1, 2. ¿Bʉara kʼãrẽ ʉ̃rʉ widibara?

BɄA Daizeze Bedʼea kʼawua wãne, ũdu wã jari ẽbẽra Daizeze kãgabʉ abʉde, wãrĩnubaira jaradiapanʉ akʉza opanʉ Daizezeba kãga ẽãta (2 Corintios 6:17). Maʉ̃ kʼarea Jeowabara jarabʉ ãĩ wãmarẽã religion zeriẽãnebara, iyabaʉta «Babilonia zroma» (Apocalipsis 18:2, 4). Mawũẽra, ¿kʼãrẽta oi bʉara? Dayirã aba abakaʉba krĩchaibara naʉ̃ta: «¿Mʉ̃ara oika Daizezeba kãgabʉta, mawũã ẽ bʉrʉ kãgaika mʉ̃a kãga zebʉrʉ kĩrãkʼa?».

² Bʉta ãĩ wãsibʉrʉ religion zeriẽãneba, bʉara mawũãra bia osi. Mamina bʉa mawũã osidu wabida krĩchabʉ baibara religion zeriẽãne baside obadata. Atia kʼawuadaya kʼãrẽa yibiata Jeowaba akʉbʉ kĩrãkʼa akʉita.

3. (1) ¿Kʼãrẽa zare ʉ̃kʉrʉitara nekʼãrẽ oma neẽã yiwidʼita Daizezeʼa? (2) ¿Kʼaseabʉ Daizeze Bedʼeabara nekʼãrẽ oma ʉ̃rʉra?

³ Ʉ̃kʉrʉ ẽbẽrabara krĩchapanʉ nekʼãrẽ oma erbʉdeba akʉza nekʼãrẽ oma poto erbʉdeba maʉ̃ʼa yiwidʼibʉrʉdera Daizezeba ũrĩbʉta. Bʉa mawũã obʉbʉrʉ, bʉitara zarebayi Daizezeʼa yiwidʼita maʉ̃ neẽãra. Mamina kĩrãbera Jeowaba sãwũã kãgamarẽãbʉta. Daizeze Bedʼeaba jarabʉ, Jeowabara kãga ẽãta maʉ̃ra (akʉra Éxodo 20:4, 5; Salmo 115:4-8; Isaías 42:8; 1 Juan 5:21).

4. (1) ¿Kʼãrẽa yiwidʼi ẽ baibara dayi zõrãrã naweda beikʉadara? (2) ¿Kʼãrẽta jarasi Jeowabara israelitara?

 ⁴ Ʉ̃kʉrʉ ẽbẽrarã ewari jʉrʉbʉ akʉza ãyi zarea jõma diabʉ dayi zõrãrã naweda beikʉada sobiabita. Ʉ̃kʉrʉrãra maʉ̃ʼa yiwidʼibʉ. Daya kʼawuasida, beidabara dayirãra neida oẽãta akʉza dayirã kʼareba ẽãta, adewara beida tẽã zokʼaibʉ ẽãta. Mamina biga ẽ maʉ̃rabawara bedʼeaira, ¿kʼãrẽa? Ẽbẽra badu beidata dayiʉ̃me bedʼeabʉbʉrʉ maʉ̃ra angel kayiruara mawũã dayirã mebẽrã beida ẽ. Maʉ̃ kʼarea Jeowabara jarasi israelitara beidabawara bedʼea ẽ marẽã, akʉza angelera kayiruaba obʉta oda ẽ marẽã (Deuteronomio 18:10-12; akʉra nota 26 akʉza 31ne).

5. ¿Kʼãrẽba kʼarebai poto nekʼãrẽ omaʼa yiwidʼi ẽ baita akʉza dayi zõrãrã naweda beikʉada yiwidʼi ẽ baita?

⁵ ¿Kʼãrẽba kʼarebai poto nekʼãrẽ oma yiwidʼi ẽ baita akʉza dayi zõrãrã naweda beikʉada yiwidʼi ẽ baita? Daizeze Bedʼeata akʉibara akʉza maʉ̃ ʉ̃rʉ krĩchaibara, kʼawuaita Jeowaba kʼãrẽ kãgabʉta. Jeowabara maʉ̃ra igara akʉbʉ (Deuteronomio 27:15). Ewariza iyaʼa yiwidʼibara kʼarebamarẽã iya akʉbʉ kĩrãkʼa akʉbimarẽa akʉza iya kãgabʉ kĩrãkʼa oita (Isaías 55:9). Jeowabara zarea diayi bʉa maʉ̃ kayirua jõma idubʉita akʉza nekʼãrẽ oma yiwidʼi ẽ baita.

