1, 2. Ano nga pamangkot ang dapat mo ipamangkot sa imo kaugalingon, kag ngaa importante ini?

NATUN-AN mo sa Biblia nga madamo sang nagapangangkon nga nagasimba sa Dios ang nagatudlo sing sala ukon nagahimo sing butang nga wala nalipay ang Dios. (2 Corinto 6:17) Amo nga ginsugo kita ni Jehova nga maggua sa butig nga relihion, ang “Babilonia nga Daku.” (Bugna 18:2, 4) Ano ang himuon mo? Kada isa sa aton dapat magdesisyon, gani dapat naton pamangkuton ang aton kaugalingon, ‘Gusto ko bala simbahon ang Dios suno sa paagi nga gusto niya, ukon gusto ko sia simbahon sa naandan ko na nga paagi?’

² Maayo gid kon nagbiya ka na sa butig nga relihion. Pero basi may ginahimo ka pa nga mga buhat ukon kustombre sang butig nga relihion. Binagbinagon naton ang pila sini kag kon ngaa importante nga tamdon naton ini pareho sa pagtamod ni Jehova.

3. (a) Ngaa nabudlayan ang iban nga untatan ang paggamit sing mga imahen sa ila pagsimba? (b) Ano ang ginasiling sang Biblia parte sa paggamit sing mga imahen sa pagsimba sa Dios?

³ Tinuig na nga nagagamit ang iban nga tawo sang mga imahen ukon grotto sa ila balay sa pagsimba sa Dios. Kon may ara ka sini, basi mamag-uhan ka ukon magbatyag nga sala ang pagsimba nga wala ini ginagamit. Pero dumduma nga ginatudluan kita ni Jehova kon paano sia simbahon. Kag maathag nga ginasilingan kita sang Biblia nga indi  gusto ni Jehova nga maggamit kita sing mga imahen sa pagsimba sa iya.—Basaha ang Exodo 20:4, 5; Salmo 115:4-8; Isaias 42:8; 1 Juan 5:21.

4. (a) Ngaa indi kita dapat magsimba sa aton mga katigulangan? (b) Ngaa ginsilingan ni Jehova ang iya katawhan nga indi makig-istorya sa mga patay?

⁴ Ginatinguhaan sang iban nga malipay ang ila napatay na nga katigulangan. Mahimo pa gani nila sila simbahon. Pero natun-an naton nga ang mga patay indi na makabulig ukon makasakit sa aton. Wala na sila nagakabuhi sa iban nga lugar. Delikado gid nga makig-istorya sa ila, kay ang bisan ano nga mensahe nga naghalin kuno sa paryente nga napatay, naghalin gali sa mga demonyo. Amo nga ginsugo ni Jehova ang mga Israelinhon nga indi makig-istorya sa mga patay ukon makigbahin sa bisan ano nga klase sang demonismo.—Deuteronomio 18:10-12; tan-awa ang Endnote 26 kag 31.

5. Ano ang makabulig sa imo nga mauntatan ang paggamit sing mga imahen sa pagsimba sa Dios kag ang pagsimba sa imo katigulangan?

⁵ Ano ang makabulig sa imo nga mauntatan ang paggamit sing mga imahen sa pagsimba sa Dios ukon pagsimba sa imo katigulangan? Basaha ang Biblia kag pamensara kon ano ang pagtamod ni Jehova sa sina nga mga butang. Para sa iya “makangilil-ad” ini. (Deuteronomio 27:15) Mangamuyo kay Jehova kada adlaw nga buligan ka nga tamdon ang mga butang pareho sa iya pagtamod kag masimba sia suno sa iya gusto. (Isaias 55:9) Sigurado nga buligan ka gid niya nga talikdan ang tanan nga may labot sa butig nga pagsimba.

6. Ngaa ginpili ang Disiembre 25 sa pagselebrar sang birthday ni Jesus?

⁶ Ang isa sa popular nga selebrasyon sa kalibutan amo  ang Krismas, kag para sa kalabanan amo ini ang birthday ni Jesus. Pero ang matuod, naangot ini sa butig nga pagsimba. Ang isa ka encyclopedia nagpaathag nga ginselebrar sang Romano nga mga pagano ang pagkabun-ag sang adlaw kada Disiembre 25. Gusto sang mga lider sang simbahan nga mas madamo nga pagano ang mangin Cristiano, gani bisan wala natawo si Jesus sang Disiembre 25, ginselebrar nila ini nga petsa bilang birthday ni Jesus. (Lucas 2:8-12) Ang mga disipulo ni Jesus wala magselebrar sang Krismas. Ang isa ka libro nagpaathag nga pagligad sang 200 ka tuig sa tapos mapatay si Jesus, “wala sing nakahibalo, kag diutay lang gid ang interesado, kon san-o gid sia natawo.” (Sacred Origins of Profound Things) Ginatos ka tuig na nga napatay si Jesus sang ginsugdan ang pagselebrar sang Krismas.

