1, 2. ¿Kasa püsakirüinjatka anain paaʼin? ¿Jamüsü jülüjainjatka paaʼin tia?

SÜKAJEE tü pikirajaaitpakalü anain suluʼujee tü Wiwüliakat, piyaawata aaʼu eein na wayuu aʼwaajakana Maleiwa naashin. Ekirajapejeʼe naya sünain alawaa nüchiki Maleiwa otta aainjashii naya kasa mojusü noʼuluʼu (2 Corinto 6:17, TNM). Müshijeseʼe nuchuntuin Jeʼwaa wojuʼitajanain suulia tü iküleesia ekirajakat alawaalü tü kanüliakat «Babilonia, tü kojutkat sütüma wayuu» (Alateetkat Mapeena [Apocalipsis] 18:2, 4). Waneeküinjatü waneʼewai wakua tü kasa waaʼinrajatkat, anapejeʼe wasakireʼerüle waaʼin sünain tüü: «¿Taaʼinrüinche tü anakat noʼuluʼu Maleiwa süpüla anain nümüin taʼwaajüin nia, shiataapaʼa neʼe kachiiruain taaʼin tü takuwaʼipapuʼukat?».

² Pujuʼitüichipale suulia tü iküleesia ekirajakalü alawaa, anasü maʼin tü paaʼinrakat. Jülüjainjatpejeʼe paaʼin ayatayürüle paaʼinrüin waneirua kasa paaʼinrapuʼuka suluʼuiwaʼaya pia tia iküleesiakat. Wekirajaa sünain waneirua kasa saainjaka tü iküleesia ekirajakalü alawaa otta jamüsü wayoutuinjatka shia maʼaka niyoutuin shia Jeʼwaa.

3. (1) ¿Jamüsü kapüleeka namüin waneinnua wayuu nooʼulaain suulia aʼwaajaa ayaakua? (2) ¿Jamüsü sünüiki tü Wiwüliakat süchiki aʼwaajaa ayaakua?

³ Eeshii na wayuu kakaliainnakana sünain aʼwaajaa ayaakua otta eeshii na kepiayaakana atuma shia süpüla naʼwaajüin Maleiwa sükajee tia naashin. Paaʼinrapuʼule tia, eesüjaʼa mojule pümüin suʼwaajüin wayuu Maleiwa sümaa nnojoluin eein ayaakua sümaʼana. Soto paaʼin nüküjain Jeʼwaa tü waaʼinrajatkat süpüla anain nümüin waʼwaajüin nia. Nüküjain Jeʼwaa suluʼu tü Wiwüliakat  mojuin nümüin nuʼwaajünüle sükajee wanee ayaakua (paashajeʼera Éxodo 20:4, 5; Salmo 115:4-8; Isaías 42:8; 1 Juan 5:21).

4. (1) ¿Jamüsü mojuka müle aka saaʼin wamaleiwase na outushiikana? (2) ¿Jamüsü nüpülajaka Jeʼwaa noulia na israeliitakana naashajaain namaa na outushiikana?

⁴ Eeshii na wayuu aaʼinrakana wainma kasa nekiira na outushiikana suulia jamajüin naya natuma naashin jee wainma nneerü nakataajaka sünain tia. Sükajee tia, müinnapa aka saaʼin namaleiwase namüin na outushiikana. Watüjaapejeʼe saaʼu nnojoluinjatüin waaʼinrüin tia süka nnojoluin süpüla nakaaliijain waya otta nnojoishii süpüla naaʼinrüin kasa mojusü wamüin na outushiikana. Watüjaa aaʼu nnojoluin suʼunuin jalamüin yaa naaʼin wanee wayuu outapa nia. Nnojotsü anain müleka nüchajaale sukuwaʼipa wanee wayuu süpüla naashajaain sümaa wayuu eekai outuin [sükajee süseyuu wanee ouutsü], süka jamüin, shieerü neʼe asoutaka nümüin tü yolujaakalüirua. Nüpülajüin Jeʼwaa noulia na israeliitakana naashajaain namaa na outushiikana, nnojoliinjana naya sünainpünaain tü sukuwaʼipamaajatkat ouutsü (Deuteronomio 18:10-12). (Paashajeʼera noota 25 otta noota 30).

