1. ¿Chem ramtuwafuiñ? ¿Chumngelu (chemu) fente falin-ngey femal tüfa?

FENTREN che feypikey ñi poyekefiel ta Chaw Ngünechen, welu kimeltukeyngün ka femkeyngün Kidu ñi üdekeel. Eymi kimimi tüfa tami chillkatufiel Biblia (2 Korintio 6:⁠17). Feymu Jewba feypikeeiñmu taiñ tripayal koylake religion mu, ‘Tati Fütra Babilonia’ pingelu (Apokalipsi 18:⁠2, 4). Eymi, ¿chumaymi kay? Kiduke iñchiñ dulliafuiñ taiñ chumal, fey ramtuwafuiñ: “¿Chumngechi poyeafiñ ta Chaw Ngünechen? ¿Inayafiñ kidu ñi ayükeel kam iñche ñi ayükeel müten?”

2. Tüfachi chillkatun mu, ¿chem inaduamaiñ?

² Elkünufilmi koyla religion kam feypikünulmi tami koneltulewenoal, sakifalimi. Welu, ¿petu ayünieymi kiñeke wimtun kam fiesta ñi nieel koylake religion? Kiñeke tüfa inaduamaiñ tüfachi chillkatun mu. Fey kimaiñ chem rakiduamkey Jewba, ka chumngelu fente falin-ngey taiñ rakiduamal kidu reke.

3. 1) Kiñeke che, ¿chumngelu küdawtukey ñi niewenoal fillke adentun ñi poyeafiel ta Chaw Ngünechen? 2) ¿Kümey taiñ poyeafiel adentun ñi fülkonal Ngünechen mu? ¿Chem feypiley Biblia?

³ Kiñeke che wimtuley ñi nieel rewe, che mamüll, ka kakelu adentun kam pichike altar ñi poyeafiel ta Chaw Ngünechen. Eymi, ¿ka femngechi femkeymi? Niewenolmi tüfa, weda duamnagafuymi kam ‘kümelay’ piafuymi. Welu longkontukunge: Jewba feypikünueiñmu chumngechi taiñ serfiafiel. Kidu ayükelay taiñ poyeafiel  adentun mu. Biblia feypi: “Ngelay tami dewmayafiel kiñe adentun no rume, adentukelayafimi chem dungu no rume mülelu wenu mapu mu, nag Mapu mu, ka ti ko mew mülelu miñche mapu mu. Ngelay tami lukutual tüfa ñi adkiñ mew, ka rulpaduamngelayaymi tami poyeafiel kütu. Iñche ta Jewba tami Ngünechen, tati Ngünechen feypikefilu tati pu che ‘iñche müten tañi poyeniengeal’, ka tati kastigakefilu tati pu che tañi chaw ñi kulpan mu, tati külangechi küpan mu ka tati melingechi küpan mu tañi pu üdekeetew” (Éxodo 20:⁠4, 5; Salmo 115:⁠4-8; Isaías 42:⁠8; 1 Juan 5:⁠21).

4. 1) ¿Chumkey fentren che ñi kümelkaleal? 2) Tüfa, ¿chumngelu kuñiwün-ngey?

⁴ Pu che ayükey ñi kümelkaleal. Feymu fente ayükey ñi konal mapuche ngillatun mu. Femkeyngün tüfa ñi müleal mawün, nieal kümeke kosecha, tañi tremoleal ka tañi mañumtuafiel ta Chaw Ngünechen, pikeyngün. Ngillatuwe mu femngekey fillke dungu ñi poyengeal ta Ngünechen, welu Chaw Dios ayükelafi. Kiñe tüfa, ñi mülen ta rewe ka kürus. Kafey ngillatun mu pu che rakiduamkey ñi fülkonmeken Chaw Dios mu. Welu kuñiwün-ngey, rüf fülkonmekeyngün pu weküfü mu. Kiñe tüfa, küymilu kam konpüllülu ti machi. Longkontukunge: Satana ka pu weküfü küpa ngünenkakefi pu che. Feymu kümeke püllü reke femfaluwkeyngün (2 Korintio 11:⁠14). ‘Mapuche ngillatun kellukeenew’, piafuymi. Welu femngechi rakiduamelkeeiñmu pu weküfü taiñ püntünentuaetew taiñ Wenu Chaw mu. Feymu Jewba feypifi pu israelche ñi fülkon-noal pu wedake püllü mu (Deuteronomio 18:⁠10-12; inaduamnge ti kimelün dungu 24 ka kimelün dungu 29).

