1, 2. Nemene la aqane tro epuni a hnying? Nge pine nemene matre ka loi e troa hnying?

ATRE hë epuni jëne la hnei epuni hna ini Tusi Hmitrötr laka, nyimutre la itre atr ka qaja ka hape, angatr a hmi koi Akötresie, ngo angatre pe a inine me kuca la itre ewekë hnei Nyidrëti hna xelen. (2 Korinito 6:17) Celë hi kepine matre Iehova a upi së troa tro trije la hmi ka thoi hna hëne ka hape, “Babulona Atraqatr.” (Hna Amaman 18:2, 4) Nemene la nyine tro epuni a kuca? Tro sa isa axecië mekun, me isa hnying ka hape, ‘Tro kö ni a hmi koi Akötresie thenge la aja i Nyidrë, maine tro kö ni a lapa ngöne la hming?’

² Maine ase hë epuni tro trije la hmi ka thoi ke, ka lolo catr. Ngo maine jë, hetre itre hna majemine kuca ngöne la hmi hnapan, ka jole koi epuni troa nuetrij. Tro sa ce wange la itre hna majemine cili, memine la enyipiewekëne la troa waiewekë tune la aqane waiewekë i Iehova.

3. (a) Pine nemene matre jole koi itre xan troa hmi koi Akötresie? (b) Nemene la hna qaja hnei Tusi Hmitrötr göne la troa hmi jëne la itre iatr?

³ Qane hë ekö, tru hnei atr ka hmi koi Akötresie, jëne la itre iatr me itre hnasaatr, maine itre ita ne huuj. Nge tune ka fe epun? Maine jë jole koi epuni enehila troa hmi koi Akötresie ke, tha thenge hmaca kö lo itre hna majemine cili. Ngo loi e tro sa mekune hnyawa laka, Iehova la ka amekötine la aqane tro sa hmi koi Nyidrë. Tusi Hmitrötr a qaja hnyawa ka hape, methi Nyidrëti la troa hmi koi Nyidrë jëne  la itre iatr.—E jë la Esodo 20:4, 5; Salamo 115:4-8; Isaia 42:8; 1 Ioane 5:21.

4. (a) Pine nemene matre tha tro kö sa hmi kowe la itre xötrapane së? (b) Pine nemene matre Iehova a wathebone la itre hlue i Nyidrë, troa thele troa ithanata memine la itre ka mec?

⁴ Alanyimu la itre atr ka nue la traeme i angatr memine la trengecatre i angatr, uti fe hë la manie i angatr, matre troa amadrinëne la itre xötrapane i angatr. Ame itre xa ijin, angatre fe a hmi kowe la itre xötrapane i angatr. Ngo atre hë së laka, thatreine hmaca kö la itre ka mec troa xatua së, maine iangazo pena. Tha ce angatre hmaca kö me easë. Celë hi matre tha loi kö troa thele troa ithanata me angatr ke, easë lai a mekune ka hape, kolo hi lo itre sinee së ka mec, ngo, itre dremoni pe. Kepine hi lai matre hnei Iehova ekö hna wathebone kowe la angetre Isaraela, troa thele troa ithanata me itre ka mec. Ketre, tha tro kö angatr a kuca la ketre ewekë ka ce tro memine la kuci haze.—Deuteronomi 18:10-12; wange ju la Ithuemacany 26 me 31.

5. Nemene la ka troa xatua epuni troa nuetrije la hmi hna jëne itre iatr, maine hmi koi itre xötrapane pena?

⁵ Nemene la ka troa xatua epuni troa nuetrije la hmi koi Akötresie jëne la itre iatr, me hmi koi itre xötrapan? Tro epuni a e la Tusi Hmitrötr me thele hnyawa la mekuna i Akötresie göne la itre ewekë cili. Nyidrëti a ‘methinën’ la itre thina cili, nge ka sisi koi Nyidrë. (Deuteronomi 27:15) Thithi jë o drai, nge sipone jë troa xatua epuni troa hane waiewekë tui Nyidrë, me troa hmi thenge la aja i Nyidrë. (Isaia 55:9) Mejiune jë laka, tro kö Iehova a thue trengecatre i epun, matre atreine epuni troa nuetrije la nöjei ewekë ka ce tro memine la hmi ka thoi.

