1, 2. Биске бойыска кандый сурак берер керек ле нениҥ учун?

СЛЕР, Агару Бичикти ӱренип тура, бойлорын кудайзак деп айдып турган кӧп улустыҥ керектери ле ӱредӱлери Кудайга јарабай турганын билип алганаар (2 Коринфтегилерге 6:17). Оныҥ учун Иегова бистерге тӧгӱн кудай јаҥнаҥ, «Улу Вавилонноҥ», чыксын деп айдат (Ачылта 18:2, 4). Слер нени эдереер? Биске бойыстаҥ мындый сурак сураар керек: «Мен Кудайга канайып бажырарга кӱӱнзейдим: Кудайдыҥ кӱӱнзегени аайынча ба эмезе бойымныҥ ӱренип калганым аайынча ба?»

² Слер тӧгӱн кудай јаҥнаҥ чыгып калган болзоор, јакшы. Је андый да болзо, слерге тӧгӱн кудай јаҥла колбулу кандый бир чӱм-јаҥдар эмдиге ле јетире јарап турган болор. Кезик таркадылган чӱм-јаҥдарды шӱӱжип, бу чӱм-јаҥдарга нениҥ учун Кудайдыҥ кӧрӱмиле кӧрӧр керек деп билип алактар.

3. а) Та кемге де Кудайга сӱрлер јокко бажырарга, нениҥ учун кӱч болордоҥ айабас? б) Агару Бичик сӱрлер тузаланары керегинде нени айдат?

³ Кезик улус канча јылдардыҥ туркунына Кудайга бажырарга, сӱрлер, статуэткалар ла оноҥ до ӧскӧ немелер тузаланат. Слер де мынайып эдерге ӱренип калган болороор, оныҥ учун андый немелер јогынаҥ Кудайга улус бажырбай јат, керек дезе андый бажырыш јастыра деп сананып турган болороор. Је Кудайга канайып бажыратанын јӱк ле ол билер деп ундыбагар. Агару Бичикте, чалулар эмезе оноҥ до ӧскӧ немелер тузаланып бажырганы Иего вага јарабай јат деп јарт айдылат. (Чыгыш 20:4, 5 кычырыгар; Сарын 115:4—8; Исаия 42:8; 1 Иоанн 5:21.)

4. а) Нениҥ учун божогон ада-ӧбӧкӧлӧргӧ бажырбас керек? б) Иегова нениҥ учун Израиль албатыны божоп калгандарла куучындашпазын деп јакарган?

⁴ Кезик ороондордо божогон улуска бажыратан јаҥ таркадылган. Улус божоп калган тӧрӧӧндӧрине јараарга кӧп ӧйин ле ийде-кӱчин берет. Је божогон улус биске болужып та болбос, каршу да јетирип болбос деп билип алганыс. Олор база кайда да јӱрӱм јӱрбей јат. Олорло колбу тударга албаданганы коркышту јеткерлӱ, не дезе, божоп калгандардаҥ келген «јетирӱлер» чынынча болзо, кӧрмӧстӧрдӧҥ болот. Оныҥ учун Иегова Израиль албатыга божоп калган улусла куучындашпазын деп јакарган. Олор кӧрмӧстӧрлӧ колбулу немелердеҥ тууралаар учурлу болгон (Јаҥды такыганы 18:10—12; 25 ле 30 Кожулталарды кӧрӱгер).

5. Сӱрлерге ле божогон тӧрӧӧндӧргӧ бажырбаска не болужар?

⁵ Айдарда, сӱрлерге ле божогон ада-ӧбӧкӧлӧргӧ бажырары — јастыра. Је мынайып бажырбаска не болужар? Агару Бичикти кычырып, мындый бажырышка Иегованыҥ кӧрӱмин шӱӱп сананыгар. Андый бажырышты Кудай јескинчилӱ деп кӧрӧт (Јаҥды такыганы 27:15). Мындый кӧрӱмдӱ болорго ло Кудайга јараар эдип бажырарга, кажы ла кӱн Иеговага мӱргӱп, болуш сурагар (Исаия 55:9). Иегова слерге тӧгӱн бажырышла колбулу ончо немелердеҥ айрылатан ийде-кӱчти кыйалта јогынаҥ берер.

