1, 2. Ania ti masapul nga isaludsodmo iti bagim, ken apay a nagpateg dayta?

BABAEN ti panagadalmo iti Biblia, naammuam nga adu a tattao ti mangibagbaga nga agdaydayawda iti Dios ngem ti kinaagpaysuanna, kagura ti Dios ti isursuro ken ar-aramidenda. (2 Corinto 6:17) Dayta ti rason nga imbilin ni Jehova a rummuartayo iti ulbod a relihion, ti “Babilonia a Dakkel.” (Apocalipsis 18:2, 4) Ania ti aramidem? Amintayo ket masapul nga agpili, ken masapul nga isaludsodtayo iti bagitayo, ‘Kayatko kadi ti agdayaw iti Dios iti pamay-an a kayatna, wenno agdayawak kenkuana kas iti datin nga ar-aramidek?’

² No pimmanawkan wenno nagikkatkan iti ulbod a relihion, nasayaat dayta. Ngem mabalin nga adda pay laeng dagiti aramid ken kaugalian ti ulbod a relihion a pakaragragsakam nga aramiden. Pagsasaritaantayo ti dadduma kadagita ken no apay a nakapatpateg a tuladentayo ti panangmatmat ni Jehova kadagita.

3. (a) Apay a marigatan ti dadduma a mangisardeng iti panagusar iti imahen iti panagdaydayawda? (b) Ania ti ibaga ti Biblia maipapan iti panagusar iti imahen iti panagdaydayaw iti Dios?

³ Adda dagiti tattao nga adu a tawenen nga addaan kadagiti imahen wenno altar iti pagtaenganda nga usarenda nga agdaydayaw iti Dios. No maysaka kadakuada, mabalin a maikawaka wenno mariknam a kamali ti agdaydayaw iti Dios no awan dagita. Ngem laglagipem nga isursuronatayo ni Jehova no kasano ti agdaydayaw kenkuana. Ken nalawag nga ibaga ti Biblia a saan a kayat ni Jehova nga agusartayo  kadagiti imahen iti panagdaydayawtayo.​—Basaen ti Exodo 20:4, 5; Salmo 115:4-8; Isaias 42:8; 1 Juan 5:21.

4. (a) Apay a saan a rumbeng a pagdaydayawan dagiti inapotayo? (b) Apay nga imbilin ni Jehova kadagiti adipenna a saanda a padasen ti makisarita kadagiti natay?

⁴ Adda dagiti mangus-usar iti adu a tiempo ken pigsada a mangay-ayo kadagiti natayen nga inapoda. Mabalin a daydayawenda pay ketdi ida. Ngem naadaltayo a saandatayo a matulongan wenno madangran dagiti natay. Saanda nga agbibiag iti sabali a lugar. Kinapudnona, delikado a padasen ti makisarita kadakuada ta aniaman a mensahe a kasla naggapu kadagiti natayen a kabagiantayo ket naggapu a talaga kadagiti demonio. Dayta ti makagapu nga imbilin ni Jehova kadagiti Israelita a dida padasen ti makisarita kadagiti natay wenno makiraman iti aniaman pay a klase ti demonismo.​—Deuteronomio 18:10-12; kitaen ti Endnote 26 ken 31.

5. Ania ti makatulong tapno maisardengmo ti panagdaydayawmo kadagiti inapom ken ti panagusar iti imahen iti panagdaydayawmo iti Dios?

⁵ Ania ti makatulong tapno maisardengmo ti panagdaydayawmo kadagiti inapom ken ti panagusar iti imahen iti panagdaydayawmo iti Dios? Masapul a basaem ti Biblia ken panunotem a naimbag no ania ti pangibilangan ni Jehova kadagita. Ibilangna dagita kas ‘makarimon’ wenno makaparurod. (Deuteronomio 27:15) Ikararagmo ken Jehova a tulongannaka tapno matuladmo ti panangmatmatna iti bambanag ken tulongannaka nga agdaydayaw kenkuana iti pamay-an a kayatna. (Isaias 55:9) Masiguradom a tulongannaka ni Jehova tapno kabaelam nga ikkaten iti biagmo ti aniaman a konektado iti ulbod a panagdaydayaw.

