1, 2. Ano an dapat mong ihapot sa saimong sadiri, asin taano ta mahalaga iyan?

SA PAG-ADAL mo nin Bibliya, naaraman mo na dakul an nagsasabing sinasamba ninda an Diyos pero an totoo mga bagay na ikinakaanggot nin Diyos an itinutukdo o ginigibo ninda. (2 Corinto 6:17) Kaya pinagbutan kita ni Jehova na humali sa palsong relihiyon, “an Dakulang Babilonya.” (Kapahayagan 18:2, 4) Ano an gigibuhon mo? Lambang saro sa sato kaipuhan na magdesisyon, asin dapat tang haputon an satong sadiri, ‘Paano ko sasambahon an Diyos? Sa paaging gusto niya o sa paagi na kinagimatan ko?’

² Kun naghali o nag-resign ka na sa sarong palsong relihiyon, marahay an ginibo mo. Pero tibaad may gusto ka pa man giraray na mga kaugalian saka mga kostumbre nin palsong relihiyon. Pag-ulayan ta an pira sa mga iyan asin aramon niyato kun taano ta mahalagang marhay na arugon ta an paghiling diyan ni Jehova.

3. (a) Taano ta tibaad masakitan an iba na pumundo sa paggamit nin mga imahen sa saindang pagsamba? (b) Ano an sinasabi kan Bibliya mapadapit sa paggamit nin mga imahen sa pagsamba sa Diyos?

³ May mga tawo na haloy nang naggagamit nin mga imahen o mga altar sa harong ninda sa pagsamba sa Diyos. Kun saro ka sa sainda, tibaad manibago ka o isipon mo pa ngani na sala an pagsamba sa Diyos kun mayo kan mga iyan. Pero tandaan, tinutukduan kita ni Jehova kun paano siya sasambahon. Asin malinaw na sinasabi sa sato kan Bibliya na habo  ni Jehova na gumamit kita nin mga imahen sa satong pagsamba.—Basahon an Exodo 20:4, 5; Salmo 115:4-8; Isaias 42:8; 1 Juan 5:21.

4. (a) Taano ta dai niyato dapat sambahon an satong mga apuon? (b) Taano ta pinagbutan ni Jehova an saiyang mga lingkod na dai pagpurbaran na makipag-ulay sa mga gadan?

⁴ May mga tawong naggagamit nin dakul na panahon asin kusog para paugmahon an gadan na nindang mga apuon. Tibaad sinasamba pa ngani ninda iyan. Pero naaraman na niyato na dai kita kayang tabangan o kulgan kan mga gadan. Dai sinda nabubuhay sa kun sain na lugar. Talagang peligroso kun pupurbaran tang makipag-ulay sainda huling an ano man na mensahe na garo baga hali sa nagadan na kapamilya an totoo hali talaga sa mga demonyo. Kaya pinagbutan kaidto ni Jehova an mga Israelita na dai pagpurbaran na makipag-ulay sa mga gadan o maggibo nin ano man na may koneksiyon sa demonismo.—Deuteronomio 18:10-12; hilingon an Dagdag na Impormasyon 26 asin 31.

5. Ano an makakatabang saimo na maipundo an paggamit nin mga imahen sa pagsamba sa Diyos o an pagsamba sa mga apuon mo?

⁵ Ano an makakatabang saimo na maipundo an paggamit nin mga imahen sa pagsamba sa Diyos o an pagsamba sa mga apuon mo? Kaipuhan mong basahon an Bibliya asin pag-isipan na marhay kun ano an paghiling ni Jehova sa mga bagay na iyan. ‘Ikinakabaldi,’ o ikinakasurang, iyan ni Jehova. (Deuteronomio 27:15, NW) Aroaldaw na ipamibi ki Jehova na tabangan kang maarog mo an kaisipan niya asin masamba siya sa paaging gusto niya. (Isaias 55:9) Makakasigurado ka na tatawan ka ni Jehova nin kusog para mahali mo an ano man na bagay na konektado sa palsong pagsamba.

