1. Ndiyani yo wangatikambiya kusopa ko Chiuta wazomereza?

MATCHALITCHI nganandi ngakamba kuti ngasambiza unenesa wakukamba zaku Chiuta. Wenuwu mbunenesa cha chifukwa yingu ngasambiza vinthu vaboza vakukwasana ndi Chiuta ndipuso mo titenere kumusope. Kumbi tingachita wuli kuti tiziŵi kusopa ko Chiuta wazomereza? Yehova pe ndiyu wangatikambiya mo tikhumbikiya kumusope.

2. Ntchinthu wuli chingakuwovyani kuziŵa mo mungasope Chiuta mwakwenere?

² Yehova wakutipasa Bayibolu kuti tisambiri mo tingamusope mwakwenere. Mwaviyo, sambirani Bayibolu ndipu Yehova wakuwovyeningi kuti muyanduwi ndi vo iyu wasambiza chifukwa watikuyanjani.—Yesaya 48:17.

3. Kumbi Chiuta wakhumba kuti tichitengenji?

³ Ŵanthu anyaki akamba kuti Chiuta wazomereza matchalitchi ngosi kweni Yesu wakukamba viyo cha. Iyu wanguti: “Ndi weyosi cha yo wakamba kwaku ini kuti, ‘Ambuya, Ambuya,’ wazamusere mu Ufumu wakuchanya, kweni yija yo wachita khumbu la Ada ŵangu.” Mwaviyo, tikhumbika kuziŵa vo Chiuta wakhumba ndipu pavuli paki titenere kuvichita. Fundu yeniyi njakukhumbika ukongwa chifukwa Yesu wanguyeruziya ŵanthu wo aleka kuvwiya Chiuta kuti ayanana ndi ŵanthu wo “akana kuvwiya marangu.”—Mateyu 7:21-23.

4. Kumbi Yesu wangukambanji pa nkhani yakuchita khumbu laku Chiuta?

⁴ Yesu wakukamba kuti asani tikhumba kuchita khumbu laku Chiuta tikumanengi ndi masuzu. Iyu wanguti: “Sereni  pakhomu lifinyu, chifukwa khomu likulu ndipuso nthowa yisani yilongoze ku nyifwa, ndipu mbanandi wo atendamu. Kweni khomu lifinyu ndipuso nthowa yimana yilongoze ku umoyu ndipu mbamanavi wo atiyisaniya.” (Mateyu 7:13, 14) Nthowa yimana pamwenga kuti kusopa kwakwenere ko Chiuta wazomereza ndiku kulongoze ŵanthu ku umoyu wamuyaya. Nthowa yikulu pamwenga kuti kusopa mu nthowa yo Chiuta wazomereza cha ndiku kulongoze ŵanthu ku nyifwa. Kweni Yehova wakhumba cha kuti munthu munyaki wazifwi. Chiuta wapasa munthu weyosi mwaŵi wakuti wasambiri zaku iyu.—2 Petro 3:9.

5. Kumbi tingaŵaziŵa wuli wo asopa Chiuta mwakwenere?

⁵ Yesu wangukamba kuti tingaŵaziŵa ŵanthu wo asopa Chiuta mwakwenere. Tingachita venivi asani taziŵa vo yiwu agomeza kweniso vo achita. Yesu wanguti: “Muŵaziŵengi ndi vipasu vawu.” Wangukamba so kuti: “Chimiti chechosi chamampha chipasa vipasu vamampha.” (Mateyu 7:16, 17) Ivi ving’anamuwa kuti wo asopa Chiuta mbanthu ambula ubudi cha. Nyengu zosi ateŵeti aku Chiuta ayesesa kuchita vinthu vamampha. Sonu, tiwonengi vinthu vo ŵanthu wo asopa Chiuta mwakwenere achita.

6, 7. Ntchifukwa wuli ŵanthu wo asopa mwaunenesa asambiza fundu zakutuliya m’Bayibolu? Nanga vo Yesu wachitanga vititisambizanji?

