1, 2. Epuriro riṋe ndu mo sokuripura nu ongwaye ihi tji tji ri otjiṋa otjinanḓengu?

MOMAKONḒONONENO woye wOmbeibela, ove we rihonga kutja ovandu ovengi mbe tja ve karera Mukuru, ve honga poo ve tjita oviṋa Mukuru mbya tonda. (2 Ovakorinte 6:17) Mena ranao, Jehova u tu rakiza kutja tu pite mu “Babilon otjinene” tji tji kuramena po ozongamburiro zoposyo. (Omavandururiro 18:2, 4) Ove mo tjiti vi? Auhe wetu ma sokutoora omukambo, nu matu sokuripura oveni kutja, ‘Me vanga okukarera Mukuru momuano mbwe vanga poo me vanga okumukarera momuano mbu mbi tjita aruhe?’

² Ndovazu wa poka poo wa isakisa ena roye kongamburiro yoposyo rukuru, ove tjiri wa tjita otjiṋa otjiwa. Posi yokutja, mourekoto woye mape ya amu kara ovitjitwa poo otuzo twozongamburiro zoposyo ove ngunda tu wa suvera. Ngatu hungirire ku tjiva vyovitjitwa notuzo two nu tu mune kutja ongwaye tje ri ohepero okuvara oviṋa mbi momuano Jehova mbye vi vara.

3. (a) Ongwaye tji mape ya aku rire ouzeu kovandu tjiva okuisa okuungurisa ovisenginina momerikotameneno wawo? (b) Ombeibela i tja vi ohunga nokuungurisa ovisenginina momerikotameneno wetu ku Mukuru?

³ Ovandu tjiva ve kara noviserekarera mozondjuwo zawo mbi ve ungurisa momerikotameneno wawo ku Mukuru. Ndovazu ove u tjita nao wina, mape ya arire ouzeu kove okuritotamena ku Mukuru nokuhina vyo. Nungwari, tjiwa kutja Jehova u tu honga omuano omusemba wokurikotamena ku ye. Ombeibela i tu raera oukahu kutja Jehova ka vanga kutja tu ungurise ovisenginina momerikotameneno wetu.—Lesa Eksodus 20:4, 5; Epsalme 115:4-8; Jesaja 42:8; 1 Johanes 5:21.

4. (a) Ongwaye tji tu ha sokurikotamena kovakuru vetu mba ṱa? (b) Ongwaye Jehova tja raerere otjiwaṋa tje kutja atji kondjo okuhungira ku novaṱi?

 ⁴ Ovandu tjiva mape ya ave ungurisa oruveze nomasa wawo okukondja okuyorokisa ovakuru vawo mba ṱa. Owo mape ya ave rikotamene ku wo. Posi yokutja, twe rihonga kutja ovaṱi kamaave yenene okutuvatera poo okutuhihamisa. Owo kave nomuinyo poruveze kaaṋi. Ouatjiri owombwi wokutja, okukondja okuhungira kuna ovaṱi otjiṋa otjinaumba, orondu ombuze ngamwa ndji mape ya ai munika aayo ya zu komuzamumwe wetu ngwa ṱa, oyo tjiri mai zu kozondemone. Nu Jehova opa zire okutjaera Ovaisrael kutja ave ha roro okuhungira ku novaṱi poo okukara norupa momiano ngamwa avihe vyoundjai.—Deuteronomium 18:10-12; tara kOmambo wokehi 26 no 31.

5. Otjikeṋa tji matji yenene okukuvatera kutja u ise okuungurisa ovisenginina momerikotameneno woye ku Mukuru nokutja u ise okurikotamena kovaṱi?

⁵ Otjikeṋa tji matji yenene okukuvatera kutja u ise okuungurisa ovisenginina momerikotameneno woye ku Mukuru poo kutja u ise okurikotamena kovaṱi? Ove mo sokulesa Ombeibela nu oripurire oukoto koumune waJehova ohunga noviṋa mbi. Eye u vi vara otjoviṋa ‘oviyaukise.’ (Deuteronomium 27:15) Kumba ku Jehova eyuva arihe kutja me ku vatere okukara noumune tjimuna imbwi owe ohunga noviṋa, nokurikotamena ku ye momuano mbwe vanga. (Jesaja 55:9) Mo yenene okukara nongamburiro kutja Jehova me ku pe omasa ngu mo hepa okunakaura oviṋa avihe mbi notjiṋa nozongamburiro zoposyo.

