1, 2. Icikiri nipenjiri ku penji makani, man pirang’o penjine pire tie tek?

NIAI m’icaku ponjo Biblia, inyang’ nia dhanu dupa giparu nia giworo Mungu, ma ke i andha, gibeponjo kunoke gibetimo lembe ma Mungu dagu. (2 Jukorinto 6:17) Pieno re ma Yehova ung’olo nia wawok kud i dini mi vupo, ma Biblia lwong’o “Babeli ma dit.” (Lembanyutha 18:2, 4) Dong’ in ke ibitimo ang’o? Ng’atuman m’ikindwa ucikere nitimo ng’iong’ic; pieno, wacikara nipenjara kumae: ‘Nyo amito niworo Mungu i ayi m’emaru awore ko, kunoke amito niwore i ayi m’abed awore ko nja?’

² Kan idaru wok kud i dini mi vupo, nwang’u itimo ber. Ento, ecicopere nia fodi asu timo kunoke kura moko mi dini mi ndra ubecikunyeng’i yor i adundeni. Dong’ wakeponj iwi timo ku kurane moko, man wanen nia pirang’o pire tie tek akeca nibedo ku nen m’urombo ku pa Yehova i wigi.

3. (a) Pirang’o dhanu moko ginwang’u nia etie tek niweko tio kud ayi gin m’acwia i thier migi? (b) Biblia uyero ang’o iwi tio kud ayi gin m’acwia pi niworo Mungu?

³ Pi oro dupa, dhanu moko gibed gitio kud ayi mi piny kunoke mi dhanu ma gikwanu nia tie leng’, pi niworo man nirwo ni Mungu. Ka in de ibed itimo kumeno, ecopo bedo iri lembe ma welo, kunoke bende lembe ma cuu ngo niworo Mungu m’umbe piny maeno. Ento, poi nia, Yehova ubeponjowa ku kite m’atira m’ukwayu wawore ko. Bende, Biblia  nyutho iwa kamaleng’ nia Yehova ubemito ngo watii kud ayi gin m’acwia ka wabewore.—Som Ai 20:4, 5; Zaburi 115:4-8; Isaya 42:8; 1 Yohana 5:21.

4. (a) Pirang’o wacikara ngo niworo tipo kwaruwa ma gidaru nitho? (b) Pirang’o Yehova ukwero dhanu pare nipimo niweco ku ju m’utho?

⁴ Dhanu moko gicopo tio ku saa ma lee man ku kero migi pi ninyayu anyong’a i kwaru migi ma gidaru nitho. Gicopo bende niworogi. Ento wadaru niponjo nia ju m’utho gicopo konyowa ngo man gicopo timowa rac de ngo. Gibekwo ngo kaka moko. I andha, etie rac nipimo niweco kugi, pilembe wec ceke m’unen nia uai kud ibang’ wat mwa ma gidaru nitho, tie wec m’uai kud ibang’ pajogi. Pi thelembe maeno re ma Yehova ung’olo ni nyithindho mir Israel nia kud gipim apima de niweco ku ju m’utho, kunoke nidikiri i kite moko ci mi weco ku pajogi.—Poi mi Cik 18:10-12; som Thenge ma jumedo, namba 26 ku 31.

5. Ang’o ma bikonyi niweko tio kud ayi gin m’acwia pi niworo Mungu man niweko woro tipo kwaru peri ma gidaru nitho?

⁵ Ang’o ma bikonyi kara iwek nitio kud ayi gin m’acwia pi niworo Mungu, kunoke kara iwek niworo tipo kwaru peri ma gidaru nitho? Icikiri nisomo Biblia man niparu cuu mandha iwi kite ma Yehova neno ko lembe maeno. Enenogi ni “Ginmajudagu,” kunoke ni gin marac. (Poi mi Cik 27:15) Rwo ibang’ Yehova kubang’ ceng’, nia ekonyi nineno lembe kite m’eneno, man ekonyi niwore i ayi m’emito. (Isaya 55:9) Kan itimo kumeno, icopo bedo mbe ku jiji nia Yehova bimio iri tego m’itie ku yenyne, kara ikoyiri cen ku gin moko ci ma tie ku ribiri ku dini mandha ngo.

