1, 2. Nang le nang bang na kidot ding kul a, tua pen ba’hang thupi mahmah a hiam?

LAI SIANGTHO na sin sungin Pasian bia takpi ung, a ci mi tampi in Pasian muhdah thute hilh a, a gamtatna uh na sin khin hi. (2 Korin 6:17) Tua ahih manin biakna man lo pawlpi ahi, “A Lian Babylon” pan i paikhiat ding Jehovah in thu hong piakna ahang ahi hi. (Maangmuhna 18:2, 4) Nangh bang na sep ding kisam a hiam? Ei mimal khat ciat in thu i teel kul ahih manin, ‘Pasian in a deih lampi bangin amah ka bia nuam hiam ahih kei leh a tawntunga Pasian ka biak ngeina mah bangin bia nuam ka hi hiam? ci-in ei le ei i kidot ding kisam hi.

² Biakna manlo pawlpi pan tawp khin ahih kei leh nusia khin na hih leh tua pen hoih hi. Ahih hang biakna man lo pawlpite ii ngeina le gamtatna pawlkhatte na lungsim sungah tu dong mah lunggulh khathei lai ding hi teh. Tu’n tua gamtatnate le ngeina pawlkhatte kikumin, tuate Jehovah’ muh bangin en’ zong i muh ding a thupina thute en ni.

3. (a) Pawlkhat in amau biakna-ah milim a zat nawn loh ding ba’hang haksa sa uh a hiam? (b) Milim zang a, Pasian i biak pen Lai Siangtho in bangci gen a hiam?

³ Mi pawlkhat in Pasian a biak nading a inn uhah milim ahih kei leh pasian tau kum tampi sung na zang uh hi. Nang e tua bangin zang na hihleh tuate zang loin Pasian biakna pen lamdangin zong khial saphial ding hi teh. Ahih hang na phawk dingah Jehovah in amah i biak dan ding ei hong hilh hi. Tua banah milim zang a, amah i biak pen Jehovah in deih lo hi ci-in Lai Siangtho in  siang takin hong gen hi.—Paikhiatna 20:4, 5 sim in; Late 115:4-8; Isaiah 42:8; 1 Johan 5:21.

4. (a) A sisa i pu le pate ba’hang bia lo ding ihi hiam? (b) Mi site tawh kiho ding a hanciam loh nading uh Jehovah in ama mite ba’hang gen a hiam?

⁴ Mi pawlkhat in a hun uh le a thatang tampi zangin a sisa amau’ pu le pate a lungkim nading a hanciam uh hi. Zong bia thei uh hi. Ahih hang tua a site in ei hong huh ahih kei leh hong bawlsia thei nawn lo hi, cih i sin khin hi. Tua misite mun khat peuhpeuhah nungta nawn lo uh hi. Man takin gen le’ng, amau tawh kizop ding i hanciamna pen lauhuai zawsop hi. Ba’hang hiam cih leh tua a site kiang pan hong pai thu khempeuh pen man takin gen le’ng, dawite kiang pan ahi hi. Tua ahih manin Israel minamte kiangah mi site tawh kiho ding a hanciam loh nading uh ahih kei leh dawi thoihna tawh kisai khempeuhah a kihel loh nading Jehovah in thu na pia hi.—Thu Hilhkikna 18:10-12; A Nunga Ciaptehna 26 le31 en in.

5. Pasian na biak ciang milim na zat nawn loh nading le pu le pate na biak nawn loh nading bang in hong huh thei ding a hiam?

⁵ Pasian na biak ciang milim na zat nawn loh nading ahih kei leh pu le pate na biak nawn loh nading bang in hong huh thei ding ahi hiam? Lai Siangtho na sim ding le Jehovah’ muh dan thute limtakin na ngaihsut ding kisam hi. Pasian in tua bang thute a “kihhuai” in mu, ahih kei leh mudah hi. (Thu Hilhkikna 27:15) Tua bang thute Jehovah’ muh bangin na muh theih nading ama kiang nisimin thungetna leh ama deihna lampi bangin amah na biak theih nading huhna na ngen in. (Isaiah 55:9) Na nuntakna-ah biakna man lote tawh na kizopna khempeuh na hepkhiat zawh nading na kisap thatang Jehovah in hong pia ding hi cih muan takpina na nei thei hi.