6. Ongwaye 25 ku Desemba tji ra toororwa otjeyuva romazemburukiro wongwatero yaJesus?

⁶ Omukandi wOkresmesa i umwe womukandi mbu tjiukwa tjinene mouye, nu ovandu ovengi ve muna kutja Okresmesa omazemburukiro wongwatero yaJesus. Posi yokutja,  omukandi wOkresmesa u notjiṋa nongamburiro yoposyo. Embo rimwe ra kahurura kutja Ovaroma ovanavisenginina aave zemburuka ongwatero yeyuva meyuva ndi 25 ku Desemba. Ovahonge vozokereka aave vanga kutja ovandu ovengi mbe rikotamena kovisenginina ve rire Ovakriste, okutja nandarire kutja Jesus kakwaterwe momayuva tji ya ri 25 ku Desemba, owo va uta okuzemburuka ongwatero yaJesus meyuva ndo. (Lukas 2:8-12) Ovahongewa vaJesus kaave nyanda omukandi wOkresmesa. Embo rimwe ra kahurura kutja mozombura 200 kombunda yongwatero yaJesus, “kape nomundu ngwaa tjiwa kutja Jesus wa kwatwa ruṋe, nu ovandu ovaṱiṱi uriri mbaave twara ko ombango.” (Sacred Origins of Profound Things) Omazemburukiro wOkresmesa ya uta ozombura ozengi kombunda ya indu Jesus tja ri kombanda yehi.

7. Ongwaye Ovakriste vatjiri tji ve ha zemburuka Okresmesa?

⁷ Ovandu ovengi ve tjiwa kutja Okresmesa notuzo twayo atuhe tjimuna omikandi nokupasana oviyandjewa, vya za kovanavisenginina. Okutara kotjihorera, mEhi rOvaingirisa notupa tjiva moAmerika, pari oruveze omukandi wOkresmesa mu wa tjaererwe mena rombutiro yawo yovanavisenginina. Omundu auhe ngwaa zemburuka Okresmesa aa verwa. Nungwari kombunda ovandu va uta okuzemburuka Okresmesa rukwao. Ongwaye Ovakriste vatjiri tji ve ha zemburuka Okresmesa? Omena rokutja ve vanga okuyorokisa omutima waMukuru moviṋa avihe mbi mave tjiti.

8, 9. Ongwaye Ovakriste voruveze orukuru tjaave ha zemburuka omayuva wongwatero?

⁸ Omazemburukiro warwe ovandu ovengi ngu ve kara na wo, omazemburukiro wongwatero yawo. Hapo Ovakriste ve sokuzemburuka eyuva rongwatero yawo? Omazemburukiro wongwatero ayeerike nga tamunwa mOmbeibela ya ri owovandu mbaave ha karere Jehova. (Genesis 40:20; Markus 6:21) Omikandi  vyongwatero aavi tjitwa otjondjozikiro koomukuru voposyo. Kunao, Ovakriste voruveze orukuru opaave “zokuvara omazemburukiro wongwatero yomundu ngamwa auhe otjotjitjitwa tjovanavisenginina.”—The World Book Encyclopedia.

⁹ Ovaroma nOvagrike voruveze orukuru aave kambura kutja pe nombepo ndji kara po meyuva rongwatero yomundu nokutja ombepo ndjo i tjevera omundu ngo oure womuinyo we. Ovandu voruveze ndwo mbe ha ri Ovakriste aave zemburuka omayuva wongwatero mena rokutja aave ripura kutja okutjita nao maku tjiti kutja oomukuru vawo ve tjevere omundu ngwa kwatwa meyuva ndo.

10. Ongwaye Ovakriste ndino tji ve ha sokuzemburuka omayuva wongwatero?

¹⁰ Ove u muna kutja Jehova u yakura omazemburukiro womayuva nge notjiṋa nozongamburiro zoposyo? (Jesaja 65:11, 12) Kako, ka yakura. Opu tu ha zokuzemburuka omayuva wongwatero poo ngamwa omayuva womasuviro nge notjiṋa nozongamburiro zoposyo.

11. Omena ratjike ovandu tjiva tji ve zemburuka omayuva womasuviro wouye? Otjikeṋa tji matji sokurira otjinanḓengu tjinene kove?