5. ¿Kasa paaʼinrajatka süpüla puuʼulaainjachin suulia aʼwaajaa ayaakua otta suulia sülanaʼaleein putuma nojutu na outushiikana?

⁵ ¿Kasa paaʼinrajatka süpüla puuʼulaainjachin suulia aʼwaajaa ayaakua otta suulia sülanaʼaleein putuma nojutu na outushiikana? Paashajeʼerüinjatü tü Wiwüliakat otta jülüjainjatü maʼin paaʼin mojuin tia kasakalüirua noʼuluʼu Jeʼwaa. Nülerajüin Jeʼwaa tia otta kashüülasü maʼin shia noʼuluʼu (Deuteronomio 27:15). Puchunta waneepia nümüin Jeʼwaa süpüla wanaawainjatüin paaʼin nümaa otta süpüla anain nümüin puʼwaajüin nia (Isaías 55:9). Nükaaliijeechi pia Jeʼwaa süpüla puuʼulaainjachin suulia tü kasa sünainpünaakat tü iküleesia ekirajakalü alawaa.

6. ¿Jamüsü süneekünaka 25 tisienpüroʼu süpüla saainjünüin miʼiraa shikiira joʼuuin Jesuu?

⁶ Keejiasü maʼin sümüin wayuu tü ekawaa aainjünakat 24 tisienpüroʼu otta saashin wainma wayuu joʼuushi Jesuu waneemüin  kaʼi süchikijee tia. Shiapejeʼe keʼinaajalain shikii tia ekawaakat tü iküleesia ekirajakalü alawaa. Aküjünüsü suluʼu wanee karaloʼuta süchikimaajatü tü sunoujakalü anain wayuu, naainjapuʼuin miʼiraa na chejeʼewaliikana Roma soʼu kaʼikat 25 tisienpüroʼu, naainjain tia süka niweetüin nüchikuaʼa chi Kaʼikai. Nayasaʼa na nekiipüʼükana na anoujayaakana nünain Jesuu, naʼwanajaain sukuwaʼipa tia miʼiraakat shiiʼiree nekerotuin na aʼwaajakana tü maleiwayaasükalüirua sünain anoujaa namaa. Müshiijeseʼe neʼitaain tü kaʼikat 25 tisienpüroʼu sünain shiain tü kaʼi jemeikalü oʼu Jesuu, nnojoitpajaʼa joʼuuin Jesuu soʼu kaʼikat tia (Lucas 2:8-12). Jaʼitakajaʼa na nikirajüinkana Jesuu, nnojoishii naya aainjain miʼiraa shikiira jemelin Jesuu. Saashin tü karaloʼutakat Los orígenes sagrados de las cosas profundas, 200 juya süchikijee jemein Jesuu nnojotsü jaralüin atüjaain saaʼu kasoʼulajachin joʼuuin nia otta eesü nnojorüle kasajatüin shia sümüin wayuu. 300 juya süchikijee outuin Jesuu, oʼttüshii na wayuukana sünain aaʼinraa miʼiraa shikiira joʼuuin nia.

7. ¿Jamüshii nnojoliinjanaka sünainpünaain na shiimainshiikana anoujain tü miʼiraa aainjünakat sülatiria juya?

⁷ Sainküin tü mmakat naatawaisü tü miʼiraa aainjünakat sülatiria juya. Anuu tü sümakat wanee karaloʼuta süchiki jalejeekualüin tia miʼiraakat: «Soʼu tü juyakat 46 nüpülapünaa Kürisüto, chi aluwataakai Roma kanüliakai Julio César, nüneeküin eneeroʼu 1 süpüla saainjünüin miʼiraa süntia tü Juya Jeketkat. Na chajanakana Roma naneeküin tia kaʼikat nüpüla Jano, chi namaleiwase sülaülakai suʼttia tü kasakalüirua. Sünülia tü kashikat eneeroʼu, [süka latín, Januarius] sünainjeejatü nünülia Jano, piamasü nuʼupünaa chia namaleiwasekai, wanee nüpüleeruajee otta wanee nüchiiruajee» (The World Book Encyclopedia). Tü miʼiraa aainjünakat süntia tü Juya Jeketkat naya keʼinaajalaka shikii na manoujainsaliikana.

