1, 2. Хайдағ сурығ посха турғызарға кирек паза ноға?

СІРЕР, Библияны ӱгреніп, Худайға киртінчем тіпчеткен кӧп кізілернің киртіністерін паза киректерін Худай хырт кӧрчеткенін піліп алғазар (2 Коринфтегілерге 6:17). Иегова піске чой религиядаң, «Илбек Вавилоннаң», сығыбызарға чоохтапча (Азых чоох 17:5; 18:2, 4). Сірер хайди поларзар? Полған на кізее позына мындағ сурығ турғызарға кирек: «Мин Худайға хайди пазырарға хынчам: ол киректепчеткен оңдайнаң алай позым кӧнік парған оңдайнаң?»

² Чой религиядаң сығыбысхан ползар, чахсы. Че чой религиянаң палғалыстығ хайдағ-да кибірлерге чӱрееңер ам даа тартылча, арса? Тарап парған нинҷе-де кибір кӧр кӧреелер паза оларға Худай чіли кӧргені ноға аарлығ полчатханын ӱзӱрібізеелер.

3. а) Ноға піреезіне Худайға обырастар чох пазырарға изі чох пілдірче? б) Оларнаң тузаланып, Худайға пазырарынаңар Библияда ниме пазылча?

³ Пірее кізілер кӧп чыллар Худайға обырастарнаң паза кізі иткен пасха даа нимелернең пастыра пазырчалар. Сірер дее іди пазырарға кӧнік парғазар, арса. Худайға ол нимелер чох пазырарға сірерге пасхаҷыл алай саба даа пілдірер. Че ундутпаңар, хайди ағаа орта пазырарға кирек полчатханын Иегова ла пілче. Иегова обырастарнаң паза пасха даа нимелернең пастыра  ағаа пазырарға піске чаратпинча. Аннаңар Библияда кӧні чоохталча. (Исход 20:4, 5 хығырыбызыңар; Псалом 115:4—8; Исаия 42:8; 1 Иоанның 5:21.)

4. а) Ноға ӱреен ӧбекелерге пазырарға чарабас? б) Ноға Иегова Израиль чонына ӱреен кізілернең чоохтазарға чаратпаан?

⁴ Пірее кізілер, ӱреен туғаннары тарынмазыннар тіп, кӧп тус паза кӱс хоратчалар. Піреелері оларға пазырчалар. Че хайди піліп алғабыс, ӱреен кізілер полыс таа полбинчалар, хомай даа ит полбинчалар. Олар хайдағ-да пасха чирде чуртабинчалар. Ӱреен кізінің орнына сынында айналар чоохтасчалар, аннаңар оларнаң палғалызарға кӱстенгені уғаа хорғыстығ. Аның ӱчӱн Иегова Израиль чонына ӱреен кізілернең палғалыспасха чахаан. Олар айналарнаң палғалыстығ нимелердең хыйа тудынарға кирек полғаннар (Второзаконие 18:10—12; 26 паза 31 приложениелерні кӧріңер).

5. Худайға пазырыста кізі иткен нимелернең тузаланмасха паза ӱреен ӧбекелерге пазырбасха ниме полызар?

⁵ Ниме піліп алдыбыс? Худайға пазырыста кізі иткен нимелернең тузаланғаны паза ӱреен ӧбекелерге пазырғаны саба. Че іди пазырбасха ниме полызар? Библияны хығырыңар паза хайди Иегова андағ пазырысха кӧрчеткенінеңер сағыныңар. Худай ол киректерні чиркестіг нимее санапча (Второзаконие 27:15). Пазырысха, ол кӧрчеткен чіли, кӧрерге полыссын тіп, Иеговадаң кӱннің сай сурыныңар. Аның кӧңніне кірчеткен оңдайнаң ағаа нымысчыланарға полыс пирзін тіп, пазырыңар (Исаия 55:9). Ікінҷілебеңер, Иегова сірерге чой пазырыснаң палғалыстығ нимелердең позып аларға кӱс пирер.

