1, 2. I ka kan k’i yɛrɛ ɲininga mun lo la ani mun na o kɔrɔtanin lo?

I KA bibulukalan na, i y’a faamu ko mɔgɔ caaman b’a fɔ ko u be Ala bato. Nka, u ka kalanw n’u ka kɛwalew ka gwo Ala ye (2 Korɛntikaw 6:17). O lo kosɔn, Jehova ko an ka bɔ ngalon diinan na, o min be weele ko “Babilonɛba” (Yirali 18:2, 4). E bena mun lo kɛ do? Bɛɛ ka ɲi k’a latigɛ a bena min kɛ. An ka ɲi k’an yɛrɛ ɲininga ko: “Yala ne b’a fɛ ka Ala bato i ko a b’a fɛ cogo min na wa? Wala ne b’a fɛ k’a bato i ko n’ be deli k’a kɛ cogo min na wa?”

² N’i bɔra ngalon diinan na ka ban, o ka ɲi. Nka n’i ye i yɛrɛ sɛgɛsɛgɛ koɲuman, n’a sɔrɔ i bena a ye ko ngalon diinan ka koo dɔw n’a ka landa dɔw bele ka di i ye. An k’u dɔw lajɛ ani an k’a filɛ fɛɛn min kama a kɔrɔtanin lo an ka kɛ ni Jehova ka miiriya ye u koo la.

3. a) Minw be tɛmɛ jaaw fɛ ka Ala bato, mun na a ka gwɛlɛ u dɔw fɛ k’o dabila? b) Ka tɛmɛ jaaw fɛ ka Ala bato, Bibulu be mun lo fɔ o koo la?

³ Jaaw ni sarakabɔlanw be dɔw fɛ u ka soo kabi saan caaman. U be tɛmɛ o fɛɛnw fɛ ka Ala bato. Ni e fana b’o lo kɛ, n’a fɔra i ye ko i k’o dabila, o be se ka kɛ koo kura wala koo jugu ye i fɛ. Nka, a to i hakili la ko Jehova y’a yira an na an ka ɲi k’ale bato cogo min na. Bibulu b’a fɔ ka gwɛ ko Jehova t’a fɛ an ka tɛmɛ jaaw fɛ k’ale bato.—Ɛkisɔdi 20:4, 5 kalan; Zaburuw 115:4-8; Ezayi 42:8; 1 Zan 5:21.

4. a) Mun na an man kan ka sukɔrɔw bato? b) Mun na Jehova tun ko Israɛldenw kana a ɲini ka kuma ni mɔgɔ saninw ye?

 ⁴ Mɔgɔ dɔw b’u jija ani u be wagati caaman ta k’a ɲini ka sukɔrɔw dusu diya. N’a sɔrɔ u b’u bato yɛrɛ. Nka, an y’a ye ko mɔgɔ saninw tɛ se k’an dɛmɛ wala ka koo jugu kɛ an na. U tɛ niin na yɔrɔ wɛrɛ. Farati yɛrɛ b’a la k’a ɲini ka kuma n’u ye. Mun na do? N’i ye koo dɔ mɛn ko a bɔra i somɔgɔ sanin dɔ fɛ, i k’a lɔn k’o tɛ mɔgɔ si nɔɔ ye jinaw kɔ. O lo kama, Jehova tun y’a fɔ ka gwɛlɛya Israɛldenw ye ko u kana a ɲini ka kuma ni mɔgɔ saninw ye wala ka lagwɛri n’a ɲɔgɔnna koo si kɛ.—Deteronɔmu 18:10-12; Kunnafoni wɛrɛw lajɛ, 26 ani 31nan.

5. N’i tun be sukɔrɔw bato wala n’i tun be tɛmɛ jaaw fɛ ka Ala bato, mun lo be se k’i dɛmɛ k’o dabila?

⁵ N’i tun be sukɔrɔw bato wala n’i tun be tɛmɛ jaaw fɛ ka Ala bato, mun lo be se k’i dɛmɛ k’o dabila? I ka ɲi ka Bibulu kalan. Jehova b’o koow jati cogo min na, miiri o la koɲuman. U “man di Masaba [Jehova] ye fewu,” a b’u haramuya (Deteronɔmu 27:15). Loon o loon, Jehova deli a k’i dɛmɛ k’o koow jati i ko ale yɛrɛ b’u jati cogo min na. A deli fana a k’i dɛmɛ k’a bato i ko a b’a fɛ cogo min na (Ezayi 55:9). I k’i seen bɔ ngalon diinan ka koow bɛɛ la. I ka la a la ko i mako be fanga min na walisa k’o kɛ, Jehova bena o di i ma.

