1, 2. Dhɛɛˈˈ ˗mɛɛn ˈü ꞊mɔɔn˗ ˗bha ˈü˗ ˈkpɔ ü ˗de ˗gɔ, ˈyö ˗mën ˈö ˗kë ˈö˗ ˈkpɔ ˗sü ˈdhö ˗së?

Ü ˗BHA Biblö draansü ˈgü, ü˗ ˈgüman ꞊dhɛ mɛn ꞊vadhɛ ˈwo˗ pö wo ˗de ˗dhɛ ꞊dhɛ wo ˗Zlan ˗dhɔkë, ˗an ˗kɔ ˗yö ꞊kun pë ˗nu ˈwo ˗Zlan ˗dhɛ ˈyaa˗ ˗a pö ˗sü ɛɛnˈˈ ˗a kë ˗sü ˗bha. (2 Kodhɛngtö 6:17) ˈPë ˗kë ˈö Zoova ˗ya pö ˈkwa ˈgo ꞊sua ˗zlanwo ɛɛnˈˈ “Babidhɔnö ˈKpii˗” ˈgü ˈyö bhë. (˗Dhɛkpaɔ dhiaˈˈ ˈsëëdhɛ 18: 2, 4) Ü ˗dho ˗a kë ꞊dhɛ? ˈMɛn ˈö ˈdhö ˗a dua ˗mü kö ˗yö ö ˗kɔ ˈˈyɛ pë ˈö ˗dho ˗a kë ˈwɔn bhë˗ ˈgü ˗a ˗bha, kö ˗yö ö ˗de dhɛɛˈˈ ˈkpɔ ꞊dhɛ: ‘A˗ ˈˈpiʋ̈ kö ˈa ˗Zlan ˗dhɔkë ˗kɔ ˈö˗ ˗zo kun ˗a ˈka ˗ee, ɛɛnˈˈ a˗ ˈˈpiʋ̈ kö ˈa ˗klu ˗kɔ ˈa˗ ˗dhɔkë ˗a ˈka ˗be ˗a ˗bha ˗ee?’

² ꞊Ya kë ꞊dhɛ ˈbha ˈgo ꞊sua ˗zlanwo ˈgü ˈsaadhö ɛɛnˈˈ ˈö ˈbha˗ pö ˗an ˗dhɛ ꞊dhɛ ˈmaan ˈka ˈˈpiʋ̈ ˈzüdho, kö ˈbha˗ kë ˗së. ˈˈKɛɛ ˈkwa ˗dhɛga ˗a ˈgü ˗së ˈka, ꞊sua ˗zlanwo ˈgümɛn ˗nu ˗bha wɔkɔ ɛɛnˈˈ ˗an këwɔn ˈbhaa ˗nu ˗dhɔ ꞊mɔɔn˗ ˗bha ˈö ˗kë ü ˗bha. ˗An ˗bha wɔkɔ ɛɛnˈˈ ˗an këwɔn ˗nu ˈwo bhë, ˗kwaa ˈbhaa ˗wɔn blɛɛˈˈ kö ˈpë ˗kë ˈö ˗së kö ˗kɔ ˈö Zoova ˗yö ˗an yö˗ ˗bha ˈkwa ˗an yö˗ ˗bha ˈpö bhë ˈkwa˗ dɔ.

3. (a) ˈMën ˗kë ˈö ˗kwaa pë ˈˈbin ˗nu ˗zü ˗sü ˈö ˗Zlan ˗dhɔkësü ˈgü ˈö ꞊mɔɔn˗ ˗bha ˈö kë mɛn ˈbhaa ˗nu ˗gɔ ˈˈgbɩɩ˗?(b) ˈMën Biblö ˗ya pö ˈö ˗gban ˗bɔ pë ˈˈbin ˗ta sü kö ˈkwa ˗Zlan ˗dhɔkë ˗a ˗bha?

³ ˗Kwɛ ꞊va ꞊dede ˈˈpiʋ̈, mɛn ˈbha ˗nu ˗wo bɔ pë ˈˈbin ɛɛnˈˈ ˗Zlan ˗dhɔkëdhɛ ˗nu ˈwo˗ ˗pëkë wo ˗gɔ ˈkɔɔ ˗an ˗ta ˈyö ˈwo ˗Zlan ˗dhɔkë. ꞊Ya kë ꞊dhɛ ˈü˗ kë ˈˈdhʋ̈, kö ˗Zlan ˗dhɔkë ˗sü kö pë ˗nu ˈwo bhë ˈwaa ü ˗gɔ bhë, ˗yö ꞊mɔɔn˗ ˗bha ˈö ˗kë ü ˈgü suu  ˈbha ˈka ɛɛnˈˈ ˈö ˗kë ü ˗dhɛ ˈyaa ˗ʒiaanwo. ˈˈKɛɛ ˗yö kë ü ˈˈɲaan ꞊dhɛ Zoova ˗ya ö ˗dhɔkë ˗kɔ ˗zɔn kwa ˗dhɛ. Biblö ˗ya ˗pö ˈˈpuu ˈka kwa ˗dhɛ ꞊dhɛ Zoova ˈyaa˗ ˈˈpiʋ̈ kö ˈkwa bɔ pë ˈˈbin ˗nu ˗ta kö ˈkwa ö ˗dhɔkë.—Exode 20:4, 5 ˗wo pö; Psaume 115:4-8; Isaïe 42:8; 1 Zan 5:21.

