1, 2. ¿Kunanaksa jisktʼasiñama, kunatsa ukanak jisktʼasiñajj wakisejja?

 DIOSARUW adorapjjta jan ukajj yupaychapjjta sasin waljaniw sapjje, ukampis kuntï Diosajj uñiski ukanakwa lurapjje yatichapjjaraki, ukwa jichhakamajj Bibliat yateqtanjja (2 Corintios 6:17). Ukatwa Diosajj ‘Jachʼa Babiloniata’, mä arunjja kʼari religionanakat mistjjapjjam sasin sistu (Apocalipsis 18:2, 4). ¿Kunsa jumajj luräta? Sapa mayniw kunsa lurañäni uk amtjjañasa. Ukhamasti akham jisktʼasiñasawa: “¿Diosarojj kunjamtï jupajj munki ukhamti adorañ muntjja? Jan ukajj ¿kunjamtï nayratpach adorkayäta ukhamcha adorañ munaskaktjja?” sasa.

² Jumatï kʼari religión jaytanukjjsta, jan ukajj renunciañatak mä carta jaytjjaraksta ukhajja, walik ukham lurtajja. Ukampis inas chuymamanjja kʼari religionanakan costumbrenakap lurañ munaskaksta. Uka costumbrenakat jichhajj mä qhawqha yatjjatañäni, ukatjja kunatsa uka costumbrenakarojj kunjamtï Jehová Diosajj uñjki ukham uñjañasaraki uk yateqarakiñäni.

3. 1) ¿Kunatsa yaqhepatakejj idolonak jaytañajj chʼamakïspa? 2) ¿Idolonakampi Diosar adorañat Bibliajj kamsisa?

³ Yaqhep jaqenakajja idolonakaruw adorapjje jan ukajj altaranakwa utanakapan lurasipjje, walja maranakaw Diosarojj ukanakamp adorapjje. Jumatï ukham lurstajja, Diosar ukanakampi jan adorañajj mayjäspawa, janiw walïkiti sasaw amuyarakisma. Ukampis ak amtañamawa, Jehová Diosaw kunjamsa jupar adorañasa uk yatichistu.  Jupajj janipuniw idolonakampi adorañas munkiti, Bibliajj uk sum qhanañchistu (Éxodo 20:4, 5 liytʼañataki; Salmo 115:4-8; Isaías 42:8; 1 Juan 5:21).

4. 1) ¿Kunatsa jiwatanakatakejj jan rezañasäki? 2) Jiwatanakamp jan parlapjjamti sasin ¿kunatsa Jehová Diosajj israelitanakar säna?

⁴ Yaqhepanakajj jiwat familiaranakapan walikïsipkañapatakejj kunayman costumbrenak lurapjje, ukhamatwa tiempsa aptʼasipjje, chʼamsa tukupjjaraki. Amuytʼañataki, Diosaruw jiwatanakatak rezarapipjje jan ukajj orarapipjje. Yaqhepasti kunatï jiwatanakaru gustkäna ukanak lurapjjaraki, jan ukajj yanaptʼa mayisipjjaraki. Ukampis kunjamtï Biblian yateqktanjja, jiwatanakajj janiw yanapkistaspati ni jan walinaksa lurapkistaspati, janirakiw yaqha cheqansa jakapkiti. Jiwatanakampi parlañajj janipuniw walïkiti. Jupanakamp parlañ munasajj inas arunakap istʼsna, ukampis demonionakan arupakïspawa. Ukatwa Jehová Diosajj israelitanakar janipun jiwatanakamp parlapjjamti ni chʼamakaninakarus sarapjjamti sasin säna (Deuteronomio 18:10-12; 26, 31 qhanañchäwinak uñjjattʼäta).

5. ¿Kunas Jehová Diosar idolonakampi jan adorañatakisa, jiwatanakar jan adorañatakis yanaptʼiristam?

