1, 2. Ngu sihi siwotiso asi hi fanelako ku ti wotisa sona, ni ku ngu ku txani i di ta lisima?

KA GONDO yako ya Bhiblia, se u gondile ti to wungi wa vathu va va ku kha vona va khozela Txizimu va gondisa ni kumaha ati Txizimu txi ti vengelako. (2 Vakorinto 6:17) Ngu toneto Jehovha a hi rumako kuhuma ka “Bhabhilona wa Hombe”. (Mtuletelo 18:2, 4) U na maha txani? Hotshethu hi ni to ti sawula, se awe u fela ku ti wotisa, ‘Ina ani, ni khozela Txizimu ngu nzila yi txona txi yi lavako, mwendo ni lava kukhozela ngati vamwane va mahisako tona?’

² Ngako se u di lekile ku ti tshanganisa ni wukhongeli wa makuhu, ngu tona i ku ta tinene. Kambe txa hombe ngutu txi nga va ka timhaka ni sihena simwane sa wukhongeli asi u ku ngadi u txi si maha. He bhulenyana ngu simaho ni sihena se hi wona ti to nda lisima ku hokela hani ku si wona ngu ha Jehovha a si wonako ngu yona.

3. a) Ngu ku txani vamwane ti nga va nemelelako kuleka kuthumisa sithombe ka wukozeli wawe? b) Bhiblia yi womba txani ngu kuthumisa sifananiso ti to hi khozela Txizimu?

³ Vathu vamwane va dhunda kuthumisa sifananiso mwendo makhalo o sawuleka mitini kwawe ti to ve khozela kona Txizimu malembe ni malembe. I di ti to wa maha eto, ti nga maha u tipfa i singa tona hambi ku tipfa ti di bihile kukhozela Txizimu u si nga naso. Kambe u nga divale, Jehovha a hi gondisa ti to hi nga mu khozelisa ku txani. Nakambe Bhiblia yi hi gela kwati ti to Jehovha kha ti lavi ti to hi thumisa sifananiso ka wokhozeli wathu.—Lera Eksodha 20:4, 5; Masalmu 115:4-8; Isaya 42:8; 1 Johane 5:21.

4. a) Ngu ku txani hi sa fanela kukhozela vafi? b) Ngu ku txani Jehovha a di gete vathu vakwe ti to va si duketi kuwombawomba ni vakufa?

 ⁴ Vathu va nga heta mbimo ni mtamo wawe va txi duketa kutsakisa vafi vawe. Ti nga maha ve tshumela ve va khozela. Kambe se hi gondile ti to va va nga fa kha va na kusikota ku hi vhuna nem hambi ku hi dayisa. Vona kha va hanyi ka wukhalo wumwane. Ngu ditshuri ti ni dikhombo kuduketa kuwombawomba ni vakufa nguko tihi ni tihi va ku ti ta ngu ka vafi ti huma ngu ka madhimoni. Ngu toneto Jehovha a nga gela Vakaisraeli ti to va si duketi kuwombawomba ni vakufa mwendo tihi ni tihi ti ti tsimbitisanako ni madhimoni.—Dheuteronome 18:10-12; Wona Titxhamuselo to gwitisa 26 ni 31.

5. Nji txani atxi txi nga ku vhunako kuleka kuthumisa sifananiso ti to u khozela Txizimu mwendo kuleka kukhozela vafi?

⁵ Nji txani atxi txi nga kuvhunako kuleka kuthumisa sifananiso ti to u khozela Txizimu mwendo kuleka kukhozela vafi? Ti lava u lera Bhiblia, se u alakanya kha kwati ngu ti Jehovha a si wonisako tona silo soneso. Ene a si wona i di “manyala” mwendo so nyenyeza. (Dheuteronome 27:15) Mbimo yotshe khongela ka Jehovha u kombela txivhuno txo va ni mawonelo o fana ni akwe ni kukhozela ene ngu nzila ayi ene a yi lavako. (Isaya 55:9) U nga tsaniseka ti to Jehovha a na kuninga mtamo wu u wu lavako ti to u tikhulula ka txihi ni txihi txi txi tsimbitisanako ni madhimoni.

