1. Кин вераны быгатэ, кызьы Инмарлы шонер йыбыртъяно?

ТРОСЭЗ религиос верало, соос Инмар сярысь зэмзэ верало шуыса. Но вань религиос зэмзэ вераны уг быгато, малы ке шуоно соос пӧртэм сямен верало со сярысь, кин со Инмар но кызьы солы йыбыртъяно. Соку кытысь ми тодыны быгатомы, кызьы Инмарлы шонер йыбыртъяно? Сое ми тодыны быгатомы Иегова Инмарлэсь гинэ.

2. Кытысь тодыны луэ, кызьы Инмарлы шонер йыбыртъяно?

² Ми тодыны мед быгатомы шуыса, кызьы Иеговалы шонер йыбыртъяно, Иегова милемлы Библия сётӥз. Соин ик Библиез дышетэмысь эн дугдэ. Инмар юрттоз тӥледлы валаны, малы дышетэ Библия, малы ке шуоно со яратэ тӥледыз но солэн потэ, тӥляд улонды умойгес мед луоз шуыса (Исаия 48:17).

3. Мае возьма милесьтым Инмар?

³ Куд-ог адямиос верало, Инмарлы вань религиос ярало шуыса. Нош Иисус Христос озьы уг малпа вал. Тани мар со вераз: «Котькудӥз ик Мыным „Кузё-Инмаре! Кузё-Инмаре!“ шуись мурт Ин Эксэйлыке уз пыры, Инмысь Атаелэсь эриксэ быдэсъясь мурт гинэ отчы пыроз». Соин ик кулэ тодыны Инмарлэсь эриксэ но быдэсъяны сое. Со туж кулэ юан, малы ке шуоно соосты, кинъёс  Инмарлэсь эриксэ уг быдэсъяло, Иисус «законлы пумит улӥсьёс», яке йыруж лэсьтӥсьёс, шуыса нимаз (Матфей 7:21—23).

4. Мар вераз Иисус Инмарлэсь эриксэ быдэсъян сярысь?

⁴ Иисус азьло ик вераз, Инмарлэсь эриксэ быдэсъяны капчи уз луы шуыса. Со шуиз: «Ӟоскыт капкатӥ пырелэ, уго паськыт капка, эркын сюрес быронэ нуо,— отӥ тросэз мыно. Ӟоскыт капка, сюбег сюрес улонэ нуо, но ӧжытэз соосты шедьто» (Матфей 7:13, 14). Сюбег сюрес, яке Инмарлы шонер амалэн йыбыртъян, пырак улонэ нуэ, нош эркын сюрес, яке Инмарлы шонертэм амалэн йыбыртъян, кулонэ нуэ. Иеговалэн уг поты, кин ке но мед кулоз шуыса, соин ик со котькуд адямилы луонлык сётэ ачиз сярысь тодыны (2 Пётр 3:9).

5. Кызьы тодманы луоз соосты, кинъёс Инмарлы шонер йыбыртъяло?

⁵ Иисус валэктӥз, кызьы тодманы луоз соосты, кинъёс Инмарлы шонер йыбыртъяло. Соосты тодманы луоз ужъёссыя но соя, малы соос оско. Со вераз: «Емышсыя тӥ соосты тодмалоды». Озьы ик ватсаз на: «Котькудӥз ӟеч писпу ӟеч емыш сётэ» (Матфей 7:16, 17). Со уг возьматы, Инмарлы йыбыртъясьёс ноку но уз янгышалэ шуыса. Но соос котьку тыршо лэсьтыны сое, мар шонер луэ. Ойдолэ эскеромы, кызьы тодманы луоз соосты, кинъёс Инмарлы шонер йыбыртъяло.

6, 7. Малы Инмарлы йыбыртъян Библия вылэ пыкиськемын луыны кулэ? Малы дышетэ милемыз Иисуслэн примерез?