6. December 25 pen Jesuh suah ni-in ba’hang kiteel a hiam?

⁶ Leitung bupah Christmas pawi pen a minthang  mahmah tawlngak ni khat hi a, mi a tamzaw in Jesuh suah ni-in pawi bawlhuai hi, ci-in ngaihsun uh hi. Ahih hang Christmas pen biakna man lo tawh a kizom na hi mawk hi. Namkim laibu khat sungah Pasian um lo Rom-te in December kha 25 ni-in, ni ii suak ni pawi na bawl uh hi ci-in hong hilh hi. Church makaite in Pasian thu um lo tampi Khristian suaksak nuam uh ahih manun Jesuh pen December 25 ni-in a suak loh hang, tua ni pen Jesuh suah ni-in pawi a bawl ding uh khensatna nei uh hi. (Luka 2:8-12) Jesuh’ nungzui te’n Christmas pawi na bawl lo uh hi. Laibu khat in Jesuh a suak zawh kum 200 khawngin “Ama hong suah ni lian, kuamah in thei lo a, mi tawm khat bek in na lunglut hi” ci hi. (Sacred Origins of Profound Things Laibu) Jesuh leitungah hong nuntak zawh kum za tampi khit ciang Christmas pawi bawl kipan hi.

7. Khristian mante in Christmas pawi ba’hang bawl lo uh ahi hiam?

⁷ Mi tampi in Christmas le a ngeina pen Pasian thu um lote pan hong piankhiat lam thei uh a, tua sungah pawi bawlna le letsong piaknate kihel hi. Gentehna, England le America gam mun pawlkhatah Christmas hun a tun ciang pawi bawl ding na kham uh hi. Ba’hang hiam cih leh tua pawi pen Pasian a um lote pan hong kipan ahih man ahi hi. Pawi a bawl kuamapeuh daan kipia hi. Ahih hang a tawpna-ah mi te’n Christmas pawi bawl hong kipankik veve uh hi. Khristian mante in Christmas pawi ba’hang bawl lo uh a hiam? Amau sepna khempeuhah Pasian lungkimsak nuam uh ahih man ahi hi.

8, 9. Khristian masate in suah ni pawi ba’hang bawl lo uh a hiam?

⁸ Mi tampite ading a minthang mahmah adang pawi khat pen amau suah ni ahi hi. Khristiante in suah ni pawi a bawlhuai hiam? Lai Siangtho sunga a om suah ni pawi a kibawl pen Jehovah a bia lo mite’ bawl pawi ahi hi. (Piancilna 40:20; Marka 6:21) A man lo pasiante pahtawi nading  suah ni pawi na bawl uh hi. Tua ahih manin Khristian masate in “khat peuhpeuh in suah ni pawi a bawl leh tua pen Pasian a um lote pawi-in ngaihsun uh hi.”—Leitung bupa Namkim Bu.

⁹ Tanglai Rom le Grik-te in mi khat peuhpeuh a suah ciang ama kiang dawi hong pai-in tua dawi-in tua mihing a nuntak sung teng na cing hi, ci-in um uh hi. “Tua dawi pen tua a suak mihing tawh suah ni a kibang dawi pasian tawh lamdang takin kizopna nei uh hi” ci-in Suah Ni Tawh Kisai Tanglai Ngeina laibu in na ci hi.

10. Tu hunin Khristian te’n suah ni pawi ba’hang bawl lo uh a hiam?

¹⁰ Biakna man lo tawh a kizom pawite Jehovah in deih-in na um hiam? (Isaiah 65:11, 12) Deih lo hi. Tua ahih manin suah ni pawi ahih kei leh biakna man lo tawh a kizom tawlngak ni pawi khat peuhpeuh ka bawl kei uh hi.