¹¹ Ovandu tjiva ve tjiwa kutja Okresmesa nomayuva warwe womasuviro ya za pi, posi yokutja owo ngunda ve yezemburuka. Owo ve muna kutja omayuva otja ingo ye yandja oruveze oruwa komaṱunḓu okukara pamwe. Ove wina u muna nao? Kanavi okuvanga okukara pu neṱunḓu roye. Jehova ongwa uta eṱunḓu, nu u vanga kutja tu kare noupanga ouwa kuna wo. (Ovaefese 3:14, 15) Posi yokutja, matu sokuyandja ombango kokukara noupanga ouwa kuna Jehova, moruveze rwokukara norupa momazemburukiro womayuva nga za kozongamburiro zoposyo otjomuano wokuyorokisa omitima vyovazamumwe vetu. Paulus opa zokutja: “Aruhe ripureye imbi mbi tjata ku Muhona.”—Ovaefese 5:10.

12. Otjikeṋa tji matji tjiti kutja omazemburukiro weyuva kaaṋi aye ha yakurwa i Jehova?

 ¹² Nandarire kutja ovandu ovengi kave rikende ohunga nokutja eyuva rorive ra uta vi, Jehova u yandja ko ombango tjinene. Eye kayakura omayuva womasuviro nga za momerikotameneno woposyo poo nge tongamisa ovandu poo oviṋa mehi. Okutara kotjihorera, Ovaengipte va ri nomikandi omingi mbyaave tjitire oomukuru vawo vovisenginina. Indu Ovaisrael tji va tjinda moEngipte, owo va horera omukandi wOvaengipte umwe nave u isana kutja “eyuva enene kondjozikiro yaMuhona.” Nungwari tji va tjita nao, Jehova we ve vera. (Eksodus 32:2-10) Otja omuprofete Jesaja pa heya, eṱe katu ‘sokuṱuna koviṋa mbya zerikwa!’—Lesa Jesaja 52:11.

13. Indu tji wa tye kutja mo isa okukara norupa momikandi vyomayuva nge zemburukwa mouye, omapuriro yeṋe ngu mape ya o kara na wo?

¹³ Indu tji wa tye kutja mo isa okukara norupa momikandi vyomayuva womasuviro, mape ya o kara nomapuriro omengi. Okutara kotjihorera, mape ya o ripura omapuriro otja inga: Me sokutjita vi indu ovakwetu mbu tu ungura pamwe tji ve ndji pura kutja ongwaye tji mbi ha zemburuka Okresmesa puna wo? Me sokutjita vi indu omundu tje ndji pe otjiyandjewa tjOkresmesa? Omukwetu ngu twa kupasana tji ma undjire ku ami okuzemburuka eyuva rorive me sokutjita vi? Me yenene vi okuvatera omuatje wandje kutja a ha kara nomutima omuvi tje hi nokuzemburuka eyuva rorive poo eyuva re rongwatero?

14, 15. Mo yenene okutjita vi indu omundu tje ku zerire po ouṋingandu poo tje ku pe otjiyandjewa momayuva womasuviro?

¹⁴ Matu sokuungurisa ounongo okutjiwa kutja matu sokutja vi poo okutjita vi mongaro aihe. Okutara kotjihorera, indu ovandu tji ve ku zerire po ouṋingandu meyuva rorive, ko nokuhepa okutjita aayo ko nokuvezuva. Mo yenene okutja, “Okuhepa.” Nungwari tji pe nomundu ngu ma vanga okutjiwa ovingi, ove mo yenene okumukahururira kutja ongwaye tji  u ha zemburuka eyuva ndo. Nungwari aruhe raisa ombepo ombwa, hungira nongengezero nu nondengero. Ombeibela i tja: “Omambo weṋu aruhe ngaye rire omananyuṋe nomatjate; nu mu tjiwe okuyandja eziriro esemba komundu auhe.” (Ovakolose 4:6) Ngahino mo yenene okukahurura kutja u tjaterwa okukara pu novakweṋu nokupasana oviyandjewa posi yokutja ko vanga okutjita oviṋa mbi momayuva otja inga.

