1, 2. Ko le vesili fea e tonu ke kotou ʼaga o fai? Ti koleā e maʼuiga ai?

I LAKOTOU ako le Tosi-Tapu, na kotou matala ai ki le tokaʼapi e lotou pati e lotou tausi ki le Atua. Kae i lona fakaʼagatonu, e lotou akonaki mo fai a aga alā e vesiʼa ki ai a le Atua. (2 Kolinito 6:17) Ko ia leia e fakatotonu mai e Seova ke tou mavae mei le lotu sala, leia ko “Papilone lasi.” (Apokalipisi 18:2, 4) Koleā e kotou ʼaga loa o fai? E maʼua ke tou toʼo fuli se tonu, ti e tonu ke tou fai le vesili leinei: ‘E kau loto ko ia ke kau tausi ki le Atua o fai a neʼa alā e fakatotonu mai a ia ki ai pe o fai pe laku fai tuʼumaʼu?ʼ

² Kāpau kua kotou mavae mei le lotu sala, ti e mālie. Kae lagi koi iai a ni agaifenua o le lotu sala e koi kotou fia fai ki ai. Tou tioʼi pe koā agaifenua anā. Ti e kotou matala loa pe koleā e maʼuiga ai ke tou tio o fai pe le tio a Seova.

3. (1) Koleā e faigataʼa ai ki ʼiki le tausi ki le Atua kae leʼaise fakaʼaogaʼi ni paaki? (2) Koleā le pati a le Tosi-Tapu ki le fakaʼaogaʼi o paaki?

³ Ko ʼiki kakai e lotou fakaʼaogaʼi talu mei fualoa ni paaki, ni fakatātā pe ko ni aletale ke tausi ai ki le Atua. Kae ā koutou, e koutou toe fakaʼaogaʼi mo neʼa anā? Kāpau ko ia, e lagi mata faikese kia kotou pe veli le tausi leia ki le Atua kae e leʼese fakaʼaogaʼi a neʼa anā. Kae kotou manatuʼi, ko  Seova leia e fakatuʼutuʼuʼia pe fefeʼaki le tausi kiate ia. Ti e fakasā fakaʼagatonu mai i le Tosi-Tapu, e se loto a ia ke tou fakaʼaogaʼi ni paaki ke tausi ai kiate ia.—Lau Ekesote 20:4, 5; Pesalemo 115:4-8; Esaia 42:8; 1 Soane 5:21.

4. (1) Koleā e se tonu ai ke tou tausi ki otātou tupuʼaga mei muʼa? (2) Koleā na fakatotonu ai e Seova ki ana kaunaga ke ʼaua na lotou faiga ke māsau mo le kau mate?

⁴ Ko ʼiki, e puli olātou a temi, mo olātou makeke ti mo alātou falā ke fakafiafiaʼi ai olātou tupuʼaga mei muʼa. I ʼiki a temi, e lotou fai ni tausi kia lātou. Na tou ako, e se mafai ke fai mai e le kau mate se agaveli kia tātou ti se mafai foki ke lotou tokoi mai. E leʼese lotou maʼuli i se tasi ake gāneʼa. Ti e fakatupu tuʼutāmaki le faiga ke māsau mo le kau mate talie ko neʼa fuli alā e ʼau meia lātou, e ʼau a ia mei le kau temonio. Ko ia leia na fakatotonu ai e Seova ki le kau Iselaele ke ʼaua na lotou faiga ke lotou māsau mo le kau mate. Ti na se tonu ke lotou ʼaga o fai se neʼa e pipiki ki le faifakalaulaʼakau.—Tetelonome 18:10-12; lau le Nota Fakaʼoki 26 mo le 31.

5. Kāpau e kotou fakaʼaogaʼi ni paaki ke tausi ai ki le Atua, pe kotou fai ni tausi ki okotou tupuʼaga mei muʼa, koleā ka tokoi atu loa ke kotou tuku le fai o neʼa anā?

⁵ Kāpau e kotou fakaʼaogaʼi ai ni paaki ke tausi ai ki le Atua, pe kotou fai ni tausi ki okotou tupuʼaga mei muʼa, koleā ka tokoi atu loa ke kotou tuku le fai o neʼa anā? E tonu ke kotou lau le Tosi-Tapu ti mo fakakaukau pe koleā le manatu a le Atua. E “fakalialia,” mo vesiʼa a ia ki neʼa anā. (Tetelonome 27:15) I aso fuli, kotou faikole kia Seova ke tokoi atu ke kotou maʼua tuʼumaʼu ana manatu ti ke kotou tausi kiate ia o mulimuli ki neʼa alā e loto a ia ki ai. (Esaia 55:9) E mafai ke kotou tui papau e soli atu loa e ia le makeke ke kotou ʼaga ai o tiʼaki a neʼa fuli alā e pipiki ki le lotu sala.