6. Ноға Иисус Христостың тӧреен кӱнін 25 декабрьда ӱлӱкӱннеп сыхханнар?

⁶ Чир-чалбахтағы иң тарап парған ӱлӱкӱннернің  пірсі — Кӧледе. Ол кӱнде Иисус Христостың тӧреен кӱнін таныхтапчалар. Кӧледе чой религиянаң палғалыстығ. Сірер анзын пілгезер бе? Пір энциклопедияда Рим империязында чуртаан язычниктер 25 декабрьда кӱннің тӧреен кӱнін таныхтааннар тіп чоохталча. Абыстар язычниктерні христианствозар тартып алар ӱчӱн, ол кӱнні Иисус Христостың тӧреен кӱні тіп адап алғаннар. Че сынында Иисус ол кӱнде тӧрібеен * (Лука 2:8—12). Иисустың пастағы ӱгренҷілері Кӧледені ӱлӱкӱннебеҷеңнер. Пір киндеде Христос тӧреен соонда пастағы ікі чӱс чыллар аразында «аның тӧреен кӱнін чон пілбеен, хаҷан ол тӧрееніне кізілернің киректері дее халбаҷаң» тіп чоохталча (Sacred Origins of Profound Things). Кӧледені Иисус ӱреен соонда нинҷе-де чӱс чыл пазынаң на ӱлӱкӱннеп сыхханнар.

7. Ноға сын христианнар Кӧледені ӱлӱкӱннебинчелер?

⁷ Кӧледенің кибірлері, кӧзідімге, сыйыхтар сыйлааны алай кӱлеттер, язычестводаң килгенін кӧп кізі пілче *. Аннаңар хаҷан-да Англияда паза Американың пірее чардыхтарында Кӧледені ӱлӱкӱннирге чарадылбаҷаң. Аны ӱлӱкӱннеен кізілерні ахчадаң хатығлаҷаңнар. Че соонаң кізілер хатап ол ӱлӱкӱнні таныхтап сыхханнар. Сын христианнар Худайның чооғын истерге хынчалар, аннаңар олар Кӧледені ӱлӱкӱннебинчелер.

8, 9. Ноға пастағы христианнар тӧреен кӱнні таныхтабаҷаңнар?

⁸ Тӧреен кӱнні прай даа кізілер таныхтирға хынчалар.  Христианнарға ол кӱнні таныхтирға чарир ба? Библияда тӧреен кӱннерін таныхтаан ікі кізідеңер чоохталча. Че олар Худайның нымысчылары полбааннар (Бытие 40:20; Марк 6:21). Андағ ӱлӱкӱннерде кізілер чой худайларны сабландырҷаңнар. Аннаңар пір энциклопедияда пастағы христианнар «тӧреен кӱнні таныхтаанын языческай кибір тіп санаҷаңнар» тіп чоохталча (The World Book Encyclopedia).

⁹ Пурунғы римдегілер паза гректер полған на кізі хайдағ-да худайның тӧреен кӱнінде тӧріпче тіп санаҷаңнар. Ол худай аны чуртазы тооза арачылазын тіп, ол кізінің тӧреен кӱнін таныхтирға кирек тіп киртінҷеңнер (The Lore of Birthdays).

10. Ноға христианнарға тӧреен кӱнні таныхтирға чарабас?

¹⁰ Чой религиянаң палғалыстығ ӱлӱкӱннер Иегованың кӧңніне кірче бе? (Исаия 65:11, 12). Чох, кірбинче. Аннаңар піс тӧреен кӱнні дее, чой религиянаң палғалыстығ пасха даа ӱлӱкӱннерні таныхтабинчабыс.

11. Ноға кізілер ӱлӱкӱннерні таныхтирға хынчалар? Піске ниме иң аарлығ поларға кирек?