6. ¿Kʼãrẽa jidasida 25 diciembrede Jesu toda piesta oira?

⁶ Nabida piestara naʉ̃ drʉa jõmaʉ̃ba ũdukaʉde. Adewara ẽbẽra jõmaʉ̃ba krĩchapanʉ Jesu toda piestata opanʉta, mamina wãrĩnubaira naʉ̃ piestara religion zeriẽãba jaradiada. Enciclopediade jara ũrĩbibʉ Roma nebemarabara ũmadaʉʼa yiwidʼipanasita, maʉ̃ba  poagaza 25 disiembrede piesta opanasi. Nokʼora religionrabara kãgabasi Daizeze ode panʉra ẽãta kristianora bamarẽã, maʉ̃ kʼarea Romanorabara poagaza 25 disiembrede piesta opanasi, Jesura maʉ̃ ewaride toda ẽ basimina (Lucas 2:8-12). Maʉ̃ba Jesu kʼaidubemarabara Nabida piestara oda ẽ. Libro Los orígenes sagrados de las cosas profundas, maʉ̃ librobara jara ũrĩbibʉ 200 poagabayeda Jesu beida ʉ̃rʉ estudiapanasita, mamina mia kʼaiba kʼawuada ẽ basi Jesu kʼãrẽ ewaride todara akʉza ẽbẽrarã wikaʉba kʼawua kĩrãpanasi maʉ̃ ʉ̃rʉra. Adewara Nabida piestara ojʉ̃drʉsida, Jesu beida poaga 300 babʉrʉ tẽã.

7. ¿Kʼãrẽa kristianoarabara Nabida piestara oda ẽ?

⁷ Ẽbẽrarã bioʉba kʼawuapanʉ samaʉ̃ba zebʉrʉta Nabida piesta oira maʉ̃nebʉ yi mebẽrãbawara yiko kʼoita akʉza nekʼãrẽ diaita. Mawũã kʼawuapanʉ baera, pʉwʉrʉ Inglaterradera Nabida piesta oda ẽ marẽã jarasida akʉza ʉ̃kʉrʉ pʉwʉrʉ Norteamerikade. Yi maʉ̃ Nabida piesta obʉrʉra zʉbʉria opanasi. Maʉ̃ tẽã jʉ̃neane akʉza ẽbẽrabara Nabida piesta opanasi. Mamina, ¿kʼãrẽa kristianoarabara Nabida piestara oda ẽ? Jeowaba kãgabʉta ewari jõmaʉ̃nẽ okĩrãpanʉ baera.

8, 9. ¿Kʼãrẽa nabema kristianorabara dayi toda ewari piesta oda ẽ basi?

⁸ Naʉ̃ jõmaʉ̃ drʉade opanʉ dayi toda ewari piestara. ¿Kristianoarabara oibaraka maʉ̃ra? Daizeze Bedʼeaba jarabʉ, toda ewari piesta oda ẽbẽrarã, Daizeze Jeowa kãgapana ẽ basita (Génesis 40:20; Marcos 6:21).  Dayi toda ewari piesta obʉrʉdera daizeze zeriẽãneta opanʉ. Libro enciclopedia ingledebʉba, jara ũrĩbibʉ nabema kristianorabara «kʼawuapanasi dayi toda ewari piesta obʉra, Daizeze odepanʉra ẽãba jaradiadata» (The World Book Encyclopedia).

⁹ Romanoraba akʉza griegoraba ĩjãpanasi wũãwũã tobʉrʉdera angel abaʉba akʉbidata ewari jõmaʉ̃nẽ iyi beiyeda. «Kristianora ẽ bara dayi toda ewari piesta obasi krĩchapanasi baera angelba kʼarebai baera ãyi toda ewari zebʉrʉza» (The Lore of Birthdays [La tradición de los cumpleaños]).

10. ¿Kʼãrẽa kristianoarabara dayi toda ewari piestara oda ẽ?

¹⁰ ¿Jeowabara kãgaka religion zeriẽãba piesta obʉra? (Isaías 65:11, 12). Maʉ̃ra jipa kãga ẽ. Maʉ̃ba idibema kristianorabara dayi toda ewari piestara oda ẽ, akʉza religion zeriẽãba piesta obʉra.

11. (1) ¿Kʼãrẽa ʉ̃kʉrʉ ẽbẽrabara opanʉ Daizeze ode panʉra ẽãba opanʉ piestata? (2) ¿Bʉitara sãʉta audre yibia?