5. Tami poyewenoafiel fillke adentun kam konwenoal mapuche ngillatun mu, ¿chem kelluaeymu?

⁵ Tami poyewenoafiel fillke adentun kam konwenoal mapuche ngillatun mu, ¿chem kelluaeymu? Chillkatufinge Biblia. Ka küme rakiduamnge tüfa: Jewba ünukefi kom  tüfachi dungu (Deuteronomio 27:⁠15). Fill antü ngillatufinge ta Jewba. Fey kelluaeymu tami rakiduamal kidu reke, ka tami küme poyeafiel chumngechi ayükey ta Kidu (Isaías 55:⁠9). Tami Fütra Chaw newentukuaeymu, femngechi famentuaymi chem rume nüwkülele koylake religion mu.

6. ¿Chumngelu elkünungey ñi akordangeal Jesus ñi choyüngen 25 diciembre mu?

⁶ Wall Mapu fentren che konkey Navidad mu. ‘Femngechi akordakefiyiñ Jesus ñi choyüngen’ pikey epe kom che. Welu Navidad nüwküley koylake religion mu. ¿Chumngechi kimnieiñ tüfa? Kiñe falin lifru feypi chumkefuy pu romache poyekefilu ta koylake dios: 25 konchi diciembre akordakefuyngün ñi wiñotun ta antü, we tripantu reke. Pu longkolelu ti Iglesia mu ayükefuy pu serfikefilu ta koylake dios ñi kristianongetual. Feymu elkünuyngün ñi akordangeal Jesus ñi choyüngen 25 konchi diciembre mu. Welu Jesus choyüngelay feychi antü (Luka 2:⁠8-12). Feymu pu inakefilu ta Jesus konkelafuyngün Navidad mu. Kafey 200 tripantu rupalu Jesus ñi choyüngen mu, iney no rume kimlafuy chem antü ñi choyüngen Jesus, ka epe kom che duamkülelafuy ñi kimal. Femngechi feypi kangelu lifru (Los orígenes sagrados de las cosas profundas). Dewma rupalu doy 300 tripantu Jesus ñi choyüngen, pu che eluwi ñi fiestañmayal Navidad.

7. Pu rüfngechi kristiano, ¿chumngelu koneltukelaiñ Navidad mu?

⁷ Feley llemay, Navidad nüwküley koylake religion mu. Ka femngechi fillke wimtun ñi nieel. Kiñeke tüfa: trawüluwal ñi ikünual kam welukentu eluwal yewün (regalo). Fentren che kimniey tüfa. Feymu Inglaterra mu ka kiñeke mapu Norteamerica mu elungekelafuy ñi konal Navidad mu. ¿Chumngelu? ‘Koylake religion tuwi’ pikefuyngün. Pu konkelu kastigangekefuy. Welu rupalu chi tripantu, pu che ka eluwtuy ñi konal tüfa mu. Welu pu rüfngechi kristiano koneltukelaiñ Navidad mu. ¿Chumngelu? Kom taiñ femken mu, küpa ayüwelkefiyiñ ta Chaw Dios.

8, 9. Pu kuyfike kristiano, ¿chumngelu koneltukelafuy puwültripantun mu?

⁸ Kafey fentren che fiestañmakey puwül-lu tripantu kiñe che, cumpleaño pingey. Pu rüf kristiano, ¿ka femafuiñ tüfa? Biblia pengeli epu che fiestañmalu ñi puwültripantun, welu mür poyekelafuyngu ta Jewba (Génesis 40:⁠20; Marku 6:⁠21). Kuyfi mu, ñi fiestañmayal kiñe che ñi puwültripantun, poyengekefuy koylake dios. Feymu pu kuyfike kristiano rakiduamkefuyngün ‘koylake religion mu tuwi tüfa’ (The World Book Encyclopedia). Feychi dungu mu pu kuyfike kristiano koneltukelafuy puwültripantun mu.

⁹ Kuyfi mu, pu romache ka greciache rakiduamkefuy ‘feychi antü choyüngelu kiñe che, fey puwültripantukefuy kiñe dios’, pikefuyngün. Ka feypikefuyngün pu che ñi fiestañmayal tañi puwültripantun, femngechi ñi kuydayaetew feychi dios kom ñi mongen mu.