11. Mi pawlkhat in tawlngak nite-ah ba’hang pawi bawl uh a hiam? Nang ading a thupipen in bang hizaw a hiam?

¹¹ Mi pawlkhat in Christmas pawi le adang tawlngak nite pen Pasian a um lote kiang pan hong kipan ahihlam thei uh hi, ahih hang tua pawite na bawl suak veve uh hi. Amau’ tua tawlngak ni pen innkuanpihte tawh kimuh khop theihna hunpha-in ngaihsun uh hi. Nang e le, tua pen bangci na sa aa? Innkuanpihte tawh om khawm a, hun na piaknop pen khial lo hi. Jehovah in innkuan na piangsak a, innkuanpihte tawh kizopna hoih i neih ding deih hi. (Efesa 3:14, 15) Ahih hang biakna man lote’ tawlngak nite-ah pawi bawl a, i sanggamte’ lungkim nading i bawl sangin Jehovah tawh kizopna hoih i neihna pen i masuan zawk ding kisam hi. Tua ahih manin sawltak Paul in: “Bangteng in Topa lungkimsak ahi hiam, ci-in kan un,” hong ci hi.—Efesa 5:10.

12. Pawi bawlnate Jehovah in a san theih loh nading bang in piangsak a hiam?

¹² Mi tampi in tawlngak ni pawi tawh kisai hong  piankhiatna thupi kei ci-in ngaihsun uh hi. Ahih hang Jehovah in tua bangin na ngaihsun lo hi. Ama’n biakna man lo pan hong piang tawlngak ni pawite ahih kei leh minam pahtawina lim ahih kei leh mihing pahtawina pawite deih lo hi. Gentehna, Egypt minam te’n a man lo pasiante ading pawi tampi na bawl uh hi. Israel minamte Egypt gam pan hong suahtak khit uh ciang Pasian a um lo Egypt-te’ pawi khat etteh uhin, tua pen “Topa ading pawi” khamna ci uh hi. Ahih hang Jehovah in tua banga pawi a bawlna uh hangin daan na pia hi. (Paikhiatna 32:2-10) Kamsang Isaiah gen mah bangin en’ ‘a nin nate i lawng kei’ ding hi.—Isaiah 52:11 Sim in.

13. Tawlngak ni pawite na bawl nawn loh ding na khensat ciang bang thu teng theinuam kha ding na hiam?

¹³ Tawlngak ni pawite bawl nawn loh ding na khensat ciang thu na theihnop tampi om kha ding hi. Gentehna: Ka naseppih te’n amau’ tawh Christmas pawi ka bawlkhop lohna ahang hong dong leh bang cih ding ka hi hiam? Khat peuhpeuh in Christmas letsong hong pia leh ke’n bang cih ding? Ka innkuanpih in tawlngak ni pawi bawl ding hong lamen leh bang cih ding ka hi hiam? Ka ta te’n amau suah ni ahih kei leh tawlngak ni pawi bawlpih lo ka hih teh a khasiat loh nading bang cih ding ka hi hiam?

14, 15. Khat peuhpeuh in tawlngak ni pawi-ah hong kihelsak nuam ahih kei leh letsong khat hong piak leh nangh bang cih ding na hiam?

¹⁴ Hun simah bang cih ding, bang gen ding cih na khensat ciang i pilna i zat ding thupi mahmah hi. Gentehna, tawlngak ni pawi-ah na kihel ding mi’n hong sap leh, kitheih mawh bawl kul lo hi. “Lungdam ei” ci-a gen thei lel hi teh. Ahih hang tua lai-ah mi khat peuhpeuh in tu-a sangin a theih zawk nop leh tawlngak ni pawi na bawl lohna ahang genpih thei hi teh. Ahih hang a tawntungin lungnem inla, pilvangin zahtak bawl in. Lai  Siangtho in: “Kam na pau uh ciangin mi’ zaknop, mi’ ngaihnop dingin na pau un. Tua hileh na kihopih uh mite khempeuh adingin phattuamna a nei kam a pau na hi ding uh hi,” ci hi. (Kolose 4:6) Midangte tawh kikhawla letsong kipiak pen nuamsa ing, ci-a gen thei hi teh, ahih hang tua tawlngak ni pawite tawh a kizom nate-ah na kisawh khak loh ding na teel kul hi.