6. Ngu ku txani ku di sawutwe 25 ka Dezembro ti to i va ditshiku da ku velekwa ka Jesu?

⁶ Khisimusi wumwane wa mibuso ya masiku o sawuleka wu wu nga toloveleka ha mafuni kotshe, se vathu va vangi va alakanya ti to ku khumbulwa ditshiku da kuvelekwa ka Jesu. Kambe ngu ditshuri khisimusi ya tsimbitisana  ni wukhozeli wa makuhu. Dibhuku dimwane da encyclopedia di txhamusela ti to ngu 25 ka Dezembro ku ti mahwa m’buso wa wuhedheni wa Roma wo tsakela ditshiku da kuvelekwa ka ditambo. Vathangeli va titxhetxhe va ti lava ti to mahedheni a mangi me maha Makristu, se hambiku Jesu a nga mbi velekwa ngu 25 ka Dezembro, vona va woni ti di tshuku ku mahisa toneto. (Luka 2:8-12) Vagondiswa va Jesu va si kulungeli khisimusi. Dibhuku dimwane di womba ti to msana ka 200 wa malembe na Jesu a di velekilwe, “a walo a nga ti ziva, futshi mba dotho va nga ti xolisisa, ti to Jesu a velekilwe ditshiku”. (Sacred Origins of Profound Things) Khisimusi yi khatile se ku di pindile mazana a mangi a malembe na Jesu a di hanyile ha mafuni.

7. Ngu ku txani Makristu a ditshuri ma si dyi khisimusi?

⁷ Va vangi va ti ziva ti to khisimusi yi khatete ka wuhedheni ni sihena sa kona, so fana ni kubusa ni kuningana so maha. Ngu txikombiso, ka ditiko da Inglaterra ni America, ku ti ni mbimo yi khisimusi yi nga ti lambiswa ngu mhaka ya ku yi khatelako ka wuhedheni. Awu a nga ti dya khisimusi a ti wona singayiwona. Kambe ngu magwito, vathu va khatile kudya khisimusi. Ngu ku txani Makristu a ditshuri ma si dyi khisimusi? Ngu mhaka ya ti to, vona va lava kutsakisa Txizimu ka tihi ni tihi va ti mahako.

8, 9. Ngu ku txani Makristu o khata ma nga ti si kulungeli ditshiku da ku velekwa ka m’thu?

⁸ Tximaho tximwane txi txi nga toloveleka, ngu khumbula masiku a kuvelekwa. Ina hi fanete hi kulungela masiku a ku velekwa? Kukulungela ka masiku a ku velekwa aku ku nga wombwa mu ka Bhiblia ti mahilwe ngu vathu va va nga ti si khozeli Jehovha. (Genesisi 40:20;  Marku 6:21) Kukulungela ka masiku a ku velekwa ku ti mahelwa kudhumisa sizimu sa makuhu. Ngu toneto Makristu o khata “ma nga ti wona m’buso wa ditshiku da ku velekwa i di txihena txa wuhedheni”—The World Book Encyclopedia.

⁹ Varoma ni Vagriki va kale va ti kholwa ti to mbimo yi wamsikati a hefemulaku ku ni moya wo kari awu wu nga ti humelela, awu wu ndino vhikela mwanana wutomi wakwe wotshe. Dibhuku di di ku The Lore of Birthdays di txhamusela ti to “Moya wonewo wu ti tsimbitisana ni txizimu txa ditshiku a di m’thu a nga velekwa ngu dona”.

10. Ngu ku txani Makristu ma sa fanela kukulungela masiku a ku velekwa?

¹⁰ Ina u alakanya ti to Jehovha wa amukela simahakalo soneso so tsimbitisana ni wukhongeli wa makuhu? (Isaya 65:11, 12) Kha na ku timaha toneto. Ngu toneto hi si kulungeliko masiku a ku velekwa ni maferiyadho ya ma tsimbitisanako ni wukhozeli wa makuhu.

