1, 2. Hetatangar nala he pi mi pi isi mitatangar ya nalawuhe heiopi mu kul penting?

E SURAH RIELING wosakolah homi mia, ong wosakolah ba mani ama Allah holuk haba herofi mu nala he Allah dohoaiy he dewotadasakolah ya de mipaneng nahani. (2 Korintus 6:17) Heiwuhe he alasan ba Yehuwa de pi bot ba agama ba wal hiyeng rofi na ”Babilon Lea” he uiytaha misei. (Penyingkapan 18:2, 4) Nala he ko ri mipaneng te? Pidi ama nunuku pi heminuku ngmiy kang, ya pi wai pi isi mihatangar, ’Nedi na ne Allah holuk haba hedomaha hu ne haluol rena, re ne Allah holuk haba ne nomaha he ne haluol?’

² Agama ba wal hiyeng rofi na ong do iti heimu kang. Haba omi rumang mia ko nala ba agama wal hiyeng rofi na de woadasakolah ya de mipak mipaneng e dar dotafuda wat na. Mie nala ba de mipak mipaneng pi wobahas ya nalawuhe kul penting ba pi hehalal mu Yehuwa de hehalal wuda te.

3. (a) Nalawuhe mani ama he ibadat homi mia de wiy bata puna heiopi wodafang mu beka? (b) Allah holuk ba wiy bata puna, nala he Surah Rieling dewofang?

³ Ama faring de wiy bata puna ya he tofa mia de kamar nuku paneni ba tung-tung he puna ba Allah holuk. Hedi ko e mipaneng e Allah holuk ba hei wei e wal puna na e miomahia beka ya ko hasalah. Haba woamunang Yehuwa dewopidasakolah ba pi lateiur holuk te. Ya, Surah Rieling  de he falaka wopokafang ba pi ibadat homi mia pi wiy bata puna Yehuwa de wal domaha na.​—Mihalal Keluaran 20:4, 5; Mazmur 115:4-8; Yesaya 42:8; 1 Yohanes 5:21.

4. (a) Nalawuhe doma keta fala wei holuk? (b) Nalawuhe Yehuwa de dehui defatil wei hotap ba ama mona hadabesar na?

⁴ Ama faring de leng ya de rumai de baharing faring puna ba de keta fala ba ngmoni wei homi hadoa kang. Ya mani de holuk nahani. Haba pong wosakolah diy ba ama mona mu de pomong beka, ya dewal beka paneng mipidasama na. Dewal he yera afena mibirang na. Herofi mu, ama mona hadabesar mu we beka wonatea heimu nala ba ama mona de wobesar wuda heimu loki maheng he besar. Heiwuhe he alasan ba Yehuwa de ama Israel wei hotap ba doma ama mona hadabesar na, nati nala ba spiritisme dil dotilaka mipaneng na.​—Ulangan 18:10-12; hehalal Catatan Hewosik 26 ya 31.

5. E Allah holuk ba wiy bata puna namati e keta fala holuk, nala he de omong kang ba e wal mipaneng na?

⁵ E Allah holuk ba wiy bata puna namati e keta fala holuk, nala he de omong kang ba e wal mipaneng na? E kul Surah Rieling mihalal ya wotanut lateiur hei wei Yehuwa de hehalal. Nal-nal ba eyala wei Yehuwa de hehalal mu ”kul hiyeng hobeka”. (Ulangan 27:15) Leng kopang doa miy Yehuwa her ba de omong e hehalal hedosama Yehuwa he hehalal wuda ya e holuk ba hedomaha wuda. (Yesaya 55:9) E worumai kang ba Yehuwa de rumai baharing ba o hiyeng te de miy er ba nala he ibadat wal hiyeng rofi na dar dotilaka e kul-kul dowat.

6. Nalawuhe 25 Desember mu miahiy ba leng ba Yesus mihamani?

⁶ Natal mu leng lea ba ruli dolea ama mia mipaneng, ya ama faring dewotanut ba leng hedi he Yesus mihamani.  Haba herofimu Natal mu agama ba wal hiyeng rofi na dar dotilaka. Kamus nuku de he falaka wofang ba ama Roma wei tanggal 25 Desember mu leng ba wari mihamani ama mipaneng. Gereja he pemimpin wei domaha ama kafir faring mie dei ama Kristen heri te, hare Yesus wala 25 Desember mihamani na haba ama woheinuk ngmiy ba tanggal hedi mia de Yesus he leng ba mihami mipaneng. (Lukas 2:8-12) Yesus he murid-murid wei Natal mu dewal mipaneng na. Buku nuku de he falaka wofang ba tung 200 ba Yesus hamani diy ”ama nuku bay dewal hiyeng na ya la ama kabei he homi hedatoka yani he mihamani diy”. (Sacred Origins of Profound Things) La ahola Natal ama mipaneng mu tung asaha kabei mihapieti ba Yesus de buku taha mia.

