1, 2. Imbe mbadga u nlama badba, ni inyuki hala a yé mahee?

NI NJEL yigil yoñ Bibel, u nigil le ngandak bôt i i nkadba le i ngwélél Djob, i niiga yaga mam a ñoo, i boñok ki mo. (2 Korintô 6:17) Inyu hala nyen Yéhôva a nti bés oda le di pam mukété bibase bi bitembee le “Babilôn Nunkeñi.” (Masoola 18:2, 4) Baa makidik moñ m’a ba le kii? Hiki wada wés a nlama kit i jam a mpohol i boñ. Jon di nlama badba le: “Baa me ngwés bégés Djob kiki a mbat me le me boñ, tole me ngwés bégés nye kiki me bé bégés nye behee?”

² Ibale u bi mal nyodi ikété base i bitembee, tole u tjôô yo, hala a yé loñge. Ndi to hala, mukété kété yoñ ñem, u nla ki bana ngim maboñog tole bilem bi base i bitembee, bi bi ngi lémlak we. Nano, di wan le ngim maboñog tole bilem bi, di béñge ki inyuki hala a yé mahee le di tehe mam ma kiki yak Yéhôva a ntehe mo.

3. (a) Inyuki bôt bape ba ntehe hala ndutu i waa gwélél bititii inyu bégés Djob? (b) Kii Bibel i nkal inyu ligwéélak li bititii inyu bégés Djob?

³ Bôt bape ba bi gwélél bititii ngandak ñwii inyu bégés Djob, bape ki ba bi bôñgôl ngim homa mukété ndap yap inyu masoohe. Ibale yak we u mboñ hala, bebeg le hala a nla nene we nkén jam, tole hala a nla bébél we, i bégés Djob ibabé gwélél gwom bi. Ndi u hôya bañ le Yéhôva a niiga bés lelaa di nlama bégés nye. Yak Bibel i ntibil yaga kal bés le Yéhôva a ngwés bé le di gwélél bititii inyu bégés  nye.​—Añ Manyodi 20:4, 5; Tjémbi 115:4-8; Yésaya 42:8; 1 Yôhanes 5:21.

4. (a) Inyuki di nlama bé yéñ kwélés bawoga? (b) Inyuki Yéhôva a bi kal litén jé le li noode bañ kwélés bawoga?

⁴ Bôt bape ki ba yé bebee i tégbaha ngandak ngéda ni gwélél ngui yap yosôna inyu noode lémél basôgôsôgô bap, ba ba bi wo. Ba nla yak yéñ kwélés bo. Ndi di nigil le bawoga ba nla ha bé hôla bés, to boñ bés béba. Ba niñ ha bé homa numpe. I pot maliga, i yé yaga béba i noode kwélés bo, inyule to umbe ñwin u u nene wengoñle u nlôl ni bawoga, u nlôl yaga ni mimbuu mimbe. Inyu hala nyen Yéhôva a bi ti Lôk Israél mbén le ba noode bañ kwélés bawoga, to i bana maada mo ki mo ni mimbuu mimbe.​—Ndiimba Mbén 18:10-12; béñge Ndoñi 26, ni Ndoñi 31, i mamélél ma kaat.

5. Kii i nla hôla we i waa gwélél bititii inyu bégés Djob, ni i waa soohe basôgôsôgô ba ba bi wo?

⁵ Kii i nla hôla we i waa gwélél bititii inyu bégés Djob, ni i waa soohe basôgôsôgô ba ba bi wo? U nlama añ Bibel, u yoñ ki ngéda i tibil wan lelaa Yéhôva a ntehe mam ma. Yéhôva a nkal le mam mana ma “nsuñgaha” nye ñem. (Ndiimba Mbén 27:15) Soohe Yéhôva hiki ngéda le a hôla we i tehe mam kiki nyemede, ni i bégés nye i nya i nlémél nye. (Yésaya 55:9) Ba nkwoog nkaa le Yéhôva a ga ti we ngui i mbéda we inyu tjôô to kinje jam li gwé maada ni base i bitembee.