10. Pu rüf kristiano, ¿chumngelu fiestakelaiñ ti puwültripantun?

¹⁰ Chaw Jewba ¿ayükey kiñe fiesta nüwkülelu koylake religion mu? ¿Chem pimi kay? (2 Korintio 6:⁠14, 15). Femkelay llemay. Feymu pu rüf kristiano fiestakelaiñ ti puwültripantun ka chem no rume nüwkülelu koylake religion mu.

11. 1) Kiñeke che, ¿chumngelu fentekünukelay ñi konal kiñeke fiesta mu? 2) Pu kristiano, ¿chem doy falintukefiyiñ?

¹¹ Fentren che kimniey Navidad ka kakelu fiesta tuwi koylake religion mu. Welu kiñeke che fentekünukelay ñi fiestayal. ‘Femngechi ñi küme rupayal taiñ pu che iñchiñ’ pikeyngün. Eymi kay, ¿ka femngechi rakiduamkeymi? Kom iñchiñ ayükeiñ küme rupayal taiñ pu che iñchiñ, tüfa ta kümey. Jewba elkünuy ti familia, ka ayüniey taiñ küme yeniewal. Iñchiñ ka ayükeiñ tüfa. Welu konlayaiñ feychi  fiesta mu nüwkülelu koylake religion mu. Pu kristiano doy falintukefiyiñ taiñ weniyeafiel ta Jewba. Feymu apostol Pablo feypi: “Küme ngüneduamniemün Ñidol ñi tutekeetewchi dungu” (Efesio 5:⁠10, TNM).

12. ¿Chem fiesta ayükelay ta Jewba?

¹² Fentren che rakiduamkey: ‘Chem tuwün niepe rume ti fiesta, weda dungu no’. Welu Chaw Jewba femngechi rakiduamkelay. Kiñe fiesta nüwkülelu koylake religion mu kam püramyefilu kiñe che kam kiñe pais, Jewba ayükelay tüfa. Rakiduamnge: pu egiptoche femkefuy fillke fiesta ñi püramyeafiel tañi koylake dios. Fey pu israelche tripalu Egipto mu, femingün kiñe fiesta pu egiptoche reke. ‘Tüfa kiñe fiesta Jewba ngealu’, pingün. Welu Jewba ayülafi, feymu kastigaeyew engün (Éxodo 32:⁠2-10). Feymu llemay, iñchiñ femkeiñ Isaia ñi feypiel: “¡Püntütripamün, püntütripamün, tripamün tüfa mew, nükefilmün chem podngechi dungu no rume! Tamün rangiñkülen mu tripamün tüfa mew, lifkülemün, eymün tati pu yeniekelu Jewba tañi fillke chemkün” (Isaías 52:⁠11).

13. Koneltuwenolmi wedake fiesta mu, ¿chem ramtuwafuymi?

¹³ Koneltuwenolmi wedake fiesta mu, fentren dungu ramtuwafuymi. Kiñeke tüfa: “Tañi pu chaf küdawfe ramtuelimew chumngelu ñi koneltukenon Navidad mu, ¿chem wiñoldunguafuiñ? Elungeli yewün Navidad mu, ¿chumafun? Tañi afkadi ayüfule tayu konal kiñe fiesta Jewba ñi ayükenoel, ¿ka chumafun? Konkenolu Navidad kam kangelu fiesta, ¿chumngechi kelluafun tañi pu pichikeche ñi weda duamnoal?”.

14. ‘Feliz Navidad’ kam ‘Feliz Año Nuevo’ feypingelmi, ¿chumafuymi?

¹⁴ Tami kimal chem femal kam chem feypial, duamfali küme rakiduamal. Ngüneduamnge tüfa: ‘Feliz Navidad’ kam ‘Feliz Año Nuevo’ feypielmu kiñe che, illamkalayafimi. ‘Mañumeyu’ piafuymi müten. Ka doy küpa kimle,  feypiafuymi chumngelu tami koneltukenon feychi fiesta mu. Nütramkafilmi, piwkeyen mu ka yamün mew entuaymi tami dungun. Weda duamel-layafimi. Longkontukunge Biblia ñi feypin: ‘Tamün nütramyekeelchi dungu ñi ayüfal nütramngeael ka ñi falin kümeke dunguael, ka müley tamün kimael chumngechi tamün küme wiñoldunguafiel tati pu che’ (Kolosense 4:⁠6). Kafey feypiafuymi: ‘Ayüken ñi küme rupaleal ka wülal yewün, welu femkelan feychi fiesta mew’.