6. Koleā na fakatuʼutuʼu ai e le kau takitaki o le ʼēkelesia ke lotou fakafiafia i le aso na tupu ai a Sesu, le aso 25 o Tesepeli?

⁶ I le mālamanei kātoa, ko le Pō-Tapu ko se aso fakafiafia lenā kua logologona. Ko ʼiki a fenua e lotou manatu ko le aso lenā na tupu ai a Sesu. Kae, ko le Pō-Tapu e toe pipiki foki ki le tausi sala. E iai se tikisionalio e fakasā ai ko kau Loma na ko ni kau pagani, (ko ni kakai e lotou atolasio ki ni atua e maʼuke) ti na lotou fakafiafia ki le aso na tupu ai le laʼā i le aso 25 o Tesepeli. Na loto le kau takitaki lotu o le ʼēkelesia ke ʼapi ake a kau pagani e liliu ko ni Kilisiteano. Logo ai na se tupu a Sesu i le aso 25 o Tesepeli, kae na lotou fakatuʼutuʼu ke lotou fakafiafia ki le aso lenā. (Luka 2:8-12) Na se fakafiafia le kau tisipulo a Sesu i le aso o le Pō-Tapu. E fakamatala i se tosi, lolotoga fētuʼu e 200 i le ʼoki o le tupu o Sesu, na se iloa fua e se tasi pe na tupu a ia i nāfea ti ko le neʼa lenā na se maʼuiga ai ki le tokaʼapi. (Sacred Origins of Profound Things) Ko ia, ko le fakafiafia na fai ki le Pō-Tapu na kamata i ni fētuʼu ki muʼa mai o le tupu o Sesu.

7. Koleā e leʼese fakafiafia ai a le kau Kilisiteano māʼoki ki le aso o le Pō-Tapu?

⁷ Tokaʼapi e lotou iloa ko le Pō-Tapu mo ona agaifenua fakapagani o fai pe neʼa alofa e fai ki ʼiki ti mo le kaitasi e fakasoko i aso anā, e ʼau a ia mei talatisio fakapagani. Na iai le temi, na tapuʼi ai i Pilitania mo ʼiki atu gāneʼa i Amelika, ke fakafiafia i le Pō-Tapu o tupu ko lona ʼauʼaga. Ko lātou alā na leʼese fakalogo na tauteaʼi lātou. Kae sili ni temi, na toe kamata fakafiafia e fenua ki le aso o le Pō-Tapu. Koleā e leʼese fakafiafia ai a le kau Kilisiteano māʼoki ki le aso lenā? Talie e lotou loto ke mālieʼia lātou e Seova.

8, 9. Koleā na se fakamanatuʼi ai e le kau ʼuluaki Kilisiteano a aso-tupu?

⁸ Tokaʼapi e lotou fakamanatu olātou aso-tupu. Kae e  fakasoko ko ia e le kau Kilisiteano māʼoki le anoʼaga lenā? Ko aso-tupu alā e māsauʼi i le Tosi-Tapu na fakatuʼutuʼu e ʼiki na leʼese tausi kia Seova. (Senesi 40:20; Maleko 6:21) Ki le kau pagani, ko fakafiafia o aso-tupu na fai mo fakavikiviki ai ki ni atua loi. Ko ia ki le kau ʼuluaki Kilisiteano, “ko le fakamanatu o aso-tupu na ko se agaifenua fakapagani.”—The World Book Encyclopedia.

⁹ Na tui le kau Loma mo le kau Keleka, ko le aso-tupu o le tagata takitautokatasi e tō tonu mo le aso-tupu o se atua. Na lotou manatu, na iai se laumālie e felogoi mo lolātou atua, ti na nofo a ia mo ia i lona tupu ake. Ti ke puipui a ia e le laumālie lenā, na tonu ke fakamanatuʼi lona aso-tupu.

10. Koleā e leʼese fakamanatuʼi ai e le kau Kilisiteano māʼoki a aso-tupu?

¹⁰ Kia koutou, e tali ko ia e Seova a fakafiafia alā e pipiki ki le lotu sala? (Esaia 65:11, 12) Leʼai! Ko ia leia e se fakamanatu ai e le kau Kilisiteano māʼoki a aso-tupu pe ko ʼiki atu aso fakafiafia e pipiki ai ki le lotu sala.