 ⁶ Со, малы оско Инмарлэн зэмос ужась-тыршисьёсыз, Библия вылэ пыкиськемын. Библиын гожтэмын: «Быдэс Священной Гожтэм Инмарлэн Духеныз вордскытэмын. Соин ик Священной Гожтэм дышетэ, сьӧлыкъёсты шарае поттэ, шонер сюрес вылэ султытэ, Инмарлы ярамон улыны дышетыса, со пайда вае. Соин ик Инмар адями дун-шектэм мед улоз, ӟеч ужъёсты лэсьтыны дась мед луоз» (2 Тимофейлы 3:16, 17). Апостол Павел гожтӥз христианъёслы: «Тӥ, ми пыр Инмар кылэз кылыса, сое кабыл басьтӥды, адями кылэз кадь ӧд, Инмар кылэз кадь сое кабыл басьтӥды,— со зэмзэ ик сыӵе луэ» (1 Фессалоникаослы 2:13). Инмарлы йыбыртъяно ӧвӧл озьы, кызьы адямиос малпало, кызьы дышето сям-йылолъёс яке мар ке но мукетыз, нош йыбыртъяно озьы, кызьы дышетэ Инмарлэн Кылыз, Библия.

⁷ Ваньмыз, малы дышетӥз Иисус, Инмарлэн Кылыз вылэ пыкиськемын вал. (Лыдӟе Иоаннлэсь 17:17.) Дышетыкуз со ӵем вералляз Священной Гожтэмъёсысь малпанъёсты (Матфей 4:4, 7, 10). Инмарлэн зэмос ужась-тыршисьёсыз Иисуслэсь адӟем каро — соос Библия вылэ гинэ пыкиськыса дышето.

8. Мар вераз Иисус Инмарлы йыбыртъян сярысь?

⁸ Соос йыбыртъяло одӥг гинэ зэмос Инмарлы, Иеговалы. Библиын гожтэмын: «Адямиос  мед тодозы, тон, кинлэн нимыз Иегова, тон одӥгнад быдэс музъем выллы Вылысь Инмар луиськод шуыса» (Псалтирь 83:18, ВД [82:19, УБ]). Иисус Христослэн потэ вал, адямиос мед тодозы шуыса, кин со зэмос Инмар, соин ик со адямиослы Инмарлэсь нимзэ усьтӥз. (Лыдӟе Иоаннлэсь 17:6.) Иисус вераз: «Инмаредлы Кузё-Инмарлы йыбыртъя, Солы Огназлы гинэ ужаса-тыршыса ул» (Матфей 4:10). Инмарлэн ужась-тыршисьёсыз Иисуслэсь адӟем каро. Соос Иеговалы гинэ йыбыртъяло но солэсь нимзэ верало, кылсярысь, куке Инмар сярысь верасько но вӧсясько. Озьы ик соос Инмарлэсь нимзэ мукет адямиослы усьто но верало, мар кароз Инмар азьланяз.

9, 10. Кызьы Инмарлэн ужась-тыршисьёсыз ог-огзэс яратэмзэс возьмато?

⁹ Соос ог-огзэс зэмзэ ик ярато. Иисус аслэсьтыз дышетскисьёссэ ог-огзэс яратыны дышетӥз. Инмарлэн зэмос ужась-тыршисьёсыз озьы ик каро. (Лыдӟе Иоаннлэсь 13:35.) Кытын гинэ соос медаз вордӥське, кыӵе гинэ калыкын соос медаз будэ, узыресь-а соос яке куанересь-а, соос ог-огзэс вын-агайёс но сузэр-апайёс шуыса лыдъяло но ог-огзэс ярато (Колоссыослы 3:14). Соин ик соос ожъёсы уг пырисько но адямиосты уг виыло. Библиын верамын: «Инмарлэсь нылпиоссэ но диаволлэсьсэ нылпиосты тазьы тодманы луоно: котькудӥз шонертэм уж лэсьтӥсь мурт, агай-вынъёссэ яратӥсьтэм мурт — Инмарлэсь ӧвӧл». Озьы ик гожтэмын на: «Огмес огмы мед яратомы.  Каин кадь ум улэ, со шайтанлэсь вал, аслэсьтыз вынзэ вииз» (1 Иоанн 3:10—12; 4:20, 21).

¹⁰ Инмарлэн зэмос ужась-тыршисьёсыз ог-огзылы юрттӥськон понна асьсэлэсь кужымзэс но ваньбурзэс сётыны дась (Еврейёслы 10:24, 25). Соос «вань адямиослы ӟеч уж» лэсьто (Галатъёслы 6:10).

11. Малы милемлы Иисуслэсь кылзӥськоно?

