1. Ia ty toko’e hirehake amantika ty fomba hivavahagne aman’Andrianagnahare?

FIVAVAHAGNE maro ty mirehake tie mampianatse ty maregne miomba an’Andrianagnahare. Faie ndra diso ty raha ampianare’e miomba Aze naho ty fomba hivavahagne ama’e. Akore ty ahafantaragne ty fomba teà i Jehovah hivavahagne ama’e? I Jehovah avao ty misaontsy ty fomba hivavahagne ama’e.

2. Akore ty hahafantara’o ty fomba teà i Jehovah hivavahagne ama’e?

² Nimea i Jehovah Baiboly tika, hahafantaragne ty fomba hivavahagne ama’e. Mikarakara azo vata’e ty Jehovah. Ianaro soa areke ty Baiboly fa hampea’e mba handrambe soa amy ty fampianara’e rehe.—Isaia 48:17.

3. Inogne ty teàn’Andrianagnahare hataontikagne?

³ Misy mirehake fa teà i Jehovah iaby ze kila fivavahagne, faie tsy izay ty nampianare i Jesosy. Hoe reke: “Tsy ze mirehake amako, manao tihoe: ‘O Tompo, Tompo’, ro hizilike amy i Fanjakà i lagnitsey ao, fa ze manao ty zoton’arofon-dRaeko.” Toko’e hofantaregne areke ty zoton’arofon’Andrianagnahare naho ty hanoagne aze. Lahibey ty fanoagne izay, fa nampitovie i Jesosy amy ty ndaty “mpandika lily” ze tsy manao ty zoton’arofo i Jehovah.—Matio 7:21-23.

4. Ino ty nirehafe i Jesosy miomba ty fanoagne ty zoton’arofon’Andrianagnahare?

⁴ Fa nampitao ty Jesosy tie tsy maintsy hiatreke raha sarotse tika naho te hanao ty zoton’arofon’Andrianagnahare. Nirehake reke tie: “Miziliha amy ty lalagne  maifitse. Malalake sady mivagnavagna ty lalagne mbamy i famonoagney mbeo, le maro ty mizilike agne. Maifitse ty lalagne mban-kavelogne mbeo, le tsiampe avao ty mahatrea aze.” (Matio 7:13, 14) Mitarike amy ty havelogne nainai’e ty lalagne maifitse ndra ty fivavahagne maregne. Fa mitarike amy ty fahafatezagne ty lalagne malalake ndra ty fivavahan-diso. Mea i Jehovah fahafahagne hianatse ty miomba aze o ndatio, fa tsy teà’e hisy ho mate.—2 Petera 3:9.

5. Akore ty ahafantara’o ty ndaty manao ty zoton’arofo i Jehovah?

⁵ Nirehake ty Jesosy fa azo fantaregne tie, ia vata’e ro mpivavake aman’Andrianagnahare. Manao izay tika naho mandineke ty raha inoa iareo naho ty fiaigna’e. Nirehake reke tie: “Ty voa vokare’e ro hahafantara’areo aze soa.” Hoe indraike reke: “Mamoa voa soa ty hatae soa, sady mamoa voa raty ty hatae raty.” (Matio 7:16, 17) Tsy tihoe zay, voririke ze ndaty manompo i Jehovah. Faie mikezake hanao ty maregne avao iareo. Hodinehentika ty ahafantaragne tie, ia vata’e ty manao ty zoton’arofo i Jehovah.

6, 7. Nagnino ty fampianara ty fivavahagne maregne ro mioregne amy ty Baiboly, sady ino ty ohatse soa nampianare i Jesosy antika?

⁶ Toko’e hioregne amy ty Baiboly ty raha inoantika. Hoe ty Baiboly: “Ty Soratse Masigne atoagne iaby le boake amy ty hery ty fagnahy masin’Andrianagnahare, soa hampianaragne, hanoroagne, hagnarenagne ze diso, hagnohagne amy ty hamaren-tane, mba hahavy ty ndatin’Andrianagnahare hahay soa naho ho ampe fitaovagne amy ty asa soa.” (2 Timoty 3:16, 17) Izao ty nisorate i apositoly Paoly hoahy o Kirisitianagneo:  “Rinambe’areo soa i saontsin’Andrianagnahare nitseize’ay tama’areoy, le tsy nirambese’areo ho reha o ndaty zay fa amy ty maha toe saontsin’Andrianagnahare aze.” (1 Tesalonianina 2:13) Mioregne amy ty Baiboly ty raha inoa ty fivavahagne maregne fa tsy amy ty heve o ndaty, ndra fomban-drazagne, naho ty hafa.

⁷ Nioregne amy ty Saontsin’Andrianagnahare ze raha nampianare i Jesosy. (Vakio Jaona 17:17.) Nampiasa rehake agnate i Soratse Masigney ao reke. (Matio 4:4, 7, 10) Manahake aze ka ty mpanompo i Jehovah naho fa mampianatse Baiboly.