6. Pirang’o jung’io nia nindo 25 mi dwi mir 12 re m’ubed nindo mi timo foc mi nyoliri pa Yesu?

⁶ I ng’om zoo, Noeli tie ceng’ madit acel ikind ceng’ ma dongo ma pigi yik akeca, man dhanu dupa giparu nia etie foc mi nyoliri pa Yesu. Ento i andha, Noeli tie ku ribiri  ku dini mi vupo. Buku moko ukoro nia nindo 25 mi dwi mir 12 tie nindo ma jukafiri mi Roma gibed gitimo i ie foc mi nyoliri pa ceng’. Judong dini gigam gimito nia jukafiri dupa gidok Jukristu, pieno, ginwang’u nia ukwayu gicak nitimo foc mi nyoliri pa Yesu nindo 25 mi dwi mir 12, kadok i andha enyolere ngo i nindo maeno de. (Luka 2:8-12) Julub pa Yesu gibed gitimo ngo foc mi Noeli. Buku moko (Sacred Origins of Profound Things) ukoro nia, pi oro 200 ing’ei nyoliri pa Yesu, “ng’atu moko acel de mbe m’ugam ung’eyo nindo m’enyolere i ie, man dhanu mapol gibed gidieng’ ungo pi nindone.” Jucaku timo foc mi Noeli oro dupa ing’ei ma Yesu ukwo i ng’om.

7. Pirang’o Jukristu mandha gitimo ngo foc mi Noeli?

⁷ Dhanu dupa ging’eyo nia jukafiri re m’ucaku the Noeli, ku lembe ma tung’ tung’ ma jubed jutimo i nindone, calu ve, timo foc (fête) man mio giramia. Ku lapor, saa moko, jugam jukwero timo foc mi Noeli i ng’om mir Angleterre ku theng ng’om moko mir Amerika, pilembe jukafiri re m’ucaku there. Jubed jumio matira ni ng’atu moko ci m’utimo foc mi Noeli. Ento ing’eye, dhanu gidok gicaku nitimo foc mi Noeli kendo. Pirang’o Jukristu mandha gitimo ngo foc mi Noeli? Pilembe gimito ginyai mutoro i Mungu i lembe ceke ma gibetimo.

8, 9. Pirang’o Jukristu ma kwong’a gibed gitimo ngo foc moko ci mi nindo mi nyoliri?

⁸ Foc mange ma dhanu mapol gibed gitimo tin, tie foc mi nindo mi nyoliri migi. Nyo Jukristu gicikiri nitimo foc mi nindo mi nyoliri? Foc ceke mi nindo mi nyoliri ma juweco pigi i Biblia ubino foc ma dhanu ma woro ngo Yehova re ma gitimo. (Thangambere 40:20; Marko 6:21) Con, jubed jutimo foc mi nindo mi nyoliri pi niyungo mungu m’araga. Pieno re ma Jukristu ma kwong’a “gibed gineno  foc moko ci mi nindo mi nyoliri ni lembe mi jukafiri.”—The World Book Encyclopedia.

⁹ Juroma ku Jugiriki ma con giyio nia, i saa mi nyoliri pa ng’atuman, tipo moko bebedo tie, man nia tipo maeno konyo ng’atu m’unyolerene i kwo pare ceke.” Buku moko (The Lore of Birthdays) ukoro nia, “Tipo maeno ubino ku ribiri moko m’ukadhu copo mi dhanu, karacelo ku mungu ma nindo pare mi nyoliri urombo ku pa ng’atu m’unyolere.”

10. Pirang’o tin Jukristu gitimo ngo foc mi nyoliri?

¹⁰ Nyo ibeparu nia Yehova copo jolo foc moko ma tie ku ribiri ku dini mi vupo? (Isaya 65:11, 12) Ungo, Yehova copo jolo ngo. Pi thelembe maeno re ma watimo ngo foc mi nindo mi nyoliri, kunoke ceng’ madit moko ci ma tie ku ribiri ku dini mi vupo.