⁵ Jehová Diosar idolonakampi jan adorañatakisa, jiwatanakar jan adorañatakisa, ¿kunas yanaptʼiristam? Biblia liyiñaw yanaptʼiristam, liykasinjja kunjamsa Diosajj ukanakar uñji ukwa amuytʼañama. Juparojja idolonakampi adorañasa, jiwatanakar adorañasa “ajjtasiyiwa” (Deuteronomio 27:15). Maysa toqetjja, kunjamtï Jehová Diosajj jan walinakar uñjki ukham uñjañatakejj sapüruw yanaptʼa mayisiñama. Kunjamtï munki ukham adorañatakis mayisiñamarakiwa (Isaías 55:9). Kʼari religionan uñstayat costumbrenak armañatakejja Jehová Diosaw yanaptʼätam, ukjjat janipun pächasimti.

6. ¿Kunatsa Jesusan nasïwipajj 25 de diciembre urun amtasi?

⁶ Navidadajj wali uñtʼatawa. Jesusan nasïwipsa amtapkaspa ukhamwa jila parte jaqenakajj amuyapjje. Ukampis ukajj janiw cheqäkiti, Navidadajj kʼari religionanakan uñstayatawa. Mä librojja, 25 de diciembre urunwa Diosar jan adoriri romanonakajj intin mistunitap uruyapjjerïna sasaw qhanañchi. Jesusajj janis 25 de diciembre urun naskchïnjja, Iglesia pʼeqtʼirinakaw Diosar jan adorir jaqenakan cristianöpjjañap munapjjäna, ukatwa uka urojj Jesusan nasïwip amtañ qalltapjjäna (Lucas 2:8-12). Ukampis Jesusan arkirinakapajj janiw Navidad amtapkänti. Los orígenes sagrados de las cosas profundas librojj siwa: “Jesusajj naskäna ukhat pä patak maranak qhepatjja, janiw khitis Jesusan nasïwipat yatkänti ni kunapachas nasïna uksa yatiñ munapkarakïnti” sasa. Navidadajja, Jesusajj aka oraqenkkäna ukhat walja maranak qhepatwa uñstaskäna.

7. ¿Kunatsa cristianonakajj Navidad jan amtapki?

⁷ Navidadan regalonak churasiñasa, ukan fiestanak lurañasa, Diosar jan servir jaqenakan uñstayatätap waljaniw yatipjje. Ukatwa Inglaterra markansa Norteamérica toqenkir yaqhep markanakansa, Navidad amtañajj mä tiempojj wali jarkʼatäna. Navidad amtir jaqenakajj castigatäpjjänwa. Ukampis tiempompejja, wasitampiw amtañ qalltapjjäna. ¿Kunatsa cheqpach cristianonakajj Navidad jan amtapki? Jupanakajj taqe kunanwa Jehová Diosar istʼañ munapjje.

8, 9. ¿Kunatsa nayrïr cristianonakajj cumpleañonak jan amtapkäna?

⁸ Niya taqe jaqenakaw cumpleaño amtapjje. ¿Cristianonakajj amtapjjañaparakiti? Biblianjja, pä cheqanakwa cumpleañonakat parli, amtapkäna uka jaqenakajj janiw Jehová Diosar servipkänti (Génesis 40:20; Marcos 6:21). Cumpleañonakajj kʼari diosanakar jachʼañchañatakiw  amtasirïna. Ukatwa nayrïr cristianonakajj “Diosar jan serviri jaqenakan uñstayatätap laykojj cumpleañonak jan amtapkänti” (The World Book Encyclopedia).

⁹ Nayra tiempon jakiri romanonakasa griegonakasa, jarkʼaqer espiritunïtanwa, maynejj naski ukhaw uka espiritojj ukanki, jakäwinsa yanaptʼasirakiwa sasaw amuyapjjerïna. Mä librosti akham sarakiwa: “Uka espiritusti mä diosampi mayachatänwa, uka diosajja mara phoqer jaqen urupanwa mara phoqarakïna” sasa (The Lore of Birthdays [La tradición de los cumpleaños]).

10. ¿Kunatsa cristianonakajj cumpleañonak jan amtapjjañapäki?

¹⁰ Kʼari religionan uñstayat fiestanakarojja, ¿kunjamsa Jehová Diosajj uñji? (Isaías 65:11, 12). Jehová Diosatakejj uka fiestanakajj janiw walïkiti. Ukatwa cristianonakajj kʼari religionan uñstayat cumpleañonaksa ni yaqha ukham fiestanaksa amtktanti.