4. (a) ˈMën ˗kë ˈö kwa dua ˈyaa ˗mü kö ˈkwa ˈˈsaa˗ ˗bho kwa ˈˈbheman ˗nu ˈö ꞊wa ga ˗an ˈˈdhiʋ̈ ɛɛnˈˈ kö ˈkwa ˈwɔn blɛɛˈˈ ˗an ˗dhɛ? (b) ˈMën ˗kë ˈö Zoova ˗ya pö ö ˗dhɔkëmɛn ˗nu ˗dhɛ ˈwa ˗dho ˈwɔn blɛɛˈˈ mɛn ˗nu ˈö ꞊wa ga ˗an ˗dhɛ?

⁴ Mɛn ˈbhaa ˗nu ˗wo wo ˗bha ˈˈtʋ̈ŋ ˗sü, ˈö ˈwo wo ˈgü dɔ ˈˈgbɩɩ˗ kö ˈwo kë wo ˈˈbheman ˗nu ˈö ꞊wa ga ˗an ˗dhɛ ˗së. ˗Wo ꞊mɔɔn˗ ˗bha ˗ʒiaanwo ˈwo ˈˈsaa˗ bho ˗an ˈˈdhiʋ̈ ɛɛnˈˈ ˈwo ˈˈyi yö ˈˈshia˗ ˗an ˈtɔ ˈgü. ˈˈKɛɛ ˈkwa˗ man ꞊dhɛ mɛn ˗nu ˈö ꞊wa ga ˈwaa ꞊mɔɔn˗ ˗bha ˗wo kwa ˗takun ɛɛnˈˈ ˗wo pë yaa kë kwa ˈka. ˈWaa ˗dhɛ ˈˈwɛɛ ˈbha ˈgü. ˗A ˈˈslö mɛɛnˈˈ ˗sü kö ˈkwa ˈwɔn blɛɛˈˈ ˗an ˗dhɛ bhë yö ˈyaa˗ ꞊dedewo, ˈyö ˈtɔ˗ ꞊dhɛ ˗wo ˗nu ˈwo ˗kë ꞊dhɛ ˈpë ˈwo go mɛn ˗nu ˈö ꞊wa ga ˗an ˈˈdhii ˗a ˈdhö bhë, gagade ˈka ˗wo ˗go ˗zuu yaa ˗nu ˈˈpiʋ̈. ˈPë ˗kë ˈö Zoova ˗ya pö Izraɛdhö ˗mɛn ˗nu ˗dhɛ ˈwa ˗dho ˈwɔn blɛɛˈˈ ˈmɛn ꞊wa ga ˗an ˗dhɛ ɛɛnˈˈ ˗an ˗kɔ ˈyaa ˗dho kë dü suu ˈˈwɛɛ ˈbha ˈgü, ˈyö bhë.—Deutéronome 18:10-12; ˗bhö kpɔɔˈˈ ˗zoto ˗a ˈˈpiʋ̈ ˗wɔn 26 waa 31 ˗bha.

5. ˈMën ˗dho ü ˗takun kö ˈü ˈˈkan ˗bɔ pë ˈˈbin ˗ta ˗sü kö ˈü ˗Zlan ˗dhɔkë ˗a ˗bha, ɛɛnˈˈ kö ˈü ˈˈkan ˈˈsaa˗ ˗bho ü ˈˈbheman ˗nu ˈö ꞊wa ga ˗an ˈˈdhiʋ̈ ˗sü waa ˈwɔn ˗blɛɛ ˗an ˗dhɛ ˗sü ˗bha?