11. Pirang’o dhanu moko gitimo foc mi ceng’ ma dongo? Ang’o m’ucikere nibedo gin ma pire tek akeca iri?

¹¹ Dhanu moko ging’eyo nia jukafiri re m’ucaku the foc mi Noeli ku foc mange mi ceng’ ma dongo, re gimediri asu nitimo focnegi. Giparu nia ceng’ ma dongo utie kende kende saa maber ma ginambu i ie ku juruot kunoke wat migi. Nyo in de ibed iparu kumeno? Etie rac ungo nimaru ninambu ku wat peri. Yehova re m’ucaku the kwo mi juruot, man emaru nia wabed ku winjiri maber ku wat mwa. (Juefeso 3:14, 15) Re, ukwayu waketh wiwa kilili iwi bedo ku winjiri maber ku Yehova, kakare nisayu ninyayu mutoro i wat mwa, ma wadikara ko kugi i foc mi ceng’ ma dongo mi dini mi ndra. Pieno, jakwenda Paulo uwacu nia, wamedara nitimo lembe “ma nyayu mutoro i Rwoth.”—Juefeso 5:10.

12. Ang’o ma copo ketho Yehova maru ngo foc mi ceng’ madit?

¹² Dhanu mapol giparu nia pire tie tek ungo nisayu  ning’eyo kite ma ceng’ madit moko ucaku ko, ento Yehova paru ngo kumeno. Emaru ngo foc mi ceng’ ma dongo m’uai kud i dini mi vupo, kunoke foc ma yungo dhanu, kunoke bende ma yungo ayi moko mi ng’om. Ku lapor, Jumisiri gibed gitimo foc dupa ni mungu migi m’araga. Ing’ei ma nyithindho mir Israel giweko Misiri, gitimo foc acel ma gimaku ibang’ Jumisiri, e gilwong’o focne “agba ni Yehova.” Ento Yehova umio igi matira pi foc maeno. (Ai 32:2-10) Calu ma jabila Isaya uyero, wacikara ngo ‘nimulo gin m’ucido.’—Som Isaya 52:11.

13. Icopo penjiri ku penji makani kan ibemaku yub mi weko nitimo foc mi ceng’ ma dongo?

¹³ Kan ibemaku yub mi weko nitimo foc mi ceng’ ma dongo, icopo penjiri ku penji dupa. Ku lapor, icopo penjiri kumae: Acopo timo ang’o ka jurutic wada upenja nia pirang’o adikara ngo kugi i timo foc mi Noeli? Acopo timo ang’o ka ng’atu moko umio ira giramia pi foc mi Noeli? Acopo timo ang’o ka jadhoga mi gamiri umito nia atim foc mi ceng’ madit? Acopo konyo nyathin para nenedi kara kud ebed ku can i cwinye pilembe wabetimo ngo foc mi ceng’ madit kunoke foc mi nindo mi nyoliri?

14, 15. Icopo timo ang’o ka ng’atu moko wacu iri nia, wafoyo ceng’ madit (kunoke, bonne fête), kunoke kan emio iri giramia moko pi ceng’ madit?

¹⁴ Pire tie tek nia watii ku riekowang’ ka wabeng’io lembe ma wacopo niyero man nitimo saa ma lembe moko uwok. Ku lapor, ka ng’atu moko wacu iri nia, wafoyo ceng’ madit (kunoke, bonne fête), kud icaye. Icopo yero ire kende kende, “Afoyo.” Ento, ka ng’atu moko umito eng’ei lee iwi thelembe m’uketho itimo ngo foc mi ceng’ madit, icopo koro ire thelembene. Re, tii ku wec maber, bed ku riekowang’, man ku woro. Biblia uwacu kumae: “Wek wec mu bed ku bero thiri thiri, ma kadu rome, kara wung’ei maram  wulok ko lembe ni dhanu kubang’gi kubang’gi.” (Jukolosai 4:6) Ku lapor, icopo yero ire nia ibed imaru ninambu ku dhanu mange man nimio giramia, ento ibed imaru nitimo kumeno i nindo mange m’uweko nindo maeno ma dongo.

