1, 2. Ikuvaikidile ulyudye dashi, na mwaa shani ni shambone kulyudya davo?

KUPITILA mapundisho la mu Ibibiliya, wako undimanya kenga vanu voe vaona kenga vankulipudya kwake Nnungu, kanji kwaumwiu vapundisha vinu vyakalota Nnungu. (2 Vakolintu 6:17) Ndyomana, Yeova ankutwaulila pakulota tume idini yakushang’apa, “Babiloni Nkumene.” (Maono 18:2, 4) Kushi wako ulota kutenda nyamani? Mwaa Kula munu ankuvanavo wamushi wake jo mwene na ivedoni inimmaikila alyudye doni: ‘Ngulipudye kwake Nnungu kulingana na malotelo ake, au nguke mushu ngulipudya kulingana na madyavalelo angu?’

² Ikava kenga wako undileka vitendo vya idini yakushang’apa ni shinu shambone. Kanji inkuululika kupagwa vinu vinji vya idini yakushang’apa vyaudyavaladile vyaukaulula kuleka. Napanelo, tuke tulole madyavalelo anji hakalota Yeova na tumanye mwaa shani wetu momo indituvaikila twite.

3. (a) Mwaa shani vanu vanji vakwona kukamadyanga kuleka kutumila mashinamu? (b) Ibibiliya ivalanga nyamani kwaupande wakutumila mashinamu?

³ Myaka vipitile kunyuma, vanu voe vashinatumila mashinamu muding’ande mwavo pakulota valipudidye kwake Nnungu. Ikava kenga unkuvanavo madyavalelo alo, unkuulula kwona kenga ni shinu shakukamadyanga kulipudya kwake Nnungu bila lishinamu. Ikava davo, kumbukila kenga Yeova ankutupundisha mwashi mwakulipudidya kwake. Ibibiliya inkutwaulila kenga Yeova hanalota shinu  kutumila mashinamu muwakati watulipudya kwake.—Shomya Kuma 20:4, 5; Dimu 115:4-8; Ishaiya 42:8; 1 Nshuwau 5:21.

4. (a) Mwaa shani hainatuvaikila shinu kulipudya kwa vanu vapadile? (b) Mwaa shani Yeova andívaleya vanaishilaeli kutangola na vanu vapadile?

⁴ Vanu vanji vanatumila dimongo dyavo na njuluku pakulota kuvapa lishangelo avalá vapadile. Vanavo vanalipudya kwa vanu vakupela. Kanji, tundilipundisha kenga vapadile havaulula kutupwashela au kutuvyanga. Na havanauka shinu ndanama kushinu kunji. Kwaumwiu, shinkuva shinu shakujowa kutangola na vanu vapadile kwa dindila dyoedyoe, mwaa unkuulula kwona kenga utangola navanavo, kanji utangola na vandamoni. Ndyomana Yeova andívaulila vanaishilaeli kenga hamunatangole na vanu vapadile au kulyunganianga mu dindila dyoedyoe dyashaviavi na vanavo.—Kumbukumbu 18:10-12; lola imbande Igwa Shana 26 na 31.

5. Shilota kukupwashela nyamani wako kuleka kutumila mashinamu pakulipudya au kutangola na vanu vapadile?

⁵ Nyamani shilota kukupwashela wako kuleka kutumila mashinamu pakulipudya au kutangola na vanu vapadile? Shitandi, indikuvaikila ushomye Ibibiliya na ukumbukilange shana mwashi mwaonela Yeova kwa ing’ano ayo. Nae ‘hananagwaledya shinu’ vinu avyo. (Kumbukumbu 27:15) Shambili, shwali unjugwa Yeova kula liduva pakulota akupwashele kwona vinu avyo kenga mwaonela nae na pakulota ulipudye kwake kulingana na malotelo ake. (Ishaiya 55:9) Kulupila kenga Yeova anakupa dimongo pakulota ulule kuleka shinu shoeshoe shalakadile ku idini yakushang’apa.