⁵ ˈMën ꞊mɔɔn˗ ˗bha ˗yö ü ˗takun kö ˈü ˈˈkan pë ˈˈbin ˗nu ˗bha ü ˗bha ˗Zlan ˗dhɔkësü ˈgü ɛɛnˈˈ kö ˈü ˈˈkan ˈˈsaa˗ ˗bho ü ˈˈbheman ˗nu ˈˈdhiʋ̈ ˗sü waa ˈwɔn ˗blɛɛ ˗an ˗dhɛ ˗sü ˗bha? Ü ˗bhawɔn ˗yö Biblö ˗wo pö ˗sü ˗bha, kö ˈü ü ˗zota ꞊dedewo ˗kɔ ˈö Zoova ˗yö pë ˗nu bhë ˗an yö˗ ˗bha ˗a ˈgü. ˗Wa ˗dhɛ “˗ɲënŋsü”. (Deutéronome 27:15) ˗Bhö bhɛɛˈˈ Zoova ˗dhɛ ˗dhɛkpaɔyi ˈˈpɛpɛ ˈka kö ˗yö ü ˗takun kö ˈü ˈwɔn ˗nu yö ꞊dhɛ ˗a ˈdhö, kö ˈü˗ ˗dhɔkë ꞊dhɛ ˗kɔ ˈö˗ ˈˈpiʋ̈ ˗a ˈdhö. (Isaïe 55:9) ˗Yö kë ü ˈˈɲaan ꞊dhɛ Zoova ˗dhö ꞊faan ˈö ü ˗bhawɔn ˈdhö˗ ˗bha ˗a nu ü ˗dhɛ, kö ˈü ˈˈkan pë ˈˈpɛpɛ ˈwo ˗gban ˗a ˗dhɔkë ˗kɔ yaa ˗bha ˗an ˗bha.

6. ˈMën ˗kë ˈwo Yesu bhɔ ˈwlaan˗ ˗ya Desanblö ˗dhɛkpaɔyi 25 ˗bha?

⁶ ˈˈKpɔnŋtaadhɛ ˗todhʋ̈sü ˈgü, ˈwlaan˗ ˗nu ˈö ˗an kë ˗sü ˈdho ˗mɔn ˗sü ˈka, ˗a do ˈnën ˈtɔ˗ Nowɛ. Mɛn ꞊vadhɛ wo ˗zota ꞊dhɛ Yesu bhɔ ˗yi  ˈwlaan˗ ˗mü. ˈˈKɛɛ Nowɛ kë ˗sü ˗yö ˗gban ꞊sua ˗zlanwo ˗bha. ˈSëëdhɛ ˗be do ˈbha ˗ya ˗pö ꞊dhɛ paɛn ˗nu ˈwo kun Wlɔmö, ˗wo ˗kun ˈɲënŋ˗ bhɔ ˗dhɛkpaɔyi ˈwlaan˗ kë ˗ni ˈgü Desanblö 25 ˈka. ˗Yö ˗kun ˗zlanwo ˗gɔdhiʋ̈mɛn ˗nu ˈˈpiʋ̈ ꞊dhɛ paɛn ꞊vadhɛ kë Kletiɛn ˈka. ˗A ˗wɔn ˈgü, ˈkö˗ ˗dee ˈö Yesu yö ˈti bhɔ Desanblö 25 ˈka, ˈyö ˈwo˗ bhɔ ˈwlaan˗ ˗ya ˗dhɛkpaɔyi ˈö bhë ˗a ˗bha. (Dhukö 2:8-12) Yesu ˗bha gwëëˈˈ ˗nu wo ˈti Nowɛ kë toŋtoŋdhö. ˈSëëdhɛ ˗be do ˈbha ˈwo˗ ˗dhɛ Les origines sacrées de choses profondes (angl.) ˗ya ˗pö ˈdhɛ Yesu bhɔ ˈö ˗kwɛ 200 ˗ʒiö, “kö Yesu bhɔ ˗dhɛkpaɔyi ꞊dede ˈyaa mɛn gbɛ˗ ˈˈɲaan, kö ˗an ˈˈtʋ ˗ʒiaan ˈyaa˗ ˗bha.” ˈDhɛ Yesu go ˈˈkpɔnŋ ꞊taa ˗a ˗kwɛ ꞊këŋ ꞊va ꞊dede ˗ʒiö ˈyö ˈwo ꞊kun ˗ya Yesu bhɔ ˗yi ˈwlaan˗ kë ˗sü ˗bha.

7. ˈMën ˗kë ˈö Kletiɛn ꞊dede ˗nu ˈwaa Nowɛ kë?

⁷ Mɛn ꞊vadhɛ ˗wa ˈwɔn ˗dɔ ꞊dhɛ Nowɛ kë ˗sü waa˗ wɔkɔ ˗nu ˈwo ˗kë ꞊dhɛ ˗a ˈwlaan˗ kë ˗kɔ ˗nu waa˗ gbɔɔdhe kë ˗sü ˗nu ˈdhö bhë, ˗wo ˗go paɛn ˗nu ꞊kwɛɛ˗. ˗A ˈwɔnzuan ˈnën ˈtɔ˗ ꞊dhɛ ˈˈtʋ̈ŋ ˈbha ˈgü, ˈwaa kun ˈˈwɩ ˗ni ˈgü ˗a ˗bha kö ˗wo Nowɛ kë Angletɛɛ ˈˈsɛ waa ꞊Mlɛnkɛn ˈˈsɛ ˈbhaa ˗nu ˈgü, ˈyö ˈtɔ˗ ˗a ˗gɛn ˗go paɛn ˗nu ꞊kwɛɛ˗. Mɛn ˈˈoo ˗mɛn ˈö ˈwlaan˗ bhë˗ ˗kë, ˗wo ˈwɔn ˗bho ˗a ˈgü. ˈˈKɛɛ ꞊dɛɛ mɛn ˗nu ˗wa ˗ya ˗a kë ˗sü ˗bha mü ˈzü ˗dɛɛwo. ˈMën ˗kë ˈö Kletiɛn ꞊dede ˗nu ˈwaa Nowɛ kë? ˈYö ˈtɔ˗ ˗wa ˈˈpiʋ̈ ˈwo kë ˗Zlan ˗dhɛ ˗së pë ˈˈpɛpɛ ˈwo ˗dho ˗an kë ˗a ˈgü.