11. 1) ¿Kunatsa yaqhep jaqenakajj fiestanak amtapjje? 2) ¿Kunas jumatakejj jukʼamp wakiskirïñapa?

¹¹ Yaqhep jaqenakajja, Navidadasa yaqha fiestanakasa kʼari religionan uñstayatätap yatipjjewa, ukampis uka fiestanak amtasipkakiwa. Familiampi qamartʼañatakikiwa sasaw sapjje. ¿Jumajj ukhamarakti amuyta? Familiasampi qamartʼañajj janiw jan walïkiti. Familiajj Jehová Diosan uttʼayatawa, jupanakampi sum apassna ukwa jupajj muni (Efesios 3:14, 15). Ukampis kʼari religionan uñstayat fiestanak amtasin familiasampi sum apasiñat sipansa, Jehová Diosampi sum apasiñatakiw chʼamachasiñasa. Apóstol Pablojj akham sänwa: “Luratanakamajj Tatitutak walïskiti janicha ukjja amuyapjjapunim” sasa (Efesios 5:10).

12. ¿Kuna fiestanakas Jehová Diosatak jan walïkaspa?

¹² Fiestanakajj kunjam uñstayatasa uk yatiñajj janiw  wakiskiti sasaw waljanejj amuyapjje. Ukampis Jehová Diosajj janiw ukham amuykiti. Kʼari religionan uñstayat fiestanakasa, jaqenakaru, mä markaru jachʼañchir fiestanak amtañasa Diosatakejj janiw walïkiti. Amuytʼañatakejj nayra egipcionakat parltʼañäni. Jupanakajja kʼari diosanakaparu adorañatakejj walja fiestanakanïpjjänwa. Israelitanakajja, Egiptot sarjjapjjäna uka qhepatjja, egipcionakan costumbreparjamaw mä fiesta lurapjjäna. Uka fiestajj Jehová Diosarus jachʼañchkaspa ukhamwa amuyapjjäna, ukham lurasinjja Diosan castigataw uñjasipjjäna (Éxodo 32:2-10). Isaías profetajj ‘janipun kuna qʼañurus llamktʼapjjamti’ sasaw sistu (Isaías 52:11 liytʼañataki).

13. ¿Kunanaksa fiestanak amtañ jaytjjasajj jisktʼasisma?

¹³ Fiestanak amtañ jaytjjasajja, inas akham jisktʼaschïta: “Trabajir masinakajatï, ¿kunatsa nanakamp chikajj Navidad jan amtkta sasin jisktʼapjjetani ukhajj kunsa luriristjja? ¿Kunsa Navidadan mä regalo churapjjetani ukhajj luriristjja? Warmijasa jan ukajj chachajasa nayamp chikaw fiesta amtañama sitani ukhajja, ¿kunsa luriristjja? Wawanakajajj fiestanaka jan ukajj cumpleañonak luriri yaqhanakar jan uñchʼukipjjañapatakejja, ¿kunsa luriristjja?” sasa.

14, 15. Maynitï “feliz Navidad” sätam, jan ukajj mä regalo churätam ukhajja, ¿kunsa lurasma?

¹⁴ Maynitï kunatsa fiestanak jan amtkta sasin jisktʼätam ukhajja, amuytʼasisaw kunsa sañama jan ukajj kunsa lurañama. Sañäni, maynitï “¡feliz Navidad!” sätam ukhajja, “yuspära” sañamakiwa. Ukampis maynitï jukʼamp yatiñ munanejja, kunatsa fiestanak jan amtkta ukwa qhanañchtʼañama. Ukampis munasiñampi, respetompi, ukhamarak wali amuyumpiw qhanañchtʼañama. Bibliajj akham siwa: “Arunakamajj sumapunïpan, jayumpi  jayuñchtʼatäkaspas ukhama, ukhamatwa sapa maynirus kunjam qhanañchañsa yatipjjäta” sasa (Colosenses 4:6). Inas akham qhanañchtʼañajj wakischispa: “Yaqhanakampi qamartʼañasa, mayninakar regalonak churañasa nayatakejj walikïskiwa, ukampis kʼari religionanakan uñstayat fiestanakan ukanak lurañaw nayatak jan walïkiti” sasa.

