1, 2. Kanmahle kanmah zeidah kan i hal awk a si, mah cu zeicah a biapit?

BAIBAL na hlathlai tikah Pathian ka bia tiah aa timi, mi tampi nih Pathian duh lomi thil an tuah asiloah mi an cawnpiakmi hna kha na hun hngalh ko lai. (2 Korin 6:17) Cucaah “Babilon Khualipi” a simi a hmaan lomi biaknak in chuah awkah Jehovah nih a kan fial. (Biathlam 18:2, 4) Zeidah na tuah lai? Pakhat cio nih thim awk kan ngeih caah hitin kan i hal awk a si: ‘Pathian kha a duhmi lam in ka bia maw asiloah keimah duhmi lam in dah ka biak?’

² A hmaan lomi biaknak in na chuah cang a si ahcun a ṭha tuk. Asinain a hmaan lomi biaknak he aa pehtlaimi tuahsernak le phungphai cheukhat kha na tuah rih men ko lai. Cu bantuk tuahsernak le phungphai cheukhat kong kha i ruah u sih, cun mah thil hna he aa tlaiin Jehovah hmuhning ngeih cu zeicah a biapit ti zong i ruah u sih.

3. (a) Mi cheukhat nih an biaknak ah milem an hmanmi ngol cu zeicah an i harh khawh? (b) Pathian biaknak ah milem hmannak he aa tlaiin Baibal nih zeidah a chim?

³ Mi cheukhat cu milem asiloah milem chiahnak hrawl hna kha an inn ah kum tampi chung an i chiah. Nang zong cutin naa chiah a si ahcun cu bantuk thil tel loin Pathian biak cu naa ziak men lai lo asiloah a palh ti hmanhin na ruah men lai. Asinain Jehovah nih zeitindah amah biak ding ti a kan cawnpiakmi kha i cinken. Jehovah nih biaknak ah milem hmanter a kan duh lo ti kha Baibal nih fiang tein a langhter.—Exodus 20:4, 5 rel; Salm 115:4-8; Isaiah 42:8; 1 Johan 5:21.

4. (a) Kan pupa hna kha zeicah kan biak hna awk a si lo? (b) Jehovah nih a mi hna kha mithi he i chawnh lo awkah zeicah nawl a pek hna?

 ⁴ Mi cheukhat nih a thi cangmi an pupa hna lungton awkah an caan le an thazaang tampi an hman men lai. Cun a biak hmanh an biak men hna lai. Asinain mithi nih cun an kan bawm kho lo i harnak zong an kan pe kho lo ti kha kan rak cawn cang. Annih cu khoika hmanhah an nung ti lo. Cucaah anmah he pehtlaihnak tuah i zuam cu ṭih a nung, zeicahtiah a thimi sinin a ra tiah kan ruahmi bia vialte cu a taktak ah khuachia sinin a rami an si. Cucaah Jehovah nih Israel mi kha mithi he i chawnh lo awk asiloah zei bantuk khuachia thiamnak he hmanh i pehtlaih lo awkah nawl a rak pek hna.—Deuteronomi 18:10-12; A Donghnak I Fianternak  26 le 31 ah zoh.

5. Pathian biaknak ah milem hmannak le pupa biaknak hna ngol awkah zeinihdah aan bawmh khawh?

⁵ Pathian biaknak ah milem hmannak asiloah pupa biaknak hna ngol awkah zeinihdah aan bawmh khawh? Mah kong he aa tlaiin Pathian hmuhning kha Baibal ah rel law ṭha tein ruat. Mah thil hna cu Jehovah caah “fihnung” an si. (Deuteronomi 27:15) Jehovah hmuhning ngeih khawh awk le a duhmi lam in biak khawh awkah Jehovah sinah nifate thla cam. (Isaiah 55:9) A hmaan lomi biaknak he aa pehtlaimi zeithil paoh hlawt khawh awkah Jehovah nih na herhmi thazaang aan pek lai kha na zumh khawh.