8, 9. ¿Jamüshii nnojoliika sünainpünaain na nikirajüinkana Jesuu tü miʼiraa aainjünakat shikeraajapa nuuyase wanee wayuu?

⁸ Kamalainsü maʼin sümüin wayuu tü miʼiraa aainjünakat shikeraajapa nuuyase wanee wayuu. ¿Süküjainche tü Wiwüliakat  naainjainjatüin tia miʼiraakat na anoujashiikana? Nnojo. Ashajünüsü suluʼu tü Wiwüliakat nachiki piamashii neʼe wayuu aainjakana miʼiraa shikiira nekeraajüin nouyase otta nnojoishii naya anoujain nünain Jeʼwaa (Génesis 40:20; Marcos 6:21). Sünain tü miʼiraa aainjünapuʼukat shikeraajapa nuuyase wanee wayuu shia aʼwaajünaka maʼin tü maleiwayaasükalüirua. Müshiijeseʼe nnojoluin sünainpünaain tia na nikirajüinkana Jesuu süka «sünainjeejatüin shia nakuwaʼipa na manoujainsaliikana» (Las cosas nuestras de cada día).

⁹ Naashin na wayuu chajanakana Roma otta Grecia, eejachi wanee meʼrujusai wanaa sümaa jemelin wanee joʼuu jee naaʼinmajüin nia süpüla kaʼikat süpüshuaʼa. Na manoujainkana nünain Kürisüto aainjawaishii miʼiraa shikeraajapa nuuyase wanee wayuu süpüla naaʼinmajünüin chia wayuukai natuma na namaleiwasekana naashin.

10. ¿Jamüshii nnojoliika sünainpünaain na shiimainshiikana anoujain tü miʼiraa aainjünakat shikeraajapa nuuyase wanee wayuu?

¹⁰ ¿Anasüche noʼuluʼu Jeʼwaa tü miʼiraa sünainjeejatkat tü iküleesia ekirajakalü alawaa? Nnojotsü anain nümüin (Isaías 65:11, 12). Müshiijeseʼe nnojoluin sünainpünaain na shiimainkana anoujain tü miʼiraa aainjünakat shikiira shikeraajüin nuuyase wanee wayuu jee shiale wanee miʼiraa saainjaka tü iküleesia ekirajakalü alawaa.

11. (1) ¿Jamüsü anaka sümüin wainma wayuu tü miʼiraa saainjaka tü iküleesia ekirajakalü alawaa? (2) ¿Kasa tü alanaʼaleekat ojutu wamüin?

¹¹ Eesü wayuu atüjaaka saaʼu sünainjeejatüin sukuwaʼipa tü manoujainsatkalüirua tü miʼiraa aainjünakat 25 tisienpüroʼu otta waneirua miʼiraa, ayatapejeʼe naya sünainpünaain tia miʼiraakat. Anasü tia namüin süka kottiraain naya sümaa napüshi naashin. ¿Müsüche tü jülüjakat paaʼin süchiki tia? Nnojotsü mojuin nülatirüle kaʼi wanee wayuu sümaa nüpüshi, nukumajüin Jeʼwaa na wayuukana süpüla paaʼinwajiraainjanain naya sümaa napüshi  (Éfeso 3:14, 15). Shiapejeʼe alanaʼaleein watuma tü naalinkat Jeʼwaa wapüla. Müshiijeseʼe nnojoluin waya namaain na wapüshikana sünain tü miʼiraa saainjaka tü iküleesia ekirajakalü alawaa. Anuu nünüiki chi aluwataaushikai Pablo: «Temeʼejüin jaaʼin shiiʼiree jiyaawatüin saaʼu tü nüchekakat chi Senyotkai jüpüleerua süpüla jaaʼinrüinjatüin shia» (Éfeso 5:10).

12. ¿Jarat tü miʼiraa mojukat noʼuluʼu Jeʼwaa?

