1, 2. Epulo lilipi tu na okulipula, nomolwashike sha fimana?

ESHI wa kala to konakona Ombiibeli, owe lihonga kutya ovanhu vahapu ovo hava ti kutya otava longele Kalunga, ohava hongo ile va longe oinima oyo Kalunga e tonde. (2 Ovakorinto 6:17) Nomolwaasho Jehova te tu lombwele tu dje mo momalongelokalunga oipupulu, ‘Babilon shinene.’ (Ehololo 18:2, 4) Mbela ove oto ka ninga po shike? Keshe umwe oku na okuninga etokolo notu na okulipula kutya, ‘Mbela onda hala ngoo okulongela Kalunga monghedi oyo a hala ndi mu longele, ile ohandi mu longele ashike monghedi oyo nda ika?’

² Ngeenge owa fiya po nale elongelokalunga loipupulu, owa ninga nawa. Ashike momutima woye otashi dulika natango u kale wa hokwa eenghedindjikilile domalongelokalunga oipupulu. Natu ka kundafane dimwe domeenghedindjikilile odo nokutala kutya omolwashike sha fimanenena tu di tale ko monghedi oyo Jehova he di tale ko.

3. (a) Omolwashike vamwe tashi dulika va mone shidjuu okweefa po okulongifa oihongwafano eshi tava longele Kalunga? (b) Ombiibeli oya ti shike kombinga yokulongifa oihongwafano mokulongela Kalunga?

³ Ovanhu vamwe ove na oihongwafano momaumbo avo oyo va kala nokulongifa oule womido dihapu eshi tava longele Kalunga. Ngeenge naave oho longifa oihongwafano, otashi dulika u mone shidjuu okulongela Kalunga nopehe na okulongifa oihongwafano. Ashike dimbuluka kutya Jehova okwe tu honga nghee tu na oku mu longela. Ombiibeli oye tu lombwela kutya Jehova ina hala tu longife  oihongwafano eshi hatu mu longele. — Lesha Exodus 20:4, 5; Epsalme 115:4-8; Jesaja 42:8; 1 Johannes 5:21.

4. (a) Omolwashike tuhe na okupopya noonakufya? (b) Omolwashike Jehova a li a lombwela oshiwana shaye shiha kendabale okupopya noonakufya?

⁴ Ovanhu vamwe otashi dulika va longife efimbo lavo lihapu nosho yo eenghono davo opo vati va hafife oonakufya vavo. Otashi dulika nokuli ve va ilikane, ashike otwe lihonga kutya ovo va fya itava dulu oku tu kwafela ile oku tu ehameka. Kave na omwenyo pamwe pe lili. Osha nyika oshiponga okukendabala okupopya navo molwaashi etumwalaka olo la fa tali di koonakufya paulelalela ohali di keendemoni. Nomolwaasho Jehova a li a lombwela Ovaisrael vaha kendabale okupopya noonakufya ile okukufa ombinga moinima i na ekwatafano neendemoni. — Deuteronomion 18:10-12; tala omafatululo oitya pexulilo lembo, oshitwa 26 nosho yo 31.

5. Oshike tashi dulu oku ku kwafela u efe po okulongifa oihongwafano eshi to longele Kalunga nosho yo okwiilikana oonakufya?

⁵ Oshike tashi ke ku kwafela u efe po okulongifa oihongwafano eshi to longele Kalunga ile okwiilikana oonakufya? Owa pumbwa okulesha Ombiibeli nokudiladila noukeka nghee Jehova ha tale ko oinima oyo. Ohe i tale ko i li “oixuna” ile oitondifa. (Deuteronomion 27:15) Ilikana kuJehova efiku keshe e ku kwafele opo u tale ko oinima ngaashi ye he i tale ko noku mu longela monghedi oyo a hokwa. (Jesaja 55:9) Oto dulu okukala noushili kutya Jehova ote ku pe eenghono odo wa pumbwa opo u efe po oinima aishe oyo i na ekwatafano nomalongelokalunga oipupulu.

