1, 2. Nama tanya ke patut ditanya diri empu, lalu nama kebuah nya beguna?

ARI pengawa belajarka Bup Kudus, nuan udah nemu pasal mayuh orang ke ngumbai diri nyembah Petara, tang kebendar sida ngajar tauka ngereja utai ti dipegedi Petara. (2 Korint 6:17) Nya kebuah Petara ngasuh kitai pansut ari pengarap pelesu, “Babilon ti Besai.” (Pemandang 18:2, 4) Nama deka digaga nuan? Tiap iku kitai patut milih sereta nanya diri empu, ‘Kati aku deka nyembah Petara ngena chara ti dikedekaka Iya, tauka kati aku deka nyembah Iya ngena chara ke suah dikena aku?’

² Enti nuan udah pansut ari pengarap pelesu, nya utai ti manah. Tang, engka agi bisi sekeda pengawa tauka adat ba pengarap pelesu ke agi dikereja nuan. Aram kitai berandauka utai nya, lalu beratika kebuah nya beguna bendar kita ngembuan runding ti sama enggau Jehovah pasal utai nya.

3. (a) Nama kebuah sekeda orang tusah deka badu ngena engkeramba lebuh nyembah Petara? (b) Nama dipadah Bup Kudus pasal nyembah Petara ngena engkeramba?

³ Sekeda orang udah betaun ngena engkeramba tauka alta ti mit ba rumah sida lebuh nyembah Petara. Enti enda ngena utai nya, sida engka berasai enda nyamai ati tauka ngumbai chara sida nyembah Petara nya salah. Tang kingatka, Jehovah ngajar kitai chara ti betul nyembah Iya. Lalu Bup Kudus enggau terang madahka, Jehovah enggai  kitai nyembah Iya ngena engkeramba.—Bacha Pemansut 20:4, 5; Masmur 115:4-8; Isaiah 42:8; 1 John 5:21.

4. (a) Nama kebuah enda patut nyembah bala peturun kitai ke udah mati? (b) Nama kebuah Jehovah enda ngasuh nembiak Iya nguji deka bejaku enggau orang ke udah mati?

⁴ Sekeda orang ngena mayuh jam, pengering, sereta duit kena ngelantangka ati bala peturun ke udah mati. Sida indah nyembah bala peturun ke udah mati. Tang kitai udah belajar, orang ke udah mati enda ulih nulung tauka ngemediska kitai. Sida enda idup ba endur bukai. Kebendar, nguji deka bejaku enggau sida nya utai ti tau ngemediska laban semua pesan ari kaban belayan ke udah mati nya datai ari bala antu. Nya kebuah Jehovah enda ngasuh orang Israel nguji deka bejaku enggau orang ke udah mati tauka enggau semua pengawa ke bekaul enggau bala antu.—Ulang Adat 18:10-12; peda Nota Penutup 26 enggau 31.

5. Nama ulih nulung nuan badu ngena engkeramba lebuh nyembah Petara tauka badu nyembah bala peturun ke udah mati?

⁵ Nama ulih nulung nuan badu ngena engkeramba lebuh nyembah Petara tauka badu nyembah bala peturun nuan ke udah mati? Nuan patut macha Bup Kudus, lalu belematika runding Jehovah bekaul enggau pengawa nya. Pengawa nya “dipegedika” Jehovah. (Ulang Adat 27:15) Besampi ngagai Jehovah ninting hari ngambika kitai nemu runding Iya, lalu bulih tulung kena nyembah Iya nitihka chara ti dikedekaka Iya. (Isaiah 55:9) Nuan ulih pechaya, Jehovah deka meri nuan pengering kena muai semua utai ke bekaul enggau sembah ti pelesu.

6. (a) Nama kebuah 25 Disember dipilih nyadi hari kena ngintu pengada Jesus? (b) Nama kebuah orang Kristian ti bendar enda ngintu Krismas?

⁶ Di serata dunya, Krismas nya siti ari hari besai ti  pemadu tebilang, lalu mayuh orang ngumbai nya pengerami hari pengada Jesus. Tang kebendar, Krismas bekaul enggau sembah ti pelesu. Siti ensiklopedia madahka, orang Rome ke enda arapka Petara ngintu hari pengada mata panas kena 25 Disember. Bala tuai pengarap gerija dekaka mayuh agi orang ke enda arapka Petara nyadi orang Kristian, nya alai taja pan Jesus ukai ada kena 25 Disember, sida netapka hari pengada Jesus diintu maya nya. (Luke 2:8-12) Bala murid Jesus enda ngintu Krismas. Siti bup pansik madahka, 200 taun pengudah Jesus ada, “nadai orang nemu, lalu mimit aja orang ibuhka ni maya iya ada.” (Sacred Origins of Profound Things) Pengerami Krismas berengkah diintu beberapa ratus taun pengudah Jesus ada. Nama kebuah orang Kristian ti bendar enda ngintu Krismas? Laban sida deka ngelantangka ati Petara ba semua utai ti dikereja sida.