7. Ngaa wala nagaselebrar sang Krismas ang matuod nga mga Cristiano?

⁷ Madamo ang nakahibalo nga naghalin sa mga pagano ang Krismas kag ang mga kustombre sini, pareho sang pagsinadya kag paghatagay sing regalo. Halimbawa, gindumilian sadto sa England kag pila ka bahin sang Amerika ang pagselebrar sang Krismas kay naghalin ini sa mga pagano. Ginasilutan ang bisan sin-o nga magselebrar sini. Pero sang ulihi, ginselebrar liwat sang mga tawo ang Krismas. Ngaa wala nagaselebrar sang Krismas ang matuod nga mga Cristiano? Kay gusto nila nga malipay ang Dios sa tanan nila nga ginahimo.

8, 9. Ngaa wala nagaselebrar sang birthday ang mga Cristiano sang una?

⁸ Ang isa pa ka popular nga selebrasyon amo ang birthday. Dapat bala magselebrar sini ang mga Cristiano? Ang nagselebrar lang sang birthday nga mabasa sa Biblia ginhiwat sang mga wala nagasimba kay Jehova. (Genesis  40:20; Marcos 6:21) Ang pagselebrar sang birthday sadto nagapadungog sa butig nga mga dios. Amo nga ginakabig sang mga Cristiano sang una ang “pagselebrar sang birthday nga isa ka pagano nga kustombre.”—The World Book Encyclopedia.

⁹ Nagapati ang mga Romano kag mga Griego sadto nga kon matawo ang isa may espiritu nga nagabantay sa iya asta mapatay ini nga tawo. “Ini nga espiritu may misteryoso nga kaangtanan sa isa ka dios nga pareho ang kaadlawan sa indibiduwal nga nabun-ag,” paathag sang libro nga The Lore of Birthdays.

10. Ngaa indi dapat magselebrar sang birthday ang mga Cristiano subong?

¹⁰ Sa banta mo, nalipay ayhan si Jehova sa mga selebrasyon nga naangot sa butig nga relihion? (Isaias 65:11, 12) Wala gid. Amo nga wala kita nagaselebrar sang birthday kag iban pa nga selebrasyon nga ginahimo sang butig nga relihion.

11. Ngaa ang pila nagaselebrar sang butig nga mga selebrasyon? Ano dapat ang pinakaimportante sa imo?

¹¹ Bisan pa nahibaluan sang pila nga naghalin sa mga pagano ang Krismas kag iban pa nga selebrasyon, ginaselebrar nila ini gihapon. Para sa ila, tsansa na ini nga makaupod nila ang ila pamilya. Amo man bala sina ang ginabatyag mo? Indi sala nga makaupod mo ang imo pamilya. Si Jehova ang nagtukod sang pamilya, kag gusto niya nga maayo ang aton relasyon sa ila. (Efeso 3:14, 15) Pero, dapat mas importante sa aton ang maayo nga relasyon kay Jehova sangsa mapahalipay ang aton mga paryente paagi sa pagselebrar sang butig nga selebrasyon sang mga relihion. Amo nga nagsiling si apostol Pablo: “Padayon ninyo nga pat-ura kon ano ang kalahamut-an sa [ukon, ginabaton sang] Ginuo.”—Efeso 5:10.

12. Ano nga selebrasyon ang wala ginabaton ni Jehova?

 ¹² Para sa madamo, indi kuno importante bisan diin man naghalin ang mga selebrasyon, pero indi amo sina ang pagtamod ni Jehova. Wala niya ginabaton ang mga selebrasyon nga naghalin sa butig nga pagsimba ukon nagapadungog sa mga tawo ukon sa pungsod. Halimbawa, madamo sing selebrasyon ang mga taga-Egipto para sa ila butig nga mga dios. Pagkatapos makapalagyo ang mga Israelinhon sa Egipto, ginsunod nila ang isa ka pagano nga selebrasyon kag gintawag ini nga “kapiestahan para kay Jehova.” Pero ginsilutan sila ni Jehova. (Exodo 32:2-10) Pareho sa ginsiling ni propeta Isaias, dapat “indi [kita] magtandog sang bisan ano nga mahigko!”—Basaha ang Isaias 52:11.

13. Ano ang mahimo mo mapamangkot kon untatan mo ang pagselebrar sang mga selebrasyon nga wala nabase sa Biblia?

¹³ Sang gin-untatan mo ang pagselebrar sang mga selebrasyon nga wala nabase sa Biblia, mahimo madamo ka sing pamangkot. Halimbawa: Ano ang himuon ko kon mamangkot ang akon mga katrabaho kon ngaa wala ako nagaselebrar sang Krismas? Ano ang himuon ko kon hatagan ako sing regalo sa Krismas? Ano ang himuon ko kon gusto sang akon bana ukon asawa nga magselebrar ako sing mga selebrasyon nga wala nabase sa Biblia? Paano ko mabuligan ang akon mga bata nga indi masubuan bangod wala kami nagaselebrar sang ila birthday ukon iban pa nga selebrasyon?

