1, 2. Nikibazoki ekyo wakwebaza, kandi kubaki kisaine kwebaza otyo?

KURABILA omu kwega Ebibulia, oshobokeirwe okwo abantu bangi abalikwekora nibafukamira Katonda, nibegesa n’okukora ebintu ebyatalikwikiliza. (2 Abakorinto 6:17) Niyo nshonga Yehova natulagira ati muruge omu dini z’ebishuba ezilikwetwa “Babiloni Ekihango.” (Okushurulirwa 18:2, 4, NW) Isi, noija kukolaki? Buli omoi kisaine akole oburamuzi, n’okwebaza ati: ‘Isi, ndafukamira Katonda omu ngeli eyali kwenda anga ndamufukamira okwo ndikwenda’?

² Koraba warugire omu dini y’ebishuba, okozire oburamuzi burungi muno. Kyonka, aliho orwo kyakuguma kurekera emimanyilire n’emigenzo eyo wayendaga orwo wabaire okyali omu dini y’ebishuba. Katuhenjuzeho emimanyilire n’emigenzo mike tubone eshonga ey’okugira ebitekerezo nk’ebya Yehova.

3. (a) Kubaki abandi nibagumirwa kulekera kukoza ebishushani omu kufukamira Katonda? (b) Ebibulia negambaki ekikwete aha kukoza ebishushani orw’olikuba n’ofukamira Katonda?

³ Abantu abandi baina obuju bw’abazimu omu maju gabo anga nibakoza ebishushani omu kwegashaniza. Kolaba omanyire kubikoza, nobasa kugamba oti tikilikubasikana kushaba Katonda ntainabyo. Kyonka Yehova natwegesa okwo twakubasa kumufukamira. Kandi Yehova talikwenda tukoze ebishushani omu kumufukamira.​—Shoma Okuruga 20: 4, 5; Ezaburi 115:4-8; Isaya 42:8; 1 Yohana 5:21.

4. (a) Kubaki tikilikugasha abantu kufukamira baishenkurubo abafire? (b) Kubaki Yehova yatangire abantube batagamba n’abafu?

 ⁴ Abantu abandi nibakoza akanya kabo n’amani gangi kushemeleza baishenkurubo abafire. Wakushanga nibabafukamira. Kyonka twegire okwo abafu tibakubasa kutujuna anga kutukora kubi. Tihaliho mbali balikugya. Kityo kintu kibi muno omuntu kugamba n’abafu, orw’eshonga amakuru gona gona agotwakuhuliliza kuruga aha mugonzibwa waitu ayafire gaba galugire aha masitani. Niyonshonga Yehova akagambira Abaisiraeli batafumora n’abafu anga kwetahya omu burogi obw’engeli yona yona.—Obwijukiro bw’ebiragiro 18:10-12; shoma Ekishoborozoa Ekyongeirweho 26 na 31.

5. Nikihai ekya kukujuna kulekera kukoza ebishushani omu kufukamira Katonda n’okulekera kuhuliliza eby’enchweke elikugamba kuruga aha bafire?

⁵ Nikihai ekya kukujuna kulekera kukoza ebishushani omu mwegashanizo anga kufukamira emizimu? Noyetaga kushoma Ebibulia n’okuhondera geigeigei enyorekelera ya yonene. Oshube oijuke nk’okwo Yehova ‘natamwa’ ebintu ebyo. (Obwijukiro bw’Ebiragiro 27:15) Shaba ahali Yehova buli kanya akujune ogire ebitekerezo nk’ebye n’okumufukamira omu ngeli elikugasha. (Isaya 55:9) Otakurengeshanyia, Yehova naija kukuha amani obase kulekera emigenzo yona y’edini y’ebishuba.