6. Inyuki hilo 25 hi sôñ Libuy li nyéé hi bi pohlana kiki ngand ligwéé li Yésu?

⁶ Kristak i yé ngand yada ikété mangand bebee le bôt ba nkoñ isi wonsôna ba nséé. Libim li bôt li nhoñol le i yé ngand ligwéé li Yésu. Ndi Kristak i nlôl ni bibase bi  bitembee. Kaat ngobol bibuk yada i ntoñol le, bihaiden i Rôma bi bé bi gwé ngand ligwéé li hiañgaa i hilo 25 hi sôñ Libuy li nyéé (sôñ jôm ni iba). Baéga bibase ba bééna ngôñ le bihaiden bi yila bikristen. Jon, to hala kiki Yésu a bi gwéé bé i hilo 25 hi sôñ Libuy li nyéé, bo ba bi kit le ba ga bana ngand i ligwéé li Yésu mu hilo hi. (Lukas 2:8-12) Banigil ba Yésu ba bé yoñ bé ngaba mu ngand i Kristak. Kaat yada ni hop Ngisi i ntoñol le 200 ñwii mbus ligwéé li Yésu, “mut to wada a bé yi bé ngéda Yésu a bi gwéé, ni le inyu libim li bôt, lini jam li bééna bé mahee.” (Les origines sacrées de choses profondes, ni hop Ngisi) Mangand ma Kristak ma bi bôdôl mbôgôl i ñwii mbus maké ma Yésu i ngii.

7. Inyuki bañga bikristen i nyoñ bé ngaba mu ngand Kristak?

⁷ Ngandak bôt i nyi le ngand i Kristak ni maboñog ma bôt mu ngéda ngand ini, kiki bo ngandak je, lihiua, ni litina makébla, ma nyôñna ikété base i bitembee. Kii héga, ba bé sôñga ngand i Kristak i loñ i Ngisi ni i biloñ bipe bi Amérika, inyule i nlôl ni base i bitembee. Ba bé kogse nu ni nu a bé yoñ ngaba mu ngand i. Ndi mbus ngéda, bôt ba bi témb ba bôdôl yoñ ngaba mu ngand i Kristak. Inyuki bañga bikristen i nyoñ bé ngaba i ngand i Kristak? Inyule ba ngwés lémél Djob mu mam momasôna ba mboñ.

8, 9. Inyuki bikristen bi ngéda bisu, bi bé yoñ bé ngaba i mangand ma ligwéé?

⁸ Ngand ipe i i nlôôha yiba ni ngandak bôt i yé ngand ligwéé jap. Baa bikristen bi nlama yoñ ngaba i mangand ma ligwéé? Mangand ma ligwéé momasôna Bibel i mpôdôl, ma bé mangand ma bôt ba bé bégés bé Yéhôva. (Bibôdle 40:20; Markô 6:21) Bôt ba bé gwélél mangand ma ligwéé inyu ti mop ma bitembee lipém. Inyu hala nyen  bikristen bi ngéda bisu bi bé tehe “liyoñ ngaba i ngand ligwéé i to kinje mut kiki bilem bi haiden.”​—The World Book Encyclopedia.

⁹ Bôt ba Rôma ni Grikia ba ngéda kwañ ba bé hémle le ngim hégél i mbuu i yé ha i ngéda ligwéé li hiki mut. Ba bé hémle ki le ini hégél i mbuu, i bé lama sôñ mut nu niñ yé yosôna. Kaat ni hop Ngisi ba nsébél le The Lore of Birthdays (Bilem bi mangand ma ligwéé) i ntoñol le: “Ini hégél i mbuu, i gwé maada ni djob li bo mut nu ba gwé kel ligwéé yada.”

10. Inyuki i len ini, bikristen bi nlama bé yoñ ngaba mu mangand ma ligwéé?

¹⁰ Baa u nhoñol le mangand ma ma gwé maada ni bibase bi bitembee ma nlémél Yéhôva? (Yésaya 65:11, 12) Heni! Ma nlémél bé nye. Inyu hala nyen yak bés di nyoñ bé ngaba mu mangand ma ligwéé, to i ngand yo ki yo, i i gwé maada ni bibase bi bitembee.

