1. Ti pani onireerela onileela enamuna yooloka ya omukokhorela Muluku?

ITIINI sinceene sinihimya wira sinniixuttiha ekeekhai voohimya sa Muluku. Masi khahiyo ekeekhai, maana sinniixuttiha itthu soovirikana voohimya sa Muluku ni moota woomukokhorela. Nto ninrowa osuwela sai enamuna yooloka ya omukokhorela Muluku? Yehova paahi toniwerya ohimya moota woomukokhorela.

2. Munrowa osuwela sai enamuna yooloka ya omukokhorela Muluku?

² Yehova oonivaha Biibiliya wira nisuwele enamuna yooloka ya omukokhorela. Tivonto, muhaana omusoma Biibiliya wira Yehova ookhaliheryeni ottottela mureerelo sowiixuttiha sa Biibiliya maana owo onnookhapelelani tthiri.​—Yesaya 48:17.

3. Muluku oniphavela wira nipakeke exeeni?

³ Atthu akina anihimya wira Muluku onneemererya itiini sotheene, masi Yesu khiixuttinhe siiso. Owo aahimmye so: “Wira mutthu akelé momweneni mwa Muluku, khivamphiyerya okìrela: ‘Apwiya! Apwiya!’. Ankela-mo t’ale anìra sintthunaya Atithi ari wirimu”. Tthiri nihaana wiixutta yootthuna ya Muluku ni opaka. Ola mwaha muulupale okhala wira Yesu aahaalikanyiha ale ahinimwiiwelela Muluku ni atakhali, aahimyaka wira ‘anìra sotakhala!’​—Matheyo 7:21-23.

4. Yesu aahimmye exeeni voohimya sa opaka yootthuna ya Muluku?

⁴ Yesu aahimlopola wira ale aniphavela opaka yootthuna ya Muluku anoophwanya mixankiho. Owo aahimmye so: “Nvireke mukhora wophunyeya, mana mukhora mulupale  n’iphiro yowokowa t’iye sinroiha worimelani: ale anvira seiyo kharere. Vano, mukhora onkeliha mwekumini ti wophunyeya, ephiro ene ti yorika: vano ale amphwanya ephiro yeyo ari vakhani”. (Matheyo 7:13, 14) Mukhora woophunyeya, niire so, enamuna yooloka ya omukokhorela Muluku, eniroiha wookumini woohimala. Ephiro yuulupale, aahiiso enamuna yoohiloka ya omukokhorela Muluku, eniroiha wookhwaani. Masi Yehova khoniphavela wira nnakhala mutthu mmosa okhwe. Tivonto onaavaha awe atthu otheene eparakha ya wiixutta voohimya sa yena.​—2 Pedru 3:9.

5. Munrowa waasuwela sai ale animukokhorela Muluku mwa enamuna yooloka?

⁵ Yesu aahimmye wira nnoowerya waasuwela ale animukokhorela Muluku mwa enamuna yooloka. Nnoowerya waasuwela nivareryaka sookupali ni sowiira saya. Yesu aahimmye so: “Munimwasuwela mwaha wa sowira saya”. Nave ahincererya oriki: “Vekekhai, mwiri worera onnìma mihokorokho soloka”. (Matheyo 7:16, 17) Ela khentaphulela wira ale animukokhorela Muluku toomalela. Masi okathi wotheene arumeyi a Muluku annimananiha opaka itthu sooloka. Vano ninrowa othokorerya ele enrowa onikhaliherya waasuwela ale animukokhorela Muluku mwa enamuna yooloka.

6, 7. Xeeni sowiixuttiha sa okokhorela wekeekhai sinikhuma aya mBiibiliyani? Ntakiheryo na Yesu ninniixuttiha exeeni?

⁶ Ele eniixuttiha aya enikhuma mBiibiliyani. Biibiliya onihimya wira: “Solempwa sothene supuxeriwé ni Muluku, khukhalihiwa wira sixuttiheke ekekhai, savanyiheke ale anvonya, sattaruxeke ale anttheka, siwettiheke atthu ephiro ya xariya. Siso, mutthu a Muluku onolikanyihiwa murohoni mwawe, onolipiheriwa ovara miteko sothene sorera”. (2 Timótheyo 3:16, 17)  Murummwa Paulo aahaalepela maKristau wira: “Vano, khamwakhenle ehapar’iyo ntoko molumo a mutthu, nto mwakhenlé muhanyiheryaka wira masú a Muluku”. (1 aTesalonika 2:13) Tivonto sowiixuttiha sa okokhorela wekeekhai sinikhuma mBiibiliyani, Nuulumo na Muluku. Khasinikhuma mwa sowiixuttiha aahiiso soolema sa apinaatamu, wala opuro mukina.

⁷ Khula etthu Yesu aixuttiha awe yaakhuma mBiibiliyani, Nuulumo na Muluku. (Mmusome Yohani 17:17.) Okathi wotheene Yesu aaromola Soolempwa. (Matheyo 4:4, 7, 10) Arumeyi eekeekhai a Muluku antthara ntakiheryo na Yesu, nto sowiixuttiha saya sinikhuma mBiibiliyani.