6. Omolwashike omafiku 25 aDesemba a hoololwa omo mu kale hamu danwa edalo laJesus?

⁶ Okrismesa oi li shimwe shomoivilo oyo hai danwa apeshe mounyuni, novanhu vahapu ohava diladila kutya otava dana edalo laJesus. Ashike Okrismesa oi na ekwatafano  nomalongelokalunga oipupulu. Embo limwe lomauyelele ola yelifa kutya ovapaani vomuRoma ova li hava dana edalo letango mo 25 Desemba. Ovawiliki vongeleka ova li va hala ovapaani vahapu va ninge Ovakriste, onghee hano, nonande Jesus ina dalwa mo 25 Desemba, ova li va tokola okudana edalo laye mefiku olo. (Lukas 2:8-12) Ovahongwa vaJesus kava li hava dana Okrismesa. Embo limwe lomauyelele ola yelifa kutya omido 200 konima eshi Jesus a dalwa, “kape na oo a li e shii kutya okwa dalwa naini, novanhu ashike vanini va li have lipula kutya okwa dalwa naanaa naini.” Edano lOkrismesa ola tameka omido omafele konima eshi Jesus a shuna meulu.

7. Omolwashike Ovakriste vashili ihava dana Okrismesa?

⁷ Ovanhu vahapu ove shi shii kutya Okrismesa nosho yo eenghedindjikilile dayo oda totwa po kovanhu ovo ihava longele Kalunga, ngaashi okuninga oivilo nokulipa omaano. Pashihopaenenwa, muEngland nosho yo moitukulwa imwe yaAmerika ovanhu ova li va kelelwa vaha dane Okrismesa molwaashi oya dja meenghedindjikilile doshipaani. Keshe oo a li he i dana okwa li ha pewa ehandukilo. Ashike mokweendela ko kwefimbo, ovanhu ova ka tameka vali okudana Okrismesa. Omolwashike Ovakriste vashili ihava dana Okrismesa? Omolwaashi ova hala okuhafifa Kalunga mukeshe shimwe osho tava ningi.

8, 9. Omolwashike Ovakriste vonale va li ihava dana omadalo?

⁸ Ovanhu vahapu mounyuni ohava dana omafiku omadalo avo. Mbela Ovakriste ove na okudana omafiku omadalo? Omadano omadalo oo a popiwa mOmbiibeli okwa li a danwa kovanhu ovo ihava longele Jehova. (Genesis 40:20; Markus 6:21) Ovanhu ova li hava dana omadalo opo va fimaneke oikalunga. Nomolwaasho Ovakriste vonale “va li va tala ko okudana edalo laumwe kutya oku li onghedindjikilile yoshipaani.” — The World Book Encyclopedia.

 ⁹ Ovaroma nOvagreka vonale ova li va itavela kutya pedalo lomunhu keshe ohapa kala oshishitwa shopamhepo osho tashi ke mu amena mokukalamwenyo kwaye. Embo li na sha nomafiku omadalo ola ti: “Oshishitwa osho shopamhepo oshi na ekwatafano noshikalunga shefiku olo omunhu oo a dalwa.” — The Lore of Birthdays.

10. Omolwashike Ovakriste kunena ihava dana omadalo?

¹⁰ Mbela oto diladila kutya Jehova okwa hokwa omadano oo e na ekwatafano nomalongelokalunga oipupulu? (Jesaja 65:11, 12) Ahowe, ine a hokwa. Nomolwaasho ihatu dana omafiku omadalo ile omadano amwe vali e na ekwatafano nomalongelokalunga oipupulu.