15. Elungelmi kiñe yewün, ¿chumafuymi kay?

¹⁵ Kiñe che eluelmu kiñe yewün, ¿chumafuymi kay? Biblia feypilay chem taiñ dullial. Welu feypieiñmu taiñ nieal lif rakiduam Ngünechen tañi adkiñ mew (Hecho 24:⁠16). Feychi che, ¿kimniey tami konkenon feychi fiesta mu? Kimlayafuy. Kam feypiafeymu: “Kimnien tami konkenon, welu küpa elueyu tüfachi yewün”. Chem rupale rume, eymi müten dulliaymi tami llowafiel kam llownoafiel. Welu chem dullilmi rume, kuñiwtukuwnge. Küme dullinolmi, niewetulayafuymi lif rakiduam Ngünechen ñi adkiñ mew, ka küme weniyerpulayafuymi ta Chaw Jewba. Welu iñchiñ ayükelaiñ ñi femngechi dungu rupayal.

16. Tami pu che küpa konle kiñe fiesta koylake religion mu nüwkülelu, ¿chumafuymi?

¹⁶ Tami pu che küpa konle kiñe fiesta koylake religion mu nüwkülelu, ¿chumafuymi? Yafkawlayaymün. Longkontukunienge, ka elungey engün ñi kidu dullial chem tañi femal. Feymu piwkeyen mu dungufinge ka yamniefinge ñi dulliel engün. Eymi ka ayükeymi tami yamniengeal (papeltunge Matew 7:⁠12). Welu feypielmu engün: ‘Küpange tüfachi fiesta mu taiñ küme rupaleal’, ¿chumafuymi kay? Petu tami dullinon, ngillatufinge ta Jewba tami kelluaetew. Ngüneduamnge: ‘¿Chem rakiduamkey Jewba feychi fiesta mu?’. Ka chillkatunge fillke papel Biblia mu küpalu kam kakelu lifru pengelkelu chew tuwi feychi  fiesta. Ngoymalayaymi tüfa: eymi küpa ayüwelkefimi tami Fütra Chaw Jewba.

17. Eymi ka tami pu pichikeche konwenolmün wedake fiesta mu, ¿chumafuymi ñi weda duamnoal engün?

¹⁷ Eymi ka tami pu pichikeche konwenolmün feychi fiesta mu, weda duamnagafuy engün. Feymu, ¿chumafuymi? Kiñeke mu elkünuafuymi kiñe antü tamün küme rupaleal. Chem antü mu rume eluafuymi kiñeke yewün. Welu doyelchi may, piwkeyefinge ka elantükünunge tamün kiñentrür müleal. Tüfa ta doy küme yewün.

18. ¿Chumngelu falin-ngey taiñ trawüluwal?

¹⁸ Küpa ayüwelfiliyiñ ta Chaw Jewba, duamfali elkünungeal koylake religion, ka fillke wimtun ka fiesta nüwkülelu tüfa mu. Welu ka duamfali inayafiel ti rüf religion. ¿Chumngechi? Tüfa kiñe dungu tami femal: amunge pu Dungukelu Iney Ngen Jewba ñi trawün mu (papeltunge Ebrew 10:⁠24, 25). Taiñ rüf serfiafiel ta Jewba, müna falin-ngey taiñ trawüluwal (Salmo 22:⁠22; 122:⁠1). Trawün mu welukonkechi yafüluwkeiñ (Romanu 1:⁠12).

19. ¿Chumngelu falin-ngey tami nütramkayafiel pu che Biblia ñi dungu?

¹⁹ Fewla fillke dungu kimürpuymi Biblia mu. Nütramkayafuymi tüfa tati pu che. Tüfa ka duamfali tami femal, femngechi inayafimi ti rüf religion. Mapu mu ruparupangey wedake dungu, feymu fentren che weda duamnagkey. Eymi kimniepelaymi femngechi che. Feymu nütramkayafuymi engün chem maneluwün nieymi. Doy amulmi trawün mu, ka doy nütramkafilmi pu che Biblia ñi dungu, fey küpa konwelayaymi koyla religion mu ka tañi wedake wimtun. Feymu maneluwkülenge. Yafüluwülmi tami serfiafiel ta Ngünechen chumngechi ayükey ta kidu, ayüwküleaymi ka tami Chaw Jewba kümelkayaeymu (Malaquías 3:⁠10).