6. Kubaki abantu baronzire omwezi gwa ikumi na ibili ekiro kya 25 kuba kiro ky’okuzarwa kwa Yesu?

⁶ Noeli kiro kikuru ekili kushemezibwa omu nsi yona, abali bangi nibesiga nk’okwo kiro kikuru ky’okwijuka okuzarwa kwa Yesu. Kyonka, Noeli netabuka omu dini y’ebishuba. Ekitabo ekilikwetwa Encyclopedia nikigamba okwo Abaroma abatakansi bakaba  nibashemeza okuzarwa kweizoba omu mwezi gwa ikumi naibili ekiro kya 25. Kyonka abebembezi b’edini, orw’okwenda abatakansi abo batahe omu dini yabo, bakabanza kushemeza ekiro ky’okuzarwa kwa Yesu omwezi gwa ikumi naibili ekiro kya 25, kyonka Yesu tiyazairwe kiro ekyo. (Luka 2:8-12) Abegesibwa ba Yesu tibashemeize Noeli. Ekitabo ekili kwetwa Sacred Origins of Profound Things, nikigamba okwo omu myaka 200 Yesu azairwe, “tihaliho muntu n’omoi ayabaire namanya ekiro eky’okuzarwa kwa Yesu, shana abantu bake muno nibobabaire nibafaho okumanya ekiro ekyo.” Ekiro kikuru kya Noeli kikabanza kushemezibwa emyaka mingi Yesu yarugire omu nsi.

7. Kubaki Abakirisito bamazima tibali kushemeza kiro kya Noeli?

⁷ Abantu bangi nibamanya okwo Noeli n’entwaza zayo ezikwete aha kuhangana ebigemuro nibitabuka omu dini y’ebishuba. Obulebero nibw’obu, omuli Buingereza n’ebichweka ebindi ebya Amerika, bakaba batangire ekiro kya Noeli kitashemezibwa orw’okuba nikitabuka omu batakansi. Omuntu ayashemezaga ekiro ekyo bakaba nibamubonabonyia. Kyonka akanya akahondeireho abantu bakabanza kushemeza ekiro ekyo. Kubaki Abakirisito ab’amazima tibali kushemeza kiro kya Noeli? Orw’enshonga nibenda kushemeleza Katonda omu bikorwa byabo byona.

8, 9. Kubaki Abakirisito abakarai tibashemezaga biro by’akuzarwa?

⁸ Abantu bangi nibashemeza ebiro by’okuzarwa kwabo. Isi, kisaine Abakirisito bashemeze ebiro by’okuzarwa? Ebiro by’okuzarwa ebilikugambwa omu Bibulia, bikashemezibwa abantu ababaire batalikufukamira Yehova. (Embandizo 40:20; Mariko 6:21) Abantu bakaba nibashemeza ebiro by’okuzarwa kwabo babase kukunira emizimu  yabo. Egyo niyo nshonga, Abakirisito ab’ekarine ya mbere “bakaba nibabona okushemeza ekiro ky’okuzarwa kw’omuntu kuba mugenzo gw’abatakansi.”—The World Book Encyclopedia.

⁹ Abaroma n’Abagiriki abakarai bakaba nibesiga ngu orw’omuntu azarwa aba aliy’omwoyo ogundi, kandi omwoyo ogwo gumulinda omu mikalireye yona. Ekitabo The Lore of Birthdays nikigamba kiti: “Omwoyo ogwo gukaba gukwatainemu n’oburogi kandi okuzarwa kwagwo kwaiganaga n’ekiro ky’omuntu ayazarwa.”

10. Kubaki Abakirisito kany’aka tibali kwetagwa kushemeza biro by’akuzarwa?

¹⁰ Isi, notekereza oti Yehova naikiliza ebiro bikuru ebilikutabuka omu dini y’ebishuba? (Isaya 65:11, 12) Chei. Niyo nshonga tituli kushemeza biro by’akuzarwa n’ebiro bikuru ebindi ebilikutabuka omu dini y’ebishuba.