11. Ngu ku txani vathu vamwane va txi kulungela tikhisimusi? Ngu tihi ati ti felako ku va ta lisima kwako?

¹¹ Vamwane va ti ziva ti to Khisimusi ni maferiyadho mamwane si ta ngu ka wuhedheni. Va khona tikhisimusi o va mbimo yi yi nga tuleka ti to maxaka me heta mbimo ma di otshe. Ina nawe u womba toneto? Kha ta biha kulava kuzumba ni maxaka mi txi sakana. Jehovha a wumbile mwaya ti to wu va ni wuxaka wa wunene ngu txa ka kwawe. (Vaefesu 3:14, 15) Hambi keto, hi lava kuveka mapimo athu basi ka wuxaka wa wunene ni Jehovha kupinda kuheta mbimo hi di ni maxaka athu ka tikhisimusi ta wukhongeli wa makuhu. Ngu toneto mpostoli Paulo a nga khene: “Lavani ati ti tsakisako Mkoma.”—Vaefesu 5:10.

12. Nji txani atxi txi nga mahako khisimusi yi si amukeleki ka Jehovha?

 ¹² Vathu va vangi va khona kha ti nga ni mhaka ni ti to khisimusi yo kari yi khukhete hani, kambe Jehovha kha mahisi toneto. Ene kha amukeli tikhisimusi ati ti khukhelako ka wukhozeli wa makuhu. Ngu txikombiso, Vaegipta va ti ni tikhisimusi to tala ta sizimu sawe sa makuhu. Msana ka ku va va Israeli vadi khulutwe Egipta, va vekile nyongane tikhisimusito se vona ve tidhana ku i ‘m’buso wo dhumisa Jehovha’. Kambe Jehovha ava khawulisile ngu mhaka ya tiya. (Eksodha 32:2-10) Nga ha mprofeti Isaya a nga womba ku, hi “nga gweseni txo mbi basa”!—Lera Isaya 52:11.

13. Ngako u txi sunga kwa mbi ngadi u maneka ka tikhisimusi, ngu sihi siwotiso asi u nga vako naso?

¹³ Ngako u txi sunga kuleka kudya tikhisimusi, ti nga maha vathu ve kuwotisela siwotiso so tala. Ngu txikombiso: Ni nga maha txani ngako mthumi kulothi atxi ni wotisa ti to ni lamba kudya khisimusi kumweko navo ngu txani? Ni nga maha txani ngako ni txi ningwa bhowa festa? Se i di mkatango a lavako ti to ni maneka ka khisimusi yo kari? Ni nga m’vhunisa ku txani mwanana wangu ti to a si tipfi a singa ni nyamne tsena ngu mhaka ya kwa mbi dya khisimusi?

14, 15. Nji txani atxi u no txi maha ngako m’thu a txi kulosa ngu ta khisimusi mwendo ku kuninga bhowa festa?

¹⁴ Ti ni lisima ti to u thumisa mawonelo aya ma nga toloveleka ti to u ziva ati u no womba ka txiemo tximwane ni tximwane. Ngu txikombiso, ngako vathu va txi kulosa vatxi khisimusi, kha ti zi ti lava ti to u malala. Kutilava u nga khawe, “Na bonga”. Se i di ti to m’thu atxi lava kuziva to tala, ngako u txi ti lava u nga mtxhamusela ti to ngu ku txani  u si kulungeli khisimusi. Hambi keto, vana ni wunene, u wombawomba kwati ni ngu txithavo. Bhiblia yi khene: “Kuwombawomba kwanu ku na ve ko tsakisa yotshe mbimo, na ku di lungilwe ngu m’nyu, ti to mi ziva ti mi fanelako ku xamulisa tona m’thu ni m’thu.” (Vakolosa 4:6) Vana ni wuxiya xiya ti to vathu va si ku teki u si nga ni Txixonipho. Makhaloni yeto, txhamusela txiemo txako ngu wutxhari. Tiveke ha kubasani ti to awe khu lwisana ni ku ningela tiningo mwendo kuya ka mibuso yo kari, kambe u navela ku timaha ngu mbimo yimwane.