6. Mun na u y’a latigɛ ka Yezu wololon sanyɛlɛma fɛti kɛ desanburu tile 25nan na?

⁶ Duniɲa kɔnɔ, mɔgɔ caaman be fɛti minw kɛ, u la dɔ ye nowɛli ye. Mɔgɔ caaman b’a miiri k’o loon ye Yezu wololon sanyɛlɛma fɛti lo ye. Nka, nowɛli basiginin lo ngalon diinan lo kan. Lɔnniya gafe dɔ b’a  ɲɛfɔ ko Ɔrɔmu kafiriw tun be tile wololon sanyɛlɛma fɛti kɛ desanburu tile 25nan na. Legilizi ɲɛmɔgɔw tun b’a fɛ kafiri caaman ka tuubi ka kɛ kerecɛnw ye. O lo kama, u y’a latigɛ ka Yezu wololon sanyɛlɛma fɛti kɛ desanburu tile 25nan na, hali k’a sɔrɔ Yezu ma wolo o loon na (Luka 2:8-12). Yezu ka kalandenw tun tɛ nowɛli fɛti kɛ. Gafe dɔ b’a fɔ ko saan kɛmɛ fila Yezu wolonin kɔ, “mɔgɔ si tun t’a lɔn Yezu wolola loon tigitigi min na ani mɔgɔ caaman tun tɛ u mako don o la.” (Sacred Origins of Profound Things). Saan kɛmɛkulu caaman Yezu sanin kɔ le, mɔgɔw sɔrɔla k’a daminɛ ka nowɛli fɛti kɛ.

7. Mun na kerecɛn sɔbɛw tɛ nowɛli fɛti kɛ?

⁷ Mɔgɔ caaman b’a lɔn ko nowɛli n’a ka landakow bɔra kafiriyako lo la. O landako nunu dɔ ye ka fɛti kɛ ani ka kadow di ɲɔgɔn ma. Ɲɛyirali fɛ, fɔlɔ la, u tun be mɔgɔw bali k’o fɛti kɛ Angletɛri jamana ni Ameriki dugu dɔw la sabu a bɔra kafiriyako lo la. Mɔgɔ o mɔgɔ tun b’o fɛti kɛ, u tun be sariya boli o tigi kan. Nka a ma mɛɛn, mɔgɔw y’a daminɛ tugun ka nowɛli fɛti kɛ. Mun na kerecɛn sɔbɛw tɛ nowɛli fɛti kɛ? Sabu u b’a fɛ k’u koo diya Ala ye u ka kokɛtaw bɛɛ la.

8, 9. Mun na kerecɛn fɔlɔw tun tɛ wololon sanyɛlɛma fɛtiw kɛ?

⁸ Mɔgɔ caaman ka teli ka fɛti min kɛ fana, o ye u wololon sanyɛlɛma fɛti ye. Yala kerecɛnw ka ɲi k’o fɛti kɛ wa? Bibulu be wololon sanyɛlɛma fɛti fila dɔrɔn kofɔ. Nka, minw y’o fɛtiw kɛ, u si tun tɛ Jehova bato (Zɛnɛzi 40:20; Mariki 6:21). Mɔgɔw tun be wololon sanyɛlɛma fɛtiw kɛ walisa ka ngalon alaw bonya.  O lo kama, kerecɛn fɔlɔw “tun b’a jati ko wololon sanyɛlɛma fɛti tun ye kafiriw ka landako lo ye.”—The World Book Encyclopedia.

⁹ Grɛkiw ni Ɔrɔmukaw tun b’a miiri ko bɛɛ wolotuma na, mɛlɛkɛ dɔ be kɛ yen ani a b’a tigi tanga a ka ɲɛnamaya bɛɛ la. O wagati la, minw tun tɛ kerecɛnw ye, olu lo tun be wololon sanyɛlɛma fɛtiw kɛ. U tun be mɔgɔ min ka wololon sanyɛlɛma fɛti kɛra, u tun b’a miiri k’o fɛti bena a to u ka alaw k’a tigi tanga.

10. Bi, mun na kerecɛnw man kan ka wololon sanyɛlɛma fɛtiw kɛ?

¹⁰ Fɛti minw basiginin be ngalon diinan kan, e ka miiri la Jehova be sɔn u la wa? (Ezayi 65:11, 12). Ayi, a tɛ sɔn u la. O lo kama, an tɛ wololon sanyɛlɛma fɛtiw kɛ ani fɛti tɔɔ minw bɛɛ basiginin lo ngalon diinan kan.