7. Nalawuhe Natal mu ama Kristen hiyeng rofi wei dewal mipaneng na?

⁷ Ama faring de hiyeng Natal mu heiyeri kafir ya tradisi, ya he tradisi mu hedosama de lek paneng ya nal miy doyeng nahani. Hedosama, Inggiris ya negara ba Amerika mia heleng hadoa ba Natal ama wotapi mbeimu nal hedi kekafiran dil dar dotilaka. Ama mahe mipaneng hukuman miher. Haba heuiyharena Natal ama wai mipaneng. Nalawuhe ama Kristen hiyeng rofi wei dewal Natal mipaneng na? Heimu domaha nal karikaranuku ba de mipaneng de Allah homi hado kang.

8, 9. Nalawuhe ama Kristen ba abad ahola leng ba mitamani dewal mipaneng na?

⁸ Leng lea afena ba ama faring de mipaneng heimu leng ba mitamani. Leng ba mitamani na ama Kristen wei de kul mipaneng? Leng ba mitamani Surah Rieling dewofang ama ayoki ba wal Yehuwa hehui hefatil na he mipaneni.  (Kejadian 40:20; Markus 6:21) Leng ba mitamani mu puna ba dewa holuk. Heiwuhe he alasan ba ama Kristen ahola wei ”leng ba mitamani wai mipaneng heimu kekafiran”.​—The World Book Encyclopedia.

⁹ Asing ama Romawi ya ama Yunani wei deworumai nahani ba leng ba mihamani nahani heimia simoi de siye ya simoi hedi opi ama hedi he birang homi mia de wofikang. ”Simoi opi loki maheng dil dar dotilaka ya dewa ba he leng mihamani ama hedi dil dosama,” buku ba The Lore of Birthdays dewofang.

10. Nalawuhe yala ama Kristen wei leng ba mitamani dewal mipaneng na?

¹⁰ E wotanut leng lea ba agama ba wal hiyeng rofi na dar dotilaka na Yehuwa dohomaha? (Yesaya 65:11, 12) Wal dohomaha na. Heihe he alasan ba nalawuhe leng ba mitamani namati leng lea afena ba agama ba wal hiyeng rofi na dil dar dotilaka pi wal mipaneng na.

11. Nalawuhe ama faring de leng lea mipaneng? Nala he kul penting ba miadasama te?

¹¹ Mani ama hiyeng Natal ya leng lea afena heiyeri mu kekafiran, haba de dar mipaneng iti. De midomahia ba leng lea mu he leng kang ba he tofa homi mia ya he au he aramang wei de mideitoluol nahani. Na ridi bay ri miromahia heiwuda? Pi leng faring puna ba pi tofa homi mia ya pi au pi aramang wei pokari teitoluol mu wal hasalah na. Yehuwa tofa homi mia he paneni ya domaha pidi ya pi nang pi naha wei pinaisena do rama amoni. (Efesus 3:14, 15) Haba lateiur bay pidi ya Yehuwa pinaisena mu pi kul wotanut te, mbeimu nang naha homi hado kang haba leng lea ba agama wal hiyeng rofi na mia pi mipaneng. Heiwuhe he alasan ba rasul Paulus dewofang  ba, ”Nal-nal ba Tuan homi hoyai he mipaneng.”​—Efesus 5:10.

12. Ko leng lea nuku Yehuwa dohoaiy he alasan mu nala?

¹² Ama kabei de midomahia ba leng lea heiyeri mu wal dowuda na, haba Yehuwa mu wal heiwuda na. Leng lea ba agama ba wal hiyeng rofi na heiyeri namati amakang hana wohaliel ya lambang negara wohaliel mu Yehuwa dohoaiy. Hedosama Mesir he ama wei leng lea ba dewa dewi wal hiyeng rofi na hei de mipaneng. Hewohaluol Israel he ama wei wal Mesir mia na Mesir he leng lea ba wal rofi na de nuku haluoli diy ya de hana hadou ba ”leng lea ba Yehuwa hei”. Haba, nala he de mipaneng nahani Yehuwa de hei hukum diy. (Keluaran 32:2-10) Nabi Yesaya dewofang wuda, pi kul ”nal ba beka hopaniy na”!​—Mihalal Yesaya 52:11.

13. E woheinuk ngmiy ba wal leng lea paneng na hetatangar nala he ko opa?

¹³ Ong heminuk ngmiy ba wal leng lea mipaneng na, na ko e tatangar faring hadoa. Hedosama, Ne mokeni ba nilia awang nuku de natangar nalawuhe Natal e wal haluol na? Ama nuku de nalkang ba Natal hei ner, nala he ne mipaneng te? Ne neng re ne mol ba nilia niy worumai walsama na de domaha nedi bay ne hadou leng lea paneng, ko ne lateiur? Ni wal Natal nati leng ba mitamani he mipaneng na, ne lateiur ne wil wei homong ba homi wosei na?