¹⁵ Icopo timo ang’o ka ng’atini umio iri giramia moko i ceng’ madit? Biblia urieyo ngo cik ceke m’ukwayu walubi, ento ewacu nia wacikara nigwoko pidocwiny mwa ubed cuu. (1 Timoteo 1:18, 19) Saa moko nyo ng’atu m’umio iri giramia ung’eyo ngo nia itimo ngo foc mi ceng’ madit. Kunoke ecopo yero kumae: “Ang’eyo nia itimo ngo foc mi ceng’ madit, ento amito amii iri giramia mae.” I lembe ario maeno zoo, icopo ning’io ka nyo ibigamu giramia maeno kunoke ngo. Re i yub moko ci ma ibemaku, tim kero nidong’ asu ku pidocwiny m’atira. Wabikwero nitimo lembe moko ci ma copo nyotho winjiri mwa ku Yehova.

16. Icopo timo ang’o ka wat peri ma ceng’ni gimito timo foc mi ceng’ madit?

¹⁶ Icopo timo ang’o ka wat peri ma ceng’ni gimito timo foc mi ceng’ madit? Icikiri ngo niloko dhogi kugi iwi lembe maeno. Poi nia gitie ku twero mi ng’io lembe ma gimito nitimo. Bed ber kugi man wor ng’iong’ic migi, tap calu m’imito gin de giwor ko ng’iong’ic peri. (Som Matayo 7:12.) Ento, ka juruot peri gimito nia inamb kugi saa mi foc mi ceng’ madit, icopo timo ango? Iwang’ ning’iyo gin m’ukwayu itim, lar irwo ibang’ Yehova kara ekonyi nimaku yub m’atira. Par cuu iwi lembene, man sai lembe i buku ma tung’ tung’ mi Jumulembe pa Yehova. Poi nia saa ceke ukwayu inyai mutoro i Yehova.

17. Icopo timo ang’o pi nikonyo awiya peri kud gipar nia lembe moko ubekosogi, kinde ma jumange gibetimo foc mi ceng’ ma dongo?

¹⁷ Icopo timo ang’o pi nikonyo awiya peri ka gineno nia jumange betimo foc mi ceng’ ma dongo? Wang’ acel acel  icopo pangu nitimo nambu kunoke foc moko ma segi pigi. Icopo bende nimio igi giramia rek, m’umbe nilar nyutho igi. Ento, giramia m’uloyo mange ceke m’icopo mio ni awiya peri, tie ninyutho igi mer man ninwang’u saa mi bedo kugi karacelo.

18. Pirang’o wacikara nicokara i coko ma tung’ tung’ mi Jumulembe pa Yehova?

¹⁸ Kara wanyai mutoro i Yehova, wacikara niweko dini mi vupo, ku lembe m’i ie ceke man bende foc mi ceng’ ma dongo ma tie ku ribiri ku dinine. Wacikara bende niwore i yo m’atira. Nenedi? Lembe acel ma wacikara nitimo utie nicidho nja i coko ma tung’ tung’ mi Jumulembe pa Yehova. (Som Juebrania 10:24, 25.) Coko tie kite acel ma pire tek ma junyutho ko nia jubeworo Mungu i yo m’atira. (Zaburi 22:22; 122:1) Wacopo niketho cwinywa i kindwa ka wacokara karacelo.—Jurumi 1:12.

19. Pirang’o etie lembe ma pire tek ninyutho ni dhanu mange pi lemandha m’idaru niponjo?

¹⁹ Lembe mange ma wacikara nitimo pi ninyutho nia wabeworo Mungu i yo m’atira tie nikoro pi lembe ma wadaru niponjo i Biblia ni jumange. Lembe mareco m’ubetimere iwi ng’om ubenyayu can i dhanu mapol. (Ezekiel 9:4) Saa moko nyo ing’eyo dhanu moko ma ginwang’iri i peko ma kumeno. Kor igi pi genogen peri maber akeca mi nindo m’ubino. Kan ibemediri nicidho i coko ma tung’ tung’ mi Jumulembe pa Yehova man ibenyutho lemandha mi Biblia ni jumange, ibinwang’u nia ava dikiri ku dini mi vupo man ku lembe moko ci ma tie ku ribiri ku dinine uai kud i kumi. Kan itimo kumeno, icopo bedo mbe ku jiji nia ibibedo kud anyong’a, man nia Yehova bimio mugisa ma lee iwi kero m’ibetimo, pilembe ibeng’io niwore i yo m’atira.—Malaki 3:10.