11. Mun na dɔw be fɛtiw kɛ? Mun lo ka ɲi ka kɛ e ɲɛnako fɔlɔ ye?

¹¹ Mɔgɔ dɔw b’a lɔn ko nowɛli ani fɛti wɛrɛw bɔra kafiriyako lo la. Nka, u bele b’o fɛtiw kɛ. Olu fɛ, o fɛtiw be sababu ɲuman di u ma ka wagati dɔ kɛ n’u somɔgɔw ye. E fana b’o lo miiri wa? K’a ɲini ka wagati dɔ kɛ n’i somɔgɔw ye, o tɛ kojugu ye. Jehova min ye denbaya tigi ye, ale b’a fɛ an ka jɛnɲɔgɔnya ɲuman kɛ n’an somɔgɔw ye (Efɛzikaw 3:14, 15, ABM). Nka, an kana a ɲini ka ngalon diinanw ka fɛtiw kɛ walisa k’an koo diya an somɔgɔw ye. Min ka fisa, o ye ka jɛnɲɔgɔnya ɲuman kɛ ni Jehova ye. O lo kama, ciden Pol y’a fɔ ko: “Fɛɛn min ka di Matigi ye, aw ka banba k’o lɔn.”—Efɛzikaw 5:10.

12. Mun lo be se k’a to fɛti dɔ koo be gwoya Jehova ye?

 ¹² Mɔgɔ caaman fɛ, fɛti jujɔn mana kɛ min o min ye, o tɛ jati. Nka Jehova tɛ o lo miiri. Ni fɛti dɔ be bɔ ngalon diinan na, n’a be nɔɔrɔ la adamaden wala jamana dɔ kan, o fɛti man di Jehova ye. Ɲɛyirali fɛ, Misirakaw tun be fɛti caaman kɛ k’u ka ngalon alaw bato. Israɛldenw bɔnin kɔ Misira jamana na, u ye Misirakaw ka kafiriya fɛti dɔ ɲɔgɔn kɛ ani u y’o weele ko “Matigi [Jehova] ka seli.” Nka, Jehova y’u ɲangi o kosɔn (Ɛkisɔdi 32:2-10, ABM). I ko kira Ezayi y’a fɔ cogo min na, an man kan ka “maga fɛɛn nɔgɔnin si la.”—Ezayi 52:11 kalan.

13. N’i y’a latigɛ ko i tɛna fɛtiw kɛ tugun, ɲiningali jumanw be se ka na i kuun na?

¹³ N’i y’a latigɛ ko i tɛna fɛti dɔw kɛ tugun, ɲiningali caaman be se ka na i kuun na, i n’a fɔ: “Ne bena mun lo kɛ ni n’ ka baarakɛɲɔgɔnw ye n’ ɲininga ko mun na n’ tɛ jɛn n’u ye ka nowɛli fɛti kɛ? Ni mɔgɔ dɔ ye nowɛli kado di ne ma, ne ka ɲi ka mun lo kɛ? Ni n’ furuɲɔgɔn b’a fɛ ne ka fɛti dɔ kɛ n’ale ye, ne ka ɲi ka mun lo kɛ? Ne be se ka mun lo kɛ walisa n’ deenw dusu kana tiɲɛ sabu n’ tɛ u wololon sanyɛlɛma fɛtiw wala fɛti dɔw kɛ?”

14, 15. Ni mɔgɔ dɔ ye fɛti foli kɛ i ye wala n’a ye kado dɔ di i ma, i be se ka mun lo kɛ?

¹⁴ Koo o koo la, fɔɔ i ka hakili sɔrɔ k’a filɛ i bena min fɔ ani ka min kɛ. Ɲɛyirali fɛ, ni mɔgɔ dɔ ye fɛti foli kɛ i ye, kana a kɛ komi i m’a mɛn. I be se k’a tigi jaabi dɔrɔn ko “i ni ce.” Ni mɔgɔ dɔ b’a fɛ k’a faamu fɛɛn min kama i tɛ fɛti dɔ kɛ, n’i b’a fɛ, i be se k’o  ɲɛfɔ a tigi ye. Nka, kana ɲinɛ k’o kɛ nɛmɛnɛmɛ, ni ɲumanya ni bonya ye. Bibulu b’a fɔ ko: “Aw k’aw ka kuma fɔcogo ɲa tuma bɛɛ, a ka diya bɛɛ ye, waasa aw ka se ka mɔgɔ bɛɛ jaabi ka ɲa.” (Kɔlɔsikaw 4:6). N’a sɔrɔ i be se k’a ɲɛfɔ ko a ka di i ye k’i ɲɛnagwɛ ni mɔgɔw ye ani ka kado di u ma. Nka, i t’a fɛ k’o kɛ o fɛtiw sen fɛ.