6. Mwaa shani linditandalegwa liduva lya 25 mwedi Wakumi na mbili kutenda shikukulu shakuvalekwa kwake Yesu?

⁶ Klishimashi ni shikukulu shimanyikene namene mushilambo, na vanu voe vamini kenga ni liduva lyavalakwidye  Yesu. Kanji Klishimashi inkwalakela kukulipudya kwakushang’apa. Libuku limo linkuvalanga kenga muwiko watalee 25 mwedi Wakumi na mbili ukawika, valoma vakavele vaklistu vashinatenda shikukulu shakuvalekwa kwa liduva. Vananangalaledi vamaganisha vashilota vapagani voe valinjidyange nkati muuklistu, ndyomana vandyúka namuwa kutenda shikukulu shakuvalekwa kwake Yesu mu liduva lya 25 mwedi wakumi na mbili, kanji Yesu havalakwadidye liduva alyo. (Lukashi 2:8-12)Kanji vakwoda vake Yesu havashitenda Klishimashi. Libuku limo linkuvalanga kenga myaka 200 baada yakuvalekwa Yesu, “hapali hamanyíte na vanu padyoko ni vashilambela kumanya shana liduva lyavalakwidye.” (Origens Sagradas de Coisas Profundas) Kwaumwiu, shikukulu sha Klishimashi shitunduvenge myaka 300 baada yakunama Yesu mushilambo shapai.

7. Mwaa shani Vaklistu vaiu havanatenda shikukulu sha Klishimashi?

⁷ Vanu voe vankumanya kenga Klishimashi pamo na madyavalelo lakujaulanila dishawadi alakadile kwavapagani. Kwampano, mu myaka vyakunyuma, mushilambo sha ku Inglaterra na disemu dinji dya ku América, shikukulu sha Klishimashi vandíleya kwamwaa wakuva shashipagani. Na munu ashitenda shikukulu asho ashinaukumwigwa. Kanji badae, vanu vandyújila kavili kutenda Klishimashi. Mwaa shani vaklistu vaiu havanatenda shikukulu sha Klishimashi? Mwaa vanavo valota vannagwaledye Nnungu kwamatendo lavo uti.

8, 9. Mwaa shani Vaklistu vatandi havashitenda shikukulu shakuvalekwa kwa munu?

⁸ Vanu vanji vanatenda shikukulu shaliduva lyakuvalekwa. Da Vaklistu indivavaikila vatende shikukulu shaliduva lyakuvalekwa kwa munu? Shikukulu shakukumbukilanga liduva lyakuvalekwa shavamba mu Ibibiliya shishitandeka na vanu vákashilipudya kwake Yeova. (Kutunduvanga 40: 20; Malukushi 6:21) Ivedoni, kukumbukiligwa kwaliduva lakuvalekwa kwa munu shívele shikukulu shakulota kuvaishimu avalá vannungu vakushang’apa. Ndyomana Vaklistu vatandi “vandímanya kenga kutenda shikukulu shaliduva lyakuvalekwa ni madyavalelo alakadile mushipagani.”—The World Book Encyclopedia (Enciclopédia Delta Universal).

⁹ Valoma na Vagalegu vakala vashamini kenga munu pavalekwa ishinamwidila imumu ya kulota kunshunga shingumi shake. Libuku limo linkushidoni: “Imumu ayo ishinaigwania kwadindila dyashaviavi na nnungu aijá avalakwadidye muliduva lyakuvalekwa kwa munu ajo.”—The Lore of Birthdays.

10. Mwaa shani Vaklistu vaiu havanatenda shikukulu shakuvalekwa kwa munu?

¹⁰ Wako ukumbukila kenga Yeova ankulota vikukulu vipagwa nkati mu didini dyakushang’apa? (Ishaiya 65:11, 12) Mene, nae hanalota shinu. Ndyomana Vaklistu vaiu havanatenda shikukulu shaliduva lyakuvalekwa kwa munu au vikukulu vinji vyalakela mu didini dyakushang’apa.

11. (a) Mwaa shani vanu vanji vankuka mushu vatenda vikukulu vyákalota Yeova? (b) Kushi wako ikuvaikidile utende nyamani?