14, 15. Ama nuku de leng lea hei woada selamat ya de nalkang er nala he e mipaneng?

¹⁴ Nal karikarnuku ba pi mipaneng ya pi wobesar wolasar mu pi aleling te. Hedosama, leng lea hei ama ada selamat doma e larama na. E wohawai ba, ”E kang o.” Haba mani ama domaha faring hiyeng nalawuhe leng lea  e wal haluol na e heminuku miy ba he falaka wohadabesar kang. Haba lateiwuda bay, kang, sadafalasing, tealeling ya mi teluk e wohiyeng te. Surah Rieling dewofang, ”Hare e besar e lasar mu tomi mihakang te, hedosama asi dosai wuda mbeimu ri hiyeng ba ri lateiur ama nunuku hebesar wohawai.” (Kolose 4:6) Wohadabesar nahani ba omaha e mokeni wei rokari riy toluol ba nal miy teyeng teriwang, haba leng afena mia, doma leng lea homi mia na.

¹⁵ Ama nuku de nalkang nuku er e lateiur paneng? Nal hedi he keding-keding Surah Rieling dewal wopokafani na, haba dewofang ba pi tomi kiding ba kang mu pi wofikang te. (1 Timotius 1:18, 19) Mbeimu ama hedi ba de nalkang nuku edi dewal hiyeng ba e wal leng lea mipaneng na. Namati ko dewofang, ”Ne hiyeng e wal leng lea opi mipaneng na haba nomaha nalkang opi ne miy er.” Lateiwuda bay e woheinuk ngmiy kang ba nalkang hedi e miy kang re doma. Haba he minuku nala he e miy doma de omi kiding habek na. Pi wal pomaha na ba pi nalnuku paneng haba pidi ya Yehuwa pinaisena de beka.

16. E tofa homi mia domaha leng lea mipaneng ko nala he e mipaneng?

¹⁶ E tofa homi mia domaha leng lea mipaneng, nala he ko e mipaneng te? Rokari ruhatang na. Woamunang, dedi wei bay he hak hadoa ba hedomaha nala de mipaneng nahani. Nala he de miahiy e sadafalasing ya heluk te, hedosama e omaha dei wei bay de heiur paneng ba miadasama. (Mihalal Matius 7:12.) Haba ko e tofa homi mia wei domaha leng lea homi mia rokari riy toluol, nala he ko e mipaneng? E dara woheinuk miy na e berdoa Yehuwa hafang ba de omong ba woheinuk hiyeng rofi e miy kang. Nala he ko midalek e wotanut ya nal hedi hei e wai faring  wosakolah te. Woamunang e omaha e kul Yehuwa homi hado kang iti.

17. Ama afena de leng lea paneng e lateiur e wil wei homong ba homi wosei na?

¹⁷ E wil wei de demokeni wei hehalal ba de leng lea paneng nala he e paneng ba mi e wil wei homong? Leng afena mia e nal ba kulkang miy her kang. Edi bay langfarot e nalkang miy her kang. Ya nal ba kulkang ba e miy e wil wei her kang mu e leng ya e mihiyena.

18. Nalawuhe teitoluol Kristen kopang mu pi haluol te?

¹⁸ Yehuwa homi hakang temati ibadat ba wal hiyeng rofi na, ya nal ba papaneng ba leng lea agama hei pi do iti te. Haba pidi bay ibadat ba hiyeng rofi mu pi kul hadou mipaneng te. Lateiur? Hanaisena mia nuku mu teitoluol kopang ba Saksi-Saksi Yehuwa wei de mipaneng e haluol iti te. (Mihalal Ibrani 10:24, 25.) Teitoluol opi mu kul penting ba ibadat hiyeng rofi homi mia. (Mazmur 22:22; 122:1) Pi teitohayei ba mitapieta mitarumai ya siye kang.​—Roma 1:12.

19. Nal hiyeng rofi ba Surah Rieling homi mia ba ong wosakolah diy nalawuhe penting ba e wai mi ama afena wohadasakolah te?

¹⁹ Wai lela afena ba agama hiyeng rofi hohau mu nala he Surah Rieling mia ba e wosakolah e wai mi ama afena wohadabesar te. Bekatafiela ba ruli taha midalek amakang faring de midomahia mu beka. Ama hedi wei ko e wala hiyeng. Worumai ba ariy falaka hei e wohadabesar kang. Teitoluol Kristen e siye ya nal hiyeng rofi ba Surah Rieling mia e wobesar tung dolal leng dowat tradisi agama ba wal hiyeng rofi hei dong nau kang. E worumai e kang hamol homi mia, ya e mifik ba ibadat hiyeng rofi hohau mu Yehuwa de oweni faring miy er kang.​—Maleakhi 3:10.