6. December 25 ah Jesuh chuah ni puai tuah dingin zeicah bia an khiah?

⁶ Christmas puai cu vawleicung ah a min a thang bikmi puai hna lakah pakhat a si ve. Mi tampi nih mah puai cu Jesuh a chuah ni caah kan tuahmi a si tiah an ruah. Asinain Christmas puai cu a hmaan lomi biaknak he aa pehtlaimi a  si. Khrihfa a si lomi Rom mi hna nih December 25 ah nika chuah ni puai an tuah tiah cauk pakhat (encyclopedia) nih a fianter. Church hruaitu hna nih lawkih mi hna kha Khrihfa ah lut hna seh ti an duh. Cucaah Jesuh cu December 25 ah a chuak lo nain mah ni ah Jesuh chuah nipuai tuah dingin bia an khiah. (Luka 2:8-12) Asinain Jesuh zultu hna nih Christmas puai kha an rak tuah lo. Cauk pakhat (Sacred Origins of Profound Things) nih hitin a ti: “Khrih a chuah hnu, kumzabu pahnih tiang mi tlawmte lawng nih Khrih a chuah ni kha hngalh an duh i ahohmanh nih a chuah ni taktak kha an hngal lo.” Christmas puai cu Jesuh vawleicung a um hnu, kumza tampi hnuah tuahmi a si.

7. A hmaanmi Khrihfa hna nih zeicah Christmas puai an tuah lo?

⁷ Mi tampi nih Christmas aa thawknak, nuamhnak le laksawng peknak ti bantuk Christmas phungphai hna cu lawkih mi hna he aa pehtlai ti kha an hngalh. Tahchunhnak ah, hlanah England le American nih an ukmi ram cheukhat ah Christmas puai tuah kha an rak thlauh hna. Zeicahtiah Christmas cu a hmaan lomi biaknak in aa thawkmi a si caah a si. Cun a tuahmi kha dan zong an tat hna. Asinain a hnuah mi nih Christmas puai kha an hun tuah ṭhan. A hmaanmi Khrihfa hna nih zeicah Christmas puai an tuah lo? An tuahmi zeithil paoh in Pathian lunglawmhter an duh caah a si.

8, 9. A hmasa Khrihfa hna nih zeicah chuah ni puai an tuah lo?

⁸ Mi tampi caah a laar ngaimi a dang puai pakhat cu an chuah ni an tuahmi hi a si. Khrihfa hna nih tah chuah ni puai kan tuah awk a si maw? Baibal ah langhtermi chuah ni puai hna cu Jehovah a bia lomi nih an tuahmi a si. (Genesis 40:20; Marka 6:21) Chuah ni puai cu a hmaan lomi pathian thangṭhatnak caah an tuah tawnmi a si. Cucaah  a hmasa Khrihfa hna nih “chuah ni puai tuah kha Khrihfa a si lomi hna tuah tawnmi puai a si tiah an ruah.”—The World Book Encyclopedia.

⁹ Hlanlio Rom mi le Greek mi nih mi pakhat chuah ni ah thlarau pakhat a ra i mah thlarau nih a nunchung vialte a huhphenh tiah an zumh. “Mah thlarau cu, cu pa he an chuah ni aa khatmi khuachia pathian he pehtlaihnak an ngei” tiah Chuah Ni Lei Hlanlio Phunglam (The Lore of Birthdays) timi cauk nih a ti.

10. Tuchan Khrihfa hna nih zeicah chuah ni puai tuah awk a si lo?

¹⁰ A hmaan lomi biaknak he aa pehtlaimi puai hna cu Jehovah nih a cohlan lai tiah na ruat maw? (Isaiah 65:11, 12) A cohlang lo. Cucaah chuah ni puai asiloah a hmaan lomi biaknak he aa pehtlaimi zei puai hmanh kan tuah lo.

