1, 2. Na hkum nang hpa ga san san ra nna, dai gaw hpa majaw ahkyak ai kun?

NANG Chyum Laika hkaja ai kaw nna, Karai Kasang hpe nawku nga ai ngu tsun ai ni gaw Karai Kasang n ra ai hpe galaw ai (sh) sharin ya nga ai hpe nang chye wa sai. (2 Korinhtu 6:17) Dai majaw, Yehowa gaw anhte hpe “Galu kaba ai Babelon” ngu shaga ai shut shai ai nawku htung kaw nna pru na matu tsun ai. (Shingran 18:2, 4) Nang hpa galaw na kun? Anhte lata na ahkang nga ai. Dai majaw, ‘Karai Kasang ra ai hku ngai nawku mayu ai kun? (sh) Tinang ra ai hku sha nawku mayu ai kun?’ ngu tinang hkrai san la ra ai.

² Shut ai nawku hpung kaw nna nang pru ngut sai rai yang kaja ai. Raitim, na myit hta shut ai nawku htung lailen nkau mi gaw ya du hkra rawng yang rawng nga na re. Dai htung lailen nkau mi hte dai ni hpe Yehowa mu mada ai hku anhte mu mada na matu kade daram ahkyak ai hpe hkaja yu ga.

3. (a) Nkau mi sumla hte nawku ai hpe jahkring kau na matu hpa majaw yak chye ai kun? (b) Karai Kasang hpe sumla hte nawku ai hte seng nna Chyum Laika hta hpa tsun da ai kun?

³ Masha nkau mi gaw, Karai Kasang hpe nawku na matu shanhte a nta hta sumla ni, nawku tawn hkungri ni hpe shaning law law jailang wa ma ai. Nang mung dai hku galaw wa ai rai yang, dai ni n lawm ai sha nawku ai hpe shut ai ngu hkamsha na (sh) loi mi ra ra ngu nna pyi hkamsha na re. Raitim, Yehowa gaw shi hpe gara hku nawku ra ai lam tsun da ai. Sumla hte nawku ai hpe Yehowa n ra ai lam Chyum Laika hta asan sha tsun da ai.—Pru Mat 20:4, 5 hpe hti u; Shakawn 115:4-8; Esaia 42:8; 1 Yawhan 5:21.

4. (a) Anhte a jiwoi jiwa ni hpe hpa majaw n mai nawku ai kun? (b) Yehowa gaw shi a masha ni hpe tsu hte ga n shaga na matu hpa majaw tsun da ai kun?

 ⁴ Nkau mi gaw si mat ai jiwoi jiwa ni a ra sharawng lam lu na matu shakut ai sha n-ga, shanhte hpe pyi nawku ma ai. Raitim, anhte hkaja wa sai hte maren, si mat ai ni gaw anhte hpe n karum ya lu ai zawn, shoihpa mung n jaw lu ai. Shanhte gaw gara kaw mung asak n hkrung sai. Gaja wa nga yang, shanhte hte matut mahkai na matu shakut ai gaw, shoihpa pyi byin chye ai. Hpa majaw nga yang, si mat ai jinghku ni kaw nna sa ai shiga ni ngu ai gaw, gaja nga yang nat ni kaw nna sa ai re. Dai majaw, Yehowa gaw Israela ni hpe si mat ai (tsu) ni hte ga n shaga na matu, nat hte seng ai lam ni n galaw na matu matsun da ai.—Tara Jahprang 18:10-12; Jahtum Matsing 25 hte 30 hpe yu u.

5. Karai Kasang hpe nawku na matu sumla jailang ai hte jiwoi jiwa ni hpe nawku ai lam ni koi lu na matu, nang hpe hpa gaw karum ya lu ai kun?

⁵ Karai Kasang hpe nawku na matu sumla jailang ai hte jiwoi jiwa ni hpe nawku ai lam ni koi lu na matu, nang hpe hpa gaw karum ya lu ai kun? Dai lam ni hpe Yehowa gara hku mu mada ai lam Chyum Laika hti nna atsawm sha sumru yu ra ai. Yehowa gaw dai lam ni hpe “matsat” shabat hku nna mu mada ai. (Tara Jahprang 27:15) Yehowa hpe shi ra sharawng ai lam hku nawku na matu hte shi mu mada ai hku anhte mu mada chye na matu, shani shagu akyu hpyi ra ai. (Esaia 55:9) Shut ai nawku htung hte matut manoi nga ai lam yawng hpe yeng seng kau lu na matu, nang ra nga ai n-gun atsam hpe Yehowa jaw na ra ai.

