1, 2. Anni i iyavu mu ta baggim, anna ngatta importante yatun?

 TA PAGGIGIAMMUM tu Biblia, nammuammu nga aru nga totolay i makkagi nga maddayaw ira ta Dios ngem mattuttuddu onu mangngua ira tu ikalussaw na Dios. (2 Corinto 6:17) Yari tu nibilin ni Jehova nga panawattam ngana i falsu nga relihion, i ‘Madumu-rumug nga Babilonia!’ (Nepakannammu 18:2, 4) Anni i kuammu? Mawag tam ngamin i mappili, anna iyavu ta baggi tam, ‘Daya-dayawakku kari i Dios segun ta kayàna, onu segun ta kayà ku?’

² Nu pinanawammu ngana i falsu nga relihion, makasta yatun. Ngem awayyana nga ta futum, egga paga i karuan nga annangngua anna kostumbre ira na falsu nga relihion nga kakayà mu. Gigiammuattam i karuan ta kuddanatun nga annangngua anna kostumbre anna innattam nu ngatta importante nga imammatattam danatun nga kunna pagimamma ni Jehova.

3. (a) Ngatta marigatan i karuan nga iyemmang i pangusa tu imahen ta paddayaw? (b) Anni i kagian na Biblia meyannung ta pangusa tu imahen ta paddayaw ta Dios?

³ Egga i karuan nga nabayag ngana nga mangusa tu imahen onu groto ta babaleda tapenu dayawan i Dios. Nu tadday ka tatun, baka ari ka sanay onu matageno mu nga mali i paddayom ta Dios nu awan danatun. Ngem daddamman nga ituttuddu nittam ni Jehova nu kunnasi yayya nga dayawan. Manawag paga nga kagian na Biblia nittam nga panakitan ni Jehova nga mangusa ittam  tu imahen ta paddayaw sa.​—Bibbigan i Exodo 20:4, 5; Salmo 115:4-8; Isaias 42:8; 1 Juan 5:21.

4. (a) Ngatta ariattam nakuan dayawan i ginafuattam ira? (b) Ngatta nikagi ni Jehova ta totolena nga ariadda purueban nga makibbida ta natay?

⁴ Aru nga tiempo, sikan, anna kuartu i ufutan na karuan tapenu mapagayayyada i natay nga ginafuadda. Dayawadda paga lagu ira. Ngem nagigiammu tam nga danuri natay ay ariadda ittam ngana moffunan onu matakitan. Awan ira ta tanakuan nga mundo. Kakuruganna, delikadu i pakikomunika nira megafu ta ngamin nga mensahe nga gittana maggafu ta minatay tam ay kakuruganna naggafu ta demonio ira. Yari tu nibilin ni Jehova ta Israelita ira nga ariadda purueban i makibbida ta natay onu makiparte ta maski anni nga klase na demonismo.​—Deuteronomio 18:10-12; innan i Endnote 26 anna 31.

5. Anni i makoffun nikaw tapenu meyemmammu i pangusa tu imahen ta paddayaw ta Dios anna i paddayaw ta ginafuammu ira?

⁵ Anni i makoffun nikaw tapenu meyemmammu i pangusa tu imahen ta paddayaw ta Dios onu paddayaw ta ginafuammu ira? Mawag tu mabbibbig ka tu Biblia anna pannonopan tu mapia nu kunnasi imammatan ni Jehova yatun ira. “Ikala-kalussaw” ni Jehova danatun. (Deuteronomio 27:15) Kadaggaw nga makimallo kani Jehova tapenu moffunan naka nga parigan i pagimammana ta ganna-gannug anna dayawan yayya segun ta kayàna. (Isaias 55:9) Makasiguradu ka nga pasikannan ni Jehova i nono mu tapenu alsan ta pattolem i maski anni nga konektadu ta falsu nga paddayaw.

6. Ngatta napili i fetcha nga Disiembre 25 tapenu iselebra i nikeyana ni Jesus?

⁶ I Krismas i tadday ta pinakapopular nga selebrasion ta interu mundo, anna nonopan na magaru nga yatun  i nikeyana ni Jesus. Ngem kakuruganna, konektadu ta falsu nga paddayaw i Krismas. Niyesplika na tadday nga ensayklopedia nga iselebra danuri pagano [onu, ari Cristiano] nga Romano i aggaw na keyana na bilag ta Disiembre 25. Kayà na lider ira na simbahan nga mas aru nga pagano i makumberte tu Cristiano, yayya nga maski ari neyana si Jesus ta Disiembre 25, dinesisiodda nga iselebra i aggaw na keyana ni Jesus tatun nga fetcha. (Lucas 2:8-12) Ari nasselebra tu Krismas i disipulos ni Jesus. Niyesplika na tadday nga libru nga 200 dagun kabalin na nikeyana ni Jesus, “awan tu makannammu, anna pilippiga laman nga totolay i interesadu ta eksakto nga fetcha na nikeyanana.” (Sacred Origins of Profound Things) Namegafu nga meselebra i Krismas maturu tu 300 dagun kabalin na patay ni Jesus.