11. Mi cheukhat nih puai hna kha zeicah an tuah? Na caah a biapi bikmi cu zeidah a si awk a si?

¹¹ Mi cheukhat nih Christmas puai le a dang puai hna cu a hmaan lomi biaknak in aa thawkmi a si ti kha an hngalh ko nain an tuah ṭhiamṭhiam. Mah puai hna nih an innchungkhar hna he hmunkhat ah caan hmanṭinak caanṭha a kan hmuhter tiah an ruah. Nangtah cutin na ruat ve maw? Na chungkhar he caan hmanṭi na duhmi cu a palh lo. Jehovah cu chungkhar dirhtu a si i na chungkhar he pehtlaihnak ṭha ngei hna seh ti aan duh. (Efesa 3:14, 15) Asinain a hmaan lomi biaknak puai tuahnak thawngin kan chungkhat pawl he pehtlaihnak ṭha ngeih nakin Jehovah he pehtlaihnak ṭha ngeih ding tu kha biapi deuh ah kan chiah awk a si. Cucaah lamkaltu Paul nih “Bawipa a lawmhtertu thil kha kawl i zuam u” tiah a ti.—Efesa 5:10.

12. Jehovah nih a cohlan lomi puai kha zeicah kan hrial awk a si?

¹² Mi tampi nih puai hna i a hram cu khoika in aa thawkmi an si hmanhah a poi lo tiah an ruah, asinain  Jehovah nih cun cutin a ruat lo. A hmaan lomi biaknak in a rami puai le minung asiloah ram pakhatkhat a hlorhmi puai hna kha Pathian nih a cohlang lo. Tahchunhnak ah, Izipt mi nih a hmaan lomi an pathian hna caah puai tampi an tuah. Israel mi nih Izipt ram in an luat hnuah Izipt mi hna tuahmi puai pakhat kha an i cawn i “BAWIPA upatnak caah puai” tiah an ti. Asinain mah puai an tuah caah Jehovah nih dan a tat hna. (Exodus 32:2-10) Lamkaltu Paul nih a chim bantukin “a thiang lomi kha zeihmanh tawng hlah u” sih.—2 Korin 6:17 rel.

13. Puai hna tuah lo dingin bia na khiah tikah zei bantuk biahalnak hna dah na tuah khawh men?

¹³ Puai hna tuah ti lo dingin bia na khiah tikah biahalnak tampi na ngei men lai. Tahchunhnak ah, ka rianṭuan hawile nih zeicah Christmas puai na tuah lo tiah an ka hal ahcun zeitindah ka leh hna awk a si? Pakhatkhat nih Christmas laksawng an ka pek ahcun zeidah ka tuah awk a si? Ka innchunghawi nih amah he puai hna tuahṭi awkah aa ruahchan ahcun zeidah ka tuah awk a si? Chuah ni puai asiloah a dang puai hna kan tuah lo ruangah ka fale an ngaih a chiat nakhnga lo zeitindah ka bawmh khawh hna lai?

14, 15. Mi pakhatkhat nih puai hmanmi bia in aan chawnhbiak asiloah laksawng aan pek ahcun zeidah na tuah khawh?

¹⁴ Thil sining pakhat cio tawnghtham tikah ṭha tein tuaktan thiam a hau. Puai ni ah hmanmi bia in an in chawnhbiak ahcun “kaa lawm” tiah a sawhsawh tein na ti khawh hna. Asinain nan i hmu lengmangmi, na rianṭuanhawi nih cutin an in chawnhbiak ahcun puai na tuah lonak a ruang kha tam deuh in na chimh hna a hau lai. Asinain nem tein, fimhring tein le upatnak tein chim hna. Baibal nih hitin a ti: “Nan biachim, nan holhrel cu a zungzal  in ngaih a nuammi le a ṭhami a si awk a si i ahopaoh kha zeitindah ka chawnh ah a ṭhat bik lai ti hngalh kha nan i zuam lai.” (Kolose 4:6) Cucaah hi bantuk puai hna he aa pehtlai lomi caandang ah midang he caan hmanṭi na duh le laksawng i pek na duh kha na chimh khawh hna.