6. Taano ta pinili an Disyembre 25 na magin petsa sa pagselebrar kan pagkamundag ni Jesus?

⁶ Sa bilog na kinaban, an Pasko an saro sa pinakapopular na selebrasyon, asin iniisip kan kadaklan na pagselebrar  iyan kan pagkamundag ni Jesus. Pero an totoo, an Pasko konektado sa palsong pagsamba. Ipinaliwanag sa sarong encyclopedia na isineselebrar kan paganong mga Romano an pagkamundag kan saldang o aldaw pag Disyembre 25. Gusto kan mga lider nin relihiyon na dakul pang pagano an magin Kristiyano, kaya dawa dai man talaga ipinangaki si Jesus kan Disyembre 25, nagdesisyon sindang iselebrar an pagkamundag ni Jesus sa petsang iyan. (Lucas 2:8-12) Dai nagselebrar nin Pasko an mga disipulo ni Jesus. Sinabi sa sarong libro na sa laog nin 200 na taon pagkatapos na ipangaki si Jesus, “mayo nin nakakaaram, asin dikit sana an interesadong makaaram, kan eksaktong petsa kan pagkamundag niya.” (Sacred Origins of Profound Things) Nagpuon na iselebrar an Pasko mga pirang gatos na taon pagkatapos na mabuhay si Jesus sa daga.

7. Taano ta dai nagseselebrar nin Pasko an tunay na mga Kristiyano?

⁷ Dakul an nakakaaram na pagano, o bakong sa Kristiyano, an pinaghalian kan Pasko asin kan mga tradisyon kaiyan, arog nin mga party saka pagtao nin regalo. Halimbawa, sa England saka sa ibang parte kan Amerika, may panahon kaidto na ipinagbawal an pagselebrar kan Pasko huling hali iyan sa mga pagano. Pinapadusahan an siisay man na magselebrar kaiyan. Pero pag-abot nin panahon, isinelebrar giraray kan mga tawo an Pasko. Taano ta dai nagseselebrar nin Pasko an tunay na mga Kristiyano? Huling gusto nindang mapaugma an Diyos sa gabos na ginigibo ninda.

8, 9. Taano ta dai nagseselebrar nin birthday an inot na mga Kristiyano?

⁸ An birthday saro pang popular na selebrasyon. Dapat daw na magselebrar nin birthday an mga Kristiyano? May sinambit sa Bibliya na mga nagselebrar nin birthday, pero dai sinda nagsasamba ki Jehova. (Genesis 40:20; Marcos 6:21) Isineselebrar kaidto an mga birthday para tawan nin onra an  palsong mga diyos. Iyan an dahilan kaya “ibinibilang [kan mga Kristiyano kan inot na siglo] na paganong kaugalian an pagselebrar kan pagkamundag nin siisay man.”—The World Book Encyclopedia.

⁹ Naniniwala an suanoy na mga Romano asin Griego na may espiritu na naghihiling pag namundag an saro asin poprotektaran siya kan espiritung ini sa bilog niyang buhay. Ipinaliwanag kan librong The Lore of Birthdays: “An espiritung ini igwa nin misteryosong koneksiyon sa diyos na an aldaw nin pagkamundag kapareho kan aldaw na namundag an sarong tawo.”

10. Taano ta dai dapat magselebrar nin birthday an mga Kristiyano ngunyan?

¹⁰ Sa hiling mo, inuuyunan daw ni Jehova an mga selebrasyon na konektado sa palsong relihiyon? (Isaias 65:11, 12) Dai. Kaya dai kita nagseselebrar nin birthday o ano man na selebrasyon na konektado sa palsong relihiyon.