¹² Eeshii wayuu nnojoliikana kasajanain amüin jalejeekualüin süpüla wayuu sukuwaʼipa wanee miʼiraa. Nnojotpejeʼe müin tü jülüjakat naaʼin Jeʼwaa, mojusü nümüin sünainpünaale waya tü miʼiraa saainjaka tü iküleesia ekirajakalü alawaa otta sünainpünaale waya tü miʼiraa eere kojutuin maʼin atuma wayuu jee shiale tü miʼiraa eere yaletüin atuma wanee mma sükajee wanteera jee waneirua kasa. Jamüshiijaʼa na wayuu chajanakana Egipto, wainma miʼiraa naainjaka süpüla naʼwaajüin namaleiwase. Wanaa sümaa chajanain na israeliitakana isashiipaʼa süchikijee nojuʼitüin Egiptojee, nashatüin sukuwaʼipa tü miʼiraa naainjapuʼukat na egipciokana otta naashin nayakana nümüinjatü shia Jeʼwaa, süsalapejeʼe naya nutuma Jeʼwaa (Éxodo 32:2-10). Waaʼinra tü nümakat Isaías, chi nünüikimaajachikai Jeʼwaa: «Nnojo jipettüin kasa eekai yarüttüin» (paashajeʼera Isaías 52:11).

13. ¿Kasa eeka süpüla püsakireʼerüin anain paaʼin puuʼulaapa suulia aainjaa tü miʼiraa mojukat noʼuluʼu Jeʼwaa?

¹³ Puuʼulaapa suulia aainjaa tü miʼiraa saainjakat tü iküleesia ekirajakalü alawaa, eesüjaʼa süpüla püsakireʼerüin paaʼin sünain wainma kasa maʼaka saaʼin tüü: «¿Kasa taaʼinrajatka tasakinnüle natuma na taʼyataajiraakana amaa jamüin nnojoika sünainpünaain taya tü ekawaa aainjünakat 24 tisienpüroʼu otta tü sülatiriakat juya? ¿Kasa taaʼinrajatka müleka süsülajünüle wanee kasa tamüin soʼunnaa tü ekawaa aainjünakat 24 tisienpüroʼu? ¿Kasa taaʼinrajatka suchuntule tamüin taʼwayuuse toʼunajachin sümaa sünain wanee miʼiraa mojuka noʼuluʼu Jeʼwaa? ¿Kasa taaʼinrajatka mojule naaʼin na tachonniikana süka nnojolin naainjain waneirua miʼiraa maka saaʼin nekeraajapa nouyase?».

14, 15. ¿Kasa paaʼinrajatka müleka «feliz año» pümünüle amüin jee süsülajünüle wanee kasa pümüin soʼunnaa waneirua miʼiraa?

 ¹⁴ Acheküsü jülüjain waaʼin jamüinjatüin wanüiki otta kasain waaʼinrajatüin. Jamüshijaʼa «feliz año» pümünüle amüin, nnojo mamaneein pia sümüin wayuu, «anayaawatsejeʼe» eeshi süpüla pümüin namüin. Müleka püsakinnüle sutuma wayuu jamüin nnojoika paainjain wanee miʼiraa, eeshi süpüla püküjain jamüin nnojoika pia sünainpünaain tia miʼiraakat, kojutuinjatpejeʼe pümüin sukuwaʼipa wayuu otta kamaneeinjachi pia sümüin. Anuu tü sümakat tü Wiwüliakat: «Anakaja müleka kemeʼeriale jünüiki sümüin wayuu süpüshua sümaa kamaneein maʼi jia namüin süpüla yapainjanain jia süpüla asouktaa namüin» (Colosas 4:6). Eeshijaʼa süpüla pümüin sümüin wayuu anain pümüin alatiraa kaʼi sümaa wayuu otta kakoloin pia sümüin, shiajaʼa neʼe nnojoluin paainjain tia soʼunnaa waneirua miʼiraa.

¹⁵ ¿Kaseerü paaʼinraka püsülajünüle amüin wanee kasa? Nnojotsü aküjünüin suluʼu tü Wiwüliakat süpüshuaʼale tü kasa waaʼinrajatkat kasale alatüin wamüin. Süküjapejeʼe waaʼinrüinjatüin kasa anasü nuʼupala Maleiwa süpüla jimatüinjatüin waaʼin (1 Timoteo 1:18, 19). Jamüshijaʼa nüsülajeere wanee wayuu wanee kasa pümüin, eesü nnojorüle nütüjaain saaʼu nnojolin sünainpünaain pia wanee miʼiraa. Otta eeshi süpüla nümüin wanee wayuu pümüin: «Tatüjaa aaʼu nnojoluin sünainpünaain pia miʼiraakat tüü, tasülajeepejeʼe wanee kasa pümüin». Sülatawaire tia pümüin, püneeka tü anakat süpüla paaʼinrüin. Eejüinjatpejeʼe paaʼin suulia paaʼinrüin wanee kasa mojuka noʼuluʼu Jeʼwaa, nnojotsü waaʼinreein wanee kasa amojujeʼereetka wakuwaʼipa nümaa.