11. Kubaki abantu abandi nibashemeza ebiro bikuru, kyonka iwe noyetagwa kwekomereza kintuki?

¹¹ N’orwo abantu abandi balikumanya okwo Noeli n’ebiro bikuru ebindi bikaruga omu batakansi, bakyagendelera kubishemeza. Nibatekereza ngu ebiro bikuru nk’ebyo niko kanya kokwema hamoi n’eka zabo. Isi, iwe notekereza otai? Tikubi kugira akanya kokuba n’eka yawe. Yehova niwe yabandisize eka, nayenda katugira ebyera omu maka gaitu. (Abaefeso 3:14, 15) Aha rw’ekyo, nitwetaga kwekomereza muno obunywanyi bwaitu ahali Yehova, kushagaho kushemereza barumuna baitu omu kushemeza ebiro bikuru ebilikutabuka omu dini y’ebishuba. Niyo nshonga entumwa Paulo ekahandiika eti: “Mutemu amani mumanye ebishemelera Omukama.”​—Abaefeso 5: 10.

12. Kubaki ebiro bikiru ebindi Yehova talikubikiliza?

¹² Abantu bangi nibatekeleza nk’okwo tikinamugasho  kumanya entabuko y’ebiro bikuru, kyonka ekyo tikikugendanwa na bitekelezo bya Yehova. Katonda talikwikiliza ebiro bikuru ebilikutabuka omu dini y’ebishuba, ebilikuha abantu ekitiinwa anga okuhaisiliza eihanga. Obulebero nibwobu, Abamisiri bakaba baina amagenyi gangi agalikuha ekitinwa emizimu yabo. Kabarugire Misiri bakashobereza abatakansi omu kiro kikuru kimoi, kandi ekiro ekyo bakyeta “Kiro kikuru ky’Omukama.” Kyonka Yehova akababonabonyia orw’enshonga y’okukora batyo. (Okuruga 32:2-10, NW) Nk’okwo omurangi Isaya yarangire, titulikwetagwa ‘kukwata kintu kyona kyona ekihagaire.’​—Shoma Isaya 52:11.

13. Nobasa kwebaza bibazoki orwo olikuramura kulekera kushemeza ebiro bikuru?

¹³ Orw’olikuramura kulekera kushemeza ebiro bikuru ebindi n’obasa kwebaza oti: Ndahorora ntai abakozi na banywani bange kabarambaza bati; kubaki otalikushemeza kiro kikuru kya Noeli naichwe? Isi, nimbasa kukoraki orw’omuntu arampa ekigemuro kya Noeli? Isi, nkoreki orw’omushaija anga mukazi wange atali mwesigwa arayenda tushemeze ekiro kikuru? Nimbasa kujuna ntai abana bange batehulira kubi orw’enshonga y’okutashemeza biro bikurui n’ebiro by’okuzarwa kwabo?

14, 15. Nobasa kukoraki orw’omuntu yakukwihukya n’ebiro bikuru anga kukuha ebigemuro by’ebiro bikuru?

¹⁴ Kirungi muno kukoza obushobokerwa omu buramuzi obwo tulikukora. Obulebero ni bwobu: Orwo abantu barakwihukya n’ebiro bikuru tikisaine kubehugya. Nobasa kubagambira oti, “Mwakora.” Kyonka omuntu kalaba nayenda kumanya enshonga kubaki otalikushemeza biro bikuru, mushoborore enshonga egyo. Kyonka okore otyo omu bufura, omu makune, n’obuganyizi.  Ebibulia negamba eti: “Efumoro yanyu eshemere, erungwemu akonyu, nirwo muramanya okwo murahorora buli muntu.” (Abakolosai 4:6) Orundi nobasa kubashoborora okw’olikwenda kwema hamoi n’abandi kuhangana ebigemuro, kyonka wakwenzire kukora otyo omu kanya akatali ka biro bikuru.

