1, 2. I dijooj kaay diwudy mwa kwiiyihanguj? Ni bwabiny i bya buseeb?

KULONG kwiibuh kwa Bibl i kukwambulwiish. Udy mulong neey baat bavul baleeleeb neey bahahambidil Mawej. Ki mu biin-biin, baloolongweesh eecy baloolong myand yidy Mawej mukin. (2 Biin Korent 6:17) Ki bwabiny Yehow wiituloolomb bwa tuhatuk mu citendelel cya makos, “Babiloon mutam.” (Myand Yisokolweel Jah 18:2, 4) Wiiyiiy kulong biny? Bikaam woos waakutudy asungul. Twiiyihanguj neey: “Nakakaam kuhambidil Mawej mu mushind udyey mukat eecy bidy teng munadyakal namuhambidil koos ook eeny?”

² Uw mwiikal muman kuhatuk mu citendelel cya makos, i bilengel. Ki kucidy misang yikwaabw myand ni bilel bya mu citendelel cya makos yiwucidy teng mukat. Tukononoonaay myand kahand eeny bilel bya mu citendelel cya makos. Wiiyiiy kumvw bwabiny i bya buseeb bwa kwiibital mudy Mawej wiibital.

3. a) Bwabiny baat bakwaabw bataatal neey i bikasakan bwa kulek kukal mudimw ni bifwaatul bwa kuhambidil Mawej? b) Bibl uleeleeb biny habitaatal kukal mudimw ni bifwaatul mu kuhambidil?

³ Kukady mivw yivul yidy baat bakwaabw bakal mudimw ni: bifwaatul ni kish bwa kuhambidil Mawej. Bwaal oobw i bukutalok byeeb eeny? Iikaleeby naak, utaatal misang yikwaabw neey i bwaal bweeny, eecy i bwaal bubiih bwa kuhambidil Mawej kakuy biit eeby. Ki vuluk neey: i Yehow wiituloolongweesh mushind a kumuhambidil. Bibl i mutookesh myand: Yehow kiish mukat tukal mudimw ni bifwaatul bwa  kumuhambidil.​—Bal Cimwang 20:4, 5; Misambw 115:4-8; Yeshaay 42:8; 1 Jah 5:21.

4. a) Bwabiny katwiin mwa kuhambidil bakish? b) Bwabiny Yehow waakady mukandik biin mudimw bindiy bwa kulek kuteet kwiisamb ni bafw?

⁴ Baat bavul bangangat diib divul, makand mababw ni fwalang bwa kusangeej bakish bababw. Misang yikwaabw bibahahambidil. Ki tudy balong neey bafw kabiin mwa kwiitukwanjok ning kwiitulongel bibiih. Kabiin ni buumy cyaab kahand. I bya buuhund bwa kuteet kwiisamb naabw bwaal diiy dihahatuk dimweek bu neey i dya mufw, dyaalalukil biin-biin kudy bademoh. Ki bwabingany Yehow wambidil biin Izaleel bwa kulek kuteet kwiisamb ni bafw. Kabaakadyoh bend mwa kulong ciit ciikal cihetangan ni myand ya miidim.​—May Mumbulul 18:10-12; bal Mamanyish ma ku bulekel 26 ni 31.

5. Uw mwiikal ukal mudimw ni bifwaatul bwa kuhambidil Mawej, eecy uhambidil bakish, i biny bidy mwa kukukwanjok bwa kulek kwiibihambidil?

⁵ Uw mwiikal ukal mudimw ni bifwaatul bwa kuhambidil Mawej, eecy uhambidil bakish, i biny bidy mwa kukukwanjok bwa kulek kulong naak? Bikaam ulong Bibl ni ulang bikasakan cidy Mawej ulang: i “mulek mulekelomw” eeny mwiibikin. (May Mumbulul 27:15) Diifuk dyoos, sambil Mawej bwa akukwanjok bwa kutal biit bu yiy ni bwa kumuhambidil mu mushind udyey mukat. (Yeshaay 55:9) Udy mwa kwiikal mutwiishibw neey Mawej wiiyiiy kukwaakish diikand dya kulek ciit cyoos cidy mu dyumvwangan ni citendelel cya makos.