8. Ino ty raha nampianare i Jesosy miomba ty fivavahagne amy i Jehovah?

⁸ I Jehovah avao ty ivavahantika. Hoe ty Salamo 83:18: “Ihe raike avao i managne tahinagne tihoey Jehovah, ro Ambone Bey ambone tane etoy!” Teà i Jesosy hahafantatse i Andrianagnahare maregney naho ty tahina’e o ndatio. (Vakio Jaona 17:6.) Hoe ty Jesosy: “I Jehovah Andrianagnahare’o ro ilolofa’o, le ie raike avao ty anoa’o fanompoagne masigne.” (Matio 4:10) Toko’e hanahake i Jesosy ka tika mpanompon’Andrianagnahare. Mampiasa ty tahinagne tihoe Jehovah tika naho fa mivavake sady magnambara ty tahina’e naho ty raha hatao’e.

9, 10. Akore ty anoroantika fa tea ndaty tika?

⁹ Toko’e ho tea ndaty vata’e tikagne. Nampianare i Jesosy ho teà ndaty o mpiana’eo. (Vakio Jaona 13:35.) Ty hateantika ty mpiharo finoagne amantika ro mampitraoke antika, fa tsy toeragne niaviagne, ndra fomban-drazagne, ndra hampagnarivo, ndra hahararahagne. (Kolosianina 3:14) Tsy mialy tika sady tsy mamono ndaty. Hoe ty Baiboly: “Izao ty ahafantaragne ze anak’Andrianagnahare naho ze ana i Devoly: Ze tsy manao ty  maregne tsy boake aman’Andrianagnahare. Hoe izay ka ze tsy tea ty rahalahi’e.” Le izao ka ty andilia’e: “Toko’e hifankatea tikagne, fa tsy hanahake i Kaina boake tamy ty raty, le namono an-drahalahi’e tsy am-piheveagne maso.”—1 Jaona 3:10-12; 4:20, 21.

¹⁰ Mampiasa fotoagne, hery, naho fanagnagne tika mba hagnampeagne naho hampaherezagne ty hafa. (Hebreo 10:24, 25) Toko’e “hanao soa amy ze kila ndaty” tika.—Galatianina 6:10.

11. Nagnino tika ro magneke fa amy ty alala i Jesosy ro ifandrambesagne amy i Jehovah?

¹¹ Toko’e hagnorike ty fagnanara i Jesosy tika, fa ie ty lalagne ifandrambesagne amy i Jehovah. Hoe ty Baiboly: “Tsy misy ndaty hafa haharombake, fa tsy misy agnaragne natolotse o ndatio ka ty ambane i lagnitsey handrombahagne antikagne.” (Asan’ny Apostoly 4:12) Nianaragne tamy Toko faha-5 ao tie nirahe i Jehovah ty Jesosy hisolovoigne ze ndaty magnorike ty fanoroa’e. (Matio 20:28) Finily i Jehovah ho Mpanjaka hifehe ty tane toy ty Jesosy. Mirehake ty Baiboly tie tsy maintsy magnorike ty fagnanara i Jesosy ze te ho velogne nainai’e.—Vakio Jaona 3:36.

12. Ino ty tsy anoantikagne polotike?

¹² Tsy toko’e hanao polotike tika. Tsy nanao polotike ty Jesosy. Hoe ty Jesosy tamy i Pilato mpitondra Romana, tamy tie nitsaraegne: “Tsy agnisa ty tontolo toy ty Fanjakàko.” (Vakio Jaona 18:36.) Manahake aze ka tika, le tsy mivalike amy ty Fanjakàn’Andrianagnahare. Tsy manao polotike tika ndra aia ndra aia. Faie mandily ty Baiboly tie toko’e hagneke “o manam-pahefàgneo,” ndra o fitondragneo tika. (Romanina 13:1) Magnorike ty lily amy ty tane misy antika tikagne. Faie naho mifanohetse amy ty lilin’Andrianagnahare ze lily  izay, le manahake ty natao i apositoly rey tika. Hoe iareo: “Andrianagnahare ro mpitondra anay le ie ro orihe’ay, fa tsy ndaty.”—Asan’ny Apostoly 5:29; Marka 12:17.

13. Ino miomba i Fanjakàn’Andrianagnaharey ty ambarantika?

¹³ Inoantika fa ty Fanjakàn’Andrianagnahare avao ty hagnafake ze raha manahiragne amy ty tane toy. Izao ty rineha i Jesosy: “Hotseizegne mbeombeo amy ty tane toy ty talily soa i Fanjakagney.” (Vakio Matio 24:14.) Tsy hahavita ty raha hanoe i Fanjakàn’Andrianagnaharey ho antika ty fitondrà o ndatio. (Salamo 146:3) Nampianare i Jesosy hivavake miomba i Fanjakàn’Andrianagnaharey tika. Hoe reke: “Ho avy abey i Fanjakà’oy! Hanoegne an-tane etoy abey ze zoton’arofo’o hambagne amy ty an-dagnitse agne!” (Matio 6:10) Rehafe ty Baiboly fa hofoagna i Fanjakàn’Andrianagnaharey ty fitondrà o ndatio, “fa i azey avao ro haharetse nainai’e.”—Daniela 2:44.