7. Ngatta ari iselebra na kurug nga Cristiano i Krismas?

⁷ Ammu na magaru i meyannung ta pagano nga naggafuan na Krismas anna na tradisionna ira, gitta na Christmas party anna parregalu. Angngariganna, egga i tiempo ta England anna ta parte ira na America nga megamma i passelebra tu Krismas megafu ta pagano nga naggafuadda. Makastigo i maski sinni nga masselebra. Ngem ari nabbayag, niselebra mangana na totolay i Krismas. Ngatta ari iselebra na kurug nga Cristiano i Krismas? Kayàda garay nga pagayayyatan i Dios ta ngamin nga kuadda.

8, 9. Ngatta ari masselebra tu birthday i ollu-siglo ira nga Cristiano?

⁸ I birthday ay tadday paga nga selebrasion nga popular ta aru nga totolay. Mepangngo kari nga iselebra na Cristiano ira i birthday? I nerekord laman ta Biblia nga nasselebra tu birthday ay danuri ari nga maddayaw kani Jehova. (Genesis 40:20; Marcos 6:21) Pamadayaw ta falsu  ira nga dios i passelebra tu birthday. Yatutta i ollu ira nga Cristiano ay “nikonsiderada nga pagano nga kostumbre i passelebra ta kaggawan na nikeyana na maski sinni.”​—The World Book Encyclopedia.

⁹ Kurugan na Romano anna Griego ira tagga nga egga i espiritu nga presente ta aggaw na nikeyana na kada abbing anna yatun nga espiritu i mapprotekta nisa adde sonu matay. Niyesplika na libru nga The Lore of Birthdays: “Egga misterioso nga koneksion naw nga espiritu ta dios nga i kaggawan na nikeyanana ay parehas ta nikeyana na abbing.”

10. Ngatta ari masselebra tu birthday i Cristiano ira ta maddaggun?

¹⁰ Para nikaw, apruban kari ni Jehova i selebrasion ira nga konektadu ta falsu nga relihion? (Isaias 65:11, 12) Siguradu nga ari. Yari tu ariattam masselebra tu birthday onu maski anni nga okasion nga konektadu ta falsu nga relihion.

11. Ngatta iselebra na karuan i okasion ira nga konektadu ta falsu nga relihion? Anni nakuan i pinaka-importante nikaw?

¹¹ Ammu na karuan nga i Krismas anna i karuan nga okasion ay pagano i naggafuanna, ngem iselebrada lagapa danatun. Irasodda nga makasta nga tiansa i okasion ira tapenu makavulu i familiada. Kunnatun kari gapa i matageno mu? Awan tu marake ta pakikavulu ta familiam. Si Jehova i nangigafu ta unnug na familia, anna kayàna nga mapeggan ittam tu makasta nga relasion nira. (Efeso 3:14, 15) Ngem, sigga-nono tam nakuan ta kapeggan tu makasta nga relasion kani Jehova imbes ta pamagustu ta familia tam gukaban na pakipasselebra nira tu okasion ira nga konektadu ta falsu nga relihion. Yatutta kinagi ni apostol Pablo: “Ammuan nu nakuan nu anni i makapagayaya ta Yafu.”​—Efeso 5:10.

12. Anni ira nga okasion i ikalussaw ni Jehova?

 ¹² Aru i makkagi nga ari importante i naggafuan na okasion, ngem ari tu kunnatun i pagimamma ni Jehova. Ikalussona i nasionalistiko ira nga selebrasion anna i okasion ira nga naggafu ta falsu nga paddayaw onu mangipoppoddu ta totolay. Angngariganna, aru i okasion na Ehipsio ira tapenu dayawan i falsu ira nga diosda. Kabalin nga nakapanaw i Israelita ira ta Ehipto, pinarigadda i tadday ta pagano nga selebrasion na Ehipsio anna inagaladda yatun nga “fiesta para kani Jehova.” Ngem kinastigo ira ni Jehova megafu tatun. (Exodo 32:2-10) Kagitta na kinagi ni apostol Pablo, ‘ariattam siggeran i anni laman nga maritta’!​—Bibbigan i 2 Corinto 6:17.

13. Anni ira i awayyana nga pakkiavu mu nu naddesisiokka nga iyemmang i passelebra ta okasion ira?

¹³ Nu naddesisiokka nga iyemmang i passelebra ta okasion ira, awayyana nga iyavu mu danaw: Anni i kuakku nu iyavu na katrabahù nu ngatta ariakku makipasselebra nira tu Krismas? Anni i kuakku nu egga i marregalu niakan? Anni i kuakku nu ikiddaw na atawà nga makipasselebra ngà nira? Kunnasì uffunan i ána ku tapenu ariadda matageno nga kakkabbi ira megafu ta ari passelebra tu okasion onu birthday-da?