8, 9. ˈMën ˗kë Kletiɛn ˗nu ˈwo kun ꞊kwɛŋzü wo ˈti mɛn bhɔ ˗yi ˈwlaan˗ kë?

⁸ ˈWlaan˗ do ˈbha ˈö˗ kë ˗sü ˈdhö ꞊mɔn ˗sü ˈka ˗dhɛ ˈˈpɛpɛ ˈgü ˈzü ˈyö ˈtɔ˗ mɛn bhɔ ˗yi ˈwlaan˗. Kletiɛn ˗nu ꞊mɔɔn˗ ˗bha kö ˗wo mɛn bhɔ ˗yi ˈwlaan˗ kë ˗ee? Mɛn bhɔ yi ˈwlaan˗ ˈö Biblö ˗ya  ˗wɔn ꞊blɛɛ, mɛn ˗nu ˈwo˗ ˗kë ˈwaa kun Zoova ˗dhɔkëmɛn ˗nu ˈka. (ˈWunzüdɔdhɛ 40:20; Makö 6:21) ˗Wo mɛn bhɔ ˗yi ˈwlaan˗ ˗kë kö ˈwo ꞊sua ˗zlan ˗nu ˈtɔ bhɔ. ˈPë ˗kë ˈö Kletiɛn ˗blɛɛsü ˗nu “˗wo mɛn bhɔ ˗dhɛkpaɔyi ˈwlaan˗ ˈˈpɛpɛ sü ꞊dhɛ paɛn ˗nu ˗bha wɔkɔ ˈdhö, ˈyö bhë.”—The World Book Encyclopedia.

⁹ Wlɔmö ˗mɛn ˗nu waa Glɛkö ˗nu ˈwo kun ꞊kwɛŋzü, ˗wo wo ˗zota ꞊dhɛ mɛn ˈö ˈdhö ˗yö ˗bhɔ ˗zuu ˈbha ˈˈɲaan. ˗A ˗zuu ˈö bhë ˗yö ꞊mɔɔn˗ ˗bha ˈö ö ˗kɔ kpa ˗a ˗mɛn ˗ta ˗a ˗bha ˗tosɛta ˈgü. ˈSëëdhɛ ˗be ˈwo˗ ˗dhɛ Coutumes et usages des anniversaires (angl.) ˗ya ˗pö: “Mɛn ˗nu ˈö ˈwaa kun Kletiɛn ˈka ˈˈtʋ̈ŋ bhë˗ ˈgü, ˗wo mɛn bhɔ yi ˈwlaan˗ ˗kë ˈyö ˈtɔ˗ ꞊dhɛ ˗a ˗kë ˈˈdhʋ̈ ˗sü ˗dho ˗a kë ˈö ˗an ˗bha ˗zlan ˗nu wo ˗kɔ kpa mɛn ˈö˗ bhɔ ˗yi ˈwlaan˗ ˈdhö bhë ˗a ˗ta.”

10. ˈMën ˗kë Kletiɛn ꞊dede ˗nu ˈwo ꞊dɛɛ ˈwaa mɛn bhɔ ˗yi ˈwlaan˗ kë?

¹⁰ Ü ˗bhaa ˈgü, ˈwlaan˗ ˗nu ˈwo ˗gban ꞊sua ˗zlanwo ˗nu ˗bha ˗wo ꞊mɔɔn˗ ˗bha kö ˗wo kë Zoova ˗dhɛ ˗së ˗ee? (Isaïe 65:11, 12) ˗Abin, ˈwaa ꞊mɔɔn˗ ˗bha. ˈPë ˗kë ˈö ˈkwaa mɛn bhɔ ˗yi ˈwlaan˗ waa ˈwlaan˗ ˈˈpɛpɛ ˈwo ˗gban ꞊sua ˗zlanwo ˗bha ˗an kë ˈyö bhë.

11. ˈMën ˗kë ˈö mɛn ˈbhaa ˗nu ˗wo ˈwlaan˗ ˗nu ˗kë? ˗Mën ˈö˗ dua ˈdhö ˗mü kö ˗yö kë ü ˗dhɛ ꞊bhlëësü?