⁶ Vo tisambiza vitenere kutuliya m’Bayibolu. Bayibolu likamba kuti: “Malemba ngosi ngakulembeka mwakulongozeka ndi Chiuta, ndipu ngakuyandulisa pa kusambiza, kuchenya, kunyolosa vinthu ndi kulanga mu urunji, kuti munthu waku Chiuta waje wakwenere ndipuso wakunozeka kuchita ntchitu yeyosi yamampha.” (2 Timote 3:16, 17) Wakutumika Paulo wangulembe Akhristu kuti: “Mwati mwalonde mazu ngaku Chiuta, ngo mungungavwa kwaku isi, mungungazomera nge mazu nga ŵanthu cha kweni  nge mo ngaliri nadi mazu ngaku Chiuta.” (1 Ŵatesalonika 2:13) Kusopa kwaunenesa kutuliya mu fundu za ŵanthu cha pamwenga miyambu ndi vinthu vinyaki kweni kutuliya mu Mazu ngaku Chiuta, Bayibolu.

⁷ Chinthu chechosi cho Yesu wasambizanga chatuliyanga mu Mazu ngaku Chiuta. (Ŵerengani Yohane 17:17.) Nyengu zinandi wazumbuwanga Malemba. (Mateyu 4:4, 7, 10) Ateŵeti aunenesa aku Chiuta alondo vo Yesu wachitanga ndipu vinthu vosi vo asambiza vituliya m’Bayibolu.

8. Kumbi Yesu wangusambizanji vakukwasana ndi kusopa Yehova?

⁸ Tisopengi Yehova pe. Lemba la Sumu 83:18 likamba kuti: “Imwi, yo zina linu ndimwi Yehova, imwi pe ndimwi Wapachanya Limu pacharu chosi chapasi.” Yesu wakhumbanga kuti ŵanthu aziŵi kuti Chiuta waunenesa ndiyani, ndipu wanguŵasambiza zina laki. (Ŵerengani Yohane 17:6.) Iyu wangukamba kuti: “Yehova Chiuta waku ndiyu utenere kumusopa, ndipu ndiyu pe yo utenere kumuchitiya uteŵeti wakupaturika.” (Mateyu 4:10) Mwaviyo, isi nge ateŵeti aku Chiuta tilondo vo Yesu wachitanga. Tisopa Yehova pe, tigwirisiya ntchitu zina laki, tisambiza anyidu zina laku Chiuta ndipuso vo wazamuchitiya ŵanthu wosi.

9, 10. Kumbi tilongo wuli kuti titanja ŵanthu?

⁹ Tikhumbika kwanjana kutuliya pasi pa mtima. Yesu wangusambiza akusambira ŵaki kuti ayanjanengi. (Ŵerengani Yohane 13:35.) Titanjana mwambula kuŵanaŵaniya ko munthu watuliya, midawuku yidu ndipuso kaya ndisi akukhupuka pamwenga akavu. Chanju cho te nachu chitenere kutiwovya kuti tichitengi vinthu mwakukoliyana nge ŵanthu a banja limoza. (Ŵakolose 3:14) Mwaviyo, tiluta cha ku nkhondu ndipuso tibaya ŵanthu cha. Bayibolu likamba kuti: “Ŵana aku Chiuta ndipuso ŵana aku Dyaboli aziŵika umampha ndi fundu iyi: Weyosi yo waleka kuchita urunji kweniso yo waleka kwanja mubali waki, wakutuliya kwaku Chiuta cha.” Likamba so kuti: “Tiyanjanengi ndipu  tingachitanga nge Kaini cha yo wangutuliya kwa muheni yo ndipu wangubaya muvurwa waki.”—1 Yohane 3:10-12; 4:20, 21.

¹⁰ Tigwirisiya ntchitu nyengu, nthazi kweniso vinthu vo te navu kuti tichisanengi. (Ŵahebere 10:24, 25) Mwaviyo, ‘tichitiya ŵanthu wosi vinthu vamampha.’—Ŵagalatia 6:10.