6. Apay a napili ti Disiembre 25 nga aldaw ti pannakaselebrar ti pannakayanak ni Jesus?

⁶ Ti Krismas ti maysa kadagiti kalatakan nga okasion  iti intero a lubong, ken patien ti kaaduan a dayta ti pannakayanak ni Jesus. Ngem ti agpayso, konektado ti Krismas iti ulbod a panagdaydayaw. Inlawlawag ti maysa nga ensiklopedia a selselebraran idi dagiti pagano a Romano ti pannakayanak ti init iti Disiembre 25. Kayat idi dagiti lider ti simbaan nga umadu pay ti pagano nga agbalin a Kristiano isu nga uray no saan a Disiembre 25 ti pannakayanak ni Jesus, nagdesisionda a selebraran ti pannakayanakna iti dayta a petsa. (Lucas 2:8-12) Saan a sinelebraran dagiti adalan ni Jesus ti Krismas. Inlawlawag ti maysa a libro a 200 a tawen kalpasan a nayanak ni Jesus, “awan ti makaammo ken manmano ti interesado no kaano ti eksakto a pannakayanakna.” (Sacred Origins of Profound Things) Nangrugi ti panagselebrar iti Krismas ginasut a tawen kalpasan a nagbiag ni Jesus ditoy daga.

7. Apay a saan nga agselselebrar dagiti Kristiano iti Krismas?

⁷ Adu ti makaammo iti pinapagano a naggapuan ti Krismas ken kadagiti tradision a konektado iti dayta, kas iti party ken panagririnnegalo. Kas pagarigan, adda idi tiempo a maiparit ti Krismas idiay England ken iti dadduma a paset ti America gapu kadagiti pinapagano a nagtaudanna. Madusa idi ti asinoman a mangselebrar iti dayta. Ngem idi agangay, sinelebraran manen dagiti tattao ti Krismas. Apay a saan a selebraran dagiti pudno a Kristiano ti Krismas? Kayatda ngamin a maragsakan ti Dios iti amin nga aramidenda.

8, 9. Apay a saan a nagselebrar iti birthday dagiti nagkauna a Kristiano?

⁸ Ti birthday ti maysa pay a selebrasion a popular iti adu a tattao. Rumbeng kadi a selebraran dagiti Kristiano ti birthday? Dagiti laeng nagselebrar iti birthday a nadakamat iti Biblia ket dagiti saan nga agdaydayaw ken Jehova.  (Genesis 40:20; Marcos 6:21) Nausar dagiti selebrasion iti birthday kas pammadayaw kadagiti ulbod a dios. Dayta ti gapuna a dagiti nagkauna a Kristiano “imbilangda a napaganuan a kaugalian ti panagselebrar iti birthday ti asinoman.”​—The World Book Encyclopedia.

⁹ Mamati dagiti nagkauna a Romano ken Griego nga adda maysa nga espiritu a presente iti pannakayanak ti maysa a tao ken dayta nga espiritu ti mangprotektar iti tao iti intero a panagbiagna. “Daytoy nga espiritu ket adda misterioso a koneksionna iti dios a ti pannakayanakna ket kapada ti aldaw a pannakayanak dayta a tao,” inlawlawag ti libro a The Lore of Birthdays.

10. Apay a saan a rumbeng nga agselebrar iti birthday dagiti Kristiano ita?

¹⁰ Panagkunam, anamongan ngata ni Jehova dagiti selebrasion a konektado iti ulbod a relihion? (Isaias 65:11, 12) Saan. Dayta ti rason a saantayo nga agselebrar iti birthday wenno aniaman nga okasion a konektado iti ulbod a relihion.