¹¹ Mɛn ꞊vadhɛ ˗wa ˈwɔn ˗dɔ ꞊dhɛ Nowɛ waa mɛn bhɔ ˗yi ˈwlaan˗ kë ˗sü ˗go paɛn ˗nu ꞊kwɛɛ˗, ˈˈkɛɛ ˗wa ˗kë ˗kplawo. ˗Wa ˗pö ˈwlaan˗ ˗nu kë ˈˈtʋ̈ŋ ˈö bhë, ˈˈtʋ̈ŋ ˗së ꞊dede ˈö ˈkɔdhigümɛn ˗nu ꞊mɔɔn˗ ˗bha ˗wa kë wo ˈkwëë˗ yö ˗mü. Ü˗ ˗yö ˈˈdhʋ̈ ˈpö ˗ee? ˈBha˗ pö kaa ü ˗bha ˈkɔdhigümɛn ˗nu ˈka kë ka ˈkwëëdhö kö ˈwɔn yaa ˈyaa ˗mü. Zoova ˈnën ˈkɔdhi ˗nu ˗da. ˗Ya ˈˈpiʋ̈ kö ˗a ˈgümɛn ˗nu ˈkwa kë kwa ˈko ˈˈpiʋ̈ ˗së ˈka. (Efɛzö 3:14, 15) ˈˈKɛɛ kwaa Zoova kwa ˗bha ˗mlɛɛn ˗sü ˗së ˗sü ˗yö ꞊bhlëësü ˈö ˗ʒiö ˗a ˈka ꞊sua ˗zlanwo ˗nu ˗bha ˈwlaan˗ kë ˗sü kö ˈkwa kë kwa ˗bha mɛn ˗nu ˗dhɛ ˗së ˗sü ˗ta. Yö ˈnën˗ ˗wɔn ˈgü ˈö bɔmɛn Pɔdhö ˗ya pö: “˗Ka ka ˗zʋ ˈgɔn ˗së ꞊dede ˈka kö ˈwɔn ˈdhɛ ˈka˗ kë ˈö˗ ˈˈdhia˗ dho ˈma kwa Dëmɛ bha˗ ˈgü ꞊në ˈka˗ kë.”—Efɛzö 5:10.

12. ˈMën ˗kë ˈö ˈwlaan˗ ˈbha ˗nu ˗kë Zoova ˗dhɛ ˈyaa˗?

¹² Mɛn ꞊vadhɛ ˗wo wo ˗zota ꞊dhɛ ˈwlaan˗ ˗gɛn  ˈgodhɛ ˈyaa ˈwɔn ˈbhaa ˈka, ˈˈkɛɛ Zoova ˗bha ˈwɔn yö ˗kɔ ˈyaa kë ˈˈdhʋ̈. ˈWlaan˗ ˈö˗ kë ˗sü ˗gɛn ˗yö go ꞊sua ˗zlanwo ˈgü ɛɛnˈˈ ˈö mɛnbhɩɩdhe waa ˈˈsɛ ˗nu ˈtɔ bhɔ ˗a ˗dhɔ ˈyaa˗ kë. ˗A ˈwɔnzuan ˈnën ˈtɔ˗ Eʒitö ˗mɛn ˗nu ˗kun wo ˗bha ꞊sua ˗zlan ˗nu ˗dhɔkë ˈwlaan˗ ꞊va kë ˗ni ˈgü. ˈDhɛ Izraɛdhö ˗mɛn ˗nu go Eʒitö ˈˈsɛ ˈgü, paɛn ˗nu ˗bha ˈwlaan˗ ˈö bhë, ˗a do ˗yö ˗to ˗an ˗kɔ ˈgü, ˈyö ˈwo˗ ˗dhɛ “Zoova ˗dhɔkë ˈwlaan˗.” ˈˈKɛɛ Zoova ˗yö ˈwɔn ˗bho ˗an ˈgü ˗a ˗kë ˈˈdhʋ̈ ˗sü ˗wɔn ˈgü. (Exode 32:2-10) Kwa dua ˈyaa ˗mü kö ˈkwa kwa “˗kɔ ˈˈyɛ pë ˗dhiisü ˗bha” ꞊dhɛ ˗kɔ ˈö Izai ˗ya pö˗ ˈka ˗a ˈdhö.—Isaïe 52:11 ˗wo pö.

13. ˈBha˗ pö ˈü ü ˗kɔ bho ˈwlaan˗ ˈbhaa ˗nu ˈgü, dhɛɛˈˈ ˗mɛɛn ˗nu ˈü ꞊mɔɔn˗ ˗bha ˈü ˗an kpɔ ü ˗de ˗gɔ?