¹¹ Vanu vanji vankumanya kenga klishimashi na vikukulu vinji vyalakadile kushipagani, kanji vankuka mushu vatenda. Mwaa vanavo vakumbukila kenga shikukulu ni liduva lyambone lya kupagwa pamo na likola. Kushi wako ukumbukila yadavo? Hashinava shinu shakunyata kupagwa pamo na likola. Yeova ni atadidye lipagwe likola, ndyomana nae alota livenavo lipuwilo. (Vaepeshu 3:14, 15) Kanji wako, indikuvaikila wigwilile malamulo ake Yeova kuliko kunagwaledya likola kwamwaa wavikukulu vyalakela mu didini dyakushang’apa. Ndyomana myombe Paulu  andítangola doni: ‘Mwenu likanyalidye kutenda ashilá shinnagwela Umu.’—Vaepeshu 5:10.

12. Vikukulu shani vyakalota Yeova?

¹² Vanu voe vakumbukila kenga haivaikidile vamanye kwashi kwavyalakela vikukulu, kanji Yeova hanakumbukila shinu davo. Nnungu hanalota shinu vikukulu vyalakela mu didini dyakushang’apa na maduva makumene lavapangile vanu pakulota vatumbyange shilambo au vantumbyanga munu. Kwampano, vanu vaku Egito vashinatenda vikukulu valipudya kwa vannungu vao vakushang’apa. Nayadavo, vanaishilaeli baada yakwambolegwa ku Egito, vanavo vandíjedya shikukulu shimo sha vanu vaku Egito na vatangola kenga asho ni “shikukulu shake Yeova.” Kanji kwamwaa wakutenda davo, Yeova andívapa shaushanga. (Kuma 32:2-10) Ndyomana myombe Paulu andítangola doni: “Hamunakamule shinu shishapu.”—Shomya 2 Vakolintu 6:17.

13. Vyakudya shani vyaulota kulyudya wako baada yakuleka kutenda vikukulu vyakalota Yeova?

¹³ Baada yakuleka kutenda vikukulu vyakalota Yeova, unkuulula kulyudya doni: Ngulota kuvajang’ula dashi vavangu vakumadengo vakangudya mwaa shani hangunatenda shinu shikukulu sha Klishimashi pamo na vanavo? Inguvaikidile ngutende nyamani ikava kenga munu aningupa shawadi yaklishimashi? Inguvaikidile ngutende nyamani ikava kenga ndyangu au ntwangu akangujugwa tutende shikukulu sha maduva makumene a idini yakushang’apa au sha mushilambo? Ngulota kuvapwashela dashi vanavangu pakulota havanave na shipalodi kwamwaa wakuleka kutenda shikukulu sha liduva lyakuvalekwa au vikukulu vinji?

14, 15. Ikuvaikidile utende nyamani ikava kenga munu andikwaulila doni: “Shikululu shambone” au akakupa shawadi ya Klishimashi?

¹⁴ Kuvanavo mang’amung’amu ni shinu shambone mwaa kunakupwashela wako kumanya mwashi mwakujang’ulila na mwakutandela shikakukodya shinu shoeshoe.  Kwampano, ikava kenga munu andikwaulila doni: shikukulu shambone, haunanjang’ule kunyata. Unkuulula kumwaulila, “Nindilambwalela au asante.” Kanji, ikava kenga munu alota amanye mwaa shani wako haunatenda shinu shikukulu shakalota Yeova, unkuulula kumwigwiniya. Nayadavo, indikuvaikila ngwengwe utangole kwa wambone na ishima. Ibibiliya inkushidoni: “Malove enu ngwengwe ave aumonyo mútakidile munyu wakumanyila mwashi mwakunjang’ulila kula munu.” (Vakoloshu 4:6) Wako unkuulula kuvaulila kenga inangunagwela kupagwa pamo na vambodi na kumya au kupwashalela shawadi liduva lyoe lyoe, i mumaduva lashikukulu.