7. Baka ni kitai nemu bagi pengerami ke patut diseliahka?

⁷ Kelimpah ari enda ngintu Krismas, orang Kristian ti bendar mega enda ngintu sekeda pengerami ke bukai. Baka ni kitai nemu bagi pengerami ke patut diseliahka kitai? Kitai patut beratika pun penatai siti-siti pengerami. Orang Kristian enda enggau pengerami ke bepun ari orang ke enda arapka Petara tauka bekaul enggau petara pelesu, utai ti bula, tauka bemanang. Ngambika chunto, Taun Baru, tauka Hari Gawai Dayak. Sitan ngena pengerami tu ngambika orang nitihka iya sereta deka orang ngumbai enti sida ngintu pengerami tu, sida ngelantangka ati petara sida. Tang enti kitai deka ngelantangka ati Jehovah, kitai enda tau enggau semua pengerami nya.

8, 9. Nama kebuah orang Kristian ba abad keterubah enda ngintu hari pengada?

⁸ Siti agi pengerami ti tebilang ba mayuh orang, iya nya  ngintu hari pengada. Patut orang Kristian ngintu hari pengada? Kengka hari pengada ke bisi disebut dalam Bup Kudus diintu orang ke enda nyembah Jehovah. (Pemungkal 40:20; Mark 6:21) Hari pengada diintu kena masa petara pelesu. Nya kebuah orang Kristian ba abad keterubah “ngumbai pengerami hari pengada bekaul enggau adat orang ke enda arapka Petara.”—The World Book Encyclopedia.

⁹ Orang Rome enggau orang Gerika kelia pechaya, bisi roh datai lebuh tiap iku orang ada, lalu roh nya deka nyaga orang nya sepemanjai pengidup iya. “Roh tu bisi kaul ti rapat enggau petara ke ngembuan hari pengada ti sama enggau orang nya,” ku bup The Lore of Birthdays.

10. Nama kebuah orang Kristian kemaya hari tu enda patut ngintu hari pengada?

¹⁰ Ba runding nuan, kati Jehovah nerima pengerami ke bekaul enggau pengarap pelesu? (Isaiah 65:11, 12) Enda. Nya kebuah kitai enda ngintu hari pengada tauka semua hari besai ke bekaul enggau pengarap pelesu.

11. Nama kebuah sekeda orang ngintu hari besai? Nama utai ke patut dikemeratka nuan?

¹¹ Sekeda orang nemu, Krismas enggau hari besai ke bukai bepun ari orang ke enda arapka Petara, tang sida agi ngintu pengerami nya. Sida ngumbai hari besai nya peluang ti manah begulai enggau diri sebilik. Kati nuan ngasaika baka nya? Enda salah deka begulai enggau diri sebilik. Jehovah nempa ruang bilik, lalu Iya deka kitai bisi kaul ti manah enggau diri sebilik. (Epesus 3:14, 15) Taja pia, kitai patut beberatka kaul ti manah enggau Jehovah, ukai deka ngelantangka ati kaban belayan kitai enggau ngintu hari besai ti bekaul enggau pengarap pelesu. Nya  kebuah rasul Paul madahka: ‘Uji giga utai ti ngerinduka ati Tuan.’—Epesus 5:10.

12. Nama deka ngasuh siti-siti hari besai enda diterima Jehovah?

¹² Mayuh orang ngumbai sida tau enda ibuh beberatka pun penatai siti-siti hari besai, tang Jehovah enda ngumbai baka nya. Iya enda nerima hari besai ke datai ari sembah ti pelesu, ke ngeninggika mensia tauka lambang menua. Ngambika chunto, orang Ejip bisi mayuh pengerami ke petara pelesu sida. Pengudah orang Israel pansut ari menua Ejip, sida ngintu siti ari pengerami orang Ejip lalu ngumbai nya pengerami ‘ngemesaika Jehovah.’ Tang Jehovah ngukum sida ketegal ngereja nya. (Pemansut 32:2-10) Baka ke dipadah nabi Isaiah, kitai “anang negu utai ti enda tuchi.”—Bacha Isaiah 52:11.

13. Nama tanya ke engka dikemisi nuan lebuh deka badu ngintu hari besai?

¹³ Lebuh nuan deka badu ngintu hari besai, nuan engka bisi mayuh tanya. Ngambika chunto: Nama patut digaga aku enti orang ke sama gawa enggau aku nanya kebuah enda ngintu Krismas enggau sida? Nama patut digaga aku enti orang meri aku hadiah Krismas? Nama patut digaga aku enti kaling pengidup deka aku ngintu hari besai? Baka ni aku ulih nulung anak aku ngambika sida enda tusah ati enti enda ngintu hari besai tauka hari pengada sida?