6. Pine nemene matre mekune jë la itre hene ne hmi, troa feetëne la ijine hnaho Iesu e 25 Diseba?

⁶ Noel la ketre feete ka hlemu ngöne la fene hnengödrai.  Alanyimu catre la itre ka mekune laka, troa feetëne la ijine hnaho Iesu. Ngo ame la Noel tre, ka ce tro me hmi ka thoi. Hna qaja hnene la ketre itus ka hape, ame la angetre Roma ekö, itre wanaithihlë (ka hmi koi nyimu haze), ke angatr a feetëne la ijine hnahone la jö lo 25 Diseba. Hnene la itre hene ne hmi hna kuca matre tro la itre wanaithihlë a hane Keresiano. Celë hi kepine matre hnei angatr hna axeciën laka, ngacama tha hna hnaho Iesu kö ngöne la 25 Diseba, ngo troa feetëne la drai cili ka hape, ijine hnaho nyidrë. (Luka 2:8-12) Tha hnene fe kö la itretre drei Iesu hna hane feetëne la Noel. Hna qejepengöne hnene la ketre itus ka hape, ame ngöne la 200 lao macatre thupene la hna hnaho Iesu, tre, “pëkö ca ka atre la ijine hnaho nyidrë, nge ewekë lai tha hna thele kö troa atre ngöne la ijine cili.” Matre hna nyiqaane feetë Noel pë hë a itre thauzan lao macatre thupene la hna hnaho Iesu.

7. Pine nemene matre tha hane fe kö la itre nyipi Keresiano feetë Noel?

⁷ Nyimutre la itre atr ka atre laka, ame la Noel memine la itre sinetrongen (tune la ihamë kado, me kuci xeni ne feet) tre, qaathene la itre wanaithihlë. Ame petre kö ekö e Agele me itre xa götran e Amerika tre, hna wathebone troa feetë Noël pine laka, qaathene la itre wanaithihlë. Ame la itre ka tha trongëne kö lai tre, troa tranyi angatr. Ngo e thupene pë hë la kola nyiqane feetëne hmaca la Noel. Pine nemene matre tha hane fe kö la itre nyipi Keresiano feetëne la Noel? Pine laka angatr a drengethenge Akötresie.

8, 9. Pine nemene laka tha hane fe kö la itre pane keresiano ekö feetëne la drai ne hnaho?

⁸ Nyimutre la itre atr ka feetëne la drai ne hnaho angatr. Tune ka fe la itre nyipi Keresiano? Ame hi la itre feet ne drai ne hnaho hna qaja hnei Tusi Hmitrötr, tre, hna kuca hmekuje  hi hnene la itre ka tha hmi kö koi Iehova. (Genese 40:20; Mareko 6:21) Ame la itre feet ne drai ne hnaho thene la itre wanaithihlë, tre, nyine atrune la itre haze. Celë hi lai kepine matre, qaja jë la ketre itusi ka hape, ame kowe la itre pane Keresiano, tre, “ketre hna majemine kuca hnene la itre wanaithihlë la drai ne hnaho.”

⁹ Hnene la angetre Roma me angetre Heleni ekö hna mekune laka, hetre haze ka sine la ijine hnahone la ketre atr. Ej a troa thupëne la atr ngöne la mele i angeic. Ngo loi tro lai atr a feetën la drai ne hnaho angeic matre tro la mene ne la haze a thupë angeic.

10. Pine nemene matre tha hane kö la itre nyipi Keresiano enehila, feetëne la drai ne hnaho?

¹⁰ Ame koi epuni ke, tro kö Iehova a kapa la itre feet ka ce tro memine la hmi ka thoi? (Isaia 65:11, 12) Ohea. Celë hi kepine matre tha itre nyipi Keresiano kö a hane feetëne la drai ne hnaho, memine la itre xa feet ka ce tro memine la hmi ka thoi.

