第15章
应该点样崇拜上帝？
1．边个可以话俾我哋知崇拜上帝嘅正确方式？
大多数宗教自称信奉真神，倡导真理。佢哋会唔会都系啱嘅呢？关于边个系真神，我哋应该点样崇拜佢，唔同嘅宗教各有主张。我哋点知边种崇拜上帝嘅方式系正确嘅呢？只有耶和华可以话俾我哋知。
2．你可以通过乜嘢知道崇拜上帝嘅正确方式？
2 圣经系耶和华赐俾我哋嘅。我哋通过圣经就可以知道点样崇拜上帝先至正确。你研读圣经，用耶和华教导嘅方式崇拜佢，就一定会从中得益。（以赛亚书48:17）
3．我哋想蒙上帝悦纳，就应该点做？
3 有啲人以为所有宗教都系上帝认可嘅，不过耶稣唔系噉讲。佢话：“唔系每个同我讲‘主啊，主啊’嘅人，都可以进入天上嘅王国，唯独遵行我天父旨意嘅人，先可以入去。”所以，我哋一定要知道上帝嘅旨意系乜嘢，然后将所学到嘅实践出嚟。噉样做非常重要，因为耶稣将嗰啲唔遵行上帝旨意嘅人同罪犯相提并论，话佢哋系“行事不法嘅人”。（马太福音7:21-23）
4．关于遵行上帝嘅旨意，耶稣点讲？
4 耶稣指出，遵行上帝旨意嘅人会面对唔少挑战。佢话：“你哋要入窄门。因为通向灭亡嘅路又宽又阔，入去嘅人好多；通往生命嘅门系窄嘅，路系狭隘嘅，揾到嘅人亦都少。”（马太福音7:13,14）人以正确嘅方式崇拜上帝，就系行紧通向永生嘅窄路。相反，人用错误嘅方式崇拜上帝，就好似行紧又宽又阔嘅路，不过结果通向灭亡。但系，耶和华唔想任何人死亡，佢俾机会每个人认识佢。（彼得后书3:9）
崇拜上帝嘅正确方式
5．你可以点样认出边啲人正确噉崇拜上帝？
5 耶稣话，我哋能够认出边啲人先至系正确崇拜上帝嘅，方法就系通过佢哋嘅信仰同行为。佢话：“你哋凭佢哋嘅果实，就可以认出佢哋。……凡好树都结好果实”。（马太福音7:16,17）耶稣嘅意思唔系话崇拜上帝嘅人都系完美嘅。不过，佢哋会尽力做正确嘅事。而家我哋睇吓，应该以点样嘅方式崇拜上帝。
6,7．我哋嘅教导点解要有圣经根据？我哋从耶稣嘅榜样学到乜嘢？
6 我哋嘅教导应该有圣经根据。圣经话：“圣经全部都系上帝用圣灵启示嘅，对于教导、责备、纠正、按正义施行管教，都系有益嘅，使敬神嘅人可以完全胜任，装备齐全，做各样善工。”（提摩太后书3:16,17）使徒保罗对基督徒同工讲：“我哋将上帝嘅话语传俾你哋，你哋听见就接纳嘞，唔认为系人嘅话语，而认为系上帝嘅话语。呢个真真正正系上帝嘅话语”。（帖撒罗尼迦前书2:13）由此可见，正确嘅崇拜只会以上帝嘅话语圣经为依据，而唔系人嘅主张、传统习俗等等。
7 耶稣所教嘅都系基于上帝嘅话语。（请读约翰福音17:17）佢经常引用经文。（马太福音4:4,7,10）真正崇拜上帝嘅人会效法耶稣嘅榜样，根据圣经教导人。
8．关于对耶和华嘅崇拜，耶稣点讲？
8 我哋应该唯独崇拜耶和华。诗篇83:18话：“你嘅名系耶和华，唯有你系统治全地嘅至高者”。耶稣想人知道边个先至系真神，所以佢教导人认识真神嘅名。（请读约翰福音17:6）耶稣话：“要崇拜耶和华你嘅上帝，单要敬奉佢”。（马太福音4:10）身为上帝嘅仆人，我哋应该效法耶稣嘅榜样，唯独崇拜耶和华。我哋唔单止自己使用上帝嘅名，仲会教导人认识佢嘅名，以及佢对人类嘅旨意。
9,10．我哋应该点样对人表现爱心？
9 我哋需要对人表现真正嘅爱心。耶稣教导门徒要彼此相爱。（请读约翰福音13:35）无论我哋嚟自边度，文化背景点样，贫穷抑或富裕，我哋之间嘅爱应该使我哋团结一致，组成一个大家庭。（歌罗西书3:14）所以，我哋唔会参战杀人。圣经话：“唔经常行正义嘅人，都唔系源于上帝嘅，唔爱弟兄嘅亦都一样。凭住呢一点，边个系上帝嘅儿女，边个系魔鬼嘅儿女，就显而易见嘞。”圣经仲话：“我哋应该彼此相爱。唔好学该隐，佢系源于恶者嘅，杀咗自己嘅弟弟”。（约翰一书3:10-12；4:20,21）
10 除咗唔参战之外，我哋仲会运用自己嘅时间、精力同财物互相帮助，彼此鼓励。（希伯来书10:24,25）圣经话我哋要“对所有人行善”。（加拉太书6:10）
11．点解我哋要承认耶稣系上帝派嚟嘅救主？