11. Koleā e fakasoko ai e ʼiki a aso fakafiafia fakamālama? Koleā leia e tonu ke maʼuiga tafito kia koutou?

¹¹ Tokaʼapi a fenua e lotou iloa ko ʼauʼaga alā o le Pō-Tapu mo ʼiki atu fakafiafia e ʼau mei agaifenua fakapagani. Kae e lotou soko atu faʼi o fakafiafia ki ai. E lotou pati: Ko fakafiafia anā, e ko se temi mālie ke lotou fakatasi ai mo olātou fāmili. Kae koleā lakotou manatu? E leʼese veli latātou fia fakatasi mo otātou fāmili. Ko Seova le tupuʼaga o fāmili, ti e loto a ia ke tou maʼua ni felogoi mālilie mo lātou. (Efeso 3:14, 15) Kae, e se tonu ke tou afa ke mālieʼia tātou e otātou fāmili i le fakasoko o ni fakafiafia o le lotu sala. E maʼuiga ake latātou maʼua ni felogoi mālie mo Seova. Na pati a le apositolo ko Paulo: “Kotou afa le nea leia e malie ki le Aliki.”—Efeso 5:10.

12. Koleā e leʼese tali ai e Seova a ʼiki fakafiafia?

 ¹² Tokaʼapi e lotou manatu, e leʼese maʼuiga a ʼauʼaga o fakafiafia anā. Kae leʼaise ko le manatu lenā a Seova. E se tali e ia a fakafiafia alā e ʼau mei lotu sala pe fakamuʼamuʼa ai a tagata pe ko se fenua. O fai pe le kau Esipito, na lasi ʼai alātou fakafiafia ki olātou atua loi. I le ʼoki o lolātou mavae mei Esipito, na fai e le kau Iselaele se fakafiafia o fakatatau ki le kau Esipito o lotou pati ai ko “se aso lasi fakafiafia [“kia Seova,” MN].” Kae na tauteaʼi lātou e Seova. (Ekesote 32:2-10) Na pati a le polofeta ko Esaia, ke ʼaua na tou “fafa ki se nea kelekele !”—Lau Esaia 52:11.

13. Koā a vesili ka kotou ʼaga loa o fai mo kāpau e kotou fakatotonu ke kotou tuku lakotou fai a fakafiafia fakamālama?

¹³ Ko le aso loa leia e kotou fakatotonu ai ke kotou tuku lakotou fai a fakafiafia fakamālama anā, lagi e kotou fai loa a vesili anei: Koleā e kau tali loa ki ai mo kāpau e vesili mai oku kaugaʼoi pe koleā leia e se kau fakafiafia ai ki le Pō-Tapu? Koleā e tonu ke kau fai mo kāpau e soli mai e se tasi sona neʼa alofa i le Pō-Tapu? Koleā e tonu ke kau fai mo kāpau e loto e loku āvaga ke kau fakafiafia ki se aso fakamālama? Koleā e tonu ke kau fai ke ʼaua se lotomamae ai aku fānau mo kāpau e se tou ʼaga o fai a fakafiafia fakamālama pe ko olātou aso-tupu?

14, 15. Koleā e tonu ke tou fai mokā fakamanuʼia atu e se tasi kia kotou pe soli atu e ia se neʼa alofa o uiga mo se aso lasi?

¹⁴ Mokā kotou fakatotonu loa ki le neʼa ka kotou fai pe pati, kotou aga fakapotopoto. Sakinake la, e fakamanuʼia atu se tasi kiate koe o uiga mo se aso lasi, e se tonu loa ke tou neʼa noaʼi, kae e mafai lau fakamālō ki ai. I ʼiki a temi, e fia matala e ʼiki kakai ki le tupuʼaga o lokotou fenaʼaki. E mafai loa ke kotou ʼaga o fakamatala kia lātou a tupuʼaga  alā e leʼese kotou kau ai ki aso lalasi anā. Kotou agamālie tuʼumaʼu ti ʼaua na kotou fai ni māsau ke fakamamae ai lātou. E pati i le Tosi-Tapu: “Ke ano tuumau le kalasia i akoutou masau, ti ke fakakonakona latou e le patai, o tupu ke kotou iloa le tali leia e aoga ki le tagata taki toka tasi.” (Kolose 4:6) E mafai lakotou fakasā kia lātou, e kotou fia fakatasi mo lātou ti mo fai nialātou neʼa alofa kae leʼai loa i aso lalasi anā.