8. Yesu oniixuttinhe exeeni voohimya sa omukokhorela Yehova?

⁸ Nimmukokhorela Yehova paahi. Esalimo 83:19, BE, enihimya wira: “Ni esuwele wi nyuwo nsina nanyu ti Yahvéh, nyuwo mekhinyu mwà Namusulú velaponi vothene”. Yesu aaphavela wira atthu amusuwele ole okhanle Muluku eekeekhai, ni aahiwiixuttiha nsina na Muluku. (Mmusome Yohani 17:6.) Yesu aahimmye so: “Mwakokhorele Apwiya [Yehova] Muluku anyu: yawo pahi mwattittimiheke”. (Matheyo 4:10) Tivonto, okhala wira naarumeyi a Muluku nintthara ntakiheryo na Yesu. Nimmukokhorela Yehova paahi, ni ninnirumeela nsina nawe, nave ninniwiixuttiha akina nsina na Muluku ni ele enrowa awe opaka mmureerelo ahu.

9, 10. Nnooniherya sai ophentana mukina ni mukhwaawe?

⁹ Ninnaaphenta atthu mwekeekhai. Yesu aahiwiixuttiha atthareli awe wira aphentaneke mukina ni mukhwaawe. (Mmusome Yohani 13:35.) Moohicikha etthu sa opuro onikhuma ahu, elapo ahu aahiiso naari athaaciri wala amasikhini ninniphentana. Ophentana wahu mukina ni mukhwaawe onniniiraaniha ntoko anna ni arokora. (aKolosi 3:14) Tivonto, khaninrowa okhottoni wira nawiiveke atthu akina.  Biibiliya onihimya wira: “Enimusuweliha mutthu okhala mwana a Muluku walá mwana a Satana t’ila: othene ale ahinvara miteko sa xariya, walá ahinaphenta akhw’aya, awo khahiyó àna a Muluku”. Ni onincererya so: “Niphentaneke. Nihikhaleké ntoko Kayini: owo ari mutthu a mutakhali, tivó vamwivalyawe muhim’awe”.​—1 Yohani 3:10-12; 4:20, 21.

¹⁰ Ninnirumeela okathi ahu, ikuru sahu, ni itthu sahu wira nikhaliheryane ni olipihana mukina ni mukhwaawe. (aHéberi 10:24, 25) Ninnimananiha ‘owirela sorera atthu othene’.—aGalasia 6:10.

11. Xeeni vaneemererya ahu wira Yesu ephiro eniroiha wa Muluku?

¹¹ Ninnimwiiwelela Yesu maana ephiro eniroiha wa Muluku. Biibiliya onihimya so: “Khavo mutthu mukina onwerya owòpola atthu: mulaponi mothene khinivo nsina nikina nivahiwe atthu, nniwerya onòpola”. (Miteko 4:12) Muru 5 wa eliivuru ela, nihiixutta wira Yehova oomuruma Yesu wira ovahe okumi awe mmureerelo wa apinaatamu oowiiwelela. (Matheyo 20:28) Yehova oomuthanla Yesu wira okhale Mwene a elapo yotheene. Ti nthowa naya Biibiliya vanihimya awe wira nihaana omwiiwelela Yesu akhala wira nimphavela okhala mahiku otheene.​—Mmusome Yohani 3:36.

12. Xeeni nihinkhaliherya ahu epoliitika?

¹² Khaninkhaliherya epoliitika. Yesu khiirela mpantta miteko sa epoliitika. Okathi Yesu aaphukeliwa awe, aahimuhimeerya Pilato namalamulela a oRoma wira: “Omwene aka khuhiyó wa vathí-va”. (Mmusome Yohani 18:36.) Ntoko Yesu, ninniroromeleya wa Omwene wa Muluku ori wiirimu, tivonto, moohicikha etthu sa opuro onikhala ahu, khaninkhaliherya ipoliitika. Masi Biibiliya onniruma owiiwelela makhulupale “anettiha elapo”, niire so, iguvernu. (aRoma 13:1) Nave ninniiwelela malamulo a elapo enikhala ahu. Nto, vaavo malamulo awo aniwana aya ni malamulo a Muluku, hiyo nnaatakiha arummwa, yaawo yaahimmye wira:  “Etthu yotepa otthuneya omwiwelela Muluku ovikana owiwelela atthu”.​—Miteko 5:29; Marko 12:17.

13. Exeeni enilaleerya ahu voohimya sa Omwene wa Muluku?

¹³ Ninnikupali wira Omwene wa Muluku paahi tonrowa omaliha mixankiho sa apinaatamu. Yesu aahimmye wira “ehapar’ila yorera y’Omwene” yaarowa olaleeriwa olumwenku wotheene. (Mmusome Matheyo 24:14.) Khiivo eguvernu ya apinaatamu eniwerya opaka ele Omwene wa Muluku enrowa aya opaka mmureerelo ahu. (Esalimo 146:3) Yesu ooniixuttiha moota woovekela Omwene wa Muluku, oriki: ‘Omwene anyu orwe; otthuna wanyu wireye ntoko wirimu siso vathí-va’. (Matheyo 6:10) Biibiliya onihimya wira Omwene wa Muluku onrowa opwetexa iguvernu sotheene sa apinaatamu, nto “onrowa okhalaka [olamulelaka] wa mahiku othene”.​—Daniyeli 2:44.

