹² Tetupalile kwiingizia mu bintu bya politike. Yesu taakwasiizie ku bintu bya politike. Musita lwaali mu bwezio, waamulandile eevi Pilato kateeka Muroma: “Bukolo bwane te bwa paano pa kyalo.” (Soma Yoane 18:36.) Nga evelia vyakitile Yesu, tulamatiliile ku Bukolo bwa ku muulu bwakue Leeza, kabili pa nsaambu ezio, anzia tube twaikeele pi, tetuviinda kwiingizia mu bintu bya politike. Inzi, Bibilia ili yatulanda tunakile “buteeko,” i kulanda nangue buteeko bwa bantu. (Baroma 13:1) Tuli twanakila mizilo ya mu kyalo mutwikeele. Anzia evio, musita muzilo wa kyalo luwapusana ni mizilo yakue Leeza, tuli kupala  batumua baalandile eevi: “Tupalile kunakila Leeza kuba kateeka kuliko bantu.”​—Miilo 5:29, NWT; Marko 12:17.

13. Tuli twasimikila ki palua Bukolo Bwakue Leeza?

¹³ Tuzumiine nangue Bukolo Bwakue Leeza bunkesie i bwakapuisia maavia pa kyalo. Yesu waalandile nangue “mpunda iweeme ya Bukolo” yakasimikiluanke mu kyalo kyonse. (Soma Mateo 24:14.) Te kuli buteeko bwa bantu buli kuviinda kuleeta buikazi bwa mutende kabili busili na maavia, ingasie Bukolo Bwakue Leeza i bwakaviinda kukita evio. (Malumbo 146:3) Yesu waatusambiliziizie kupepa palua Bukolo Bwakue Leeza musita lwaalandile eevi: “Bukolo bobe buize. Kutona kobe kukitike, ku muulu, kabili ni pa kyalo.” (Mateo 6:10, NWT) Bibilia ili yatubuila nangue Bukolo Bwakue Leeza bwakaba kwinoona buteeko bonse bwa bantu kabili “buene bunke bwakeemana loonse.”​—Danieli 2:44.

14. Nga viwamona, ni baani bali bamupupa Leeza mu diini ya kisinka?

¹⁴ Kisia kusambilila bintu beebi, iipuzie eevi: ‘Ni baani bali basambilizia bintu biswapiile Bibilia? Ni baani bali babuilako bange liina lyakue Leeza? Ni baani bali balangililana ntono ya kisinka kabili bazumiine nangue Leeza waamutumine Yesu eevi kutupususia? Ni baani basiizi kwiingizia mu bintu bya politike? Ni baani bali basimikila nangue Bukolo Bwakue Leeza sie i bwakapuisia maavia etu?’ Ni Bakasininkizia Bakue Yehova sie bunke.​—Isaya 43:10-12.

15. Ni kiki kitupalile kukita eevi Leeza etabile lupupo lwetu?

¹⁵ Te kipalile kupeleelasie pa kuzumina nangue Leeza kwali. Atasie bibanda bizumiine nangue Leeza kwali, inzi, tebiizi kumunakila. (Yakobo 2:19) Kine tutonene Leeza etabile lupupo lwetu, tetupalile kuzuminasie nangue kwali, inzi, tupalile kukita beelia byali walanda.

16. Juu ya ki tupalile kulekana ni diini ya bufi?

 ¹⁶ Eevi Leeza etabile lupupo lwetu, tupalile kulekana ni diini ya bufi. Kabika Isaya waaleembele eevi: “Fume pakati kakue, isuunge mwaswetele.” (Isaya 52:11; 2 Bakorinto 6:17) I mana tupalile kulekana ni kintu kili kyonse kipateene ni diini ya bufi.

17, 18. ‘Babiloni Mukulu’ ni kiki, kabili juu ya ki ni kintu kya mana kufumamo?

¹⁷ Diini ya bufi ni kiki? Ni kubalua diini ili yatusambilizia kumupupa Leeza mu nzila ipingeene ni Mulandu wakue. Bibilia ili yakuuta ma diini onse a bufi kuba ‘Babiloni Mukulu’. (Nfyulo 17:5) Juu ya ki? Kisia kibunda kya mu nsiku yakua Noa, masambilizio engi a diini ya bufi aatendekele mu muzi wa Babiloni. Masambilizio azo a bufi aakumeene mu kyalo kyonse. Kwa mufuano, bantu baali baikeele mu muzi wa Babiloni baali bapupa baleeza batatu-batatu. Ni leenu, ma diini engi ali asambilizia nangue Leeza alimo baleeza batatu, inzi, Bibilia ili yasambilizia nangue kulisie Leeza umo wa kisinka, Yehova, kabili nangue Yesu i muana wakue. (Yoane 17:3) Bantu baali baikeele mu Babiloni baali bazumiine nangue kantu kamo mu mubili wa muntu, kali kafuma ni kutwalilila kuba kaakosele kine muntu wafua, kabili nangue kali kakyula mu mulilo wa bukyuzi. Bobo ni bufi.​—Mona Bulondolozi Bunge bwa 14, ku lubali lwa 212; bwa 17 ku lubali lwa 214, ni bwa 18 ku lubali lwa 215.

¹⁸ Leeza waalandile nangue leenusie ma diini a bufi akaba kwinoonua. (Nfyulo 18:8) Eba, wainika juu ya ki ni kintu kya mana ufume mu diini ya bufi bila kukokola? Yehova Leeza atonene ukite evio ntaanzi musita teunapue.​—Nfyulo 18:4.

19. Yehova wakaba kukwemena siani kine wapingula kumubombela?

¹⁹ Musita luwapingula kufuma mu diini ya bufi ni kutendeka  kumubombela Yehova, bange pa babibuza bobe ao bantu ba mu lupua lobe kunti bakaana kwitabila bupinguzi bobe, kabili kunti balengia bintu bikukolele. Inzi, Yehova takaba kukusia. Wakaba kwaluka pakati ka lupua lwa mu kyalo kyonse lwa mamilioni a bantu bali balangililana ntono ya kisinka, kabili wakaba ni kiswapilo kya kwikala loonse mu kyalo kya leenu kyakue Leeza. (Marko 10:28-30) Paange bamo pakati ka babibuza bobe ao lupua lobe bali bapinga bupinguzi bobe bwa kumubombela Yehova, mukupita kwa nsiku, kunti bapingula kusambilila Bibilia.

20. Juu ya ki ni kintu kya mana kumupupa Leeza mu diini ya kisinka?

²⁰ Leenusie, Leeza wakaba kwinoona bubiifi bonse, ni Bukolo bwakue bwakaba kuteeka pa kyalo. (2 Petro 3:9, 13) Ozo, wakaba musita uweeme saana! Kila umo wakamupupa Yehova mu nzila yatonene tumupupilemo. Pakaako ni kintu kya mana ukwate bupinguzi leenu ni kumupupa Leeza mu diini ya kisinka.