6. Yesu a shangai poi hpe, December 25 hta galaw na matu hpa majaw lata wa ai kun?

⁶ Mungkan ting hta Hkrismat gaw gumhkawng ai poi langai rai nna, masha law malawng gaw Yesu a shangai poi ngu shamying la ma ai. Raitim, Hkrismat gaw shut ai nawku htung hte matut manoi nga ai. Moi prat na Roma  ni gaw, December 25 hta jan nat a shangai poi hpe galaw ma ai ngu, hparat chyum (encyclopedia) langai hta tsun da ai. Tsa ban 4 daram hta, Hkristan ningbaw ni gaw, jan nat nawku ai ni hpe Hkristan byin shangun mayu ai majaw, December 25 hta Yesu n shangai tim, dai nhtoi hta Yesu a shangai poi galaw na matu dawdan da ma ai. (Luka 2:8-12) Tsaban langai na Yesu a sape ni gaw Hkrismat poi n galaw ai. Yesu shangai nna shaning 200 na ai hpang pyi, “shi shangai wa ai nhtoi hpe kadai mung n chye ai zawn myit lawm ai masha mung n nga ai daram re” nga nna laika buk langai hta ka da ai. (Sacred Origins of Profound Things) Yesu shangai ngut nna shaning 300 jan daram na ai hpang she, Hkrismat poi galaw hpang wa ai.

7. Jet ai Hkristan ni gaw hpa majaw Hkrismat n galaw ai kun?

⁷ Hkrismat hta kumhpa jaw ai, poi galaw ai htung ni gaw Roma ni a nat naw ai htung kaw nna yu hkrat wa ai hpe masha law law chye ma ai. Ga shadawn, England hte America mung daw nkau hta Hkrismat gaw nat naw ai ni kaw nna yu hkrat wa ai majaw, n galaw na matu pat shingdang ai aten ni pyi nga wa ai. Dai aten hta poi galaw ai ni hpe dam jaw ai baw pyi galaw ma ai. Raitim, aten ni na wa ai hte maren Hkrismat poi bai galaw wa ma ai. Jet ai Hkristan ni gaw hpa majaw Hkrismat n galaw ai kun? Shanhte galaw ai lam shagu hta Karai Kasang hpe myit shadik ya mayu ai majaw re.

8, 9. Shawng nnan na Hkristan ni gaw shangai poi hpe hpa majaw n galaw ai kun?

⁸ Gumhkawng ai kaga poi langai gaw shangai poi re ai. Hkristan ni shangai poi galaw ging ai kun? Chyum Laika hta, Yehowa hpe n nawku ai ni a shangai poi galaw ai lam sha tsun da ai. (Ningpawt 40:20; Marku 6:21) Shangai poi gaw shut ai hpara ni hpe shakawn shagrau ai poi re. Dai majaw, shawng nnan na Hkristan ni gaw, “shangai poi galaw  ai gaw shut ai ngu hkam la ma ai.”—The World Book Encyclopedia.

⁹ Moi na Roma hte Greek ni gaw, marai langai shangai ai shaloi nat langai du wa nna, dai masha asak hkrung ai laman shi hpe makawp maga ya ai ngu kam sham ma ai. Dai prat na gawkngu sumla nawku ai ni shangai poi galaw ai gaw, shanhte a nat hpara ni gaw shangai poi madu hpe makawp maga ya ai ngu, kam sham ai majaw re.

10. Hkristan ni hpa majaw shangai poi n galaw ging ai kun?

¹⁰ Shut ai nawku htung hte matut manoi nga ai poi ni hpe, Yehowa hkap la ai ngu nang shadu ai kun? (Esaia 65:11, 12) N hkap la ai. Dai majaw, shut ai nawku htung hte matut manoi nga ai shangai poi zawn re ai gara poi hpe mung anhte n galaw ai re.