14. Tani anaakupali anyu wira animukokhorela Muluku mwa enamuna yooloka?

¹⁴ Nuumala othokoreya iponto iya, mwiikoheke so: ‘Etiini xeeni sowiixuttiha saya sinikhuma mBiibiliyani? Eniwiixuttiha akina nsina na Muluku? Tani aniphentana mukina ni mukhwaawe ni anikupali wira Muluku oomuruma Yesu wira onoopole? Tani ahinikhaliherya epoliitika? Tani anilaleerya wira Omwene wa Muluku paahi tonrowa omaliha mixankiho sahu?’ Anamoona a Yehova paahi.​—Yesaya 43:10-12.

15. Nipake exeeni wira Muluku eemererye okokhorela wahu?

¹⁵ Nto khivaniphiyerya ohimya wira kinnimukupali Muluku. Maana nnaamwi minepa sootakhala simukupaliki Muluku, iyo khisinimwiiwelela. (Yakobo 2:19) Akhala wira nimphavela wira Muluku eemererye okokhorela wahu, nihaana weettela ele enihimya ahu.

16. Ninrowa okhootta sai etiini yoowootha?

 ¹⁶ Wira Muluku eemererye okokhorela wahu, nihaana okhootta etiini yoowootha. Profeta Yesaya aalempe so: “Mukhume eriyari aya: mmwalane ni yawo. Muhivaré itthu sa mwikho”. (Yesaya 52:11; 2 aKorinto 6:17) Ti nthowa naya vanireerela ahu okhootta khuta etthu anivarihana ni okokhorela wowootha.

17, 18. Anitaphulela-ni masu oowi “‘Babilonia’ Muttetthe Mulupale”, nto xeeni varyaaya vootthuneya okhuma moohipisa?

¹⁷ Etiini yoowootha exeeni? Ti yeele eniixuttiha omukokhorela Muluku mwa enamuna enivirikana ni ele Biibiliya oniixuttiha awe. Nto Biibiliya onnihimya itiini iyo okhala “‘Babilonia’ Muttetthe Mulupale”. (Wisupulula 17:5) Nthowa xeeni? Nthowa noowi nuumala Epula ya Mutaaseke mahiku a Nowe, sowiixuttiha sa itiini sowootha saapacenrye epooma ya oBabilonia. Sowiixuttiha iyo, saahimwareela olumwenku wotheene. Mwa ntakiheryo, atthu yaakhala oBabilonia yanaakokhorela amuluku araru. Nave olelo-va, itiini sinceene siniixuttiha wira Muluku ti Oraru, masi Biibiliya onniiwanyeiha wira Muluku ori mmosa paahi, Yehova, ni wira Yesu ti Mwanawe. (Yohani 17:3) Nave-tho, atthu yaakhala oBabilonia yaanikupali wira nuumala mutthu okhwa, yookhala etthu enivikaniha okhala, nave pooti ohaaxiwa omooroni. Masi mwiixuttiho owo khahiyo wekeekhai.​—Nwehe Enoota 14, 17, ni 18.

¹⁸ Muluku aahihimya vahinatthi wira itiini sotheene sowootha sinrowa opwetexiwa moohipisa. (Wisupulula 18:8) Nto munnoona otthuneya waya okhuma etiini yoowootha mowaakuveya? Yehova Muluku oniphavela wira nyuwo mpake eyo okathi ohinatthi omala.​—Wisupulula 18:4.

19. Vaavo vanithanla anyu omukokhorela Yehova, owo onrowa wookhapelelani sai?

¹⁹ Vaavo vanithanla anyu ohiya etiini yoowootha wira mmurumeele Yehova, apatthani aahiiso amusi anyu akina  pooti otikinihiwa ni yoothanla anyu eyo, aahiiso ophavela woohiihani. Masi Yehova khonrowa woohiyani. Nave munrowa wiirela mpantta emusi ya atthu imilyau sinceene olumwenku wotheene, yeeyo tthiri eniphentana mukina ni mukhwaawe, ni munrowa okhalana nlipelelo na okhala mahiku otheene elapo esya ya Muluku. (Marko 10:28-30) Waaniheryasa apatthani ni amusi anyu akina yookhoottiheryani omurumeela Yehova, muhoolo pooti ophavela omusoma Biibiliya.

20. Xeeni varyaaya vootthuneya omukokhorela Muluku mwa enamuna yooloka?

²⁰ Moohipisa, Muluku onrowa omaliha otakhala, nave Omwene awe onrowa olamulaka elapo yotheene. (2 Pedru 3:9, 13) Tthiri, onrowa okhala okathi wootepa oreera! Atthu otheene anrowa omukokhorelaka Yehova mwa enamuna enimusivela. Tthiri, ti vootthuneya othanla olelo-va enamuna yooloka ya omukokhorela Muluku.