¹⁵ ¿Maynitï mä regalo churiristam ukhajj kamachasmasa? Ukhaman uñjasisajj kunsa lurañasa uk janiw Biblian qhanañchkiti. Antisas suma conciencianïñatakiw chʼamañchtʼistu (1 Timoteo 1:18, 19). Regalo churktam uka jaqejja, kunatsa fiestanak jan amtkta uk inas jan yatkchiti. Jan ukajj inas akham siristam: “Aka fiesta jan amtirïtam nayajj yattwa, ukampis aka regalo churañ munsma” sasa. Ukhaman uñjasisajj uka regalo katoqasïtati janicha ukajj jumatäjjewa. Ukampis suma conciencianïñatakiw chʼamachasiñama. Diosampi sum apasitas janipuniw aptʼasiñ munktanti.

16. ¿Familiamantï mä fiesta amtañ munapjjani ukhajj kunsa lurasma?

¹⁶ ¿Familiamantï mä fiesta lurañ munapjjani ukhajj kunsa lurasma? Janiw jupanakamp chʼajjwañamäkiti. Amtapunim, kun lurañ amtañatakis jupanakajj derechonïpjjewa. Munasirïñamawa, kuntï amtapkani uksa respetañamawa, kunjamtï amtanakam respetapjjañap munkta ukhama (Mateo 7:12 liytʼañataki). Ukampis ¿familiamatï jumamp mä fiestan qamarañ munapjjani ukhajj kunsa lurasma? Janïr kun lurkasasa Jehová Diosaruw suma amtar puriñatakejj yanaptʼa mayisiñama. Kunsa lurasma uk sumwa amuytʼañama, kunatsa uka fiesta amtañajj jan walïki uksa yatjjatañamarakiwa. Amtapunim, Jehová Diosatakjam sarnaqañatakiw chʼamachasiñama.

17. ¿Kunjamsa yaqhanakar fiestanak lurir jan uñchʼukipjjañapatakejj wawanakamar yanaptʼasma?

 ¹⁷ Yaqha jaqenakaru fiestanak lurir jan uñchʼukipjjañapatakejja ¿kunjamsa wawanakamar yanaptʼasma? Jupanakatakejj yaqha uruw kunsa lurapjjasma, regalonaksa churapjjarakismawa. Ukat sipansa, jupanakampïñatakiw tiempo apstʼasipjjañama, jupanakarus muñasipjjañamawa ukanakaw mä suma regalöspajja.

18. ¿Kunatsa tantachäwinakar sarañasa?

¹⁸ Jehová Diosatakjam sarnaqañatakejja, kʼari religionat mistjjañasawa. Uka religionanakan uñstayat fiestanaksa costumbrenaksa apanukuñasawa. Ukampis janiw ukak lurañajj wakiskiti, kunjamtï Diosajj munki ukarjamaw jupar adorañasa. ¿Kunjamsa uk lursna? Tantachäwinakarojj jan faltasisaw sarañasa (Hebreos 10:24, 25 liytʼañataki). Diosar adorañatakejja tantachäwinakar sarañajj wali wakiskiriwa (Salmo 22:22; 122:1). Uka tantachäwinakanwa maynit maynikamajj chʼamañchtʼastanjja (Romanos 1:12).

19. ¿Kunatsa jaqenakarojj Biblian cheqa yatichäwinakapat parlañama?

¹⁹ Diosatakjam sarnaqatasjja, Bibliat jaqe masisar yatiyasaw uñachtʼayaraksna. Kunanakatï akapachan paski ukanak uñjasajj walja jaqenakaw wali llakita sarnaqapjje. Inas jumajj ukham llakit jaqenakar uñjirïsta. Jupanakarojja kunjamas jutïrin jakasjjañäni uka toqetwa parltʼasma. Ukhamasti jumatï tantachäwinakar saräta, Biblian cheqa yatichäwinakapatsa parlarakïta ukhajja, janiw kʼari religionanakar sarañ munjjätati ni costumbrenakaparjam sarnaqañsa munjjarakïtati. Ukhamarusa Jehová Diosar kunjamtï munki ukarjam adorañatak chʼamachasïta ukhajja, wali kusisitaw jakasïta, Diosasti walja bendicionanakwa churarakïtam (Malaquías 3:10).