¹⁵ Nka, ni mɔgɔ dɔ ye kado di i ma do? Bibulu tɛ sariya tigitigi di an ma o koow kelen kelen bɛɛ la. Nka a b’a fɔ ko an man kan ka foyi kɛ min b’a to an dusukun b’an kɛlɛ (1 Timote 1:18, 19). Mɔgɔ min be kado dira i ma, n’a sɔrɔ a tigi t’a lɔn ko i t’o fɛti kɛ. A fana be se k’a fɔ ko: “Ne b’a lɔn ko i tɛ fɛti nin kɛ. Nka ne b’a fɛ ka kado nin d’i ma.” O koo fila nunu bɛɛ la, i be se k’a latigɛ n’i bena sɔn o kado la wala n’i tɛna sɔn a la. I mana min o min latigɛ, kana koo si kɛ min bena a to i dusukun be i kɛlɛ. An t’a fɛ ka koo si kɛ min bena a to teriya min be an ni Jehova cɛ, o be tiɲɛ.

16. N’i somɔgɔw b’a fɛ ka fɛti dɔ kɛ, i ka ɲi ka mun lo kɛ?

¹⁶ N’i somɔgɔw b’a fɛ ka fɛti dɔ kɛ do? Kuun t’a la ka kɛlɛ kɛ o kosɔn. Kana ɲinɛ ko joo b’u fɛ k’u sago kɛ. U mana a latigɛ ka min o min kɛ, i k’u minɛ ni ɲumanya ye. I k’u bonya i ko ele yɛrɛ b’a fɛ u k’i bonya cogo min na n’i ye koo dɔ latigɛ (Matiyo 7:12 kalan). Nka, n’i somɔgɔw b’a fɛ i ka wagati dɔ kɛ n’u ye fɛtilon na do? Sanni i k’a latigɛ i bena min kɛ, kɔn ka Jehova deli fɔlɔ a k’i dɛmɛ i ka desizɔn ɲuman ta. Miiri koɲuman ani sɛgɛsɛgɛri kɛ o koo la. Kana ɲinɛ ko i ka laɲinita ye k’i koo diya Jehova ye tuma bɛɛ.

17. Ni tɔɔw be fɛtiw kɛra, i be se k’i deenw dɛmɛ cogo di u kana a miiri ko u be fɔnna fɛɛn dɔ la?

 ¹⁷ Komi i deenw ɲɛɛ b’a la ko tɔɔw be fɛtiw kɛra, i be se ka mun lo kɛ k’u dɛmɛ? I be se ka ɲɛnagwɛko dɔ labɛn u ye tuma dɔw la. I fana be se ka kado dɔ di u ma walisa k’u dusu diya. I be se ka kado fisaman minw di i deenw ma, u la dɔ ye ka wagati kɛ n’u ye ani k’u kanu.

18. Mun na an ka ɲi ka taga kafo ka lajɛnw na?

¹⁸ N’an b’a fɛ k’an koo diya Jehova ye, fɔɔ an k’an seen bɔ ngalon diinan na, a ka landakow n’a ka fɛtiw la. An ka kan ka tiɲɛn batoli sira tagama fana. An be se k’o kɛ cogo di? O kɛcogo dɔ ye ka taga kafo ka lajɛnw na tuma bɛɛ (Eburuw 10:24, 25 kalan). Lajɛnw ye tiɲɛn batoli faan dɔ ye min kɔrɔtanin lo kosɔbɛ (Zaburuw 22:23; 122:1). An be se ka ɲɔgɔn jija o lajɛnw na.—Ɔrɔmukaw 1:12.

19. I ye min kalan Bibulu kɔnɔ, mun na a kɔrɔtanin lo i k’o ɲɛfɔ mɔgɔw ye?

¹⁹ I ye min kalan Bibulu kɔnɔ, i k’o fɔ mɔgɔw ye. O la, i bena a yira fana ko i ye tiɲɛn batoli sira ta. Koo jugu minw be kɛra duniɲa kɔnɔ, u be mɔgɔ caaman dusu kasi. N’a sɔrɔ i be mɔgɔ dɔw lɔn minw dusu kasinin lo o kosɔn. I be ni jigiya ɲuman min ye siniɲasigi koo la, i k’o ɲɛfɔ u ye. To ka taga kafo ka lajɛnw na ani i ye tiɲɛn kuma minw faamu Bibulu kɔnɔ, i k’u fɔ mɔgɔw ye. N’i b’o kɛ, i bena a ye ko ngalon diinan n’a ka landakow nege tɛna kɛ i la tugun. I ka la a la ko i bena ninsɔndiya ani ko Jehova bena i duga kosɔbɛ sabu i y’a latigɛ k’ale bato cogo ɲuman na.—Malasi 3:10.