14, 15. Anni i kuammu nu egga i makkagi nikaw tu “Merry Christmas” onu egga i narregalu nikaw?

¹⁴ Importante nga usan i abilidad nga marrason nu maddesisiokka nu anni i kagiammu anna kuammu ta kada situasion. Angngariganna, nu kagian nikaw na tanakuan tu “Merry Christmas,” ariammu nakuan ira nga lillitan. Awayyam lagapa ikagi, “Mabbalo.” Ngem ta situasion ira nga egga i makkiavu, puedem nga iyesplika nu ngatta ariammu iselebra yatun nga okasion. Ngem, kanayukka  nakuan nga masippo, mataktika, anna marespeto. Kagian na Biblia: “Kanayun gapa nakuan nga makapagayaya anna makapagustu i uvovugan nu, anna ammu nu nakuan i mepangngo nga itabba-tabbag nu ta ngamin nga totolay.” (Colosas 4:6) Puedem iyesplika nga magayayya ka nga makikavulu ta tanakuan anna marregalu ngem ariammu kuan yatun tatun ira nga okasion.

¹⁵ Anni i kuammu nu egga i narregalu nikaw? Awan tu espesipiko nga bilin na Biblia meyannung tatun, ngem kagianna nga pattalupaddianattam nakuan nga marenu i konsensia tam. (1 Timoteo 1:18, 19) Awayyana nga ari ammu na narregalu nikaw nga ariammu iselebra i tadday nga okasion. Onu kagianna nga, “Ammù nga ariammu iselebra yaw nga okasion, ngem kayà taka lagapa nga regaluan.” Maski anni paga tatun, egga lagapa nikaw nu alawatammu i regalu onu ari. Maski anni paga i desisiommu, siguraduammu nakuan nga mattalupaddian nga marenu i konsensiam. Manaki tam nga magangngua tu maski anni nga makadaral ta relasiottam kani Jehova.

16. Anni nakuan i kuammu nu kayà na familiam nga makavulu daka ta tiempo ira nga mekanna nga egga i okasion?

¹⁶ Anni i kuammu nu kayà na familiam nga iselebra i tadday nga okasion? Ari ka makiddiskusion nira. Daddamman, ira lagapa i maddesision nu anni i kayàda nga kuan. Masippo ka nakuan anna irespetom i desisiodda nu kunnasi nga kayà mu gapa nga irespeto daka. (Bibbigan i Mateo 7:12.) Ngem nu kayà na familiam nga makavulu daka ta tiempo ira nga mekanna nga egga i okasion, anni nakuan i kuammu? Nige maddesision, makimallo kani Jehova tapenu makapaddesision tu fustu. Nonopan yatun nga situasion anna marresearch meyannung tatun. Daddamman, mas kayà mu nga pagayayyatan si Jehova.

17. Anni i makuam tapenu moffunan i ána mu nga ari ira nga kakkabbi nu masingadda i tanakuan nga masselebra tu okasion ira?

 ¹⁷ Anni i makuam tapenu moffunammu i ána mu nu masingadda nga iselebra na tanakuan i okasion ira? Awayyam mangiyunnug nu mittan tu espesial ira nga gannug para nira. Puedem ira sorpresan tu regalu. I tiempom anna i pangiddu mu i tadday ta pinakamakasta nga meregalum ta ána mu.

18. Ngatta magatende ittam nakuan ta study ira?

¹⁸ Tapenu mapagayayya si Jehova, mawag tu panawattam i falsu nga relihion kunne na gapa i kostumbre anna okasion ira nga konektadu tatun. Mawag gapa nga tuttulattam i kurug nga paddayaw. Kunnasi? I tadday ay i regular nga pagatende ta study ira ta Kingdom Hall. (Bibbigan i Hebreo 10:24, 25.) Importante nga parte na kurug nga paddayaw danatun. (Salmo 22:22; 122:1) Mapasikattam i kataggi-tadday nu maggarammammung ittam.​—Roma 1:12.

19. Ngatta importante nga ibillem ta tanakuan i kinakurug ira ta Biblia nga nagigiammum?

¹⁹ Tadday paga nga makua tapenu matuttul mu i kurug nga paddayaw ay gukaban na pangikagi ta tanakuan meyannung ta nagigiammum ta Biblia. Aru nga totolay i problemadu megafu ta marake nga mesissimmu ta mundo. Awayyana nga egga i ammum nga kunnatun. Ikagim nira i makakkasta nga iddanama ta mappange. Durante ta pagatendem ta study ira anna ta pangibillem ta tanakuan tu kinakurug ta Biblia, sisinu nga matageno mu nga manaki mu ngana nga makiparte ta falsu nga relihion anna ta kostumbre ira natun. Makasiguradu ka nga magayayya ka anna abundansia nga bendisionan ni Jehova i appursigim nga dayawan yayya.​—Malakias 3:10.