6. Bwabiny bafumw ba citendelel baswiikil diiy bwa kulong musangal a Nowel mu dya 25 suuny a 12?

⁶ Ha bulab butuutul, Nowel i musangal udy baat bavul balong. Baat bavul balalang neey: Nowel i musangal a kuledibw kwa Yeez. Ki naabw, Nowel umvumvwangan ni citendelel cya makos. Mukand kahand umvumvwiij neey: biin Rom  baakady bampangan (baat baakady bahambidil baamawej bavul) baakady balong musangal a kuledibw kwa diib, mu diifuk dya 25, suuny a 12. Bafumw ba citendelel baakacil neey bampangan bavul bikal biin krist. Baswiikil diiy bwa kusangal kwa kuledibw kwa Yeez mu diifuk dya 25, suuny a 12, ning yiy mwiikal kay muleloh diifuk aady. (Luuk 2:8-12) Biiyij ba Yeez kaabakady balong musangal a Nowel. Mukand mukwaabw uleeleeb neey: mukacy mwa mivw 200 kuunyim kwa kuledibw kwa Yeez, “muut ning waakaabumw kaakady mumanyik menmen diifuk dyaakadyobw bamulel, ni baat bavul kabaakadyoh bend bakaam kumanyik bwaal oobw.” (Sacred Origins of Profound Things) Nook, baat bavul i batang kulong musangal a Nowel mukacy mwa mivw nkam ni nkam kuunyim kwa kuledibw kwa Yeez.

7. Bwabiny biin Krist ba biin-biin kabiin basangeel Nowel?

⁷ Baat bavul i bamanyik neey Nowel ni bilel bidyakalobw balong diin diifuk aady, byaalalukil kudy bampangan, bu mudy: kushintakany kwa biit bya bukish ni byakudy bya musangal. Ciisang kahand, mu cibunj cya Angleterre ni mu bituh bikwaabw bya Amerik, baakady balekesh baat bwa kulong musangal a Nowel bwaal baakady bamanyik kwaakady musangal oow mwaalukil. Boos baakady bakufwaabeel baakady bibanyook. Ki kuunyim kwa mafuk maman kuhit, bahingulwiil cikwaabw bwa kulong musangal a Nowel. Bwabiny biin Krist ba biin-biin kabiin basangeel Nowel? Bwaal i bakat kusangeej Mawej.

8, 9. Bwabiny biin krist ba kuuhal kabaakady basangeel diifuk dilelelobw muut?

⁸ Baat bavul basasangeel diifuk dyaakadyobw bibalel. Biin Krist ba biin-biin baloolong byaabw musangal oow eeny? I bateel mu Bibl baat baakady balong musangal a diifuk dyaakadyobw bibalel. Musangal oow waakady mulong kudy baat baakady kabay bahambidil Yehow. (Kutang kwa Bwanjil 40: 20; Mark 6:21) Bwa bampangan, kusangeel diifuk dilelelobw muut kwaakady bwa kwaakish baamawej baababw lutumb. Ki bwabingany, bwa biin Krist ba kuuhal, “musangal a diifuk dilelelobw muut, cyaakady cilel cya bampangan.”​—The World Book Encyclopedia.

⁹ Biin Rom ni biin Krek baakady bitab neey kuledibw kwa muut woos kwaakady kwiiy mu diifuk dya musangal a kuledibw kwa mawej kahand. Baakady balang neey spirit waakady uhetangan ni mawej kahand waakadyok diib dyaakadyobw baleel muut. Ki bwa spirit oow kulamey muut oow, waakady ni bwa kusangeel diifuk dimulelelobw.

10. Bwabingany biin krist ba biin-biin kabiish basangeel diifuk dilelelobw muut?

¹⁰ Mu kutal kwiibuh, Yehow wiitaatabok musangal uhehetangan ni citendelel cya makos eeny? (Yeshaay 65:11, 12) Waakweeh. Ki bwabingany biin krist ba biin-biin kabiish basangeel diifuk dilelelobw muut ning musangal mukwaabw wa bicy uhehetagan ni citendelel cya makos.

11. a) Bwabiny baat bakwaabw baloolong mishind ya musangal yaalalukil kudy bampangan? b) I biny bidy mwa kwiikal ni buseeb kuwudy?