11. Omolwashike ovanhu vamwe hava dana oivilo yomafudo? Oshike shi na okukala sha fimanenena kwoove?

¹¹ Ovanhu vamwe ove shii kutya Okrismesa nosho yo oivilo imwe vali oya totwa po kovanhu ovo ihava longele Kalunga, ashike otava twikile oku i dana. Ove udite kutya oivilo oyo oi li omhito iwa yokukala pamwe nomaukwaneumbo avo. Mbela naave osho u udite ngaho? Inashi puka okukala wa hala u kale efimbo lonhumba pamwe novapambele voye. Jehova oye a tota po oukwaneumbo, nokwa hala tu kale tu na ekwatafano liwa noilyo youkwaneumbo wetu. (Ovaefeso 3:14, 15) Ashike otwa pumbwa okuyandja elitulemo kokukala tu na ekwatafano liwa naJehova shi dulife okuhafifa ovapambele vetu mokudana oivilo yomalongelokalunga oipupulu. Nomolwaasho omuyapostoli Paulus a ti: “Shipaashipeni eshi tashi wapalele Omwene.” — Ovaefeso 5:10.

12. Oshike tashi dulu okuningifa oshivilo shefiku lefudo shiha tambulwe ko kuJehova?

¹² Ovanhu vahapu ove udite kutya kashi na oshilonga kutya oshivilo osho tava dana osha dja peni, ashike Jehova  hasho e shi tala ko ngaho. Jehova ina hokwa omadano oivilo yomalongelokalunga oipupulu ile okutumbaleka ovanhu nokufimaneka omadidiliko oiwana. Pashihopaenenwa, Ovaegipti ova li hava dana oivilo ihapu omolwoikalunga yavo. Eshi Ovaisrael va dja muEgipti, ova li va dana shimwe shomoivilo yoshipaani tava ti ‘oshivilo shefimano lOmwene.’ Ashike Jehova okwa li e va handukila eshi va ninga ngaho. (Exodus 32:2-10) Inatu “kuma oshipo” ngaashi omuprofeti Jesaja a ti. — Lesha Jesaja 52:11.

13. Omapulo elipi tashi dulika u lipule ngeenge owa efa po okudana oivilo yomafudo?

¹³ Ngeenge owa efa po okudana oivilo yomafudo, otashi dulika u kale u na omapulo mahapu. Pashihopaenenwa, otashi dulika u lipule kutya: Ondi na okunyamukula ngahelipi ngeenge ovanailonga vakwetu ova pula nge kutya omolwashike ihandi dana vali Okrismesa? Ondi na okuninga po shike ngeenge onda pewa omaano Okrismesa? Ondi na okuninga po shike ngeenge kaume kange kopahombo okwa teelela ndi dane oshivilo shefiku lonhumba lefudo? Ongahelipi handi dulu okukwafela ovana vange vaha kale va nyemata molwaashi ihava dana oivilo yonhumba ile omadalo avo?

14, 15. Oto dulu okuninga po shike ngeenge omunhu wonhumba ote ku popifa monghedi oyo ovanhu hava longifa pomafiku oivilo yonhumba ile te ku pe omaano?

¹⁴ Osha fimana okulongifa eendunge dokuyoolola opo tu shiive osho tu na okupopya nokuninga monghalo keshe. Pashihopaenenwa, ngeenge omunhu ote ku popifa monghedi yonhumba oyo ovanhu hava longifa pefimbo loshivilo shonhumba, ino pumbwa okukala wa mwena. Oto dulu oku mu itavela, ndele ngeenge umwe okwa hala okuuda kutya omolwashike iho dana oshivilo osho, oto dulu oku mu yelifila. Ashike kala alushe u na olukeno, elungi nefimaneko.  Ombiibeli oya ti: “Eendjovo deni nadi kale alushe donghenda, da fingala omongwa, nye mu kale mu shi shii nhumbi mu nokunyamukula keshe umwe.” (Ovakolossi 4:6) Otashi dulika u va yelifile kutya oho hafele okukala pamwe novanhu vakweni nokuyandja omaano, ndele iho shi ningi pefimbo loivilo yomafudo.