14, 15. Nama ulih digaga nuan enti orang nyebut “Selamat Hari Krismas!” tauka meri nuan hadiah?

¹⁴ Endang beguna berunding enggau manah pasal utai ti deka disebut sereta dikereja ba tiap iti pekara. Ngambika chunto, enti orang nyebut “Selamat Hari Krismas!” nuan enda patut nyeliahka diri ari sida. Nuan ulih nyebut, “Terima kasih.” Tang enti bisi orang deka nemu enggau  mayuh agi, nuan tau nerangka kebuah nuan enda ngintu hari besai. Taja pia, seruran nelap, bejimat, sereta bebasa. Bup Kudus madahka: “Awakka jaku kita seruran badas sereta ngenyamaika ati orang, ngambika kita nemu jalai kita patut nyaut semua orang.” (Kolosi 4:6) Nuan tau madahka diri rindu begulai enggau orang bukai sereta meri hadiah, tang nuan enggai ngereja nya enti bisi kaul enggau hari besai.

¹⁵ Nama patut digaga nuan enti orang meri nuan hadiah? Bup Kudus nadai madahka atur pasal pekara tu, tang Bup Kudus bisi madahka kitai patut ngetanka ati ti beresi. (1 Timoti 1: 18, 19) Orang ke meri hadiah engka enda nemu nuan enda ngintu hari besai. Tauka iya engka nyebut, “Aku nemu nuan enda ngintu hari besai. Tang, aku deka meri nuan hadiah tu.” Ba dua iti pekara nya, nuan ulih milih sekalika deka nerima hadiah nya tauka enggai. Tang enda ngira nama pemutus ti digaga nuan, tanka meh ati ti beresi. Kitai enggai ngereja sebarang utai ke tau ngachau kaul kitai enggau Jehovah ngena chara ti enda manah.

16. Nama patut digaga nuan enti diri sebilik deka ngintu hari besai?

¹⁶ Nama patut digaga nuan enti diri sebilik deka ngintu hari besai? Anang bekelikuh enggau sida. Kingatka, sida bisi hak nentuka utai ke deka digaga sida. Nelap sereta bebasaka utai ti dipilih sida, baka nuan ke deka sida bebasaka nuan. (Bacha Matthew 7:12.) Tang enti diri sebilik deka nuan begulai enggau sida maya hari besai, nama patut digaga nuan? Sebedau mutuska utai ti deka digaga, besampi meh ngagai Jehovah ngambika ulih nulung nuan ngaga pemutus ti betul. Pikirka pekara nya, lalu mansik iya. Kingatka, nuan seruran deka ngelantangka ati Jehovah.

17. Baka ni nuan ulih nulung anak nuan ngambika sida enda tusah ati enti orang bukai ngintu hari besai?

 ¹⁷ Nama ulih digaga nuan kena nulung anak nuan enti sida meda orang bukai ngintu hari besai? Nuan ulih ngatur siti-siti pengawa ti ngerinduka ati sida ba maya bukai. Nuan mega ulih meri sida hadiah. Lalu siti ari hadiah ti pemadu manah ke ulih diberi ngagai anak nuan, iya nya awak begulai sereta pengerindu nuan.

18. Nama kebuah kitai patut datai ngagai gempuru Kristian?

¹⁸ Kena ngelantangka ati Jehovah, kitai patut ninggalka pengarap pelesu nyengkaum adat sereta hari besai ke bekaul enggau pengarap nya. Tang kitai mega patut ngemeranka sembah ti bendar. Baka ni? Siti chara nya enggau bejarit datai ngagai gempuru Kristian. (Bacha Hebrew 10:24, 25.) Datai begempuru nya siti ari pengawa ti beguna ba sembah ti bendar. (Masmur 22:22; 122:1) Kitai ulih meransang pangan diri lebuh begempuru.—Rome 1:12.

19. Nama kebuah nya beguna madah ngagai orang bukai pasal pemendar ke udah dipelajarka nuan?

¹⁹ Siti agi bagi sembah ti bendar, iya nya berandau enggau orang bukai pasal utai ti udah dipelajarka nuan ari Bup Kudus. Mayuh orang berasai tusah ati enggau penyai ke nyadi ba dunya. Nuan engka nemu sekeda orang ke tusah ati nya. Padah ngagai sida pasal pengadang ti ngerinduka ati ke jemah ila. Seraya nuan datai ngagai gempuru Kristian, lalu madah ngagai orang bukai pasal pemendar Bup Kudus, nuan nyau nemu diri nadai agi pengingin deka enggau pengarap pelesu sereta bekaul enggau adat iya. Nuan ulih pechaya, nuan deka lantang ati, lalu Jehovah deka merekatka pengawa nuan ke bebendar nyembah Iya ngena chara ti betul.—Malaki 3:10.