¹³ ˈBha˗ pö ˈü ˈˈkan ˈwlaan˗ ˈbhaa ˗nu kë ˗sü ˗bha, dhɛɛˈˈ ꞊vadhɛ ꞊mɔɔn˗ ˗bha ˈwo nu ü ˗zo ˈˈpiʋ̈. Ü ꞊mɔɔn˗ ˗bha ˈü˗ pö ü ˗de ˗dhɛ ꞊dhɛ: Kö ˈmɛn yaa˗ ˗nu ˈyi yö ˗kë ˗dhɛ do ˈgü ˗wo n dhɛɛˈˈ ˈkpɔ ꞊dhɛ ˈmën ˗kë ˈmaan Nowɛ kë, ˗a ˗dho ˗a pö ꞊dhɛ? Kö mɛn ˈbha ˗yö gbɔɔ n ˗gɔ Nowɛ yi ˈka, a ˗dho ˗a kë ꞊dhɛ? ꞊Ya kë ꞊dhɛ n ꞊gɔn ɛɛnˈˈ n ˗bha dhebɔ ꞊yaa˗ pö ˈa gbɔɔ ö ˗gɔ Nowɛ yi ˈka, ˗a ˗dho ˗a kë ꞊dhɛ? A ˗dho n ˗bha ˈnën ˗nu ˗takun ˗kɔ ˗kë ꞊dhɛ kö wo ˈti wo bhɔ yi ˈwlaan˗ ɛɛnˈˈ ˈwlaan˗ ˈˈwɛɛ kë ˈwa ˗dho kë ˗wëë ˗sü?

14, 15. Kö mɛn ˈbha ˗yö ü ˈˈyʋʋsü ɛɛnˈˈ kö ˗yö gbɔɔ ü ˗gɔ ˈwlaan˗ yi ˈka, ü ˗dho ˗a kë˗ ꞊dhɛ?

¹⁴ Pë ˈkwa ˗dho ˗a pö ɛɛnˈˈ ˈkwa ˗dho ˗a kë ˈwɔn ˗nu bhë ˗an ꞊gban ˈˈpɛpɛ ˈgü, ˗yö ˗së kö ˈkwa˗ kë ꞊kpɔɔdhɛ ˈka. ˗A ˈwɔnzuan ˈnën ˈtɔ˗ kö mɛn ˈbha ˗yö ü ˈˈyʋʋ ˈsü ˈwlaan˗ yi ˈka, ü dua ˈyaa ˗mü kö ˈü˗ ˗wo bho ü ˈˈtʋʋ. ꞊Ya kë ˈˈdhʋ̈, ü ꞊mɔɔn˗ ˗bha ˈü˗ pö: “꞊Ao ü ˈˈnuɛ ˈgbɛ.” ˈˈKɛɛ ꞊ya kë ꞊dhɛ mɛn ˈbha ˗ya ˈˈpiʋ̈ ˈpë ˗kë ˈö ˈbha ˈwlaan˗ ˈbha kë ˈö˗ ˗gɛn dɔ, ü dua ˗mü kö ˈü˗ ˗gɛn pö ˗a ˗dhɛ. ˈˈKɛɛ ü ˈˈdhiidhɛ ˗yö kë ˈˈnɛɛnnɛn, ˈü ˈwɔn ˗nu kë ˗gleŋ ˈka, mɛn ˗nu ꞊bhlëë ˈgü. Biblö ˗ya ˗pö: “Ka ˗wʋ ˗yö kë ˈˈnɛɛnɛɛ yi ꞊gban ˈˈpɛpɛ  ˈka kö mɛ ˈˈʋʋ mɛ ˈö ꞊yaa˗ ma, kö˗ din˗ ˈto˗ ˗mɛ ˈˈtʋʋ, kö ˈka mɛ ˈö ˈˈdhʋ̈ ˗a ˗bha dhiang ˗yɔ bɔ ˗kɔ mɔɔ˗ kö ˈka˗ bɔ˗ ˈka˗ ˗mɛ ˗gɔ.” (Kodhɔsö 4:6) ˗A ˈbha ꞊ya kë ü ꞊mɔɔn˗ ˗bha ˈü˗ pö ˗kë mɛn ˈˈwɛɛ ˗nu ˈˈpiʋ̈ ˗sü ˈö ˈka gbɔɔdhe ˗nu ˗kë ka ˈko ˗gɔ ˗a ˗dhɔ ˗yö ü ˗kë, ˈˈkɛɛ ˈbhaa˗ ˈˈpiʋ̈ ˗yö kë ˈwlaan˗ ˗nu bhë ˗an yi ˈka.