11. Ntchifukwa wuli tigomeza kuti Yesu ndi nthowa yakutilongoze kwaku Chiuta?

¹¹ Tikhumbika kugomeza Yesu chifukwa iyu ndi nthowa yakutilongoze kwaku Chiuta. Bayibolu likamba kuti: “Mulivi utasi mwa munthu weyosi, chifukwa palivi zina linyaki pacharu, lo lapasika ku ŵanthu lo lingatitasa.” (Machitidu 4:12) Mu Mutu 5, tikusambira kuti Yehova wangutuma Yesu kuti wazipereki umoyu waki nge sembi. (Mateyu 20:28) Yehova wakusankha Yesu kuti wazilamuliyi charu chapasi. Ndichu chifukwa chaki Bayibolu lititikambiya kuti titenere kuvwiya Yesu asani tikhumba kuzija ndi umoyu wamuyaya.—Ŵerengani Yohane 3:36.

12. Ntchifukwa wuli tikhumbika cha kuchitaku ndali?

¹² Titenere cha kuchitaku ndali. Yesu wachitangaku cha ndali. Pa nyengu yo wayesekanga, wangukambiya Pilato, yo wenga nduna yachiroma kuti: “Ufumu wangu ngwa charu chinu cha.” (Ŵerengani Yohane 18:36.) Nge Yesu, nasi te akugomezeka ku Ufumu wakuchanya ndipu pachifukwa chenichi kaya tingaja charu nichi tichitaku cha ndali. Mbunenesa kuti Bayibolu lititikambiya kuti tivwiyengi “ŵanthu wo ŵe ndi mazaza,” kung’anamuwa maboma. (Ŵaroma 13:1) Tivwiya marangu nga charu cho tija. Chinanga kuti ve viyo, asani dangu la charu cho likoliyana cha ndi marangu ngaku Chiuta, tilondo vo akutumika angukamba. Yiwu anguti: “Titenere kuvwiya Chiuta nge wakulamuliya mumalu mwakuvwiya ŵanthu.”—Machitidu 5:29; Marko 12:17.

13. Kumbi tipharazanji za Ufumu waku Chiuta?

 ¹³ Tigomeza kuti ndi Ufumu waku Chiuta pe wo wazamumalisa masuzu ngosi. Yesu wangukamba kuti “uthenga wamampha wa Ufumu” wazamupharazika pacharu chosi chapasi. (Ŵerengani Mateyu 24:14.) Palivi boma la ŵanthu lo lingachita vo Ufumu waku Chiuta utichitiyengi. (Sumu 146:3) Yesu wakutisambiza mo tingapemphe Ufumu waku Chiuta, iyu wanguti: “Ufumu winu uzi. Khumbu linu lichitiki, kuchanya kweniso pacharu chapasi.” (Mateyu 6:10) Bayibolu lititikambiya kuti Ufumu waku Chiuta unangengi maboma ngosi nga ŵanthu ndipu ndiwu pe “wazamuwusa mpaka muyaya.”—Danyele 2:44.

14. Kumbi muwona kuti mbayani wo asopa Chiuta mu nthowa yo iyu wazomereza?

¹⁴ Ŵanaŵaniyani fundu zo takambisana ndipu jifumbeni kuti: ‘Mbayani wo asambiza fundu zakutuliya m’Bayibolu? Mbayani wo apharaziya ŵanthu za zina laku Chiuta? Mbayani wo atanjana ndipuso wo agomeza kuti Chiuta wangutuma Yesu kuti wazititasi? Mbayani wo achitaku cha ndali? Nanga mbayani wo apharaza kuti Ufumu waku Chiuta pe ndiwu ungamalisa masuzu ngidu?’ Kukamba unenesa, Akaboni aku Yehova ndiwu achita venivi.—Yesaya 43:10-12.

15. Titenere kuchitanji asani tikhumba kuti Chiuta wazomerezengi kusopa kwidu?

¹⁵ Kugomeza ŵaka kuti kwe Chiuta nkhwakukwana cha. Chinanga ndi viŵanda navu, vigomeza kuti Chiuta waliku kweni vitimuvwiya cha. (Yakobe 2:19) Asani tikhumba kuti Chiuta wazomerezengi kusopa kwidu, titenere kugomeza kuti waliku ndipuso tivwiyengi vo watitikambiya.