¹⁵ Khat peuhpeuh in letsong khat hong pia leh nangh bang cih ding? Lai Siangtho in thukhunte a min kigualin hong pia lo hi, ahih hang kisuanna a om lo lungsim siangtho i kep suak ding hong gen hi. (1 Timoti 1:18, 19) Tawlngak ni pawi na bawl loh lam a thei lo mi khat in letsong khat hong pia leh e. Ahih kei leh ama’n “Tawlngak ni pawi na bawl loh lam thei mah ing, ahih hang hong pia nuam veve ing,” hong ci leh e. Bangbang ahi zongin letsong na san ding le na san loh ding pen na khensat ding kul hi. Ahih hang bangbang na khensat zongin kisuanna om lo lungsim siangtho na kep suak lam kiciansak in. Jehovah tawh i kizopna hong siasak thei bangmah i sem nuam kei hi.

16. Na innkuanpih te’n tawlngak ni pawi bawl nuam le uh nangh bang cih ding na hiam?

¹⁶ Na innkuanpih te’n tawlngak ni pawi bawl nuam le uh nangh bang cih ding? Amau tawh kitot kul lo hi. Na phawk dingah, amau’ bang sem nuam uh hiam cih pen a ut bangun khensat thei uh hi. Nang ii teelna hong zahtak ding uh na ut mah bangin amau teelna zong zahtak inla, migi in. (Matthai 7:12 Sim in.) Ahih hang na innkuanpih te’n tua pawi sungah hong kihelsak nuam leh e, bang na cih tam? Man takin na khensat theih nading Jehovah kiang huhna ngen masa in. A thupiang ngaihsun inla tua thu tawh kisai laibu sungah na zong in. Na phawk dingah Jehovah lungkim nading a tawntungin na sep ding kisam hi.

17. Midang te’n tawlngak ni pawi a bawl uh ciang na tate’n hong kiphawk kha kei ci-a, a khasiat loh nading nangh bang bawlsak thei ding na hiam?

 ¹⁷ Midangte’ tawlngak ni pawi a bawl uh na ta te’n a muh uh ciang amau ading bang bawlsak thei ding na hiam? Khat veivei amau ading na khat peuhpeuh a tuamin gel a, bawlsak thei hi teh. Amau a lungnop nading letsong zong pia thei hi teh. Tua khit teh na tate ading na piak theih a hoihpen letsong khat in na hun le na itna ahi hi.

18. Khristian kikhopnate-ah ba’hang i kikhop ding kul a hiam?

¹⁸ Jehovah a lungkim ding i ut leh biakna man lote a kipan a kisaipih ngeina le tawlngak ni pawite i nusiat ding kisam hi. Ahih hang biakna man i zuih ding zong kisam lai hi. Bangci zuih ding ihi hiam? Lam khatah Khristian kikhopnate manmana kikhopna ahi hi. (Hebru 10:24, 25 Sim in.) Kikhop pen biakna man ii a thupi mahmah panmun khatah na kihel hi. (Late 22:22; 122:1) Kikhopna-ah i kimuh khop ciang khatlekhat tha i kipia thei hi.—Rom 1:12.

19. Na sinsa Lai Siangtho thumante midangte kiang na gen ding ba’hang thupi mahmah a hiam?

¹⁹ Biakna man i zuihna adang khat in, Lai Siangtho pan na sin thute midangte kiang genna ahi hi. Mi tampi in leitunga a piang thusia lasiate hangin lunggim uh hi. (Ezekiel 9:4) Tua banga a lunggim mi pawlkhat na theih omkha ding hi. Mailama na ngah ding a lamdang mahmah lametna thu va gen in. Khristian kikhopna-ah na kikhopna le Lai Siangtho thuman tawh kisai mite kiang na genna in na lungsim sunga om tua biakna man lote le ngeinate hong kiamin hong bei ding hi. Na lung hong nuam ding cih pen kician a, tua banah lampi man tawh Jehovah biak ding na hanciamna ama’n thupha tampi hong pia ding hi.—Malakhi 3:10.