14, 15. Ano ang himuon mo kon may magtamyaw sa imo pareho sing Merry Christmas ukon may maghatag sa imo sing regalo?

¹⁴ Importante nga pamensaran mo sing maayo kon ano ang imo isabat kag himuon sa kada sitwasyon. Halimbawa, kon tamyawon ka sing Merry Christmas, indi mo sila dapat pagbalewalaon. Mahimo ka magsiling sing, “Salamat.” Pero kon gusto sang isa nga mahibaluan pa gid kon ngaa wala ka  nagaselebrar, mahimo mo ini ipaathag sa iya. Pero, pirme ipakita ang kaayo, mangin mataktikanhon, kag matinahuron. Ang Biblia nagasiling: “Maghambal kamo pirme sing mainayuhon, nga daw gintimplahan sing asin, agod mahibaluan ninyo kon paano sabton ang kada isa.” (Colosas 4:6) Mahimo ka magsiling sa ila nga nanamian ka man mag-upod sa iban kag maghatag sing regalo pero indi lang kon may mga selebrasyon pareho sang Krismas.

¹⁵ Ano abi kon hatagan ka sing regalo? Ang Biblia wala naghatag sing listahan sang mga pagsulundan, pero nagsiling ini nga dapat matinlo ang aton konsiensia. (1 Timoteo 1:18, 19) Basi wala nakahibalo ang naghatag sa imo sing regalo nga wala ka nagaselebrar sang mga selebrasyon nga wala nabase sa Biblia. Ukon mahimo sia magsiling, “Kabalo ko nga wala ka nagaselebrar, pero gusto ko gihapon ihatag ini sa imo.” Depende sa imo kon batunon mo ang regalo ukon indi. Pero bisan ano man ang imo desisyon, siguraduha nga matinlo ang imo konsiensia. Indi naton gusto maghimo sing bisan ano nga butang nga makaguba sang aton relasyon kay Jehova.

16. Ano ang himuon mo kon gusto sang imo pamilya magselebrar sang mga selebrasyon nga wala nabase sa Biblia?

¹⁶ Ano ang himuon mo kon gusto sang imo pamilya magselebrar sang mga selebrasyon nga wala nabase sa Biblia? Indi ka makigbais sa ila. Dumduma nga makadesisyon sila kon ano ang gusto nila himuon. Ipakita ang kaayo sa ila kag respetuha sila, kay gusto mo nga respetuhon ka man nila. (Basaha ang Mateo 7:12.) Pero ano ang himuon mo kon gusto sang imo pamilya nga mag-upod ka sa ila sa sini nga selebrasyon? Antes ka magdesisyon, mangamuyo anay kay Jehova nga buligan ka nga makadesisyon sing insakto. Pamensara ang sitwasyon kag mag-research. Dumduma nga gusto mo pirme malipay si Jehova.

17. Paano mo mabuligan ang imo kabataan nga indi masubuan kay wala kamo nagaselebrar sang mga selebrasyon nga wala nabase sa Biblia?

 ¹⁷ Paano mo mabuligan ang imo kabataan kon makita nila ang iban nga nagaselebrar sang mga selebrasyon nga wala nabase sa Biblia? Kon kaisa, maghanda sing espesyal pagtipontipon para sa ila. Puede mo man sila hatagan sing regalo. Kag ang isa sa pinakamaayo nga regalo nga mahatag mo amo ang imo pagpalangga kag pagpakig-upod sa ila.

18. Ngaa dapat kita magtambong sa Cristianong mga miting?

¹⁸ Para malipay si Jehova, dapat naton biyaan ang butig nga relihion pati na ang mga kustombre kag mga selebrasyon sini. Pero dapat man kita mangin bahin sang matuod nga pagsimba. Paano? Ang isa ka paagi amo ang regular nga pagtambong sa Cristianong mga miting. (Basaha ang Hebreo 10:24, 25.) Importante gid nga bahin sang matuod nga pagsimba ang mga miting. (Salmo 22:22; 122:1) Mapalig-on naton ang isa kag isa kon magtipon kita sing tingob.—Roma 1:12.

19. Ngaa importante nga isugid mo sa iban ang kamatuoran nga natun-an mo sa Biblia?

¹⁹ Ang isa pa ka bahin sang matuod nga pagsimba amo ang pagsugid sa iban sang imo mga natun-an sa Biblia. Madamo ang nasubuan sa malain nga nagakatabo sa kalibutan. Basi may kilala ka nga amo sini ang ginabatyag. Isugid sa ila ang imo matahom nga paglaum sa palaabuton. Kon nagatambong ka sa Cristianong mga miting kag nagasugid sa iban sang kamatuoran nga imo natun-an sa Biblia, mabatyagan mo nga indi mo na gusto makigbahin sa butig nga relihion kag sa mga kustombre sini. Sigurado nga mangin malipayon ka kag pakamaayuhon ka gid ni Jehova kay ginpili mo nga simbahon sia sa insakto nga paagi.—Malaquias 3:10.