11. Pine nemene matre itre atr a feetëne la itre feete i wanaithihlë? Ngo nemene la ka nyipiewekë koi së?

¹¹ Ame enehila ke, atre hnyawa hi la itre atr laka, ame la Noel memine la itre xaa feet ke, ka xulu qa ngöne la hmi wanaithihlë, ngo angatre kö a feetën. Ame koi angatre ke, itre ijine lai troa ce madrine memine la hnepe lapa. Tune ka fe la mekuna i epun? Pëkö engazone la troa ce madrine memine la hnepe lapa. Iehova la Atre xupe la hnepe lapa, matre aja i Nyidrë tro angatr a ce mele madrin. (Efeso 3:14, 15) Ngo tha tro kö sa feetëne la itre feete ne la hmi ka thoi, göi tro hi a amadrinëne la hnepe lapa së. Ame la ka nyipiewekë ke, ene la aqane imelekeu së me Iehova. Hnei Paulo aposetolo hna qaja ka hape: “Kola thele la nyine amadi Joxu.”—Efeso 5:10.

12. Pine nemene matre tha Iehova kö a kapa la itre xaa feet?

 ¹² Alanyimu la itre atr ka mekun laka, tha nyipiewekë kö troa atre la qaane la itre feet. Ngo tha mekuna i Iehova kö lai. Tha Nyidrëti kö a kapa la itre feet ka xulu qa ngöne la itre hmi ka thoi ke, itre ej a atrunyi atr me itre nöj. Tune la angetre Aigupito ekö, itre ka hmi angatre koi itre haze. Ame la angetre Isaraela ekö a lö qa Aigupito, hnei angatre hna nyitipune la ketre feete i angetre Aigupito, me qaja ka hape, ketre “pui ne xeni [feet] koi Iehova.” Ngo hnei Iehova hna haji angatr. (Esodo 32:2-10) Tune la hna qaja hnei Isaia perofeta ka hape: “The ketre kö la ka sis!”—E jë la Isaia 52:11.

13. Ame la epuni a mekune troa nuetrije la itre feete ne la hmi ka thoi ke, nemene la itre hnyinge i epun?

¹³ Ame la epuni a mekune troa nuetrije la itre feete ne la hmi ka thoi tre, maine jë troa tru hnei hnyinge i epun. Tune la hna hape: Tro ni a qeje nemen? E traqa jë hnyinge la itre sine huliwang ka hape, hnauëne laka tha hane kö ni ce feetë Noel me angatr? Nemene la aqane tro ni a ujë e hamë kado ne Noel jë koi ni? Nemene la nyine tro ni a kuca e traqa ju la föeng sipo ni troa hane sine la ketre feet? Nemene la nyine tro ni a kuca matre tha tro kö a hace la itre neköng, ngöne la itre ijine feete i wanaithihlë, maine feetë drai ne hnaho?

14, 15. Nemene la nyine tro epuni a kuca, e traqa ju ketre atr qaja ka hape, “bonne fête,” maine hamë kado pena koi epun?

¹⁴ Loi e tro epuni a inamacan ngöne la aqane troa ithanata me ujë kowe la ketre atr. Maine ketre atr a qaja koi epuni ka hape, “bonne fête” ke, the drei simine kö, qaja jë hi ka hape, “Oleti.” Ame itre xaa ijin, hetre itre atr ka hnying. E cili, tro epuni a qejepengöne la kepine matre tha epuni kö a hane feetëne la itre feete cili. Loi e tro pala hi a qaja cememine la hni ka menyik me metrötr, ngo tha ngöne iwesitrë  kö. Tusi Hmitrötr a qaja ka hape: “Loi e ewekë pala hi nyipunie memine la ihnim, hna aloine hnei alase [sootr], mate atejë nyipunie la aqane troa isa sa kowe la nöjei ate.” (Kolose 4:6) Maine pena, qejepengöne jë ka hape, ka hane fe hi epuni kuci madrin me hamë kado ngo, tha ngöne kö la itre ijine feete cili.