¹¹ Baat bavul i bamanyik neey Nowel ni mishind yikwaabw ya musangal yidy baat balong, i bilel byaalalukil kudy bampangan. Ki i batungunuk teng ni kwiibilong. Baleeleeb neey, mishind ya musangal yidyobw balong eey, i mushind a kuhitish kaheeh ni biin cisak cya babw. Ki uw naabw, ulaalang bicy? Kabiish bibiih bwa kuhitish kaheeh ni biin mu cisak ciibuh. I Yehow uhangil cisak ni i yiy udy mukat bwa tushikat bilengel ni biin mu cisak ciitut. (Efez 3:14, 15) Ki kabiin bikaam kwiibasangeej mu kulong musangal a citendelel cya makos. Cya buseeb menmen, i kwiikal ni bulund bulengel ni Yehow. Cikwaabw, mupostol Pool uleebel neey: ‘Iikashishayomw bwa kujingunun myand yidy Mawej mukat.’​—Efez 5:10.

12. Bwabiny Yehow kiin wiitaboh bend mishind yikwaabw ya kusangal?

 ¹² Baat bavul balaalang neey, byaab bidy musangal mwaalukil kabiish ni buseeb. Ki kaciish cidy Yehow ulang. Kiin wiitaboh mishind ya musangal yaalalukil ku citendelel cya makos eecy musangal wakakish baat eecy cibunj lutumb. Cileejel, biin Ejipit baakady balong mishind yivul ya musangal bwa baamawej bababw ba makos. Haakady biin Izaleel baman kuhatuk mu Ejipit, biidikijil musangal umw wa mu Ejipit ni bamubikeen neey: ‘Musangal mu diijin dya Mawej.’ Ki Yehow wiibanyookel. (Cimwang 32:2-10) Muprofet Yeshaay uleebel neey: kabiin bikaam “nuteng ku ciit cyoonyoonyangan hanyeet.”​—Bal Yeshaay 52:11.

13. Diifuk diwiiyiiy kwangat dihangadik bwa kulek kulong mishind ya musangal ya bampangan, i majooj kaay mawiikal misang yikwaabw kwiiyihanguj?

¹³ Diifuk diwiiyiiy kwangat dihangadik bwa kulek kulong mishind ya musangal ya bampangan, wiiyiiy kwiiyihanguj misang yikwaabw majooj mavul. Cileejel: “Hikal balund nany ba mudimw baajooj bwabiny ciin nasangeel Nowel haakaabumw naabw, nady bwa kulong biny? Hikal muut uyakish ciit cya bukish bwa musangal a Nowel, cinady mwa kulong i cingany? Cinady mwa kulong i cingany hikal mwiin maluw nany mukat bwa nalong musangal a bampangan? Mushind kaay unady mwa kwambulwiish baan bamim bwa kabikal babungam bwa kulong musangal a bampangan eecy musangal a diifuk dyaakadyobw bibalel?”

14, 15. Babw bakujingil neey: fet mulengel eecy babw bakwaakiish ciit cya bukish, udy mwa kulong biny?

¹⁴ Hawaangangat dihangadik bwa ciwiikal mwa kuleeb eecy kulong, long ni meej malengel. Cileejel, hikal muut ukulangil neey fet mulengel, kulong bu neey: kwiish mumanyikoh bend. Udy mwa kwaalaabul bituh neey: “Waafwaak.” Ki misang yikwaabw, baat bakwaabw i bakat kumanyik  bivul. Udy mwa kwiibumvwiij bwabiny kwiin ulong musangal aaw. Iibaleej teng lukat ni iibakish kaneemw, kwiibambiloh bend may mady mwaakwiibatah. Bibl uleeleeb neey: “May miinun miikal teng malengel, ma musangal kudy biinumvumvw. Numanyik mwa kwaalabul muut ni muut bilengel.” (Kolos 4:6) Cileejel: udy mwa kumvwiij neey nady mukat kuhitish kaheeh ni bakwaabw ni kwiibakish bya bukish, ki kaay wiibilong mu biisang bya musangal.