6. Иисус Христостыҥ чыккан кӱни нениҥ учун јаҥар айдыҥ 25-чи кӱнинде ӧткӱрилип јат?

⁶ Рождество — телекейде эҥ јарлу байрамдардыҥ бирӱзи. Бу кӱнде улус Иисус Христостыҥ чыккан кӱнин темдектейт. Рождество тӧгӱн кудай јаҥла тудуш деп  слер билгенеер бе? Бир энциклопедияда айдылганыла болзо, Римниҥ империязында јаткан язычниктер јаҥар айдыҥ 25-чи кӱнинде кӱнниҥ чыккан кӱнин темдектеген. Абыстар дезе, язычниктерди христиан јаҥга кийдирерге, бу кӱнди Иисус Христостыҥ чыккан кӱни эдип салган. Је чынынча болзо, Иисус бу кӱнде чыкпаган * (Лука 2:8—12). Иисустыҥ баштапкы ӱренчиктери Рождествоны байрамдабаган. Бир бичикте айдылганыла болзо, Христостыҥ чыкканынаҥ ала, баштапкы эки чактыҥ туркунына, «оныҥ чыккан кӱнине јаан ајару эдилбеген; улус оныҥ чыккан кӱнин билбес те болгон» (Sacred Origins of Profound Things). Рождествоны Иисустыҥ божогонынаҥ канча јӱс јылдар ӧдӧ берерде байрамдап баштагандар.

7. Чындык христиандар нениҥ учун Рождествоны байрамдабай јат?

⁷ Рождествоныҥ чӱм-јаҥдары: сыйлар сыйлайтаны, кӧп аш-курсак белетеп байрамдаары язычниктердеҥ келген деп, кӧп улус билер *. Бу шылтактаҥ улам Англияда ла Американыҥ кезик јерлеринде Рождествоны байрамдаарга јарабас болгон. Оны темдектеген улуска штраф салынып туратан. Је кийнинде бу байрамды улус ойто байрамдап баштаган. Чындык христиандар Рождествоны байрамдабай јат, не дезе, Кудайга сӧсуккур болорго кӱӱнзейт.

8, 9. Баштапкы христиандар нениҥ учун чыккан кӱндерди байрамдабаган?

⁸ Ончо улустыҥ база бир сӱӱген байрамы — чыккан кӱн. Христиандарга бу байрамды ӧткӱрерге јараар ба? Агару Бичикте кезик улус чыккан кӱндерди байрамдаган деп  айдылат. Је олор Кудайдыҥ ишчилери болбогон (Башталганы 40:20; Марк 6:21). Андый байрамдарда улус тӧгӱн кудайларды макка чыгарган. Оныҥ учун бир энциклопедияда мынайып айдылат: «Баштапкы чактыҥ христиандары кижиниҥ чыккан кӱнин ӧткӱрерин язычниктердиҥ чӱм-јаҥы деп сананатан» (The World Book Encyclopedia).

⁹ Јебрен Римниҥ ле Грецияныҥ улузы, кижи энедеҥ чыгып јатса, оныҥ јанында байаназы (коручы-тыны) болот деп бӱткен. Олордыҥ санаазыла болзо, бу байана кижини бастыра јӱрӱминиҥ туркунына корулап јӱрет. Бир бичикте айдылганыла: «Кандый бир кудайдыҥ чыккан кӱнинде чыккан кижиниҥ байаназында бу кудайла кандый да колбу бар» (The Lore of Birthdays).

10. Христиандар нениҥ учун чыккан кӱндерди байрамдабас учурлу?

¹⁰ Иегова тӧгӱн кудай јаҥдарла колбулу байрамдарга кандый кӧрӱмдӱ? (Исаия 65:11, 12). Ол бу байрамдарды јаратпай јат. Оныҥ учун бис чыккан кӱндерди де, ӧскӧ дӧ тӧгӱн кудай јаҥдарла колбулу байрамдарды байрамдабай јадыс.