14. Ia ty inoa’o fa fivavahagne teàn’Andrianagnahare?

¹⁴ Afara ty fianarantika o foto-kevetse reo, le dineho tie: ‘Ia ty fivavahagne mampianatse ty raha rehafe ty Baiboly sady mampahafantatse ty tahinan’Andrianagnahare? Ia ty fivavahagne mifankatea sady mino tie nalefa i Jehovah hagnavotse antika ty Jesosy? Ia ty fivavahagne tsy manao polotike sady magnambara fa ty Fanjakàn’Andrianagnahare ty hagnafake ze raha manahiragne?’ Ty Vavaolombelo i Jehovah.—Isaia 43:10-12.

15. Inogne ty tsy maintsy ataontikagne naho teàntikagne hekén’Andrianagnahare ty fivavahantikagne?

¹⁵ Tsy ampe ty mino tie misy ty Andrianagnahare. Ndra o demoniao ka toe mino izay, faie tsy magnorike ty saontsi’e. (Jakoba 2:19) Naho teàntika hekén’Andrianagnahare  ty fivavahantika, le tsy toko’e hino ty fisia’e avao tika, fa hagnorike ty saontsi’e.

16. Nagnino tikagne ro toko’e hisintake amy ty fivavahan-diso?

¹⁶ Tsy maintsy miala amy ty fivavahan-diso tika mba hekén’Andrianagnahare ty fanompoantika. Hoe ty Isaia mpaminany: “Miakara boake ama’e ao, sady maliova nareo.” (Isaia 52:11; 2 Korintianina 6:17) Izay ty anto’e toko’e hagnalavirantika ze raha misy ifandrambesa’e amy ty fivavahan-diso.

17, 18. Ino ty atao tihoe “Babylona Jabajaba”, sady nagnino ro toko’e hisintahagne malaky ty ao?

¹⁷ Ino ty atao tihoe fivavahan-diso? Ze fivavahagne mampianatse raha mifanohetse amy ty Baiboly. “Babylona Jabajaba” ty irehafa ty Baiboly o fivavahan-disò. (Apokalypsy 17:5) Ino ty anto’e? Nanomboke ta Babylona ao ty fampianara ty fivavahan-diso, tafara ty ranobey faha i Noa. Niparitake tamy ty tane toy ze fampianaran-diso zay. Nivavake tamy ty andrianagnahare telo miharo raike ohatse ty ndaty ta Babylona ao. Maro ka hinane zao ty fivavahagne mampianatse tie andrianagnahare telo miharo raike ty Andrianagnahare. Faie rehafe ty Baiboly fa i Jehovah ty Andrianagnahare maregne sady Ana’e ty Jesosy. (Jaona 17:3) Ninoa ty ndaty ta Babylona agne tie naho fa mate o ndatio, le misy raha miala amy ty vata’e mbe miaigne, sady va’e hijale agn’afobey agne. Faie diso zay.—Henteo ty Fagnazavagne 14, 17, naho 18.

¹⁸ Nisaontsy ty Jehovah tie marine ty handrava’e ty fivavahan-diso. (Apokalypsy 18:8) Nagnino areke ro toko’e hisintahagne tsiela ty fivavahan-diso? Teà i Jehovah hanao izay rehe mba tsy ho tara loatse.—Apokalypsy 18:4.

19. Akore ty hikarakara i Jehovah azo naho fa tapa-kevetse hanompo aze rehe?

 ¹⁹ Va’e tsy fanta ty longo’o ndra ty ragne’o ty nahavy azo manapa-kevetse hisintake amy ty fivavahan-diso naho hanompo i Jehovah. Le va’e halaigne azo iareo, faie tsy haria i Jehovah rehe. Ho agnisa ty keleian-draike an-tapetrisa’e mifankatea magneneke ty tane toy rehe, sady hitamà hiaigne nainai’e amy i tontolo vaovaoy ao. (Marka 10:28-30) Va’e hisy amo o ndaty nalaigne azo reo, ho tapa-kevetse hanompo i Jehovah sady hianatse Baiboly naho fa ela ty ela.

20. Nagnino ro lahibey ty fagnorihagne ty fomba teà i Jehovah hivavahagne ama’e?

²⁰ Marine hagnafake o haratiagneo ty Andrianagnahare, le i Fanjakà’ey ty hifehe ty tane toy. (2 Petera 3:9, 13) Hivavake amy i Jehovah amy ze iteà’e aze o ndatio amy izay. Ho soa ze andro zay! Manomboke amy izao areke, le toko’e hivavake amy i Jehovah amy ty fomba teà’e rehe.