11. Shut ai poi ni hpe masha nkau mi hpa majaw galaw ai kun? Na a matu ahkyak htum gaw hpa rai ging ai kun?

¹¹ Hkrismat hte kaga poi ni gaw shut ai nawku htung kaw nna sa ai hpe masha nkau mi chye tim, matut nna galaw ma ai. Dai poi ni gaw, shanhte a nta masha ni hte rau pyaw na matu htap htuk ai aten re ngu hkamsha ma ai. Nang gara hku hkamsha ai kun? Na nta masha ni hte rau pyaw mayu ai gaw n shut ai. Yehowa gaw dinghku hpe nnan de ya ai majaw, nta masha shada da ngwi pyaw let kanawn mazum shangun mayu ai. (Ehpesu 3:14, 15) Yehowa ra sharawng ai hku nta masha shada da kanawn mazum mai ai. Shut shai ai poi ni galaw nna jinghku ni hte pyaw ai hta, Yehowa hte kaja ai hku hkau lam nga na matu gaw grau ahkyak ai. Dai majaw, “Madu a sharawng awng ai lam hpa rai nga ai gaw, dinglik yu nga” mu nga nna kasa Pawlu tsun wa ai.—Ehpesu 5:9.

12. Gara poi ni hpe Yehowa n hkap la ai kun?

¹² Masha law law gaw, shanhte galaw nga ai poi ni gaw gara kaw nna yu hkrat wa ai hpe ahkyak n shatai ma ai.  Raitim, Yehowa gaw dai hku n re. Shut shai ai nawku htung kaw nna yu hkrat wa ai poi (sh) masha hte mungdan masat dingsat hpe shagrau ai poi ni hpe shi n hkap la ai. Ga shadawn, Egutu masha ni hta shanhte a hpara shaje ni a matu poi law law nga ai. Israela masha ni Egutu mung kaw nna pru wa ai hpang, Egutu ni a shut shai ai poi langai hpe hkan galaw nna “Yehowa a matu poi” nga nna tsun ma ai. Raitim, shanhte dai hku galaw ai hpe Yehowa ari jaw wa ai. (Pru Mat 32:2-10) Anhte mung “n san seng ai hpe hkum hkra myit” ngu ai myihtoi Esaia a ga hpe hkan sa ra ai.—Esaia 52:11 hpe hti u.

13. Shut shai ai poi ni n galaw na matu dawdan ai shaloi nang hta hpa ga san ni nga chye ai kun?

¹³ Shut shai ai poi ni n galaw na matu dawdan ai shaloi, nang hta ga san law law nga na re. Ga shadawn, bungli manang ni gaw shanhte hte rau Hkrismat poi hpa majaw n galaw ai hpe san wa yang, ngai gara hku tsun na kun? Marai langai ngai Hkrismat kumhpa jaw wa yang, ngai gara hku di na kun? Nye a ningrum ningtau gaw, ngai hpe shut shai ai poi hta shang lawm shangun mayu yang hpa galaw na kun? Nye a ma ni shut shai ai poi (sh) shanhte a shangai poi n galaw ya ai majaw, myit kaji yang gara hku karum ya na kun?

14, 15. Marai langai Merry Hkrismat ngu shakram yang (sh) kumhpa jaw yang nang hpa galaw na kun?

¹⁴ Dai zawn re ai masa ni hta nang dawdan ra ai shaloi, hpaji rawng ai hku tsun shaga chye na matu grai ahkyak ai. Ga shadawn, Merry Hkrismat ngu shakram yang, n gawn n sawn n di ai sha “chyeju kaba sai” ngu bai tsun mai ai. Ndai zawn poi hpa majaw n galaw ai hpe, marai langai ngai chye mayu yang, nang tsun dan mayu na re. Raitim sumnung ai, hkungga ai hte hpaji rawng let tsun dan ra ai.  Chyum Laika hta, “langai hte langai hpe kaning rai htan lu na chye lu u ga, nanhte a ga hta galoi mung chyeju lawm nga nna, jum hte a shum nga u ga” nga nna tsun da ai. (Kolose 4:6) Dai majaw, anhte a manang ni hte shada da kumhpa jaw, kanawn mazum ai zawn aten ni nga ai raitim, shut shai ai poi ni hte matut manoi nna gaw n galaw ai hpe atsawm tsun dan mai ai.