¹⁵ Nji txani atxi u no txi maha ngako m’thu a txi kuninga bhowa fexta? Bhiblia kha yi nga ni layeni ya milayo, kambe eto ti womba ti to hi nga ya masoni hi va ni livhalo la linene. (1 Timoti 1:18, 19) Ti nga maheka awu a ku ningako kha zivi txilo ngu ti to ngu ku txani awe u si kulungela khisimusi. Mwendo a nga womba tiya, “Na ti ziva ti to khu tsimbilisani ni tikhisimusi, kambe ni tsakete ku kuninga siya”. Ka totshe ngawe u no ti wona ti to wa teka mwendo nem. Kambe ka tihi ni tihi ati u no ti maha, tsaniseka ti to khu pekwe ngu livhalo. Kha hi na mbi lava kumaha txilo atxi txi no moxa wuxaka wathu ni Jehovha.

16. Nji txani u no maha ngako mwaya wako wu txi lava kudya khisimusi?

¹⁶ Nji txani u no maha ngako mwaya wako wu txi lava kudya khisimusi? Kha ti lavi u lwisana navo. Khumbula ti to va ni mkhululeko wo maha ati va ti lavako. Vana ni wunene ni kuxonipha txisungo txawe nga ha nawe u lavako ti to ve xonipha txi txako. (Lera Matewu 7:12.) Se, u na maha txani i di ti to mwaya wako wu lava kuheta mbimo ni nawe ngu mbimo ya khisimusi? Na u si se sawula ti to u na maha txani, khongela ka Jehovha ti to e kuvhuna kumaha txisungo txa txinene. Alakanyisisa ngu ti to u na  txani, se u timahela wuxolisisi. U nga divale, mbimo yotshe u lava kutsakisa Jehovha.

17. U nga maha txani ti to u vhuna vanana vako mbimo yi va wonako vamwane va txi dya khisimusi?

¹⁷ U nga maha txani ti to u vhuna vanana vako mbimo yi va wonako vamwane va txi dya khisimusi? Kha ti karati, mbimo yimwane ni yimwane u nga va mahela to karinyana to tsakisa. U nga tshumela u va ninga txo kari va sa tiemela. Ni ku ningo ya lisima ngutu ayi u nga ningako vanana vako i mbimo ni lirando lako.

18. Ngu ku txani hi di fanete ku ya ka mitshangano ya Wukristu?

¹⁸ Ti to hi tsakisa Jehovha, ti lava hi leka wukhozeli wa makuhu ni sihena ni tikhisimusi ta wona. Kambe hi fanete hi maha wukhozeli wa ditshuri. Hi nga mahisa ku txani? Nzila yimwane ngu ya mitshanganoni ya Wukristu. (Lera Vahebheru 10:24, 25.) Mitshangano njienge txa lisima txa wukhozeli wa ditshuri. (Masalmu 22:23; 122:1) Hi nga tsanisana mbimo yi hi tshanganako.—Varoma 1:12.

19. Ngu ku txani ti di ni lisima kugela vamwane ngu ti u nga ti gonda?

¹⁹ Txienge tximwane txo sawula wukhozeli wa ditshuri, ngu gela vamwane ngu ti u nga tigonda a mu ka Bhiblia. Ti nga maha vamwane va txi karateka ngu timhaka to biha ati ti mahekako ha mafuni hawa. Ti nga maha u txi ziva vamwane va ku ka txiemo txonetxo. Va gele ngu themba ayi u ku nayo ngu mbimo yi yi tako. Ngako se u txi ya mitshanganoni ya Wukristu ni kugela vamwane mayelana ni ditshuri, u na so pfa kukapee, nem u si nge ngadi u lava ku va txienge txa mafu awa ni sihena sa ona. U nga tsaniseka ti to u na tsaka ni ku Jehovha a na yi katekisa ngutu mizamo yako yo sawula ku mu khozela ngu nzila ya yinene.—Malakiya 3:10.