11. Apay nga adda dagiti agselselebrar kadagiti okasion a konektado iti ulbod a relihion? Ania koma ti kapatgan kenka?

¹¹ Ammo ti dadduma a naggapu kadagiti pagano ti Krismas ken ti dadduma pay nga okasion, ngem agtultuloy latta a selselebraranda dagita. Ipagarupda a dagita nga okasion ket nagsayaat a gundaway tapno makikaduada iti pamiliada. Kastaka met kadi? Saan a dakes no kayatmo ti makikadua iti pamiliam. Ni Jehova ti nangbuangay iti pamilia, ken kayatna a nasayaat ti relasiontayo kadakuada. (Efeso 3:14, 15) Ngem masapul nga agpokustayo iti panangpasayaat iti relasiontayo ken Jehova imbes a pagustuantayo dagiti kakabagiantayo babaen ti panagselebrar kadagiti okasion a konektado iti ulbod a relihion. Dayta ti  makagapu nga imbaga ni apostol Pablo: “Itultuloyyo a siguraduen no ania ti makaay-ayo iti Apo.”​—Efeso 5:10.

12. Ania dagiti selebrasion a kagura ni Jehova?

¹² Para iti adu a tattao, saan a napateg no naggapuan ti maysa a selebrasion, ngem saan a kasta ni Jehova. Kagurana dagiti selebrasion a naggapu iti ulbod a panagdaydayaw wenno mangidaydayaw kadagiti tattao wenno kadagiti simbolo ti pagilian. Kas pagarigan, adu ti selebrasion dagiti Egipcio para kadagiti ulbod a diosda. Kalpasan a pimmanaw dagiti Israelita idiay Egipto, tinuladda ti maysa a pagano a selebrasion dagiti Egipcio ket inawaganda iti “piesta para ken Jehova.” Ngem dinusa ida ni Jehova gapu iti dayta. (Exodo 32:2-10) Kas iti imbaga ni propeta Isaias, masapul a ‘ditay sagiden ti aniaman a narugit!’​—Basaen ti Isaias 52:11.

13. Ania dagiti maisaludsodmo no agdesisionka a saanmon a selebraran ti dadduma nga okasion?

¹³ No agdesisionka a saanen nga agselebrar kadagiti okasion, mabalin nga adu ti mapanunotmo a saludsod. Kas pagarigan: Ania ti aramidek no damagen dagiti katrabahuak no apay a saanak a makiselselebrar kadakuada iti Krismas? Ania ti aramidek no adda mangted kaniak iti regalo no Krismas? Ania ti aramidek no kayat ti asawak a makiramanak iti maysa a selebrasion? Ania ti aramidek tapno saan a malidayan dagiti annakko gapu ta saanmi a selselebraran ti birthday-da ken ti dadduma pay nga okasion?

14, 15. Ania ti aramidem no adda mangkablaaw wenno mangted iti regalo kenka iti maysa nga okasion?

¹⁴ Nagpateg nga usarem ti abilidadmo nga agrason no agdesisionka iti ibagam ken aramidem iti tunggal situasion. Kas pagarigan, no adda nangkablaaw kenka para iti maysa a selebrasion, saan a masapul a liklikam ida. Mabalinmo laeng nga ibaga, “Agyamanak.” Ngem no kadagiti situasion  nga adda agdamag, mabalinmo nga ilawlawag no apay a saanmo a selselebraran dayta nga okasion. Ngem kanayonka koma a nakonsiderar, nataktika, ken managraem. Kuna ti Biblia: “Kanayon koma a makaay-ayo ti sasaoyo, ken natemplaan iti asin, tapno ammoyo no kasano ti rumbeng a panangsungbatyo iti tunggal tao.” (Colosas 4:6) Mabalinmo nga ibaga a maragragsakanka a makikadua iti dadduma ken mangted iti regalo ngem saanmo nga aramiden dagita no para kadagita nga okasion.