¹¹ Ẽbẽra bioʉba kʼawuapanʉ Nabida piesta oira Daizeze odepanʉra ẽã bʉrʉ opanʉta akʉza maʉ̃ awuara badu piestata opanʉ. Krĩchapanʉ maʉ̃ ewarira yibiata mebẽrãbawara bʼaita. ¿Bʉara mawũã krĩchabʉka? Dayirã mebẽrãbawara ãba bʼaira biga. Jeowabʉrʉ parãsi baera ẽbẽrarã, maʉ̃ba iya kãgabʉ dayirã mebẽrãbawara sobiapanaita (Efesios 3:14, 15). Jeowa neũdukʼawuara bʼaita audre yibia baibara dayirãitara dayi mebẽrãbawara ãba baikaʉde, mawũã religion zeriẽãba piesta obʉta oda ẽ bʼaita. Apostol Pabloba jarasi: «Obara Daizezeba kãgabʉta» (Efesios 5:10).

12. ¿Kʼãrẽ piestata oẽ marẽã jarabʉ Jeowabara?

 ¹² Ẽbẽra jõmaʉ̃ba krĩchapanʉ naʉ̃ piesta oira samaʉ̃ba zeda kʼawuaira nesida ẽãta. Mamina Jeowara mawũã krĩchabʉ ẽ. Jeowabara kãga ẽ dayirãba piesta omarẽã religion zeriẽãba jaradiadata akʉza ʉ̃kʉrʉ pʉwʉrʉita piesta odaira. Bari jaraita, pʉwʉrʉ egisiorãbara mejãcha piesta opanasi daizeze zeriẽãita. Israelita Egitodeba ẽdrʉda tẽã, egisiaba piesta obada kĩrãkʼa ojʉ̃drʉsida ãya maʉ̃ piestata trʉ̃gasida «Jeowa piestata». Maʉ̃ kʼarea Jeowaba ãyira bia wãbi ẽ basi (Éxodo 32:2-10). Isaiasba jarasi: «Nemitiara tõbariraidua» (akʉra Isaías 52:11).

13. ¿Kʼãrẽta krĩchaseabʉ bʉa piesta obada idubʉbʉrʉdera?

¹³ Bʉa naʉ̃ drʉade piesta obʉ amaebʉrʉdera, bʉa krĩchaseabʉ naʉ̃ta: «¿Kʼãrẽta jarai mʉ̃ara mʉ neũdukʼawua trajodebemaba widira kʼãrẽa Nabida piesta oẽãta? ¿Kʼãrẽta oi mʉ̃a nekʼãrẽ biata diabʉdabʉrʉ Nabidade? ¿Kʼãrẽta oi mʉ̃ kimaba jarara piesta Daizezeba kãga ẽãta omarẽã? ¿Sãwũã kʼarebaseabʉ mʉ̃ wũãwũãrarã krĩcha zroma oda ẽ marẽã ãyi toda ewari piesta oẽ kʼarea akʉza ẽbẽrarãba piesta obʉ kʼarea?».

14, 15. ¿Kʼãrẽta oibara bʉa jaradara, «feliz año nuevo» akʉza nekʼãrẽ bia diadara?

¹⁴ Dayirãbara biʼia krĩchaibara naʉ̃ panʉita. Bari jaraita, ẽbẽra abaʉba bʉa jarara, «feliz año nuevo» ¿iyi bedʼeara ũrĩ ẽ baibaraka? Mawũã ẽ, awuarabʉrʉ ibiade jaraibara, «biga». Maʉ̃ba ẽbẽrã abaʉba audre kʼawuakĩrãbʉbʉrʉ kʼãrẽa Nabida piesta oẽãta, bʉa jara ũrĩbiseabʉ maʉ̃ ʉ̃rʉ. Mamina ibiade jaradiaibara.  Daizeze Bedʼeaba jarabʉ: «Bʉ bedʼeabʉra ibiade bedʼeabaibara, tãta wiña edabʉera, kʼawuadamarẽã sãwũã panʉita aba abaka» (Colosenses 4:6). Bʉa jara ũrĩbiseabʉ bʉra bʉ mebẽrãbawara ãba sobia bakĩrãta akʉza nekʼãrẽ bia diakĩrãta, mamina naʉ̃ Nabida piestadera oẽãta.