16. ¿Kasa paaʼinrajatka müleka naainjeere na püpüshikana wanee miʼiraa mojuka noʼuluʼu Maleiwa?

¹⁶ ¿Kasa paaʼinrajatka müleka naainjeere na püpüshikana wanee miʼiraa mojuka noʼuluʼu Maleiwa? Nnojo jashichin pia namüin. Soto paaʼin laülaain wayuu saaʼu sukuwaʼipa sümüiwaʼa. Kojutaa naya pümüin. Müle shia putuma, kojuteerü namüin tü punoujakalü anain (paashajeʼera Mateo 7:12). ¿Jama shiale keeʼireein naaʼin na püpüshikana nalatirüin kaʼi pümaa sünain wanee  miʼiraa? Anashi puʼuraajüle nümüin Jeʼwaa süpüla pütüjaain saaʼu tü anakat süpüla paaʼinrüin. Jülüjeesü paaʼin jameerüin pukuwaʼipa namaale pia sünain tia miʼiraakat otta pikirajaa süchiki tü paaʼinrajatkat. Shiainjatü paaʼinmaaka maʼin talatüin naaʼin Jeʼwaa putuma.

17. ¿Kasa paaʼinrajatka suulia mojujain naaʼin na püchonniikana sünainjee nnojoluin naya sünainpünaain waneirua miʼiraa?

¹⁷ ¿Kasa paaʼinrajatka suulia mojujain naaʼin na püchonniikana sutuma nnojoluin naya sünainpünaain waneirua miʼiraa? Alatirüinjachi pia kaʼi namaa sünain aainjaa wanee kasa kamalainka namüin. Anashi püsülajüle wanee kasa namüin na tepichikana, alanaʼaleeinjatpajaʼa pümüin alatiraa kaʼi namaa otta alinjana maʼin naya püpüla.

18. ¿Jamüshii outkajaainjanaka waya waneepia?

¹⁸ Süpüla anain nümüin Jeʼwaa waʼwaajüin nia, akatalaainjana waya suulia tü iküleesia ekirajakalü alawaa, nnojoliinjana waya sünainpünaain tü miʼiraa saainjakat otta tü kasa shikirajakalü anain. Suluʼuinjana waya tü iküleesia ekirajakat tü shiimainkat nüchiki Maleiwa. Müshiijeseʼe woutkajaainjanain semaanawai (paashajeʼera Hebreokana 10:24, 25). Na shiimainshiikana anoujain outkajaʼawaishii waneepia süpüla naʼwaajüin Jeʼwaa (Salmo 22:22; 122:1). Sünain tü outkajawaakat watütüleʼerajiraain waaʼin (Roma 1:12).

19. ¿Jamüsü anaka püküjale sümüin wayuu süchiki tü pikirajaakalü anain suluʼujee tü Wiwüliakat?

¹⁹ Süpüla paaʼinrüinjatüin tü anakat noʼuluʼu Maleiwa, püküjainjatü sümüin wayuu süchiki tü pikirajaakalü anain suluʼujee tü Wiwüliakat. Mojushaatasü saaʼin tü wayuukalüirua sutuma jouluin maʼin tü kasa mojusükat maaʼulu. Eesüjaʼa piʼraajüle wayuu makana akuwaʼipa mayaa. Paashajaa sümaa süchiki tü kasa anashaatakat maʼin naaʼinrüinjatka mapeena Maleiwa saaʼu tü Mmakat. Paaʼinrüle tia, mapüleejeerü pümüin puuʼulaain suulia anoujaa sünain tü alawaa shikirajakalü anain tü iküleesia ekirajakalü alawaa. Nükaaliijeechi pia Jeʼwaa süpüla paaʼinrüinjatüin tü anakat noʼuluʼu sümaʼinruʼu piʼyataain nümüin (Malaquías 3:10).