¹⁵ Marai langai nang hpe kumhpa jaw yang nang hpa galaw na kun? Chyum Laika hta dai hte seng nna tara ni hpe tup hkrak n ka da ai. Raitim, kaja n kaja ginhka chye ai myit hpe matut shaman da ra ai ngu nna gaw tsun da ai. (Hebre 5:14) Nang dai zawn poi n galaw ai hpe n chye ai marai langai gaw nang hpe kumhpa jaw yang jaw na. Shing n rai shi gaw “nang ndai poi n galaw ai hpe chye ai, raitim nang hpe kumhpa jaw mayu ai” ngu tsun yang tsun na. Dai zawn masa ni hta kumhpa la na, n la na hpe gaw nang dawdan ra ai. Hpa hpe dawdan ai raitim, kaja n kaja ginhka chye ai myit hte dawdan ra ai. Dai hku n dawdan ai rai yang, Yehowa hte anhte a hku hkau lam hten za mat chye ai.

16. Na a nta masha ni shut shai ai poi galaw mayu yang nang hpa galaw na kun?

¹⁶ Na a nta masha ni gaw, shut shai ai poi galaw mayu yang, nang hpa galaw na kun? Nang shanhte hte ndang hkat ai baw hkum galaw. Shanhte hta tinang hkrai dawdan lu ai ahkang nga ai hpe dum ra ai. Tinang dawdan ai hpe hkungga shangun mayu ai zawn, shanhte lata ai lam hpe mung chye na ya ra ai. (Mahte 7:12 hpe hti u.) Raitim, nta masha ni gaw nang hte rau poi galaw mayu yang, nang hpa galaw na kun? Nang n dawdan shi yang, jaw ai hku dawdan lu na matu Yehowa hpang akyu hpyi ra ai. Dai poi hte seng nna atsawm sumru let, sawk sagawn ai ni mung galaw ra ai. Galoi shagu Yehowa hpe myit pyaw hkra nang galaw mayu ai hpe dum u.

17. Kaga masha ni poi galaw ai hpe ma ni mu ai shaloi, shanhte myit n kaji hkra nang hpa galaw ya na kun?

 ¹⁷ Kaga masha ni poi galaw ai hpe ma ni mu ai shaloi, shanhte myit n kaji hkra nang hpa galaw ya na kun? Kalang lang shanhte a matu laksan poi ni galaw ya mai ai. Shanhte pyaw na matu kumhpa mai jaw ai. Ma ni hpe aten jaw nna tsawra myit madun ai gaw kaja htum kumhpa re ai.

18. Nawku zuphpawng ni hpe hpa majaw lung ra ai kun?

¹⁸ Yehowa ra sharawng ai hpe lu na matu, shut ai nawku htung lailen hte dai hte matut manoi nga ai poi ni hpe tawn kau da ra ai. Teng man ai nawku htung hte seng ai lam ni hpe galaw ra ai. Gara hku galaw na kun? Langai gaw, nawku zuphpawng ni hpe galoi mung lung ra ai. (Hebre 10:24, 25 hpe hti u.) Teng man ai nawku daw jau lam hta, zuphpawng ni gaw grai ahkyak ai. (Shakawn 22:22; 122:1) Anhte shada da hkrum ai shaloi n-gun jaw mai ai.—Roma 1:12.

19. Nang chye wa ai Chyum Laika a teng man ai lam ni hpe bai tsun dan na matu hpa majaw ahkyak ai kun?

¹⁹ Teng man ai nawku daw jau lam hte seng nna nang galaw ra na lam langai gaw, Chyum Laika kaw nna nang sharin la ai ni hpe, kaga masha ni hpe bai tsun dan ai lam re. Masha law law gaw mungkan a n hkru ai lam ni a majaw, myitru myit tsang nga ma ai. (Ezekela 9:4) Dai zawn hkamsha nga ai marai langai ngai hpe nang hkrum ga na re. Htawm hpang hte seng ai myit mada lam hpe tsun dan u. Nang zuphpawng ni lung nna, Chyum Laika a teng man ai lam kaga ni hpe tsun dan yang, shut ai nawku htung a lailen ni hta lawm mayu ai myit, angwi ngwi mat mat na re. Teng man ai nawku lam hpe lata yang, grai ngwi pyaw nna Yehowa Karai Kasang kaw nna shaman chyeju law law lu la na re.—Malahki 3:10.