¹⁵ Ania ti aramidem no adda agregalo kenka? Awan ti espesipiko a bilin ti Biblia maipapan iti dayta, ngem ibagana a masapul a pagtalinaedentayo a nadalus ti konsiensiatayo. (1 Timoteo 1:18, 19) Mabalin a saan nga ammo ti nagregalo kenka nga adda dagiti okasion a dimo selselebraran. Wenno mabalin nga ibagana, “Ammok a saanmo a selselebraran daytoy nga okasion ngem kayatko latta nga ited daytoy kenka.” Kadagita a situasion, sika ti agdesision no awatem wenno saan ti regalo. Ngem aniaman ti desisionmo, siguraduem a nadalus latta ti konsiensiam. Ditay kayat nga adda aniaman a makaperdi iti relasiontayo ken Jehova.

16. Ania ti masapul nga aramidem no kayat dagiti kapamiliam a selebraran ti maysa nga okasion?

¹⁶ Ania ti masapul nga aramidem no kayat dagiti kapamiliam a selebraran ti maysa nga okasion? Saan a masapul a makiririka kadakuada. Laglagipem nga adda kalinteganda a mangaramid iti kayatda. Agbalinka a nakonsiderar ken respetuem dagiti desisionda no kasano a kayatmo a respetuenda ti desisionmo. (Basaen ti Mateo 7:12.) Ngem no kayat dagiti kapamiliam a makaduadaka iti maysa nga okasion, ania ti aramidem? Sakbay nga agdesisionka, ikararagmo ken Jehova a tulongannaka a mangaramid iti umiso a desision. Panunotem ti situasion, ken agsukimatka. Laglagipem a kanayon a kayatmo a paragsaken ni Jehova.

17. Ania ti mabalinmo nga aramiden tapno matulongam dagiti annakmo no mariknada a maikapkapisda gapu ta selselebraran ti dadduma dagiti okasion?

 ¹⁷ Ania ti mabalinmo nga aramiden tapno matulongam dagiti annakmo no makitkitada ti sabsabali nga agselselebrar kadagiti okasion? Mabalin a sagpaminsan a mangaramidka iti espesial a banag para kadakuada. Mabalinmo met ida a sorpresaen babaen ti regalo. Ken ti kasayaatan a mairegalom kadagiti annakmo ket ti tiempom ken ti ayatmo.

18. Apay a masapul a makigimongka?

¹⁸ Tapno maparagsaktayo ni Jehova, masapul a panawantayo ti ulbod a relihion ken dagiti kaugalian ken selebrasion a konektado iti dayta. Ngem masapul met a surotentayo ti pudno a panagdaydayaw. Kasano? Ti maysa a pamay-an ket ti regular a pannakigimong. (Basaen ti Hebreo 10:24, 25.) Nagpateg a paset ti pudno a panagdaydayaw dagiti gimong. (Salmo 22:22; 122:1) Makapagpipinnaregtatayo no aggigimongtayo.​—Roma 1:12.

19. Apay a nagpateg nga ibagam iti sabsabali dagiti naadalmo a kinapudno iti Biblia?

¹⁹ Ti maysa pay a pamay-an ti panangsurot iti pudno a panagdaydayaw ket ti panangibaga iti sabsabali kadagiti naadalmo iti Biblia. Adu ti malidlidayan kadagiti dakes a mapaspasamak ditoy daga. Mabalin nga adda dagiti am-ammom a kasta. Ibagam kadakuada ti nagsayaat a namnamam iti masanguanan. Bayat a makigimgimongka ken ibagbagam iti sabsabali dagiti kinapudno iti Biblia, makitamto a saanmon a kayat ti makipaset iti ulbod a relihion ken kadagiti kaugalian a konektado iti dayta. Masiguradom a naragsakkanto ken bendisionan ni Jehova ti panangikagumaam nga agdaydayaw kenkuana iti umiso a pamay-an.​—Malakias 3:10.