¹¹ Соос Иисус Христослэсь кылзӥсько, малы ке шуоно со пыр гинэ утиськыны луэ. Библиын гожтэмын: «Со бордын сяна, нокин бордын но утиськон ӧвӧл. Инбам улын адямиослы сётэмын ӧвӧл мукет ним, кудӥз пыр асьмеос мед быгатысалмы утиськыны» (Апостолъёслэн ужъёссы 4:11, 12). Та книгалэн 5-тӥ люкетысьтыз ми тодӥмы, Иегова Иисусэз музъем вылэ ыстӥз шуыса, со аслэсьтыз улонзэ мед сётоз но Инмарлэсь кылзӥськись адямиосты кулонлэсь но сьӧлыклэсь мед мозмытоз шуыса (Матфей 20:28). Со сяна, Иегова Иисусэз музъемен кивалтыны пуктӥз. Соин ик Библиын верамын, пырак дауръёс ӵоже улэммы потэ ке, милемлы Иисуслэсь кылзӥськоно шуыса. (Лыдӟе Иоаннлэсь 3:36.)

12. Малы Инмарлэн ужась-тыршисьёсыз политикае уг пырисько?

¹² Соос политикае уг пырисько. Иисус Христос политикае ӧз пыриськы. Пилат нимо рим кивалтӥсь дорын судын дыръяз со вераз: «Мынам Эксэйлыке та дуннелэсь ӧвӧл». (Лыдӟе Иоаннлэсь 18:36.) Христослэн сямен ик, Инмарлэн ужась-тыршисьёсызлэн потэ, Инмарлэн  Эксэйлыкез мед кивалтоз шуыса. Соин ик, кытын гинэ соос медаз улэ, политикае соос уг пырисько. Но соос ас шаерысьтызы катъёсты быдэсъяло, малы ке шуоно Библиын верамын, «вылӥ властьёслы-кивалтӥсьёслы», яке шаерысь кивалтӥсьёслы, тэрытсконо шуыса (Римъёслы 13:1). Нош кыӵе ке кат Инмарлэн законэзлы пумит луэ ке, Инмарлэн ужась-тыршисьёсыз апостолъёслэсь адӟем каро, кудъёсыз веразы: «Адямиослы сярысь, Инмарлы золгес тэрытскыны кулэ» (Апостолъёслэн ужъёссы 5:29; Марк 12:17).

13. Мар сярысь тодыто Инмарлэн зэмос ужась-тыршисьёсыз?

¹³ Соос оско, Инмарлэн Эксэйлыкез гинэ адямиослэсь вань шуг-секытъёссэс сэрттоз-пертчоз шуыса. Иисус вераз, Эксэйлык сярысь ӟеч ивор быдэс музъем вылын тодытэмын луоз шуыса. (Лыдӟе Матфейлэсь 24:14.) Одӥг кивалтэт но уз быгаты сётыны милемлы сое, мае сётоз Инмарлэн Эксэйлыкез (Псалтирь 145:3). Иисус косӥз милемыз со Эксэйлык сярысь вӧсяськыны: «Тынад Эксэйлыкед мед лыктоз; Тынад эрикедъя мед луоз музъем вылын но инмын кадь ик» (Матфей 6:10). Библиын азьпалзэ ивортыса верамын вал, Инмарлэн Эксэйлыкез вань кивалтэтъёсты быдтоз, «нош ачиз пумтэм вапумъёс ӵоже сылоз» шуыса (Даниил 2:44).

14. Тӥ малпамъя, кинъёс Инмарлы шонер йыбыртъяло?

¹⁴ Озьыен, малпаське: кинъёс Библия вылэ пыкиськыса дышето? Кинъёс адямиослы Инмарлэн  нимыз сярысь верало? Кинъёс сярысь вераны луоз, соос ог-огзэс зэмзэ ик ярато шуыса? Кинъёс оско, Иисус Христос пыр гинэ утиськыны луэ шуыса? Кинъёс политикае уг пырисько? Кинъёс верало, Инмарлэн Эксэйлыкез гинэ адямиослэсь вань шуг-секытъёссэс сэрттоз-пертчоз шуыса? Со Иеговалэн Адӟись-Ивортӥсьёсыз (Исаия 43:10—12).

15. Мар кароно, йыбыртъяммы Инмарлы мед яралоз шуыса?

¹⁵ Инмар вань шуыса оскыны гинэ тырмыт ӧвӧл. Периос но солы оско, но соос солэсь уг кылзӥсько (Иаков 2:19). Йыбыртъяммы Инмарлы мед яралоз шуыса, Инмар вань шуыса оскем сяна, кулэ на карыны ваньзэ, мае со куре.