¹⁵ Oto ka ninga po shike ngeenge owa pewa omaano e na sha noshivilo shefiku lefudo lonhumba? MOmbiibeli kamu na omusholondodo weemhango di na sha naasho, ashike oya ti kutya otu na okukala tu na eliudo liwa. (1 Timoteus 1:18, 19) Otashi dulika omunhu oo te ku pe omaano ke shii kutya iho dana oshivilo osho. Ile otashi dulika a tye, “Ondi shii kutya iho dana oshivilo eshi, ashike onda hala oku ku pa omaano aa.” Pomhito keshe, oto dulu okutokola kutya oto tambula ko omaano oo ile oto a anye . Ndele shilipaleka alushe kutya etokolo olo to ningi otali ku fiye u na eliudo liwa. Inatu hala okuninga sha osho tashi nyono po ekwatafano letu naJehova.

16. Oto ka ninga po shike ngeenge oukwaneumbo weni owa hala okudana oshivilo shefiku lonhumba lefudo?

¹⁶ Oto ka ninga po shike ngeenge oukwaneumbo weni owa hala okudana oshivilo shefiku lonhumba lefudo? Ino pumbwa oku va kelela. Dimbuluka kutya ove na oufemba wokuninga osho va hala. Kala u na olukeno nokufimaneka ehoololo lavo, ngaashi ashike naave wa hala va fimaneke ehoololo loye. (Lesha Mateus 7:12.) Ndele ongahelipi ngeenge oukwaneumbo weni owa hala mu hafele pamwe oshivilo shefiku lonhumba lefudo? Mbela oto ka ninga po shike? Fimbo ino ninga etokolo, oshiwa okwiilikana kuJehova e ku kwafele u ninge etokolo la yuka. Diladila konghalo oyo nokukonga omauyelele a wedwa po kombinga yaasho. Dimbuluka kutya owa hala alushe okuhafifa Jehova.

17. Oshike to dulu okuninga opo u kwafele ovana voye vaha kale ve udite va pitililwa po eshi ve wete ovanhu vamwe tava dana oshivilo shefiku lonhumba lefudo?

 ¹⁷ Oshike to dulu okuninga opo u kwafele ovana voye vaha kale ve udite va pitililwa po eshi ve wete ovanhu vamwe tava dana oshivilo shefiku lonhumba lefudo? Oto dulu okukala ho va ningile oinima iwa omafimbo nomafimbo. Oto dulu yo okukala ho va pe omaano, nomaano a denga mbada oo to dulu oku pa ovana voye oo okukala pamwe navo nokuulika kutya ou va hole.

18. Omolwashike tu na okukala hatu kala pokwoongala kwopaKriste?

¹⁸ Opo tu hafife Jehova, otu na okudja mo momalongelokalunga oipupulu nokweefa po eenghedindjikilile nosho yo oivilo oyo ya kwatelwa mo. Ndele otu na yo okuhoolola elongelokalunga lashili. Ngahelipi mbela? Onghedi imwe omo hatu dulu oku shi ninga omokukala hatu ongala nopehe na okufaula. (Lesha Ovaheberi 10:24, 25.) Okwoongala oku li oshitukulwa sha fimanenena shelongelokalunga lashili. (Epsalme 22:23; 122:1) Ohatu twaafana omukumo ngeenge twa ongala pamwe. — Ovaroma 1:12.

19. Omolwashike sha fimana okulombwela ovanhu vakweni kombinga yoshili yOmbiibeli oyo we lihonga?

¹⁹ Onghedi imwe vali omo hatu dulu okuulika kutya otwa hoolola elongelokalunga lashili omokulombwela vamwe kombinga yaasho twe lihonga mOmbiibeli. Ovanhu vahapu ova wililwa po koinima ii oyo tai ningwa kombada yedu. (Hesekiel 9:4) Otashi dulika u shii vamwe ovo ve li monghalo ya tya ngaho. Va lombwela kombinga yeteelelo olo u na li na sha nonakwiiwa. Eshi to twikile okukala ho ongala nokulombwela ovanhu vakweni kombinga yoshili yOmbiibeli, ito ka kala vali u na ohokwe momalongelokalunga oipupulu neenghedindjikilile dao. Oto ka kala wa hafa, na Jehova ota ka nangeka noupuna eenghendabala doye eshi to hoolola oku mu longela monghedi ya yuka. — Malakia 3:10.