¹⁵ ¿Kʼãrẽta oi mʉ̃ʼa nekʼãrẽ bia diabʉdadera? Daizeze Bedʼeaba jõma jara ũrĩbi ẽ mina, mamina dayirãbara dayi dobaʉba kʼawuaibara saʉ̃ta yibiata, mawũã krĩcha bia erbaita (1 Timoteo 1:18, 19). Yi ẽbẽra bʉa nekʼãrẽ bia diadabara kʼawua ẽ baibara bʉa Nabida piesta oẽãta. Maʉ̃ta neẽ bʉrʉ ãya jaraseabʉ: «Mʉ̃a kʼawuabʉ bʉara piesta oẽãta mamina mʉ̃ã diakĩrãbʉ nekʼãrẽ biata». Mama bʉa krĩchaibara maʉ̃ jidaita mawũẽ ẽ bʉrʉ jida ẽ baita. Bʉa biʼia krĩchaibara bʉa obʉra yibia kʼawuaita. Dayirãra jʉra kʼawuapanaibara Jeowa neũdukʼawua bakĩrapanʉbʉrʉ.

16. ¿Kʼãrẽta oibara bʉ mebẽrãba naʉ̃ drʉadebʉ piestata okĩrãpanʉbʉrʉ?

¹⁶ ¿Kʼãrẽta oibara bʉ mebẽrãba naʉ̃ drʉadebʉ piestata okĩrãpanʉbʉrʉ? Ãyibawara kʼaikʼaiarãra. Kĩrãbera ãyara oseabʉta ãyimabʉta. Maʉ̃ kʼarea ibiade bedʼebara akʉza wawiara ãya kʼãrẽ obʉrʉra, bʉme ibiade bamarẽãbʉ kĩrãkʼa (akʉra Mateo 7:12). Mamina, ¿bʉ mebẽrãba kãgapanʉbʉrʉ bʉta ãyibawara piestade bamarẽã? Bʉa nekʼãrẽ oi naweda, Jeowa widida kʼarebamarẽã bʉa aripe oita. Adewara krĩchara maʉ̃ ʉ̃rʉ akʉza jʉrʉda maʉ̃ ʉ̃rʉ bedʼeabʉta. Kĩrãduarãra, bʉa oibarata Jeowaba kãgabʉta.

17. ¿Kʼãrẽta oibara bʉ wũãwũãraba krĩchada ẽ marẽã wuabemaraba piesta obʉra audre yibiata?

 ¹⁷ ¿Kʼãrẽta oibara bʉ wũãwũãraba krĩchada ẽ marẽã wuabemaraba piesta obʉra audre yibiata? Ewari jʉrʉda bʉ mebẽrãbawara bia berabarita. Adewara bʉara nekʼãrẽ biata diaseabʉ ãyaʼa. Bʉa audre nebia diabʉrʉ kĩrãkʼa oyi, ewarita jʉrʉra ãyibawarabaita akʉza bʉ kãgata ũdubira.

18. ¿Kʼãrẽa wãibara kristianora ãba yi jʉrebarima?

¹⁸ Dayirãba Jeowata sobiabikĩrãpanʉbʉrʉ amaeibara religion zeriẽãta akʉza mama jõma opanʉta akʉza jʉrʉibara religion wãrĩnuaraba opanʉta. ¿Sãwũã jʉrʉibara? Wãibara kristianora ãba yi jʉrebarima (akʉra Hebreos 10:24, 25). Mama wãira audre yibia, mama kʼawuapanʉ baera Daizeze ʉ̃rʉ (Salmo 22:22; 122:1). Akʉza dayirãi zarea diapanʉ (Romanos 1:12).

19. ¿Kʼãrẽa yibia dayirãba Daizeze Bedʼea ʉ̃rʉ kʼawua wãra awurua jaradiaita?

¹⁹ Bʉta religion wãrĩnuarade bakĩrãbʉbʉrʉ, bedʼeaibara wuabemabawara bʉa Daizeze Bedʼeade kʼawua wãta. Ẽbẽra mejãchaʉta krĩcha zroma opanʉ zʉbʉriata ũdupanʉ baera naʉ̃ drʉade. Mʉ̃a kʼawuaita bʉara ũdubaribaibara mawũãbʉ ẽbẽrarã, maʉ̃rata ũdukʼawuabʉbʉrʉ jaradiara, Daizezeba ʉ̃rabʉrʉ kʼãrẽ nebia weita. Bʉ kristianora ãba yi jʉrebarima wãbʉde, akʉza Daizeze ʉ̃rʉ kʼawuadata awurua jaradiara, kʼawuayi religion zeriẽãne bakĩrã ẽãta akʉza ãya obʉta okĩrã ẽãta. Bʉra sobia baseabʉ, akʉza Jeowaba kʼarebayi, adewara iyi zarea diayi iya kãgabʉta obʉ kʼarea (Malaquías 3:10).