¹⁵ Isi, orakoraki omuntu nanka kalakuha ekigemuro ky’ekiro kikuru? Ebibulia teina mateka ga buli kintu, kyonka netulagira tugendelere kwikazage ishenkazi mutima eli nungi. (1 Timoteo 1:18, 19) Orundi omuntu yakukuha ekigemuro atalikumanya okw’otalikushemeza kiro kikuru. Rundi yakugamba ati: “Nimanya okw’otalikushemeza kiro kikuru, kyonka nakwenzire kukuha ekigemuro eki.” Iwe nobasa kuramura kukikiliza anga kukyanga. Kyonka oyekaze kwikazage ishenkazi mutima eli nungi omu buramuzi obw’olikukora. Titulikwetaga kukora kintu kyona kyona ekyakubasa kutwihya ahali Yehova.

16. Nobasa kukoraki abantu b’eka yawe kabakwenda oshemeze nabo ebiro bikuru?

¹⁶ Wakukoraki abantu b’eka yawe kabakwenda kushemeza ekiro kikuru? Otabatanga. Ijuka nk’okwo baina ehaki y’okuramura ebyobalakora. Obe mufura, mara okunire ebitekelezo byabo, nkaiwe okwo wakwenzire bakunira ebitekelezo byawe. (Shoma Matayo 7:12.) Isi, nobasa kukoraki abantu b’eka yawe kabakwenda oshemeze nabo ebiro bikuru? Otakaramwire ekyorakora, shaba Yehova akujune okore oburamuzi obulikugasha. Tekelezaho ekintu ekyo, oshube okore obuchukuzi. Oijuke nk’okwo ebiro byona noyenda kushemereza Yehova.

17. Wakubasa kujuna otai abana bawe batehulira kubi orw’enshonga y’okutashemeza kiro kikuru?

¹⁷ Wakubasa kujuna otai abana bawe batehulira kubi  orw’enshonga y’okutashemeza kiro kikuru? Omu mirundi mingi tekateka ebintu ebyobakubasa kushemelerwa. Kandi nobasa kubaha ebintu ebilikubashemelera. Ekintu kirungi muno ekyo wakubasa kuha abana bawe, nikukoza ak’anya hamoi nabo n’okubagonza muno.

18. Kubaki nitwetagwa kuterana omu nkiiko z’Ekikirisito?

¹⁸ Tubase kushemeleza Yehova, nitwetagwa kulekera kwema hamoi n’edini z’ebishuba, emigenzo amoi n’ebiro bikuru by’edini ezo. Aha rw’ekyo nitwetagwa kwema hamoi n’edini y’amazima. Isi, ngeliki? Engeli emoi eyotwakubasa kukoza, nikuterana hamoi omu nkiiko zaitu z’Ekikirisito. (Shoma Abaheburania 10:24, 25.) Enkiiko kintu kilikugasha muno omu dini y’amazima. (Ezaburi 22:22; 122:1) Orwo tulikuterana hamoi nitutekanganamu ekihika.​—Abaroma 1:12.

19. Kubaki nikigasha muno kushoborora abandi amazima ag’oyegire omu Bibulia?

¹⁹ Engeli endijo ey’okwema hamoi n’edini y’amazima, nikugambira abandi amakuru garungi ag’oyegire omu Bibulia. Ebintu bingi ebilikukoreka omu nsi mbiteka abantu aha kahangahango. (Ezekieli 9:4). Nangu orundi wakuba nomanya abantu abalikushasibwa ebintu nk’ebyo. Bashobolore eshuubi nungi ey’akanya akalikwija. Okugendelera kuterana omu nkiiko z’Ekikirisito, n’okurangilira abandi amakuru g’Obukama agali omu Bibulia, nikwija kukujuna kulekera edini y’ebishuba n’emigenzo yayo. Oyesige nk’okwo kolakora otyo noija kugira ebyera bingi kandi Yehova naija kukuha emigisha mingi orw’eshonga y’okwekaza kumufukamira omu ngeli elikugasha.​—Malaki 3:10.