¹⁵ Ikuvaikidile utende nyamani ikava kenga munu andikupa shawadi au inudyo yaklishimashi? Vipali vinu vinji Ibibiliya hainavalanga shinu shalowa mwakutandela, kanji inkutwaulila tuvenavo makumbukililo ambone amuntima. (1 Timoti 1:18, 19) Inkuululika munu kukupa shawadi bila kumanya kenga wako haunangaikangila shinu shikukulu asho. Au ankuulula kutangola kushidoni: “Ninkumanya kenga wako haunatenda shikukulu ashi, kanji iningunagwela nikupe shawadi ai.” Kulingana na maoni ako unkuulula kwamuwa kupwashalela au kwita. Kanji shikumene ni kuvanavo makumbukililo ambone a muntima. Haituvaikidile tutende shinu shoeshoe shilota kutimbanga umbodi wetu namu Yeova.

16. Ikuvaikidile utende nyamani ikava kenga valikola lyako valota mupishe pamo shikukulu shakalota Yeova?

¹⁶ Ikuvaikidile utende nyamani ikava kenga valikola lyako valota mupishe pamo shikukulu shakalota Yeova? Haunapwatane na vanavo. Mwaa vanavo vankuvanavo aki ya kwamuwa kutenda shavalota. Wako, Indikuvaikila wishimu wamushi wave kwa wambone kenga momo mwaushilatela wako vavao vakutandele. (Shomya Mateu 7:12.) Kushi  ikava kenga vanavo valota mupishe pamo liduva alyo? Hukanava kutenda shinu shoeshoe, shitandi njugwe Yeova pakulota akupwashele kumya wamushi wambone. Kumbukila shana ing’ano ayo na lambela kumanya shana. Shikumene ni kumya wamushi ulota kumupa Yeova lipuwilo.

17. Ikuvaikidile utende nyamani pakulota vanavako havanalyone kenga vankukatoka kutenda shikukulu?

¹⁷ Ikuvaikidile utende nyamani pakulota vanavako havanalyone kenga vankukatoka kutenda shikukulu? Lambela wakati wakuvatandela vanavako shinu shoeshoe shilota kuvapa lipuwilo. Nayadavo, unkuulula kuvapa shawadi muliduva lyoelyoe líkavele lya shikukulu. Kanji, manya kenga shawadi yambone ivaikidile kuvapa vanavako ni kupagwa navanavo wakati woe na kuvannagwaledya.

18. Mwaa shani ni shinu shikumene kuka ku mikutano vya Shiklistu?

¹⁸ Pakulota tumupe Yeova lipuwilo, ituvaikidile tuleke idini yakushang’apa, diyadi na vikukulu vyake. Nayadavo, kulipudya kwetu kuvaikidile kuve kwiu. Kwa dindila shani? Indila itandi ni kuka ku mikutano vya Shiklistu bila kuleka. (Shomya Vabalaniya 10:24, 25.) Mwaa mikutano ni indila ikumene ya kulipudidya kwake Yeova. (Dimu 22:22; 122:1) Na patukadyania po, tunaing’ana ntima shii.—Valoma 1:12.

19. Mwaa shani ni shambone kuka ku mikutano na kuvaulila vanu umwiu wa ulipundishidye mu Ibibiliya?

¹⁹ Indila ya mbili, ni kuvaulila vanu vanji vinu vyaulipundishidye mu Ibibiliya. Vanu voe vankuvanavo shipalodi kwamwaa wa kwinjipa kwa mauvilo mushilambo. Na inkuululika kupagwa vanu vauvamanyite wako, vavenavo mauvilo alo. Nadoni, vaulile vanu avo vinu vyalota kutenda Yeova muwakati wamushu. Kuka kumikutano na kuvaulila vanu umwiu wa ulipundishidye mu Ibibiliya, kunakupwashela wako kuleka kutenda vinu vyalakela mu idini yakushang’apa. Kulupila kenga ukalipudya kwaindila iu, Yeova andakwalaliya na undapata lipuwilo.—Malakiya 3:10.