¹⁵ Mo sokutjita vi omundu tje ku pe otjiyandjewa? Ombeibela kai yandja oruteto rwoviṋa mbi twa sokutjita na imbi mbi tu ha sere, nungwari i tja matu sokukara nomeritjiviro omawa womomutima. (1 Timoteus 1:18, 19) Omundu ngu me ku pe otjiyandjewa mape ya ke nokutjiwa kutja ove kozemburuka omayuva womasuviro. Poo mape ya a tja, “Me tjiwa kutja kozemburuka omayuva womasuviro, posi yokutja me vanga okukupa otjiyandjewa hi.” Momiano avihe mbi, mo yenene okutya kutja mo yakura otjiyandjewa ho poo indee. Nungwari ngamwa omukambo auhe mbu wa toora, kondja kutja u sewe nomeritjiviro omawa womomutima. Kamaatu vanga okutjita otjiṋa tji mape ya atji twa oupanga wetu kuna Jehova moumba.

16. Ove mo sokutjita vi indu oveṱunḓu roye tji mave vanga kutja u kare puna wo tji mave zemburuka omayuva womasuviro?

¹⁶ Indu oveṱunḓu roye tji mave vanga kutja u zemburuke omayuva womasuviro puna wo, mo sokutjita vi? Ko nokuhepa okuuta ozombata kuna wo. Tjiwa kutja owo ve nouyara wokutya ohunga na imbi mbi mave vanga okutjita. Raisa otjikaro otjiwa nondengero kozondando zawo, otja tjo tjo vanga kutja owo ve yandje ondengero ku inḓa ozoye. (Lesa Mateus 7:12.) Nambano oveṱunḓu roye tji mave vanga kutja mu kare pamwe momayuva womasuviro, ove mo sokutjita vi? Ngunda au hi ya tya kutja mo tjiti vi, kumba ku Jehova me ku vatere okutoora omukambo omusemba. Ripurira kongaro ndji ri po, nu u tjite omakonḓononeno ohunga na yo. Tjiwa kutja, ondando yoye aruhe mai sokurira oyokuyorokisa omutima waJehova.

17. Ove mo yenene okuvatera vi ovanatje voye kutja ave ha kara nomutima omuvi tji mave munu ovanatje varwe amave zemburuka omayuva womasuviro?

 ¹⁷ Ove mo yenene vi okuvatera ovanatje voye kutja ave ha kara nomutima omuvi tji mave munu ovakwao amave nyanda omanyando wokuzemburuka omayuva nge zemburukwa mouye? Kondja okukara novitjitwa vyapeke puna wo. Wina mo yenene okuvepa oviyandjewa ngunda ave hi nokuundjira ko. Oviyandjewa ovisembasemba ove mbi mo yenene okuyandja kovanatje voye, oruveze norusuvero rwoye.

18. Ongwaye tji matu sokukara pozombongarero zOukriste zombongo?

¹⁸ Tji matu vanga okuyakurwa i Jehova, matu sokupoka kozongamburiro zoposyo, ovitjitwa nomayuva womasuviro nge notjiṋa na zo. Posi yokutja wina matu sokuungurisa omerikotameneno watjiri. Omomuano uṋe? Omuano umwe omokukara pozombongarero zombongo aruhe. (Lesa Ovaheberi 10:24, 25.) Ozombongarero zombongo orupa orunanḓengu tjinene momerikotameneno wouatjiri. (Epsalme 22:22; 122:1) Tji matu worongana pamwe tu yenena okutunduuzasana.—Ovaroma 1:12.

19. Ongwaye tje ri ohepero kove okuhungira kuna varwe ohunga nouatjiri mbu we rihonga mOmbeibela?

¹⁹ Omuano warwe wokutoorora omerikotameneno wouatjiri omokuraera varwe ohunga noviṋa mbi we rihonga mOmbeibela. Ovandu ovengi tjiri va ningisa ondjenda nu va kurungisiwa i oviṋa ovivi mbi tjitwa mouye ndino. Ove ngahino u novandu tjiva mbu mo tjiwa mbe ri mongaro ndjo. Ve raera ohunga nomaundjiro omawa woruyaveze. Otja tji mo i kozombongarero zOukriste zombongo nokuraera varwe ohunga nouatjiri wOmbeibela, mo utu okumuna kutja ko nonḓero yokukara norupa mozongamburiro zoposyo notuzo twazo rukwao. Kara nongamburiro kutja mo kayoroka tjinene nokutja Jehova me ku sere ondaya tjinene tji wa toorora okurikotamena ku ye momuano omusemba.—Maleaki 3:10.