11 我哋必须服从耶稣，承认佢系上帝派嚟嘅救主。圣经话：“除咗佢，边个都唔能够带嚟拯救，因为喺天下人间，冇赐下其他名，系我哋必须依靠先能够得救嘅。”（使徒行传4:12）我哋喺第5章学到，耶和华派耶稣嚟到地上献出生命作为赎价，使服从上帝嘅人可以得救。（马太福音20:28）耶和华拣选耶稣做君王统治整个地球。所以圣经话，如果我哋想得到永生，就一定要服从耶稣。（请读约翰福音3:36）
12．点解我哋唔参与政治？
12 我哋唔应该参与政治。耶稣喺地上嘅时候唔参与政治。佢喺罗马总督彼拉多面前受审时话：“我嘅王国唔属于呢个世界”。（请读约翰福音18:36）我哋应该同耶稣一样，效忠上帝天上嘅政府。所以，无论我哋生活喺边个国家，都唔会参与政治。不过，圣经吩咐我哋要服从“在上当权嘅”，意思系世上嘅政府。（罗马书13:1）我哋会遵守当地嘅法律。不过，如果政府嘅法律同上帝嘅律法有冲突，我哋就会效法使徒嘅榜样。佢哋话：“我哋必须接受上帝嘅统治，服从上帝而唔系服从人”。（使徒行传5:29；马可福音12:17）
13．我哋传讲关于上帝王国嘅乜嘢信息？
13 我哋相信只有上帝嘅王国先至可以解决世上嘅一切难题。耶稣话 “王国嘅好消息”会传遍世界各地。（请读马太福音24:14）上帝嘅王国将会成就嘅事，系冇任何人间政府做得到嘅。（诗篇146:3）耶稣教导我哋为上帝嘅王国祷告，佢话：“愿你嘅王国来临。愿你嘅旨意喺地上实现，好似喺天上一样。”（马太福音6:10）圣经预告，上帝嘅王国会毁灭所有人间政府，而“唯独呢个王国会永远屹立”。（但以理书2:44）
14．你认为边啲人以正确嘅方式崇拜上帝？
14 根据以上几个特征，你可以问问自己：“边啲人根据圣经教导人，并传扬上帝嘅名？边啲人彼此之间表现真正嘅爱心，同埋相信耶稣系上帝派嚟拯救我哋嘅？边啲人唔参与政治？边啲人传讲只有上帝嘅王国先至可以解决我哋嘅难题？”答案系：耶和华见证人。（以赛亚书43:10-12）
你会点做？
15．如果想上帝认可我哋嘅崇拜，我哋就一定要点做？
15 净系信有上帝系唔够嘅。邪灵都信，不过佢哋就冇服从上帝。（雅各书2:19）如果想上帝认可我哋嘅崇拜，我哋唔单止要相信佢存在，仲一定要按照佢所讲嘅去做。
16．点解我哋必须同错误嘅宗教划清界线？
16 如果我哋想自己嘅崇拜得到上帝认可，就必须弃绝错误嘅宗教。以赛亚先知话：“要离开嗰度，唔好接触不洁嘅嘢”。（以赛亚书52:11；哥林多后书6:17）所以我哋必须同错误嘅宗教划清界线。
17,18．“大巴比伦”系指乜嘢？点解离开错误宗教系好紧急嘅事？
17 点样嘅宗教系错误嘅？任何宗教，如果倡导嘅崇拜方式或者行为违反上帝嘅话语，就系错误嘅。圣经将所有错误嘅宗教称为“大巴比伦”。（启示录17:5）点解？喺挪亚洪水之后，好多错误嘅宗教都系喺巴比伦城兴起嘅。呢啲宗教嘅道理散布世界各地。例如，住喺巴比伦嘅人崇拜三位一体嘅神。今日，好多宗教亦都倡导上帝系三位一体嘅。不过，圣经清楚指出真神只有一位，就系耶和华，而耶稣只系佢嘅儿子。（约翰福音17:3）巴比伦人亦都相信人死后会以某种形式继续生存，仲会喺地狱受折磨。呢啲讲法都系错嘅。——请睇附注14、17同18
18 上帝预告所有错误嘅宗教好快就会被毁灭。（启示录18:8）耶和华上帝希望你可以及时采取行动。（启示录18:4）你睇唔睇得出离开错误宗教点解系好紧急嘅事？
同耶和华嘅子民一齐事奉上帝，你就会成为真基督徒大家庭嘅一分子
19．你决心事奉耶和华，可以得到乜嘢福分？
19 你一旦决定离开错误嘅宗教事奉耶和华，有啲亲友可能唔明白你点解要噉做，佢哋嘅反应甚至会令你好难受。不过，耶和华唔会离弃你。你可以成为真基督徒大家庭嘅一分子，感受到世界各地几百万属灵弟兄姊妹真挚嘅爱，仲有喺新世界永远生活嘅希望。（马可福音10:28-30）况且，嗰啲反对你事奉耶和华嘅亲友话唔定日后会改变，愿意学习圣经。
20．点解以正确嘅方式崇拜上帝好重要？
20 上帝好快就会将恶人恶事全部铲除，而上帝嘅王国就会统治全地。（彼得后书3:9,13）到时，生活一定非常美好！每个人都会以耶和华悦纳嘅方式崇拜佢。所以，而家就要采取行动，以正确嘅方式崇拜上帝！