11. Улуска нениҥ учун байрамдар байрамдаарга јарап јат? Бис кемниҥ јарадузын аларга кӱӱнзейдис?

¹¹ Кезик улус Рождество до, ӧскӧ дӧ байрамдар язычниктердиҥ байрамдарынаҥ келген деп билер. Је олор бу байрамдарды тӱҥей ле байрамдап јат. Олор байрамдарды билезиле кожо јуулыжатан арга деп сананат. А слер канайып сананадаар? Билениҥ тӧзӧӧчизи, Иегова, билелерде јакшы колбулар болзын деп кӱӱнзеп јат. Оныҥ учун бастыра билениҥ кожо јуулышканы сӱрекей керектӱ болот (Ефестегилерге 3:14, 15). Бис тӧрӧӧндӧрисле тӧгӱн кудай јаҥла колбулу кандый бир байрам байрамдазаас, олорды сӱӱндирер болорыс. Је бис озо ло баштап Иегованыҥ јарадузын аларга кӱӱнзейдис. Элчи Павел: «Кудайга  не јарап турганын билип алыгар [јаантайын бӱдӱмјиленип турыгар, ЈТ]» — деп айткан (Ефестегилерге 5:10).

12. Иегова кандый байрамдарды јаратпай јат?

¹² Кӧп саба улуска байрамдардыҥ кайдаҥ келгени керек те јок. Је Иегова анайып сананбай јат. Ол тӧгӱн бажырышла колбулу эмезе кандый бир кижини макка чыгарып турган, анайда ок патриотический байрамдарды јаратпай јат. Темдектезе, Египетте тӧгӱн кудайларга учурлалган кӧп байрамдар болгон. Израиль албаты Египеттеҥ чыгарда, олордыҥ байрамдарыныҥ бирӱзин байрамдаган. Олор оны «Иеговага учурлалган байрам» деп адаган да болзо, бу байрам учун Иегова олорды кату каруузына тургускан (Чыгыш 32:2—10). Агару Бичик бисти: «Ару эмеске тийбегер» — деп кычырат. (2 Коринфтегилерге 6:17 кычырыгар.)

13. Слер байрамдарды байрамдабаска сананып та алган болзогор, слерде кандый сурактар чыгардаҥ айабас?

¹³ Слер байрамдар байрамдабас деп сананып та алган болзогор, слерде тӱҥей ле санааркаштар болордоҥ айабас: «Кожо иштеп турган улус мени олорло кожо нениҥ учун байрамдабай турганымды сураза, нени айдарым? Байрамга учурлай сый берзе, аларым ба? Ӧбӧӧним эмезе ӱйим мени оныла кожо байрамдазын деп сураза, канайдарым? Бис чыккан кӱндерди эмезе ӧскӧ дӧ байрамды байрамдабай турганыстаҥ улам балдар кунукпазын деп, нени эдер аргалу?»

14, 15. Слерди байрамла уткып турза, эмезе слерге сый берип јатса нени эдеригер?

¹⁴ Айалгалар башка-башка болуп јат. Оныҥ учун нени айдарын ла нени эдерин кажы ла катап јакшы сананар керек. Темдектезе, та кем де слерди байрамла уткыза, ол кижиге быйанысты айдарга јараар. Је ол кижи слер нениҥ  учун бу байрамды байрамдабай турганаар деп билерге турза, бойыстыҥ кӧрӱмисти куучындап берерге јараар. Јаантайын јымжак, јалакай болыгар, кижиниҥ сезимдерин ајаруга алып турыгар. Агару Бичик: «Сӧзигер јаантайын јакшылыкту ла чечен [тузап салгандый, ЈТ] болзын. Кажы ла кижиге канайып каруу јандыратанын билип јӱригер» — деп јӧп берет (Колоссыдагыларга 4:6). Темдектезе, слерге најылараарла куучындажарга ла сыйлар эдерге јарап турган деп, слер олорго јартап берер аргалу. Је бу байрамла колбой сыйлар этпей јадаар деп айдарга јараар.