11. Inyuki bôt bape ba nyoñ ngaba i mangand? Kii i nlama ba we mahee iloo mam momasôna?

¹¹ Bôt bape ba nyi le ngand i Kristak ni mangand mape ma nlôl ni bilem bi haiden, ndi ba ntéñbe ndik i yoñ ngaba mu. Ba nhoñol le mangand ma yé ndik loñge jam inyu tégbaha loñge ngéda ni lihaa jap. Baa yak we u nhoñol hala? Hala a ta bé béba jam i tégbaha ngéda ni lihaa joñ. Yéhôva a yé Nheg lihaa, jon a ngwés le di bana maada malam ni bôt bés ba lihaa. (Efésô 3:14, 15) Ndi, jam li nlama lôôha ba bés mahee, li yé le di bana maada malam ni Yéhôva ilole di yéñ lémél bôt bés ba lihaa, di yoñog ngaba i mangand ma bibase bi bitembee ni bo. Inyu hala nyen ñôma Paul a bi kal le: “Wana yaga mam ma nlémél Nwet.”​—Efésô 5:10.

12. Kii i nla boñ le Yéhôva a neebe bañ ngim ngand?

 ¹² Ngandak bôt i nhoñol le, i yi hee ngim ngand i nlôl, ni inyuki bôt ba bi téé yo, i ta bé nseñ, ndi Yéhôva a nhoñol bé hala. A ngwés bé mangand ma ma nlôl ni bibase bi bitembee, to mangand ma ma mbégés bôt ba binam tole biyimbne bi biloñ. Kii héga, bôt ba Égiptô ba bééna ngandak mangand inyu mop map ma bitembee. Mbus Yéhôva a bi mal pémés bon ba Israél i Égiptô, Lôk Israél i bi nigle ngand yada ikété mangand ma bihaiden bi Égiptô, ni bo ba sébél yo le “ngand inyu Yéhôva.” Ndi Yéhôva a bi kogse bo inyule ba bi boñ hala. (Manyodi 32:2-10) Ndik kiki mpôdôl Yésaya a bi kal, di nlama bé ‘tihba yom i nyega!’​—Añ Yésaya 52:11.

13. Mambe mambadga u nla badba ibale u nkit le u ga yoñ ha bé ngaba mu mangand ma nkoñ isi?

¹³ Ibale u nkit le u ga séé ha bé mangand ma bibase bi bitembee, u nla bana ngandak mambadga. Kiki héga: Kii me nlama boñ ibale mawanda mem ma bôlô ba mbat me inyuki me nyoñ ha bé me ngaba mu mangand ma ni bo? Kii me nlama boñ ibale mut a nti me likébla li Kristak? Kii me ga boñ ibale nlô wem tole nwaa wem a mbem le me yoñ ngaba mu ngand i? Lelaa me nla hôla bon bem i tééda maséé map to hala kiki ba nséé bé ngand Kristak, to mangand map ma ligwéé?

14, 15. Kii u nla boñ ibale mut a nkal we le “ngand lam,” tole a nti we likébla?

¹⁴ I yé loñge le di gwélél pék ni loñgeñem inyu yi kii di nlama kal ni boñ ngéda di nsômbôl yoñ ngim makidik. Kii héga, ibale mut a nkal we le “ngand lam,” u nlama bé boñ wengoñle u nok bé nye. U nla ndigi kal le: “Me nyéga.” Ndi ibale mut a gwé ngôñ yi inyuki u nséé bé ngim ngand, u  nla ni toñle nye manjom moñ. Ndi, pot hiki ngéda ni loñgeñem, u undga ki le u ndiihe bôt. U gwélél bañ bibuk bi nla babaa bo. Bibel i nkal le: “Minkwel minan mi ba ngéda yosôna ni karis nnéhak ni bas, ndi ni yi kiki ni nlama timbhe hiki mut.” (Kôlôsé 4:6) Bebeg u ga gwés toñle bo le u nok maséé i tégbaha ngéda ni bôt bape, ni i ti bo makébla. Ndi kal bo le u nkit le u ga boñ bé hala mu ngéda i mangand ma.