¹⁵ Kö mɛn ˈbha ˗yö gbɔɔ ü ˗gɔ, ü ˗dho ˗a kë ꞊dhɛ? ˈPë ˈkwa ˗dho ˗an kë Biblö yö ˈti ˗an ꞊gban pö kwa ˗dhɛ, ˈˈkɛɛ ˗ya ˗pö ˈkwa˗ kë ˗së kö kwa zuʋ̈ˈˈ ˈya ˗dho za dɔ kwa ˗bha. (1 Timote 1:18, 19) ˗A ˈbhaa ꞊ya kë mɛn ˈbha ꞊mɔɔn˗ ˗bha ˈö gbɔɔ ü ˗gɔ ˈˈkɛɛ kö ˈyaa˗ ˈwɔn dɔ ꞊dhɛ ˈbhaa ˈwlaan˗ ˈö bhë ˗a kë. Mɛn ˈbhaa ꞊mɔɔn˗ ˗bha ˈzü ˈö˗ pö: “A˗ ˈwɔn dɔ ꞊dhɛ ˈbhaa ˈwlaan˗ ˈö ꞊dɛɛ ˗a kë, ˈˈkɛɛ ˗yö n ˈˈpiʋ̈ ꞊dhɛ ˈa ˈpë yö ˗a gbɔɔ ü ˗gɔ.” Gbɔɔdhe ꞊plɛ ˈwo bhë, ü ˗bha ˗kɔ ˗an ˈka ˗sü ɛɛnˈˈ ü ˗bha ˗kɔ ˗kpɔ ˗an ˗gɔ ˗sü ˗yö ˗sü ü ˗bha, ˈˈkɛɛ ˗a ˗dhɛ ˈˈoo ˗dhɛ ˈü ˗dho ˗a kë, ˗a ˈwɔn dɔ ü ˗de ˗gɔ ꞊dhɛ ü zuʋ̈ˈˈ yö ˈti ˗dho za dɔ ü ˗bha. ˈKwaa˗ ˈˈpiʋ̈ ˈkwa pë ˈbha kë kö ˗yö kwaa Zoova kwa ˗bha ˗mlɛɛn shiʋ̈ˈˈ.

16. ꞊Ya kë ꞊dhɛ ü ˗bha ˈkɔdhigümɛn ˗nu ˗wa ˈˈpiʋ̈ ˈwo ˈwlaan˗ ˈbha kë, ü ˗dho ˗a kë ꞊dhɛ?

¹⁶ ꞊Ya kë ꞊dhɛ ü ˗bha ˈkɔdhigümɛn ˗nu ˗wa ˈˈpiʋ̈ ˈwo ˈwlaan˗ kë, ü ˗dho ˗a kë ꞊dhɛ? Ü dua ˈyaa ˗mü kö ka˗ ˗nu ˈka ˈˈdhinaan ˈmën. ˗Yö kë ü ˈˈɲaan ꞊dhɛ ˗an dua ˗mü kö ˈpë ˗dhi ˗an ˗dhɛ ˗wa kë. ˗Bhö ˈwɔn ˗nu kë ˈlëëlë, kö ˗an ˗bha ʒiaan ˈwo˗ ˗ta ˈü˗ ꞊bhlëë ˗ya ꞊dhɛ ˗kɔ ˈü˗ ˈˈpiʋ̈ ˗wo ü ˗bha ꞊bhlëë ˗ya ˗a ˈka ˗a ˈdhö. (Matiö 7:12 ˗wo pö.) ˈˈKɛɛ kö ü ˗bha ˈkɔdhigümɛn ˗nu ˗wa pö ˈü ˗da wo ˈˈpiʋ̈ kö ˈka ˈwlaan˗ ˈbha kë, ü ˗dho ˗a kë ꞊dhɛ? ˈPë ˈü ˗dho ˗a kë, ˗a ˈto ˈˈdhiʋ̈ ˈü˗ blɛɛˈˈ Zoova ˗dhɛ kö ˗yö ü ˗takun kö ˈü ˗da ʒiaan ˗së ˗ta. ˗Bhö ü ˗zota ˗a ˗wɔn ˈgü, kö ˈwɔn ˈö ˗gban ˗a ˗bha ˈü˗ mɛɛnˈˈ kwa ˗bha ˈsëëdhɛ ˗nu ˈgü. ˗Yö kë ü ˈˈɲaan ꞊dhɛ Zoova ˈnën ˈü˗ ˈˈpiʋ̈ ˈü kë ˗a ˗dhɛ ˗së ˈˈtʋ̈ŋ ꞊gban ˈka.

17. Mɛn ˈˈwɛɛ ˗nu ˗wo ˈwlaan˗ kë ˗ni ˈgü, ü ˗dho ü ˗bha ˈnën ˗nu ˗takun ˗kɔ ˗kë ꞊dhɛ kö ˈya dho ˗kë ˗an ˈgü ꞊dhɛ ˈwa pë ˗së ˈbha ˈto?

 ¹⁷ Ü ˗bha ˈnën ˗nu ˗wa ˗kpan mɛn ˈˈwɛɛ ˗nu ˗bha kö ˗wo ˈwlaan˗ kë ˗ni ˈgü, ü ˗dho ˗an ˗takun ˗kɔ ˗kë ꞊dhɛ? ꞊Ya kë ꞊shiö ꞊shiö ü ꞊mɔɔn˗ ˗bha ˗yakwëëdhösü ˈwo zuʋ̈niidadhe ˗kë, ˈü˗ kë ü ˗gɔ ˈˈkwɛnŋdhö. Ü ꞊mɔɔn˗ ˗bha ˈzü, ˈü gbɔɔdhe ˗nu ˗kë ˗an ˗gɔ ˗an ˗de ˈti ˈka. ˈˈKɛɛ gbɔɔdhe ˗së ꞊dede ˈü ꞊mɔɔn˗ ˗bha ˈü ˗an kë ü ˗bha ˈnën ˗nu ˗gɔ ˈyö ˈwo ˈtɔ˗ ü ˗bha ˗ya ˈˈkwɛnŋdhö ˗sü ˈö kaa˗ ˗nu ˈka ˗kë ka ˈkwëëdhö waa ˗an ˗dhɔ ˗bha ü kë ˗sü.