16. Малы милемлы куштӥськоно ваньмызлэсь, мар зэмос луисьтэм религиен герӟаськемын?

¹⁶ Йыбыртъяммы Инмарлы мед яралоз шуыса, милемлы куштӥськоно ваньмызлэсь, мар зэмос луисьтэм религиен герӟаськемын. Исаия пророк гожтӥз: «Потэлэ отысь... асьтэдыз сузялэ» (Исаия 52:11; 2 Коринфъёслы 6:17). Тӥни малы милемлы куштӥськоно ваньмызлэсь, мар зэмос луисьтэм религиен герӟаськемын.

17, 18. Мар со сыӵе «Быдӟым Вавилон» но малы отысь али ик ини потоно?

¹⁷ Кыӵе религиез зэмос луисьтэм религия шуыса ниманы луоз? Созэ, кудаз дышето мукет сямен Инмарлы йыбыртъяны, озьы, кызьы Библиын гожтэмын ӧвӧл. Вань зэмос луисьтэм религиосты Библия «Быдӟым Вавилон» шуыса нима  (Усьтӥськон 17:5). Малы? Ву тудӟон бере Вавилон карын туж трос шонертэм дышетонъёс потӥзы, кудъёсыз быдэс музъем вылэ вӧлмизы но зэмос луисьтэм религиослэн дышетонъёссы пӧлы пыризы. Кылсярысь, Вавилонын улӥсь адямиос йыбыртъяло вал инмаръёслы, кудъёсыз куинен-куинен огазеямын вал. Туннэ но тросэз религиос дышето, Инмар, Пи но святой дух — со одӥг шуыса. Нош Библиын валамон верамын, одӥг гинэ Инмар вань шуыса — Иегова, нош Иисус Христос — со солэн Пиез (Иоанн 17:3). Озьы ик Вавилонын улӥсьёс оско вал, адямилэн лулыз вань шуыса, кудӥз адями кулэм бере уг кулы но адэ сюрыны быгатэ. Но со озьы ӧвӧл. (Учке 14-тӥ ватсам валэктонэз но 17-тӥ но 18-тӥ ватсам валэктонъёсты.)

¹⁸ Инмар кылзэ сётӥз, ӝоген вань зэмос луисьтэм религиос быдтэмын луозы шуыса (Усьтӥськон 18:8). Соин ик ӝегатскытэк зэмос луисьтэм религиысь потоно. Иеговалэн потэ, тӥ отысь али ик ини мед потоды шуыса, малы ке шуоно собере бер луоз (Усьтӥськон 18:4).

19. Кызьы Иегова тӥ сярысь сюлмаськоз, тӥ солы ужаны-тыршыны ужпум кутӥды ке?

¹⁹ Нош тӥ зэмос религиысь потыны но Иеговалы ужаны-тыршыны ужпум кутӥды ке, эшъёсты яке ӵыжы-выжыосты пӧлысь кин ке но, оло нош, тӥледыз уз вала но тӥледлы люкетыны кутскоз. Но Иегова тӥледыз уз кельты. Инмарлы ужаны-тыршыны кутскыса, тӥ пыроды семья  пӧлы, кудаз пӧртэм калыкысь трос миллион ог-огзэс яратӥсь вын-агайёс но сузэр-апайёс пыро. Озьы ик тӥляд осконды луоз пырак дауръёс ӵоже улыны Инмарен сётэм выль дуннеын (Марк 10:28—30). Оло нош, дыр ортчыса, эшъёсты яке ӵыжы-выжыосты пӧлысь кинлэн ке, кин тӥледлы нырысь люкетэ вал, Библиез дышетэмез потоз.

20. Малы туж кулэ али ик ини кутскыны Инмарлы шонер йыбыртъяны?

²⁰ Ӝоген Инмар музъем вылысь ваньзэ уродзэ быдтоз но, солэн Эксэйлыкез кивалтыны кутскоз (2 Пётр 3:9, 13). Ми туж возьмаськомы со дырез, малы ке шуоно соку вань адямиос Инмарлы шонер йыбыртъялозы — озьы, кызьы солэн потэ. Соин ик туж кулэ али ик ини кутскыны Инмарлы шонер йыбыртъяны.