¹⁵ Mi pakhatkhat nih laksawng an in pek ahcun zeidah na tuah awk a si? Baibal nih phunglam hna kha cazin pakhat in a kan pe lo, asinain chiaṭha thleidan khawhnak lungthin ngeih zungzal awkah a kan forh. (1 Timote 1:18, 19) Laksawng aan petu nih puai hna na tuah lomi kha a hngal men lai lo. Asiloah hitin a ti men lai: “Mah puai na tuah lomi kha ka hngalh ko, asinain mah laksawng te hi pek kaan duh i a si.” Cu bantuk caan ah laksawng ka cohlang lai maw, cohlang lai lo timi kha nangmah tein biakhiahnak na tuah khawh. Zei bantuk biakhiahnak na tuah hmanhah na chiaṭha thleidannak lungthin kha hmang zungzal. Jehovah he kan i pehtlaihnak a hrawk khomi zeithil hmanh tuah kan duh lo.

16. Na chungkhar mi nih puai tuah an duh ahcun zeidah na tuah awk a si?

¹⁶ Na chungkhar mi nih puai tuah an duh ahcun zeidah na tuah awk a si? Anmah he i doh a hau lo. Tuah an duhmi kong he aa tlaiin biakhiahnak nawl an ngei ti kha i cinken. An sinin upatnak hmuh na duh bantukin an i thimmi kha upat law nem tein pehtlaih hna. (Matthai 7:12 rel.) Asinain na chungkhar mi nih an sinah puai tuah ve seh ti an in duh ahcun zeidah na tuah awk a si? Biakhiahnak na tuah hlanah a ṭhami biakhiahnak na tuah khawh nakhnga Jehovah sinah bawmhnak hal. Thil sining kha ruat law mah he aa tlaimi kong kha hlathlainak tuah. A zungzal in Jehovah lunglawmhter na duh kha i cinken.

17. Midang nih puai an tuahmi kha na fale nih an hmuh tikah kan i sungh tuk tiah an ruah sual nakhnga lo zeitindah na bawmh khawh hna?

 ¹⁷ Midang nih puai an tuahmi kha na fale nih an hmuh tikah zeitindah na bawmh khawh hna? Caandang ah na fale caah a hleiin thil pakhatkhat na tuahpiak khawh hna. Laksawng zong na pek khawh hna. Na fale na pek khawhmi hna laksawng lakah a ṭha bikmi cu na caan le na dawtnak kha a si.

18. Zeicah kan i pumh awk a si?

¹⁸ Pathian lungton awkah a hmaan lomi biaknak kha na hlawt a hau, cun a hmaan lomi biaknak he aa pehtlaimi phungphai le puai hna zong hlawt a hau. Mah lengah a hmaanmi biaknak phung zong kan zulh a hau. Zeiti lam in dah? Lamkhat cu Khrihfabu pumhnak ah hmaan tein kan i pumhnak thawngin a si. (Hebru 10:24, 25 rel.) Pumhnak cu a hmaanmi biaknak caah a biapi tukmi a si. (Salm 22:22; 122:1) Hmunkhat i kan i ton tikah pakhat le pakhat tha kan i pe kho.—Rom 1:12.

19. Na cawnmi Baibal biatak kong midang sin chim cu zeidah a biapit?

¹⁹ A hmaanmi biaknak phung zulh khawhnak a dang lamkhat cu Baibal in na cawnmi kong hna midang sinah na chimnak thawngin a si. Mi tampi cu vawleicung ah a cangmi thil ṭhalo kong he aa tlaiin an lungre a thei. Cutin a lungre a theimi mi cheukhat kha na hngalh men ko hna lai. Annih kha a ṭha tukmi hmailei ruahchannak kong chim hna. Hmaan tein i pum law midang kha Baibal biatak kong chim hna, mah tikah a hmaan lomi biaknak he aa pehtlaimi phungphai hna na tlaihchannak cu duhsah duhsah in a tlau ko lai. A hmaanmi lam in amah biak naa zuam tikah Jehovah nih thluachuah aan pek lai i na hun i nuam lai.—Malakhi 3:10.