18. ˈMën ˗kë kwa dua ˈdhö ˗mü kö ˈkwa ˈdho Kletiɛn ˗nu ˗bha ˗bhɔkwëë ˗nu ˗ta?

¹⁸ ˈKwa˗ pö ˈkwa kë Zoova ˗dhɛ ˗së, kwa dua ˗mü ˈkwa ˈˈkan ꞊sua ˗zlanwo ˗bha wɔkɔ waa˗ ˗bha ˈwlaan˗ ˗nu ˗bha. ˈˈKɛɛ kwa dua ˗mü ˈpö kö ˈkwa ˗Zlan ˗dhɔkë ˗kɔ ˈö˗ ˗zo kun ˗a ˗bha. Kwa ˗dho ˗a kë ˗kɔ ˗kë ꞊dhɛ? ˗A kë ˗kɔ do ˈnën ˈtɔ˗ ˗nu Kletiɛn ꞊dede ˗nu ˗bha ˗bhɔkwëë ˗nu ˗ta ˗sü ˈö zoodhö zoodhö. (Eblö 10:24, 25 ˗wo pö.) ˗Bhɔkwëë ˗nu ˗wo ˗Zlan ˗dhɔkë ˗kɔ ˈö˗ ˗zo kun ˗a ˈˈpian ˗wɔngbɩɩsü do ˈka. (Psaumes 22:22; 122:1) Kwa ꞊mɔɔn˗ ˗bha ˈkwa ˗kpan kwa ˈkwëë˗ ˗bhɔkwëë ˗nu ˈwo bhë ˗an ˗ta kö ˈkwa kwa ˈko ꞊faan ˈmën.​—Wlɔmö 1:12.

19. ˈMën ˈö ˗kë ˈö ˗së kö gagade ˗nu ˈü ˗an ꞊draan Biblö ˈgü bhë ˈü ˗an ˗wɔn blɛɛˈˈ mɛn ˈˈwɛɛ ˗nu ˗dhɛ?

¹⁹ ˗Da ˗Zlan ˗dhɔkë ˗kɔ ˗së ˗ta ˗ʒian do ˈbha ˈö ˈdhö ˈzü ˈyö ˈtɔ˗ pë ˈü˗ ꞊draan Biblö ˈgü ˗a ˗zɔn mɛn ˈˈwɛɛ ˗nu ˗dhɛ ˗sü. Mɛn ꞊vadhɛ zuʋ̈ˈˈ ˈˈklʋʋ ˗yö bhɔ ˗ni ˈgü ˈwɔn yaa ˗nu ˈwo kë ˗ni ˈgü ˈˈkpʋnŋ ꞊taa ꞊dɛɛ ˗an ˗wɔn ˈgü. (Ézékiel 9:4) ˗A ˈbhaa ꞊ya kë kö mɛn ˈbha ˗nu ˈwo saanˈˈ ˈwo ˈˈdhʋ̈ ˗an ˈgü, ü ˗an ˗dɔ. ˗Dhɛkpaɔ dhiʋ̈ˈˈ ˗së ˈü ü ˗zo yö˗ ˗dhɛ, ˗a ˗wɔn blɛɛˈˈ ˗an ˗dhɛ. ꞊Ya kë ꞊dhɛ ü ˈdho ˗ni ˈgü Kletiɛn ꞊dede ˗nu ˗bha ˗bhɔkwëë ˗ta, ˈö ˈwɔn gagade ˈü˗ man Biblö ˈgü ˗a ˗zɔn ˗ni ˈgü mɛn ˗nu ˗dhɛ, ˗kë ꞊sua ˗zlanwo waa˗ ˗bha wɔkɔ ˗nu ˈgü ˗sü ˗dhɔ ˗dho ˈgo ü zuʋ̈ˈˈ ˗bha. ˗Yö kë ü ˈˈɲaan ꞊dhɛ ü ˗dho zuʋ̈gblüdhi ꞊slɔɔ, ˈö Zoova ˗yö ˈdhuëë˗ kpɔ ü ˗bha ꞊dedewo ü ˗bha ˈgü ˗dɔ ˈˈgbɩɩ˗ ˗sü kö ˈü˗ ˗dhɔkë ˗kɔ ˈö˗ ˗zo kun ˗a ˈka bhë˗ ˗wɔn ˈgü.​—Malaki 3:10.