¹⁵ Kii u ga boñ ibale mut a nti we likébla? Bibel i ntéé bé mambén inyu hiki jam, ndi i nkal le di nlama tééda loñge kiññem. (1 Timôtéô 1:18, 19) Bebeg le i mut a nti we likébla, a nyi bé le u nyoñ bé ngaba mu ngand i. Tole a nla kal le: “Me nyi yaga le u nyoñ bé ngaba mu ngand ini, ndi to hala me gwé ngôñ i ti we jomb lini.” Ngim mangéda, u nla neebe i yoñ, ndi mangéda mape u nla kit le u nyoñ bé. Ndi to u nyoñ mambe makidik, yoñ yihe le u tééda loñge kiññem. Di ngwés bé boñ jam jo kiki jo, li li nla hindis maada més ni Yéhôva.

16. Kii u nlama boñ ibale lihaa joñ li ngwés le u yoñ ngaba i mangand map?

¹⁶ Kii u nlama boñ ibale lihaa joñ li ngwés le u yoñ ngaba mu ngand i? U gwé bé le u jôs bo. Hoñol le ba gwé kunde i pohol kii ba ngwés boñ. Unda bo loñgeñem, u diihege ki makidik map, nlélém kiki wemede u ngwés le ba diihe moñ. (Añ Matéô 7:12.) Ndi ibale lihaa joñ li ngwés le u tégbaha ngéda ni bo mu kel ngand, kii u nlama boñ? Ilole u nkit i jam u nlama boñ, soohe Yéhôva le a hôla we i yoñ makidik ma téé sép. Sélés boña woñ inyu jam li, u yoñ ki ngéda i wan ikété bikaat. U hôiga bañ le ngôñ yoñ i yé le u lémél Yéhôva hiki ngéda.

17. Kii u nla boñ inyu hôla bon boñ le ba hoñol bañ le ba yé nimis ngim jam mu kiki ba ntehe boñge bape ba nyoñ ngaba mu mangand ma?

 ¹⁷ Kii u nla boñ inyu hôla bon boñ mu kiki ba ntehe boñge bape ba nyoñ ngaba mu mangand ma? Jam u nla boñ li yé le u pohol dilo dipe inyu kôôba mam ma tôbôtôbô inyu yap, u tégbaha ki loñge ngéda ni bo. U nla ki puhe bo ni makébla. Ndi likébla lipe li nloo bé lini le, u ti bon boñ ngéda yoñ ni gwéha yoñ.

18. Inyuki di nlama ke i makoda ma bikristen?

¹⁸ Inyu lémél Yéhôva, di nlama tjôô bibase bi bitembee, ni bilem, ni mangand, bi bi gwé maada ni bibase bi. Ndi, di nlama ki bégés Djob i nya i nlémél nye. Lelaa di nla boñ hala? Njel yada i yé le di bana lem i lo i makoda ma bikristen hiki ngéda. (Añ Lôk Héber 10:24, 25.) Makoda ma yé nseñ ngandak ikété bibégés di nti Yéhôva. (Tjémbi 22:23; 122:1) Di nla tina mankénd ngéda di yé i makoda.​—Rôma 1:12.

19. Inyuki i yé nseñ le u kal bôt bape maliga u nigil ikété Bibel?

¹⁹ Jam lipe li ñunda le u mpohol i bégés Djob i nya i nlémél nye, li yé le u añle bôt bape mam u nigil ikété Bibel. Ngandak bôt i gwé miñem mi nsiidaha bo inyu mam mabe momasôna ma mbôña ikété nkoñ isi. Bebeg u nyi ngim bôt i i nôgda hala. Añle bo loñge botñem u gwé inyu dilo di nlo. Mu kii u ga ke i makoda, u kalak ki bôt bape maliga ma Bibel, u ga nôgda le u gwé ha bé ki ngôñ i bana maada ni bibase bi bitembee, to ni bilem gwap. U nla ba nkwoog nkaa le u ga kon maséé, ni le Yéhôva a ga sayap biliya gwoñ mu kii u yé bégés nye i nya i nlémél nye.​—Malaki 3:10.