¹⁵ E fefeʼaki loa mo kāpau e soli atu e se tasi se neʼa alofa i se aso lasi fakamālama? E se soli mai e le Tosi-Tapu ni lisi ki lao anā, kae e pati mai a ia ke tou ʼaga o taupau se leʼoloto e mālie. (1 Timoteo 1:18, 19) Ka soli atu e se tasi sona neʼa alofa, lagi e se iloa e ia e se kau kotou ki le aso lasi lenā, pe lagi e mafai ke pati atu a ia: E kau iloa e se ke kau ki le aso leinei, kae e kau fia soli atu le neʼa alofa leinei. Kae e fakalogo loa a ia kia koutou, pe mafai ke kotou ʼaga o tali pe leʼai. Kotou taupau se leʼoloto e mālie, o mulimuli ki le tonu ka kotou ʼaga o toʼo. E leʼaise tou loto ke iai se anoʼaga fakatupu tuʼutāmaki ki atātou felogoi mo Seova.

16. Koleā e tonu ke kotou fai mo kāpau e fia fakasoko e okotou fāmili se fiafia fakamālama?

¹⁶ Koleā e tonu ke kotou fai mo kāpau e fia fakasoko e okotou fāmili se fiafia fakamālama? ʼAua na kotou fefele mo lātou. E lotou maʼua le lotofaitalisa ke lotou fai le neʼa e lotou loto ki ai. Kotou agamālie mo fakaʼapaʼapa ki alātou manatu, o fai pe lokotou loto leia ke lotou fakaʼapaʼapa atu ki akoutou manatu. (Lau Mateo 7:12.) Kae koleā loa ka kotou fai mo kāpau e loto okotou fāmili ke kotou fakatasi mo lātou ki aso anā? ʼUluaki, kotou faikole kia Seova ke tokoi atu ke kotou toʼo se tonu leia e mālie. Ti kotou fakakaukau  ki le anoʼaga lenā mo fai ni afa ki ai. Kotou manatuʼi e kotou loto ke mālieʼia koutou e Seova.

17. E mafai ke kotou tokoi fefeʼaki ki akotou fānau ke ʼaua se lotou lotomamae mokā lotou tio ki ʼiki e lotou fakasoko a fiafia fakamālama?

¹⁷ E mafai ke kotou tokoi fefeʼaki ki akotou fānau ke ʼaua se lotou lotomamae mokā lotou tio ki ʼiki e lotou fakasoko a fakafiafia fakamālama? I ʼiki a temi, e mafai ke kotou fakatuʼutuʼu se aso ke kotou fakafiafia ai mo okoutou fānau, ti mo soli ake nialātou neʼa alofa. Kae ko le neʼa alofa maʼuiga, ko lakotou toʼo le temi ke kotou fakatasi ai mo lātou mo fakasā ake e kotou alofa kia lātou.

18. Koleā e tonu ai ke tou kau tuʼumaʼu ki fono Fakakilisiteano?

¹⁸ Ke mālieʼia tātou e Seova, e tonu ke tou mavae mei lotu sala ti mo tiʼaki a fakafiafia mo agaifenua alā e pipiki ki ai. Kae e tonu foki ke tou maʼuliʼi le tausi māʼoki. O fefeʼaki? E tonu ke tou kau tuʼumaʼu ki fono Fakakilisiteano. (Lau Epeleo 10:24, 25.) E kau a fono ki koga maʼuiga alā o le tausi māʼoki. (Pesalemo 22:22; 122:1) Ti ko se faigamālie lenā ke tou fefakalotomakekeiʼaki.—Loma 1:12.

19. Koleā e maʼuiga ai ke kotou māsau ki ʼiki o uiga mo neʼa alā na kotou ako i le Tosi-Tapu?

¹⁹ Ko le māsau ki ʼiki o uiga mo neʼa alā na kotou ako i le Tosi-Tapu e toe kau a ia ki le tausi māʼoki. Tokaʼapi e lotou tuʼania i lalātou tio kua lasiʼai a agaveveli i le kele. (Esekiele 9:4) Ko ia, kotou māsau ki anoʼaga mālilie alā na kotou ako. I lakotou kau loa ki fono Fakakilisiteano mo māsau ki ʼiki o uiga mo māʼoki o le Tosi-Tapu, e leʼese kotou toe fia kau loa ki le lotu sala ti mo mulimuli ki ona agaifenua. Kotou tui papau kāpau e kotou filifili ke kotou tausi agatonu kia Seova, ti e tapuakiʼi loa e ia akotou faiga ti e kotou fiafia loa.—Malakia 3:10.