11. Taano ta may mga nagseselebrar nin mga kapiyestahan? Ano an dapat na magin pinakamahalaga sa saimo?

¹¹ Dakul an nakakaaram na pagano an pinaghalian kan Pasko asin kan iba pang selebrasyon, pero isineselebrar pa man giraray ninda iyan. Para sainda, an mga okasyon na ini saro sanang magayon na pagkakataon para makaibanan an saindang pamilya. Arog man daw kaiyan an iniisip mo? Bako man sala kun gusto mong makaibanan an saimong pamilya. Si Jehova an kagpundar kan pamilya, asin gusto niyang magin harani kamo sa kada saro. (Efeso 3:14, 15) Pero an dapat na magin pinakamahalaga sa sato iyo an magkaigwa nin marahay na relasyon ki Jehova bako an mapaugma an satong mga kapamilya paagi sa pagselebrar kan mga kapiyestahan o okasyon nin palsong relihiyon. Kaya si apostol Pablo nagsabi: “Padagos nindong siguraduhon kun ano an akseptable sa Kagurangnan.”—Efeso 5:10.

12. Anong mga selebrasyon an dai inuuyunan ni Jehova?

 ¹² Iniisip nin dakul na bako man mahalaga kun sain hali an sarong selebrasyon, pero bakong arog kaiyan an paghiling ni Jehova. Dai niya inuuyunan an mga okasyon na hali sa palsong pagsamba o an mga selebrasyon na nagtatao nin sobra-sobrang onra sa mga tawo o simbolo kan nasyon. Halimbawa, an mga taga Ehipto kadakul nin mga selebrasyon para sa saindang palsong mga diyos. Kan makahali na an mga Israelita sa Ehipto, inarog ninda an sarong paganong selebrasyon kan mga taga duman tapos inapod ninda iyan na ‘kapiyestahan para ki Jehova.’ Pero pinadusahan sinda ni Jehova huli kaiyan. (Exodo 32:2-10) Arog kan sinabi ni propeta Isaias, dai kita dapat ‘magdutdot nin ano man na maati!’—Basahon an Isaias 52:11.

13. Ano an puwedeng maihapot mo pag nagdesisyon kang dai na magselebrar nin mga kapiyestahan?

¹³ Pag nagdesisyon kang dai na magselebrar kan mga kapiyestahan, puwedeng dakul kang maihapot. Halimbawa: Ano an sasabihon ko kun maghapot an mga katrabaho ko kun taano ta dai ako nagpa-Pasko? Ano an gigibuhon ko pag may nagregalo sako sa Pasko? Ano an gigibuhon ko pag gusto kan agom ko na iselebrar mi an sarong kapiyestahan? Paano ko matatabangan an mga aki ko na dai mamundo huling dai kami nagseselebrar nin mga kapiyestahan o kan birthday ninda?

14, 15. Ano an puwede mong gibuhon kun may magsabi saimo nin “Merry Christmas” o may magtao saimo nin regalo?

¹⁴ Mahalaga man na pag-isipan kun ano an sa hiling mong tamang sabihon asin gibuhon sa kada sitwasyon. Halimbawa, kun may magsabi saimo nin “Merry Christmas,” dai mo sinda pag-isnabon. Puwede mong sabihon, “Salamat.” Pero kun gusto nin saro nin dagdag na paliwanag, puwede mong sabihon saiya kun taano ta dai ka nagseselebrar kaiyan. Pero, pirming magin mabuot, mataktika, saka magalang. Sinasabi kan  Bibliya: “Pirmi lugod na magin mabuot an saindong pagtaram, na tinimplahan nin asin. Paagi kaiyan maaaraman nindo kun paano sisimbagon an lambang tawo.” (Colosas 4:6) Puwede mong sabihon na nauugma kang makaibanan an iba saka magregalo, pero dai mo lang gustong gibuhon iyan sa mga arog kaiyan na okasyon.