16. Ntchifukwa wuli tikhumbika kukana kusopa kwaboza?

¹⁶ Kuti Chiuta wazomerezi kusopa kwidu, titenere kukana kusopa kwaboza. Mchimi Yesaya wangulemba kuti:  “Tuwanipu pakati paki, ndipu jitoweseni.” (Yesaya 52:11; 2 Ŵakorinte 6:17) Ndichu chifukwa chaki tikhumbika cha kuchitaku chinthu chechosi chakukwasana ndi kusopa kwaboza.

17, 18. Kumbi “Babiloni Mukulu” ntchinthu wuli, nanga ntchifukwa wuli tikhumbika kutuwamu mwaliŵi?

¹⁷ Kumbi chisopa chaboza ntchinthu wuli? Ntchisopa chechosi cho chisambiza ŵanthu kusopa Chiuta mu nthowa yambula kukoliyana ndi Mazu ngaki. Bayibolu lidana visopa vosi vaboza kuti, “Babiloni Mukulu.” (Chivumbuzi 17:5) Chifukwa wuli? Pavuli pa Chigumula cho chinguchitika mu nyengu yaku Nowa, mutawuni ya Babiloni munguyambika visambizu vaboza. Visambizu venivi vinguwanda pacharu chosi. Mwakuyeruziyapu, ŵanthu wo ajanga ku Babiloni asopanga magulu ngatatu nga achiuta. Mazuŵa nganu so, matchalitchi nganandi ngasambiza kuti mwaku chiuta yumoza mwe achiuta atatu kweni Bayibolu likambiya limu kuti pe Chiuta yumoza pe, Yehova ndipu Yesu ndiyu Mwana waki. (Yohane 17:3) Ŵanthu wo ajanga ku Babiloni agomezanga so kuti asani munthu wafwa, pe chinthu chinyaki cho chilutiriza kuja ndi umoyu ndipu chinthu chenicho chitombozeka ndi motu wamuyaya. Venivi vaboza.—Wonani Fundu Yakukumaliya ya nambala 14, 17 ndi 18.

¹⁸ Chiuta wakukambiya limu kuti pambula kuswera yapa, visopa vosi vaboza wavituzengepu. (Chivumbuzi 18:8) Kumbi mwawona kukhumbika kwakutuwamu liŵi muchisopa chaboza? Yehova Chiuta wakhumba kuti mungasweranga cha kutuwamu.—Chivumbuzi 18:4.

19. Kumbi Yehova wachitengenji asani mwayamba kumuteŵete?

¹⁹ Asani mwasankha kutuwamu muchisopa chaboza kuti muyambi kuteŵete Yehova, anyinu anyaki pamwenga a mubanja linu avwisisengi cha chifukwa cho mwasankhiya  kuchita viyo ndipu angayamba kukuchitiyani nkhaza. Kweni ziŵani kuti Yehova wangakusiyani cha. Mujengi mubanja la pacharu chosi lo litanjana nadi ndipu le ndi ŵanthu mamiliyoni nganandi. Kusaziyapu pa fundu yeniyi, mwazamulonde umoyu wamuyaya mucharu chifya. (Marko 10:28-30) Vingachitika kuti anyinu anyaki kweniso a mubanja linu wo atikutinkhani chifukwa chakuti mwayamba kuteŵete Yehova, kunthazi nawu angaziyamba kusambira Bayibolu.

20. Ntchifukwa wuli mukhumbika kusopa Chiuta mu nthowa yo iyu wazomereza?

²⁰ Pambula kuswera yapa, Chiuta watuzengepu vinthu vosi viheni ndipu Ufumu waki uyambengi kulamuliya charu chapasi. (2 Petro 3:9, 13) Kukamba unenesa, yazamuja nyengu yakukondwesa ukongwa! Tazamusopanga mu nthowa yo Yehova wakhumba. Mwaviyo, mukhumbika kuchitapu kanthu sonu kuti musopengi Chiuta mu nthowa yo iyu wazomereza.