¹¹ Піреелері Кӧледенің паза пасха даа ӱлӱкӱннернің чой религиядаң сыхханнарын пілчелер, че андағ даа полза, оларны ӱлӱкӱннепчелер. Олар ӱлӱкӱннер сӧбіренең чыылызып аларға чахсы оңдай пирчелер тіп санапчалар. Сірер хайди сағынчазар? Ікінҷілес чоғыл, сӧбіренең тус иртірерге уғаа кирек. Иегова, сӧбіренің чайаачызы, сӧбіредегілер ынағ ползыннар тіп хынча (Ефестегілерге 3:14, 15, НТ). Туғаннарыбыснаң хада чой религиянаң палғалыстығ ӱлӱкӱнні таныхтазабыс, олар ӧрінерлер. Че піске Иегованаң нанҷыласханы хай-хай  аарлығ. Павел илҷі теен: «Худайның нимее чӧпсінчеткенін піліп аларға кӱстеніңер» (Ефестегілерге 5:10).

12. Хайдағ ӱлӱкӱннерні Иегова чаратпинча?

¹² Кӧп кізі ӱлӱкӱннер хайдаң сыхханын пілерге кирек тее чоғыл тіп санапча. Че Иегова іди санабинча. Ол чой пазырыснаң палғалыстығ алай кізіні саблапчатхан, ідӧк патриотическай ӱлӱкӱннерні чаратпинча. Мына кӧзідім. Египет чонының чой худайларына чарыдылған ӱлӱкӱннер кӧп полған. Израиль чоны, Египеттең сыхханда, пір андағ ӱлӱкӱнні ӱлӱкӱннеп сыххан. Олар ол ӱлӱкӱнні «Иеговаа чарыдылған ӱлӱкӱн» тіп адазалар даа, аның ӱчӱн Иегова оларны хатығлаан (Исход 32:2—10). Библия пісті сизіндірче: «Кірліг нимее теңмеңер» (2 Коринфтегілерге 6:17 хығырыбызыңар.)

13. Ӱлӱкӱннерні таныхтабасха пӧгін алзар, сірернің хайдағ сурығлар сығарға айабас?

¹³ Сірер ӱлӱкӱннерні таныхтабасха пӧгін алған ползар даа, сағыссырапчазар, арса: «Хада тоғынчатханнар пу ӱлӱкӱнні ноға піснең хада ӱлӱкӱннебинчезің тіп сурзалар, ниме нандырарға? Ӱлӱкӱнде сыйыхтар сыйлазалар, аларға ба? Ирім алай ипчім хада ӱлӱкӱннирге сурынчатса, хайди поларға? Тӧреен кӱннерін алай пасха ӱлӱкӱнні тутпинчатхан ӱчӱн палалар хомзынмазыннар тіп, ниме идерге?»

14, 15. Сірерні ӱлӱкӱннең алғыстапчатсалар алай сыйых сыйлапчатсалар, хайди поларға?

¹⁴ Полған на киректе ниме тирін, хайди тудынарын чахсы сағынып ал турарға кирек. Кӧзідімге, кем-де сірерні ӱлӱкӱннең алғыстапчатса, ол кізее «алғыс» тіп нандырарға чарир. Че кем-де ноға сірер ол ӱлӱкӱнні таныхтабинчатханнаңар піліп аларға хынчатса, ағаа киртінізіңердеңер кӧп арах чоохтап пирерге чарир. Чоохтапчатсаң,  хаҷан даа иптіг, кізіні улуғлап паза хомзындырбин чоохтан. Библияда чӧп пирілче: «Сурған кізее хайди нандырарын піліңер: сӧстерің паарсастығ паза ӧтіг ползын» (Колосстағыларға 4:6). Кӧзідімге, нанҷыларнаң тус иртірерге паза сыйыхтар сыйлирға хынчам, че анзын пу ӱлӱкӱннең палғалыстыра идерге хынминчам тирге чарир.