¹⁵ Ngo maine ketre a hamë kado koi epuni ngöne la ijine feete cili, nemene la aqane tro epuni a ujë? Pëkö hnei Tusi Hmitrötr hna amekötin göne lai, ngo eje pe a qaja ka hape, loi e tro palahi a hetre mekuthetheu ka loi. (1 Timoteo 1:18, 19) Maine jë thatre kö lai atr ka hamë kado ka hape, tha ka hane kö epuni sine la itre feete cili. Maine pena, tro angeic a qaja ka hape, “atre hi ni laka, tha eö kö a hane sine la feet celë, ngo eni kö a pi hamë eö la kado.” Ame e cili, epuni kö la ka sipu iëne troa kapa, maine tha kapa pena. Matre, e traqa ju epuni kapa maine tha kapa pena, ngo loi e troa pë ethane kowe la mekuthetheu i epun. Loi e tro sa thupëne matre tha tro kö a angazone la aqane imelekeu së me Iehova.

16. Nemene la nyine tro epuni a kuca e traqa ju hë epuni hnene la hnepe lapa troa hane sine la ketre feete i wanaithihlë?

¹⁶ Maine kola hë epuni hnene la hnepe lapa i epuni troa feetëne la ketre feete i wanaithihlë, nemene la nyine tro epuni a kuca? The thele iwesitrë kö me angatr nge the musinë angatre kö. Aja së asë hi tro la itre xan a metrötrëne la mekuna së. Haawe, metrötrëne ju fe la mekuna i angatr. (E jë la Mataio 7:12.) Ngo nemene la nyine tro epuni a kuca, e traqa ju hë epuni hnene la hnepe lapa troa hane sine la feete cili? Thithi jë koi Iehova göi troa axecië mekune ka inamacan, nge sine thele jë la itre trepene meköt ka ihmeku memine lai jol. The thëthëhmine kö laka, ame la aja së ke, troa amadrinë Iehova.

17. Tune ka la aqane tro epuni a xatuane la itre neköi epun, la nyudreni a goeëne la itre xa nekönatr e feetëne la itre feete i wanaithihlë?

 ¹⁷ Ame itre xa ijin, troa hace la itre neköi epun, la kola goeëne la itre xa nekönatr e feetëne la itre feete i wanaithihlë. Tune ka la aqane tro epuni a xatua nyudren? Thele jë la aqane troa amadrinë nyudren. Maine jë, ngöne la ketre ijin, troa ce xeni memine la itre xaa nekönatr. Haawe, ijije hi troa hane hamë kado ngöne la ijine cili. Ngo ame kö la kado ka sisitria catr, tre, ene la tro epuni keme me thin a xomi ijine troa ce me nyudren, me amamane la ihnimi epuni koi nyudren.

18. Pine nemene matre nyipiewekë troa sine lapaane la itre icasikeu?

¹⁸ Ame la aqane troa amadrinë Iehova tre, troa tro trije la hmi ka thoi, me nuetrije la itre feet ka ce tro memin. Ngo tro fe sa melëne la nyipi hmi, tune la troa sine lapaane la itre icasikeu. (E jë la Heberu 10:24, 25.) Ame la itre icasikeu cili, tre, ketre igötranen ka nyipiewekë catr ne la nyipi hmi. (Salamo 22:22; 122:1) Itre ijine hi lai tro sa ithuecatrekeu.—Roma 1:12.

19. Pine nemene matre nyipiewekë troa qejepengöne koi itre xan la hnei epuni hna inine qa hnine la Tusi Hmitrötr?

¹⁹ Loi e tro sa qejepengöne koi itre xane la hne së hna inine qa hnine la Tusi Hmitrötr, ke ka ce tro lai memine la nyipi hmi. Alanyimu la itre atr ka seseu la angatr a goeëne la kola elë la ngazo e celë fen. Maine jë atre fe hi epuni la itre xan e angatr. Ce thawa jë me angatr la mejiune i epun. Ame hë la epuni a sine lapaane la itre icasikeu, me ithanatane la itre trenge nyipici qa hnine la Tusi Hmitrötr, ke tro hë epuni lai a nuetrije la hmi ka thoi me itre hna majemin. Nge eje hi laka, e tro epuni a iëne troa nyihlue i Iehova hnyawa, ke tro Nyidrëti a amanathithine la trengecatre i epun, nge tro fe epuni a madrin.—Malaki 3:10.