¹⁵ I biny biwudy mwa kulong babw bakwaakish cya bukish mu ciisang cya musangal a bampangan? Bibl kiin wiitwaakish mulong-long a mikenj ya kulond mu bwaal boos, ki wiitwambambl bwa kulam mucim a mund mutook. (1 Timoteh 1:18, 19) Muut ukwaakwaakish cya bukish kiish mumanyik misang iikwaabw neey kudyaakal usangal bwa fet oow. Eecy udy mwa kukuleej neey: “Nady mumanyik neey kudyakulongoh bend musangal oow, ki nady mukat kukwaakishok cya bukish eecy.” Mu mushind mukwaabw, udy mwa kwiitab cya bukish eecy eeny kwiicilek. Ki ning mwiikal dihangadik diibuh, lam mucim a mund mutook. Katwiin bakat kulong ciit ning cyumw cidy mwa kunyang bulund bwiitut ni Yehow.

16. I biny biwudy mwa kulong hikal biin mu cisak ciinun bakat kulong musangal a bampangan?

¹⁶ I biny biwudy mwa kulong hikal biin mu cisak ciinun bakat kulong musangal a bampangan? Kanusomakan naab bwaal. Bady ni cya bwa kulong cidyobw bakat. Iibalongel myand ni lukat ni leej kaneemw mu bidyobw baleeb, bumuwudy mukat bwa bakulongel byeeb. (Bal Matewus 7:12.) Ki kabaak, udy mwa kulong bingany iikal biin mu cisak ciinun bakat bwa uhicish naabw diib mu ciisang cya musangal oow? Kuuhal a hal, lomb Yehow bwa akukwanjok bwa kwangat dihangadik dilengel. Cikwaabw, langil ha bwaal aabw ni kaam malabul. Vuluk neey: ciwudy mukat, i kusangeej Yehow.

17. I mushind kaay uwudy mwa kukwanjok baan bibuh hadyobw batal bakwaabw balong musangal a bampangan?

 ¹⁷ I mushind kaay uwudy mwa kukwanjok baan bibuh hadyobw batal bakwaabw balong musangal a bampangan? Udy mwa kwiikal wiibalongelok myand kahand ya musangal ku musang ni kumusang. Cikwaabw, udy mwa kwiibakish bya bukish. Cyumw cya ku bya bukish bihit kulengel ciwudy mwa kwiibalongel, i kuhicish naab diib ni kwiibaleej muwudy mwiibakat.

18. Bwabiny bikaam kutweel mu bisangil bya biin Krist?

¹⁸ Bwa kusangeej Yehow, bikaam tuhatuk mu citendelel cya makos ni tulek kulong musangal ni bilel bidyakalomw. Ki bikaam ushaal mu citendelel cya biin-biin. Mushind kaay? Cileejel, hawutweetweel misang yivul mu bisangil bya biin Krist. (Bal Ebreh 10:24, 25.) Bisangil eeby bidy ni buseeb buvul bwa kuhambidil kwa biin-biin. (Misambw 22:22; 122:1) Hatutweetweel mu bisangil bya biin Krist, i mushind utukakashishangan muut ni mukwaabw.​—Biin Rom 1:12.

19. Bwabiny i bya buseeb bwa kwambil baat bakwaabw myand yitudy balong mu Bibl?

¹⁹ Kwambil baat bakwaabw myand yitudy balong mu Bibl kuloolong byaak cituh cya kuhambidil kwa biin-biin. Baat bavul bady ni kakunying hadyobw batal myand yibiih yiloolongek ha bulab. Misang yikwaabw udy mwa kwiikal mumanyik baat bakwaabw bumvumvw nook. I bambil bwa kutakamin kwiibuh kulengel kweeh kuwudy naak. Hawutweetweel mu bisangil bya biin Krist ni hakwambil baat bakwaabw myand ya biin-biin yidy mu Bibl, kwiish mwa kuhetoh bend micim yakwiikal mu citendelel cya makos ning kulond bilel bidyomw. Iikal mujaadik neey uw mwangat dihangadik dya kuhambidil Yehow mu mushind mulengel, wiiyiiy ufiil kis kwiikashishomw kwiibuh kuwudy mulong ni wiiyiiy kwiikal ni musangal.​—Malakih 3:10.