¹⁵ Сірерге сыйых сыйлапчатсалар чи? Библияда аннаңар кӧні чоохталбинча, че совесть арығ халарға кирек тіп чоохталча (1 Тимофейге 1:18, 19). Сірерге сыйых сыйлапчатхан кізі сірернің ол ӱлӱкӱнні таныхтабинчатханыңарны пілбинче дее полар. Алай пілче, че: «Пу ӱлӱкӱнні таныхтабинчатсаң даа, мин сағаа пу сыйыхты пирерге хынчам», — тир, арса. Хайди даа полза, сыйых аларға алай албасха позыңар пӧгерге кирексер. Хайдағ даа пӧгін алзар, совесть арығ халарға кирек. Иегованаң ынархазыбысты сайбапчатхан киректерні идерге хынминчабыс.

16. Сӧбіреңер хайдағ-да ӱлӱкӱн таныхтирға итчетсе, хайди поларға?

¹⁶ Сӧбіреңер хайдағ-да ӱлӱкӱн таныхтирға итчетсе, хайди поларға? Ундутпаңар, полған на кізі ниме идерінеңер позы пӧгін аларға кирек. Аның ӱчӱн таласпаңар. Паарсах полыңар, оларның пӧгіннерін улуғлаңар, сірернің дее пӧгіннеріңні олар улуғлазыннар тіп хынчазар нооза. (Матфей 7:12 хығырыбызыңар.) Сӧбіредегілер сірерні оларнаң хада ӱлӱкӱннирге хығырчатсалар чи? Иң пурун Иеговаа пазырып алыңар. Орта пӧгін аларға полыссын тіп сурыныңар. Ол ӱлӱкӱннеңер паза хайди аны ӱлӱкӱннирінеңер кӧп арах піліп аларға кӱстеніңер. Пӧгін алчатсар, ундутпаңар, Иегованы хомзындырбасха кирек.

17. Пірее ӱлӱкӱнні тутпинчатхан ӱчӱн палалар хомзынмазыннар тіп, ниме идерге чарир?

 ¹⁷ Ӱлӱкӱнні кӧбізі чіли тутпинчатхан ӱчӱн палалар хомзынмазыннар тіп, ниме идерге чарир? Палаларға, нанҷыларынаң хада тус хынығ иртірзіннер тіп, чыылызып аларға оңдай пир турыңар. Палалар сағыбаан туста оларға сыйыхтар сыйлирға чарир. Иң аарлығ сыйыхтарның пірсі — сірернің тузыңар паза хынызыңар.

18. Христианнарның чыылығларына ноға чӧрерге кирек?

¹⁸ Иегованы ӧріндірер ӱчӱн, чой религиядаң сығарға кирек, аннаң палғалыстығ кибірлерні тудынмасха паза ӱлӱкӱннерні таныхтабасха кирек. Че анзы асхынах, Худайға орта пазырып пастирға кирек. Хайди? Кӧзідімге, христианнарның чыылығларына сыбыра чӧрерге. (Еврейлерге 10:24, 25 хығырыбызыңар.) Ӧме чыылығлары пазырыстың уғаа аарлығ чардығы (Псалом 22:22; 122:1). Паза андағ чыылығларда удур-тӧдір кӧңнілерібісті кӧдірізерге оңдай пар (Римдегілерге 1:12).

19. Библиядаң піліп алған нимелернең ноға пасхаларынаң ӱлезерге кирек?

¹⁹ Ідӧк Библиядаң піліп алған нимелерні пасхаларына чоохтирға кирек. Чир-чалбахта полчатхан чабал киректернің ӱчӱн кӧп кізі тың сағыссырапча. Сірернің таныстарыңның аразында іди сағыссырапчатхан кізілер парох полар. Алнындағы чахсы чуртастаңар оларға чоохтап пиріңер. Христианнарның чыылығларына чӧрзер паза Библиядаң алған пілістернең пасхаларынаң ӱлессер, пола-пола чой религияа чағын поларға пір дее хынминчатханнарыңны сизін саларзар. Ікінҷілебеңер, Иеговаа орта пазырзар, кӧп ӧрініс паза алғастар аларзар! (Малахия 3:10).