¹⁵ Слерге сый берзе, нени эдеригер? Бу јанынаҥ Агару Бичикте чокум ээжилер јок, је анда айдылганыла бистиҥ уйадыс ару болор учурлу (1 Тимофейге 1:18, 19). Слерге сый берип јаткан кижи, слердиҥ кӧрӱм-шӱӱлтегер керегинде нени де билбес болордоҥ айабас. Эмезе ол: «Мен билерим сен бу байрамды ӧткӱрбей тургаҥ деп, је мен тӱҥей ле сеге сый берерге турум» — деп айдардаҥ айабас. Мындый учуралда сыйды алатан ба, јок бо деп, слер бойоор кӧрӧр аргалу. Је эҥ учурлузы — уйадыс ару болзын. Бис Иеговала колбуларысты ӱреерге кӱӱнзебей јадыс.

16. Слердиҥ биле кандый-бир байрамды ӧткӱрерге турган болзо, нени эдерге јараар?

¹⁶ Слердиҥ билегер кандый-бир байрам ӧткӱрерге турган болзо, нени эдерге јараар? Кажы ла кижи нени канайып эдерин бойы кӧрӧр аргалу деп ундыбагар. Оныҥ учун сӧс блаашпагар. Јаҥыс бойыгарды сананбай, јуук улузыгардыҥ кӧрӱмин тооп турыгар. Нениҥ учун дезе улус слердиҥ де кӧрӱмигерди тооп турзын деп кӱӱнзеп јадыгар эмей. (Матфей 7:12 кычырыгар.) Слердиҥ билегер байрамныҥ ӧйинде слерди олорло кожо болзын деп турза, канайдар? Озо ло баштап Иеговага мӱргӱп, слерге чын шӱӱлтеге келерге,  болуш сурагар. Анайда ок бу байрам керегинде ле байрам канайып ӧткӱрилери керегинде кӧптӧдӧ билип алыгар. Эҥ керектӱзин — Иегованы сӱӱндирерин ундыбагар.

17. Байрамдарды ӧткӱрбей турганаардаҥ улам балдараар кунукпазын деп, нени эдерге јараар?

¹⁷ Байрамдарды ӧткӱрбей турганыгардаҥ улам балдараар кунукпазын деп, нени эдерге јараар? Кезикте слер олорго сӱӱнчилӱ туштажулар ӧткӱрер аргалу. Эмезе олорго сакыбаган сыйлар да эдерге јараар. Је эҥ артык сый слердиҥ ӧйигер ле сӱӱжигер болор.

18. Христиан туштажуларга нениҥ учун јӱрер керек?

¹⁸ Иегованы сӱӱндирерге турган болзогор, тӧгӱн кудай јаҥнаҥ чыгып, оныла колбулу байрамдарды ла чӱм-јаҥдарды эдерин токтодор керек. Је анайда ок Кудайга чын бажырып баштаар керек. Канайып? Темдектезе, христиан туштажуларга улай ла јӱрер керек. (Еврейлерге 10:24, 25 кычырыгар.) Јуунныҥ туштажулары — Кудайга бажырарыныҥ эҥ учурлу бӧлӱги (Сарын 22:22; 122:1). Анайда ок андый туштажуларда бис бой-бойысты оморкодор аргалу (Римдегилерге 1:12).

19. Агару Бичиктеҥ билип алганаарды улуска нениҥ учун куучындаар керек?

¹⁹ Анайда ок слерге Агару Бичиктеҥ билип алганаарды улуска куучындаар керек. Кӧп улус јаманныҥ таркап калганына тыҥ санааркап јат. Слердиҥ де таныштараардыҥ кемизи де анайып санааркап турган болор. Олорго келер ӧй керегинде сӱреен јакшы ижемјини куучындагар. Христиан туштажуларга јӱрӱп, Агару Бичиктеҥ билип алганаарды улуска куучындап турзагар, бир эмеш ӧйдӧҥ тӧгӱн кудай јаҥнаҥ чек айрылар керек деп, оҥдоп ийереер. Алаҥзыбагар: Иеговага чын бажырзаар, ол слерге кӧп сӱӱнчи ле алкыштар берер! (Малахия 3:10).