¹⁵ Ano an gigibuhon mo pag may nagregalo saimo? Dai nagtatao an Bibliya nin lista nin mga dapat tang gibuhon, pero sinasabi kaiyan na dapat na igwa kita nin malinig na konsiyensiya. (1 Timoteo 1:18, 19) Tibaad dai aram kan nagregalo saimo na dai ka nagseselebrar nin mga kapiyestahan. O tibaad sabihon niya, “Aram kong dai ka nagseselebrar kaini, pero gusto taka pa man giraray na regaluhan.” Arin man diyan, nasa saimo kun aakuon mo an regalo o dai. Pero ano man an magin desisyon mo, dapat na siguraduhon mong magin malinig man giraray an konsiyensiya mo. Habo tang gumibo nin ano man na puwedeng makaraot kan satong relasyon ki Jehova.

16. Ano an dapat mong gibuhon kun gusto kan saimong pamilya na magselebrar nin sarong kapiyestahan?

¹⁶ Ano an gigibuhon mo kun gusto kan saimong pamilya na iselebrar an sarong kapiyestahan? Dai mo man kaipuhan na makipagdiskusyon sa sainda. Tandaan, may deretso sindang magdesisyon kun ano an gusto nindang gibuhon. Magin mabuot saka irespeto an desisyon ninda, kun paanong gusto mo man na irespeto ninda an desisyon mo. (Basahon an Mateo 7:12.) Pero paano kun gusto ka nindang makaiba sa pagselebrar? Ano an puwede mong gibuhon? Bago ka magdesisyon, mamibi nguna ki Jehova na tabangan kang makapagdesisyon nin tama. Isipon kun ano an paghiling ni Jehova sa selebrasyon na iyan, asin mag-research. Tandaan na an mahalaga saimo iyo na pirming mapaugma si Jehova.

17. Ano an puwede mong gibuhon para dai mamundo an saimong mga aki pag nahihiling ninda an iba na nagseselebrar nin mga kapiyestahan?

 ¹⁷ Ano an puwede mong gibuhon para dai mamundo an saimong mga aki pag nahihiling ninda an iba na nagseselebrar nin mga kapiyestahan? Paminsan-minsan, puwede kang maggibo o maghanda nin espesyal na bagay para sa sainda. Puwede mo sindang regaluhan dawa mayong okasyon. Asin an saro sa pinakamagayon na regalo na maitatao mo sa sainda iyo an saimong panahon asin pagpadaba sa sainda.

18. Taano ta dapat kitang mag-atender sa Kristiyanong mga pagtiripon?

¹⁸ Para mapaugma si Jehova, dapat kitang maghali sa palsong relihiyon asin ipundo an mga kostumbre saka selebrasyon na konektado diyan. Pero dapat ta man na sambahon an Diyos sa tamang paagi. Paano? An sarong paagi iyo an regular na pag-atender sa Kristiyanong mga pagtiripon. (Basahon an Hebreo 10:24, 25.) An mga pagtiripon mahalagang parte kan tunay na pagsamba. (Salmo 22:22; 122:1) Mapapakusog ta an kada saro kun nagtitiripon kita.—Roma 1:12.

19. Taano ta mahalaga na sabihon mo sa iba an mga nanunudan mong katotoohan sa Bibliya?

¹⁹ An saro pang magigibo mo para masamba an Diyos sa tamang paagi iyo an pagsabi sa iba kan mga nanunudan mo sa Bibliya. Dakul an namomroblema huli sa maraot na mga nangyayari sa kinaban. Tibaad may mga kabisto ka na arog kaiyan an namamatian. Sabihon mo sainda an manungod sa magayon mong paglaom. Sa padagos mong pag-atender sa Kristiyanong mga pagtiripon asin pagsabi sa iba kan mga katotoohan sa Bibliya, maririsa mong habo mo nang magin parte kan palsong relihiyon saka kan mga kaugalian kaiyan. Siguradong magigin maugma ka asin dakul na bendisyon an itatao saimo ni Jehova huli sa paghihinguwa mong sambahon siya sa tamang paagi.—Malaquias 3:10.